Juan 12

Uj warmeqa Jesuspa chakinta jawin

(Mt 26.6-13; Mc 14.3-9)

1Pascua raymipaj sojta p'unchayraj kashajtin, Jesús Betaniaman rerqa. Chaypi Lázaro tiyakorqa, pitachus Jesús wañusqamanta kawsarichisqa, chay. 2Chantá Lázaroj wasinpi jatun mikhuyta Jesuspaj wayk'orqanku. Martaqa mikhunata jaywarasharqa, Lazarotaj jamojkunawan khuska Jesuswan mikhusharqa. 3Chaymantaj María nardomanta ruwasqa sumaj jawinata apamorqa. Apamusqan jawinaqa khuskan litro jina karqa, ashkha precioyojtaj. Chantá Mariaqa Jesuspa chakinta chaywan jawerqa, chujchanwantaj ch'akicherqa. Chay jawinaj sumaj q'apasqantaj wasiman junt'aykorqa.

4Chantá Jesuspa yachachisqakunamanta ujnin, Judas Iscariote, pichus Jesusta wasanchaspa jap'ichinan karqa, chay nerqa: 5Imaraykutaj chay sumaj q'apashaj jawinata mana venderqachuri? Chaymanta chunka killa jornalta jina qolqeta jap'inman karqa. Chay qolqewantaj wajchakunata yanapayta atinman karqa, nispa. 6Judas chayta nisharqa, mana wajchakunata khuyaspachu. Manachayqa pay Jesuspa yachachisqankunaj qolqe wayaqankuta jap'erqa, chayman churasqankutataj suwaj.

7Jesustajrí nerqa: Ama Mariata imatapis niychu. Kay jawinataqa p'ampakunay p'unchaypaj waqaychasharqa. 8Wajchakunaqa qankuna ukhupi kallanqankupuni. Noqarí manaña qankunawan kallasajpunichu, nispa.

Lazarota wañuchinankupaj yachachinakunku

9Chaypacha ashkha runakuna Betaniapi Jesús kashasqanta yacharqanku. Chaywanpis mana Jesusta rikunankuraykullachu rerqanku, astawanqa Lazarota rikuyta munaspa, pitachus Jesús wañusqamanta kawsarichisqa, chayta. 10Kuraj sacerdotekunarí chayta yachaspa, Lazarotapis wañuchinankupaj yachachinakorqanku. 11Paytapis wañuchiyta munarqanku, imaraykuchus Lazarorayku ashkha runakuna sacerdotekunamanta karunchakusharqanku, Jesustataj qhatisharqanku.#Jn 11.45.

Jesús kuraj kamachej jina Jerusalén llajtaman yaykun

(Mt 21.1-11; Mc 11.1-11; Lc 19.28-40)

12Ashkha runa Jerusalén llajtaman Pascua raymiman rerqanku. Q'ayantintaj Jesús Jerusalenman chayananta yachaspa, 13chay runakunaqa palma jap'irisqa Jesusta taripaj llojserqanku. Chantá qhaparerqanku:

Diosniyku, qhespichiwayku.

Tukuyta Kamachej Diospa sutinpi jamojqa yupaychasqa kachun.

Israelpa Kuraj Kamachejnin jatunchasqa kachun,#Sal 118.26. nispa.

14Chantá Jesús uj maltun burroman lloq'aykuspa, Jerusalenman yaykusharqa, Diospa Qhelqachisqanpi nisqanman jina:

15Jerusalenpi tiyakojkuna, ama manchachikuychejchu.

Kuraj Kamachejniykichejqa burro uñapi lloq'asqa jamushasunkichej,#Zac 9.9. nispa.

16Jesuspa yachachisqankuna chaypacha imachus kashasqanta mana entienderqankuchu. Aswan qhepamanrí, maypachachus Jesús janaj pachaman kutiporqa chaypacha, yuyarikorqanku Jesusta imachus qhatirisqanqa Diospa Qhelqachisqanman jina kasqanta.

17Pikunachus Betaniapi Jesús Lazarota wañusqamanta kawsarichisqanta rikorqanku, chaykuna Jerusalenpi tiyakojkunaman Jesuspa chay ruwasqanmanta willasqanku. 18Chayrayku ashkha runakuna Jesusta taripaj llojserqanku, imaraykuchus runaj mana jayk'aj rikusqan chay t'ukuna ruwasqanmanta yacharqanku. 19Fariseokunatajrí ninakorqanku: Rikunkichejchu? Tukuy payman k'askakapushanku, noqanchejtaj manaña imatapis ruwayta atinchejchu, nispa.

Grecia llajtayojkuna Jesusta mask'anku

20Pascua raymipi pikunachus Diosta yupaychaj Jerusalenman jamojkunamanta wakin Grecia suyumanta karqanku. 21Paykunataj Galileamanta Betsaida llajtayoj Felipeman chimpaykuspa, nerqanku: Wiraqochi, Jesuswan parlariyta munaykuman, nispa.

22Chantá Felipe rispa, Andresman willamorqa, jinataj iskayninku Jesusman willamorqanku. 23Jesustajrí paykunaman kuticherqa: Runaj Churin jatunchasqa kananpaj p'unchay chayamunña, nispa. 24Chantá rijch'anachinawan parlaspa, nerqa: Kayta sut'ita niykichej: Trigo mujuchus jallp'aman tarpusqa kaspa mana wañunman chayqa, mana poqonmanchu. Sichus wañun chayrí, ashkhata poqonqa. 25Pichus noqata kasunawanmanta nisqaqa kawsaynin aswan kasqanta qhawajqa mana wiñay kawsayman yaykonqachu. Pichus kawsayninta mana may kasqanta qhawaspa noqata kasuwan chayrí, payqa wiñay kawsayman yaykonqa.#Mt 10.38-39; 16.24-25; Mc 8.34-35; Lc 9.23-24; 14.27; 17.33. 26Qankunamanta pillapis kamachiy kayta munajqa kasunawan tiyan. Pikunachus kamachiy kajkunataj, maypichus noqa kasaj, chayllapitaj kanqanku. Tataytaj tukuy kamachiykunata jatunchanqa, nispa.

Jesús wañuchisqa kananmanta willan

27Jesús nillarqataj: Kunanqa sonqoy manchay phutisqa kashan. Ima nisajtajri? Ichapis niyman: Tatáy, ñak'arinaymanta kacharichiway ari, nispa. Aswanpis noqaqa ñak'arinaypajpuni jamuni.#Mt 26.36-46; Mc 14.32-42; Lc 22.39-46. 28Chayrayku, kayta nisaj: Tatáy, sutiykita jatunchay, nispa.

Chayta Jesús nisqantawankama, janaj pachamanta Diospa parlasqan uyarikorqa: Jatun kayniyta runakunaman rejsichiniña, kunantaj ujtawan rejsichillasajtaj, nispa. 29Ashkha chaypi kajkunamanta parlamojta uyarispa, nerqanku qhon qhon kasqanta. Wakinkunataj uj ángel parlamusqanta nerqanku.

30Jesustajrí paykunata nerqa: Parlamojta uyarisqaykichejqa mana noqapajchu karqa. Manachayqa qankuna noqapi atinikunaykichejpaj karqa. 31Kunan kay pachapi tukuy runata Dios juzganan p'unchay chayamun. Kay pachapi kamachej Kuraj Supaytaj kay pachamanta wijch'usqa kanqa.#12.31 Kay pachapi kamachej: Ajinata nispa, Supaymanta parlashan. Jn 14.30; 16.11; 2 Co 4.4; Ef 2.1-2; 1 Jn 5.19. 32Chaywanpis maypachachus noqata cruzman chakatawanqanku chaypacha, tukuy runakuna noqapi atinikunankuta ruwasaj, nispa. 33Jesús ajinata nispa, sut'inchayta munarqa imaynatachus pay wañunanmanta.

34Chay runakunatajrí payta nerqanku: Noqayku kamachisqa qhelqasqata ñawirispa, yachayku Cristoqa wiñaypaj kawsananta. Jina chayqa, imaraykutaj qan nishanki Runaj Churin cruzman chakatasqa kanantari? Pitaj chay Runaj Churinri? nispa.

35Chantá Jesús paykunaman kuticherqa: K'anchayneyqa pisi p'unchaytawanraj qankunata k'anchasonqachej. K'anchaypi puriychej, ama laqhawan jap'ichikunaykichejpaj. Laqhapi purejqa mana yachanchu maynintachus rishasqanta. 36Qankunawan k'anchay kashajtin, k'anchaypi atinikuychej, k'anchaypa wawankuna kanaykichejpaj, nispa.

Chayta niytawantaj, Jesús paykunamanta karunchakorqa, mana tariyta atinankupajtaj wajnejman riporqa.

Judiokuna Jesuspi mana atinikuyta munankuchu

37Runaj mana jayk'aj ruwasqan chay chhika t'ukuna imakunata Jesús paykunaj rikunankuta ruwajtinpis, judiokuna manapuni paypi atinikuyta munarqankuchu. 38Chay karqa Diosmanta sut'inchaj Isaiaspa nisqanman jina. Pay nisqa:

Tukuyta Kamachej Dios, pitaj willasqaykuta jap'ikorqari?

Pimantaj Tata Dios atiyninta rikucherqari?#Is 53.1. nispa.

39Chayrayku judiokunaqa mana Jesuspi atinikuyta aterqankuchu, imajtinchus Diosmanta sut'inchaj Isaías nillasqataj: Dios nin:

40Diosqa ñawinkuta ñawsayacherqa,

sonqonkutataj rumiyacherqa, ñawinkuwan ama rikunankupaj,

nitaj sonqonkuwan unanchaspa, noqaman kutirikamunankupaj,

noqa paykunata qhaliyachinaypaj, nispa.#Is 6.10.

41Diosmanta sut'inchaj Isaías ajinata nisqa, imaraykuchus Diospa kachamusqan Cristoj atiyninta rikusqa. Chayrayku Cristoj jatun kayninpa lliphipiyninmanta chayta parlasqa.

42Chaywanpis judiokunamanta, jinataj kurajkunamanta ima Jesuspi ashkha atinikorqanku. Paykunarí fariseokunata manchachikusqankurayku, mana sut'ita paymanta parlajchu kanku, tantakuna wasimanta ama wijch'usqa kanankupaj. 43Paykunaqa runallaman allin rijch'ayta munarqanku, manataj Diosmanqa.

Jesuspa parlasqanman jina runakuna juzgasqa kanqanku

44Chantá Jesús jatunmanta parlaspa, nerqa: Pichus noqapi atinikojqa mana noqallapichu atinikun, manachayqa Diospipis atinikullantaj, pichus noqata kachamuwarqa, chaypi. 45Pichus noqata rikuwajqa Kachamuwajniytapis rikullantaj.#Mt 10.40; Mc 9.37; 14.9. 46Noqa k'anchay jina kay pachapi k'anchanaypaj jamorqani, noqapi tukuy atinikojkuna amaña laqhallapipuni kanankupaj. 47Chaywanpis parlasqayta uyarispa mana kasojtaqa mana noqachu juchachani, imaraykuchus mana runakunata juchachajchu jamorqani. Aswanpis paykunata qhespichej jamorqani.#Jn 3.17. 48Pichus noqata pisipaj qhawawaspa parlasqayta mana kasojtaqa juchachajmin tiyan. Cheqa kajta parlasqaymin kay pachaj tukukuynin p'unchaypi payta juchachanqa.#Jn 3.17-18; 8.12. 49Noqarí mana munasqayman jinallachu parlani. Manachayqa Kachamuwaj Tata imatachus kamachiwasqanta parlani, yachachinitaj. 50Noqa yachani Tataypa kamachisqanta kasojkunaqa wiñay kawsayman yaykunankuta. Chayrayku Tatay tukuy imatachus parlanayta kamachiwasqanta qankunaman willarqaykichej, nispa.

Currently Selected:

Juan 12: DQDC

Highlight

Copy