Luka 19

Yàng Jesu mut tòm hìu Sace

1Yàng Jesu mut tòm Jerikô, mơ lòt gan. 2Ne, gơs dô nă cau sơnđan la Sace, la cau at bồ ală cau dar dia, mơ la cau pas sơm. 3Khai jòi gùng sền Yàng Jesu la ñcau, mơya ò rgơi gŏ tài bơh mpồl làng bol oă, mơ să khai la liah. 4Gen khai ntoat lài, hào hơđang chi sơr nàng sền Kơnràñ, bơh Kơnràñ rơp lòt gan tềng hơ̆. 5Tòm tŭ tus tềng hơ̆, Yàng Jesu tơnggòr mơ đơs lah: “Ơ Sace, mù tĕ mhar, bơh ngai do Añ pal ơm tòm hìu mê.” 6Khai mù sơrbac sơrbang mơ hòn chò wă rò Kơnràñ. 7Làng bol gŏ behơ̆ gen đơs òm lah: “Cau do neh mut tòm hìu cau glài mơ ơm.” 8Mơya Sace ntào đơs mơ Yàng lah: “Ơ Yàng, do, añ ai nggùl phan mơna añ jê mơ tòmpà cau rƀah lơòi in, mơ dilah añ neh sa kwì sa kwà phan cau lơi dê, gen añ rơp tòm wơl poan dơ̆ rlau.” 9Yàng Jesu đơs mơ khai lah: “Ngai do bơta dong klàs neh tus tòm hìu do, bơh cau do kung la kòn sau Abraham dê. 10Bơh Kòn Mơnus neh tus nàng jòi mơ dong klàs cau neh roh.”#Mat 18:11.

Pơnyơu bơh jơt pơnai priă

(Mathiơ 25:14-30)

11Tòm tŭ bol khai kơno ală jơnau hơ̆, gen Yàng Jesu đơs bơtơl dô jơnau pơnyơu tai, tài bơh Kơnràñ mòr tus rềp hơ Jerusalem, mơ bol khai tồnlah lơgar Yàng Tom Trồ rơp tơlik gơs mo. 12Gen Kơnràñ đơs lah: “Gơs dô nă cau ryŭ ryơm ne lòt tus hơ tiah ngài nàng dòp gơnoar at bồ lơgar, mơ rơp rê wơl. 13Lài mơ tŭ khai lik lòt. Chòp khai hòi jơt nă cau dĭ khai dê, jào bol khai in jơt pơnai priă mơ sồr lah: ‘Lòt kă bro tĕ, lơh gơlik cồng nha jơl tus di tŭ añ rê.’ 14Mơya làng bol khai dê gơjrañ kơuềng di khai, sồr cau kong sồr lòt jat mơ đơs lah: ‘Bol hi ò kòñ cau do at bồ bol hi.’

15Tòm tŭ khai neh dòp gơnoar at bồ lơgar mơ rê wơl, gen sồr hòi ală cau dĭ mơ khai neh jào priă lòt tus, nàng git kòp nă neh lơh gơlik cồng nha la nđò. 16Cau sơnròp lòt tus yal lah: ‘Ơ ồng, pơnai priă ồng dê añ neh lơh gơlik gơs jơt pơnai priă.’ 17Cau tòm đơs lah: ‘Ơ cau dĭ lơbơn niam ne, niam ngan, bơh mê neh dòn song tòm broă dềt rhền, gen mê gơs gơnoar at bồ hơđang jơt nơm ƀòn dờng.’ 18Cau dĭ dơ̆ bàr lòt tus yal lah: ‘Ơ ồng, pơnai priă ồng dê añ neh lơh gơlik gơs pram pơnai priă.’ 19Cau tòm đơs lah: ‘Mê kung gơs gơnoar at bồ pram nơm ƀòn dờng.’ 20Cau dĭ dơ̆ pe lòt tus mơ đơs lah: ‘Ơ ồng, do do, pơnai priă ồng do, añ neh klơm pồn tòm chèo, 21bơh añ rngòt di ồng, tài bơh ồng la cau kràñ cê, dòñ phan ồng ò prap, toès phan ồng ò sih.’ 22Cau tòm đơs lah: ‘Ơ cau dĭ iơh bơsak ne, añ jat jơnau mê đơs mơ lơh nền glài mê. Mê neh git añ la cau kràñ cê, dòñ phan ò prap, toès phan ò sih. 23Ñchi bơh tài mê ò ơn priă añ jê tòm hìu prap priă tồ tŭ añ rê wơl, gen rơp lùp wơl jền tòm mơ jền cồng taih?’ 24Gen cau tòm đơs mơ cau ơm rềp tềng hơ̆ lah: ‘Tă tĕ pơnai priă bơh di khai mơ ai cau gơs jơt pơnai priă in.’ 25Bol khai đơs lah: ‘Ơ ồng, khai neh gơs jơt pơnai priă rau.’ 26#Mat 13:12; Mak 4:25; Luk 8:18.‘Añ đơs mơ bol mê, cau lơi gơs, rơp ai bơtơl tai. Mơya cau lơi ò gơs, bulah phan khai neh gơs kung rơp tă tơlik tơn. 27Ai ală cau sò tơm di añ, la ală cau ò kòñ añ at bồ hơđang bol khai, hwài tĕ bol khai tus hơ do mơ tơnchơt di đap añ.’” 28Dơ̆ Kơnràñ neh đơs jơnau hơ̆ rau, gen lòt lài guh hơ Jerusalem.

Gơnoar broă Yàng Jesu tòm Jerusalem

(19:29 – 21:38)

Yàng Jesu mut tòm Jerusalem

(Mathiơ 21:1-11; Mak 11:1-11; Jang 12:12-19)

29Tòm tŭ mòr tus hơ Betphage mơ Bethani, di gah mơnơm sơnđan la Ôlibe, gen Yàng Jesu sồr bàr nă cau bơtê, 30mơ đơs lah: “Lòt tĕ mut tòm ƀòn tòm toh di đap bol mê. Dơ̆ neh tus rau, gen rơp gŏ dô nơm alàng kòn gam kơt diàng, òhềt gơs cau lơi hào; hồ tĕ gơ mơ tề tus hơ do. 31Dilah gơs cau lơi lùp: ‘Ñchi bơh tài bol mê hồ gơ taih?’ gen đơs tĕ be do: ‘Yàng kòñ ngui gơ.’” 32Gen cau kong sồr lik lòt, mơ tìp ală bơta tòm toh ngan be Kơnràñ neh đơs. 33Tòm tŭ bol khai ơm hồ alàng kòn, cau tòm gơ lùp lah: “Ñchi bơh tài bol mê hồ alàng kòn do taih?” 34Bol khai ho lah: “Yàng kòñ ngui gơ.”#19:31, 34 Yàng; Rct: Cau tòm gơ. 35Gen bol khai tề gơ Yàng Jesu in, dă ào bol khai hơđang alàng kòn, gen tơnhào Kơnràñ.

36Tòm tŭ Kơnràñ lòt, làng bol dă ào tòm gùng. 37Kơnràñ mòr tus rềp di ƀòn dờng Jerusalem tiah mù mơnơm Ôlibe rau, gen jơh mpồl cau bơtê hòn chò, driau dờng jòng ro Yàng Tom Trồ bơh ală broă gơnap gơnoar mơ bol khai neh gŏ, 38#Đơs Crih 118:26.mơ đơs lah:

“Lơngai Bơtau ai sơnđan Yàng mơ tus!

Ring lơngai hơđang trồ mơ gơklŏ Yàng Tom Trồ in!”

39Gơs dô êt nă cau Pharisi ơm tòm mpồl làng bol đơs mơ Kơnràñ lah: “Ơ Cau Bơto, dan lah pơrhơng tĕ ală cau bơtê ồng dê.” 40Kơnràñ ho lah: “Añ đơs mơ bol mê, dilah bol khai ơm mŏ mŏ, gen lŭ rơp driau dờng.”

41Tòm tŭ Kơnràñ tus rềp, gŏ ƀòn dờng Jerusalem gen ñìm bơh gơ, 42mơ đơs lah: “Kơp kòñ tòm ngai do mê rgơi git ală bơta lơh mê in ring lơngai. Mơya tŭ do mê ò rgơi sền gŏ gơ. 43Bơh ală ngai rơp gơlik tus mê in, la tŭ ală cau sò tơm lơh dơrñang gơrwàng gùt dar mê, mơ rềt kơ̆ mê bơh kòp đah. 44Bol khai rơp tơnlề mê mơ ală kòn sau ơm tòm mê, ò lòi wơl tòm mê pơnai lŭ lơi hơđang pơnai lŭ ndai, bơh mê ò git tơngai mê neh geh còp.”

Yàng Jesu lơh goh hìu duh khoai

(Mathiơ 21:12-17; Mak 11:15-19; Jang 2:13-22)

45Kơnràñ mut tòm hìu duh khoai, bơtrơh tơlik ală cau kă bro, 46#Esai 56:7; Jer 7:11.mơ đơs mơ bol khai lah: “Gơs jơnau cih lah: ‘Hìu Añ pal la hìu hòi dan,’ mơya bol mê neh lơh hìu hơ̆ in gơlik gơs trồm ală cau ntung kơñau.”

47 # Luk 21:37. Kòp ngai Kơnràñ bơto sồr tòm hìu duh khoai. Ală cau gơnoar lam bồ ơn phan duh khoai, ală cau bơto bơta boh lam, mơ ală cau kwang kra tòm làng bol jòi bơta nàng tơnchơt Kơnràñ, 48mơya ò rgơi jòi bơta lơi, bơh jơh làng bol kòñ ngan jat iat Kơnràñ.

Currently Selected:

Luka 19: KPM2018

Highlight

Copy