Luka 7

Bơta dòn cau at dô rhiang ling tòm Kapenaum

(Mathiơ 8:5-13)

1Dơ̆ Yàng Jesu đơs jơh ală jơnau hơ̆ làng bol in iat rau, gen Kơnràñ mut tòm Kapenaum.

2Gơs dô nă cau dĭ gơna kòñ gơboh cau at dô rhiang ling dê kòp mòr chơt. 3Dơ̆ khai kơno pơnro bơh Yàng Jesu, gen sồr ală cau kwang kra làng bol Juda dê lòt dan mơ Kơnràñ tus sơmbòi cau dĭ gơna khai in. 4Tŭ bol khai tus hơ Yàng Jesu, gen dan rac ròc lah: “Cau kwang hơ̆ la di pal nàng ồng in dong kòl, 5bơh khai kòñ gơboh di làng bol he dê, mơ să tòm khai neh bơt bơtào hìu jum bol he in.” 6Gen Yàng Jesu lòt bal mơ bol khai. Tòm tŭ ò ngài bơh hìu, cau at dô rhiang ling sồr oh mi bơyô lòt kơp Kơnràñ mơ đơs lah: “Ơ Yàng, añ ò khin lơh pơnjê Kơnràñ, bơh añ ò di pal nàng Kơnràñ mut tòm hìu añ, 7gen tàng añ kung kơlôi lah să tòm añ ò di pal nàng tus hơ Kơnràñ. Mơya dan Kơnràñ đơs dô jơnau, gen cau dĭ gơna añ jê rơp geh bòi. 8Bơh añ kung ơm hơđơm gơnoar cau ndai dê, kung gơs ală cau ling ơm hơđơm gơnoar añ jê. Añ sồr cau do: ‘Lòt tĕ,’ gen khai lòt; sồr cau ne: ‘Tus tĕ,’ gen khai tus; mơ sồr cau dĭ gơna añ: ‘Lơh tĕ broă do,’ gen khai lơh.” 9Yàng Jesu kơno ală jơnau hơ̆, gen ai lơh krơi bơh khai, mơ wơlke đơs mơ mpồl làng bol lòt jat Kơnràñ lah: “Añ đơs mơ bol mê, bulah tòm làng bol Israel Añ kung òhềt gŏ bơta dòn dờng be do.” 10Ală cau neh geh sồr lòt rê hìu, gŏ cau dĭ gơna neh bòi rau.

Yàng Jesu hòi cau pơnu ƀòn Nain kis Wơl

11Tơnơ̆ mơ hơ̆ dô êt jŏ, tòm tŭ Yàng Jesu lòt tus hơ ƀòn dờng ne sơnđan la Nain, gơs ală cau bơtê mơ mpồl làng bol oă lòt bal mơ Kơnràñ. 12Dơ̆ neh tus rềp di mpồng ƀòn dờng, ne, cau tùng tơlik dô nă cau chơt, la kòn klau dô nă mè khai dê, la ùr bơnrau; gơs oă cau tòm ƀòn dờng lòt bal mơ khai. 13Yàng gŏ cau ùr hơ̆ gen gơs nùs nđàc sơngit mơ đơs lah: “Bañ ñìm.” 14Gen Kơnràñ tus rềp, ƀư di bòng ƀồc, gen ală cau tùng dơh wơl. Mơ Kơnràñ đơs lah: “Ơ cau pơnu, Añ sồr mê guh tĕ.” 15Chòp cau chơt guh mo mơ sơntòm đơs. Gen Kơnràñ jào khai mè khai in. 16Jơh tơl nă gơlơh rngòt rngơt, jòng ro Yàng Tom Trồ mơ đơs lah: “Gơs cau gơnoar hwơr dờng tơngguh digùl bol he, mơ Yàng Tom Trồ neh tus còp làng bol Kơnràñ dê.” 17Jơnau do pơnro làm Jude mơ jơh tiah gùt dar.

Jang Ƀaptis sồr cau lùp Yàng Jesu

(Mathiơ 11:2-19)

18Ală cau bơtê Jang dê yal jơh ală jơnau hơ̆ khai in. 19Gen Jang hòi bàr nă cau bơtê khai dê sồr lòt tus hơ Yàng mơ đơs lah: “Ồng la Bơtau pal tus, hala bol hi pal gơn Bơtau ndai taih?” 20Tòm tŭ bàr nă cau bơtê tus hơ Yàng Jesu, gen đơs lah: “Jang Ƀaptis sồr bol hi tus lùp ồng: ‘Ồng la Bơtau pal tus, hala bol hi pal gơn Bơtau ndai taih?’” 21Mơ tai, tòm tŭ hơ̆ Yàng Jesu sơmbòi oă cau kòp jê pluh plàng, gơkòl cà lơh, mơ oă cau jơngo geh àng. 22#Esai 35:5,6; 61:1.Kơnràñ ho lah: “Rê tĕ yal Jang in ală bơta bol mê neh gŏ mơ kơno: cau jơngo gơs àng, cau kwet gơlte gơs lòt, cau dun gơs goh, cau tĭ gơs klo, cau chơt gơs kis wơl, mơ cau rƀah lơòi gơs kơno bơto yal Jơnau Niam. 23Lơngai cau lơi in ò gơtup tìs tài bơh Añ!”

24Dơ̆ ală cau kong sồr Jang dê neh lik lòt rau, Yàng Jesu đơs mơ mpồl làng bol bơh Jang lah: “Ñchi bol mê neh lik sền tòm ƀlàng bràs taih? Sền tòm proh gơs càl tơnwañ#7:24 Cil: lơnggơh. ơ? 25Hala ñchi bol mê lik sền taih? Sền cau soh ào bài lơbơn ơ? Ne, ală cau soh ào hàng mơnĕ ryŭ ryơm mơ ngui sa pròng preh gen ơm lơngap lơngai tòm gơlang bơtau. 26Behơ̆ gen ñchi bol mê lik sền taih? Sền cau gơnoar hwơr ơ? Ngan Añ đơs mơ bol mê, kung lin rlau mơ cau gơnoar hwơr tai sơl. 27#Mal 3:1.Bơh cau hơ̆ mơ gơs cih lah:

‘Do, Añ sồr cau kong sồr Añ jê lòt tus di đap mê,

La cau rơp wàs gùng lài mê in.’

28Añ đơs mơ bol mê, tòm ală cau deh bơh cau ùr, ò gơs cau lơi dờng rlau mơ Jang; mơya cau dềt rlau jơh tòm lơgar Yàng Tom Trồ la dờng rlau mơ khai.” 29#Mat 21:32; Luk 3:12.Jơh làng bol bal mơ ală cau dar dia neh gơs ƀaptem Jang dê kơno Kơnràñ đơs gen kòp Yàng Tom Trồ la song ring. 30Mơya ală cau Pharisi mơ ală cau bơto bơta boh lam ò kòñ Jang lơh ƀaptem, gen ò dòp bơta lơh nền Yàng Tom Trồ dê ơn is bol khai in.

31“Behơ̆ Añ pơndròm cau rài do mơ ñchi, bol khai dròm be ñcau taih? 32Bol khai be ală cau kơnòm nggui tòm drà, hòi driau bal lah: ‘Bol hi neh uh kơwào bol mê in, mơya bol mê ò tòmya; bol hi neh pơt wòl mơya bol mê ò ñìm rac.’ 33Bơh Jang Ƀaptis neh tus ò sa piang lă, ò ñô tơrnòm, gen bol mê đơs lah: ‘Khai gơkòl cà lơh.’ 34Kòn Mơnus tus sa mơ ñô, gen bol mê đơs lah: ‘Ne khai la cau jròk sa jròk ñô, oh mi bơyô mơ ală cau dar dia mơ ală cau glài!’ 35Behơ̆ bơta jak chài geh kòp la song ring kơnòm di kòn sau bơta jak chài dê.”

Cau ùr tìs glài geh toh

36Gơs dô nă cau Pharisi jà Yàng Jesu sào bal mơ khai. Gen Kơnràñ mut tòm hìu cau Pharisi hơ̆ mơ nggui sào. 37#Mat 26:7; Mak 14:3; Jang 12:3.Ne, gơs dô nă cau ùr tìs glài ơm tòm ƀòn dờng hơ̆, git Kơnràñ ơm nggui sào tòm hìu cau Pharisi, gen cèng dô nơm gri mơ lŭ màng gơs ƀô bơlhu,#7:37 Cil: ƀô bơkah. 38ơm ntào đah ngkòi di jơng Kơnràñ mơ ñìm, dà mat hòr sùh jơng Kơnràñ, gen khai ai sŏ mơ jùt, cum jơng Kơnràñ, mơ bong mơñà ƀô sơl. 39Cau Pharisi neh jà Kơnràñ gŏ behơ̆ gen kơlôi òm lah: “Dilah cau do la cau gơnoar hwơr gen git cau ùr ƀư dê să khai la ñcau mơ la cau mbe lơi, bơh khai la cau glài.” 40Yàng Jesu ai jơnau đơs mơ cau Pharisi lah: “Ơ Simôn, Añ gơs jơnau đơs mơ mê.” Khai đơs lah: “Ơ cau Bơto, dan kư̆ đơs.”

41“Cau tòm ne gơs bàr nă cau kòl dồs; cau do dồs pram rhiang dơnie,#7:41 Dô dơnie la jền tơngai dô ngai lơh broă. cau ne dồs pram jơt. 42Bơh bol khai ò gơs phan lơi nàng tơm dồs, gen cau tòmlòi tơn dồs jơh bàr nă bol khai in. Tòm bàr nă cau hơ̆, ñcau kòñ gơboh di cau tòm rlau taih?” 43Simôn ho lah: “Añ kơlôi la cau geh sang dồs oă rlau.” Kơnràñ đơs lah: “Mê kơlôi hơ̆ la di.” 44Gen Kơnràñ wơlke hơ cau ùr, đơs mơ Simôn lah: “Mê gŏ cau ùr do sơl? Añ mut tòm hìu mê, mê ò ai dà rào jơng, mơya khai ai dà mat lơh sùh jơng Añ mơ ai sŏ jùt sơl. 45Mê ò cum Añ, mơya bơh di tŭ Añ mut tòm hìu mê gen khai cum jơng Añ ò dơh. 46Mê ò bong mơñà di bồ Añ, mơya khai ngui mơñà ƀô bơlhu bong di jơng Añ. 47Behơ̆ gen, Añ đơs mơ mê, tồi glài khai gơs oă kung geh toh jơh, bơh khai kòñ gơboh oă; mơya cau geh toh dô êt, gen kòñ gơboh dô êt.” 48Kơnràñ đơs mơ cau ùr lah: “Tồi glài ai dê neh geh toh rau.” 49Ală cau nggui sào bal mơ Kơnràñ đơs is lah: “Cau do la ñcau mơ gơs gơnoar toh glài taih?” 50Mơya Kơnràñ đơs mơ cau ùr lah: “Bơta dòn ai neh dong klàs ai; rê tĕ lơngap lơngai.”

Currently Selected:

Luka 7: KPM2018

Highlight

Copy