Juan 15

Jesusqa sumaj uva sach'a jina

1Jesús yachachisqankunata nillarqapuni: Noqaqa sumaj uva sach'a jina kani, Tataytaj uva huertata qhawaj jina. 2Noqaman ujchasqa kaj yura, sichus mana poqon chayqa, Tatay k'uturparenqa. Poqoj yuratarí, podaspa llimphuchanqa, astawan poqonanpaj. 3Qankuna llimphuchasqaña kankichej noqaj parlasqayrayku. 4Chaywanpis noqallamanpuni ujchasqa kaychej, imaynatachus noqapis qankunawan ujchasqa kani, ajinata. Imaynatachus yura uva sach'aman mana ujchasqa kaspa, sapallanmanta mana poqoyta atinchu, ajinallatataj qankunapis Diospa munasqanta ruwayta mana atinkichejchu, manachus noqaman ujchasqallapuni kankichej chayqa.

5Noqa uva sach'a jina kani, qankunataj chay uva sach'aj yuran jina kankichej. Pillapis noqaman ujchasqallapuni kaj, noqataj payman, chaymá ashkhata poqonqa. Chaywanpis sichus qankunamanta pillapis noqamanta t'aqakun chayqa, mana imatapis ruwayta atenqachu. 6Mana noqaman ujchasqallapuni kajqa k'utusqa yura jina huertamanta jawaman wijch'usqa kanqa, ch'akiponqataj. Chay wijch'usqa yurakunata tantaspataj, runaqa ninaman wijch'un.

7Sichus qankuna noqaman ujchasqallapuni kaspa, tukuy nisqayta kasunkichej chayqa, munasqaykichejta Diosmanta mañakuychej, paytaj qosonqachej. 8Maypachachus qankuna uva yura jina ashkha poqoyniyoj kankichej chaypacha, cheqapuni yachachisqay kasqaykichejta yachayta qoshankichej, chaynejtataj Tatay jatunchasqa kanqa.

9Imaynatachus Tata Dios noqata munakuwan, ajinallatataj noqapis qankunata munakuykichej. Ajinaqa qankunapis kasuwaspa puriychej munakususqaykichejmanta ama karunchakunaykichejpaj. 10Munakususqaykichejman jina kawsanaykichejpaj, kamachisqaykunata kasunaykichej tiyan, imaynatachus noqapis Tataypa kamachiwasqanta kasuspa munakuyninpi kawsani, ajinata.

11Chaykunata niykichej noqawan khuska mayta kusikunaykichejpaj, chay kusikuytaj sonqoykichejmanta phullchirenqa. 12Kaytamin kamachiykichej: Qankunapura munakuychej, imaynatachus noqa munakuykichej, ajinata. 13Pillapis kawsaqenkunarayku wañojqa imaynatapunichus paykunata munakusqanmanta yachayta qon. 14Qankunataj kawsaqeykuna kankichej, sichus kamachisqayta kasunkichej chayqa. 15Manaña wata runay nisqaykichejchu, imaraykuchus wata runaqa patronnin imatachus ruwasqanta mana yachanchu. Manachayqa kawsaqeykuna nisqaykichej, imaraykuchus Tataypa tukuy ima niwasqanta rejsichiykichej.

16Mana qankunachu ajllawarqankichej, aswanpis noqa qankunata ajllarqaykichej. Chantá churarqaykichej, rispa ashkha poqoyniyoj yura jina kanaykichejpaj, chay ruwasqaykichejtaj unaypaj kananpaj. Ajinamanta tukuy imatachus noqaj sutiypi Tata Diosmanta mañakusqaykichejta pay qosonqachej. 17Ujtawan kamachiykichej: Purajmanta munakuychej, nispa. Ajinata Jesús yachachisqankunata nerqa.

Runakuna Jesusta, chantá yachachisqankunata ima chejnenqanku

18Jesús nillarqataj: Sichus Diosman mana kutirikojkuna chejnisunkichej chayqa, yachaychej noqataraj ñawpajta chejniwasqankuta. 19Sichus qankuna paykuna jinallataj kawajchej chayqa, munakusunkichejman. Qankunarí manaña paykuna jinachu kankichej, imaraykuchus noqa qankunata ajllakorqaykichej manaña paykuna jina kanaykichejpaj. Chayraykumin paykuna chejnisunkichej.

20Imatachus qankunaman nisqayta yuyarikuychej: Wata runaqa patronninmanta mana aswan kurajchu, nispa. Noqatachus qhatiykachawarqanku chayqa, qankunatapis qhatiykachallasonqachejtaj. Nisqaytachus kasorqanku chayrí, qankunaj nisqaykichejtapis kasullanqankutaj. 21Paykuna chay tukuyta ruwasonqachej yachachisqay kasqaykichejrayku, imajtinchus Diosman mana kutirikojkunaqa pichus Kachamuwajta mana rejsinkuchu.

22Sichus noqa jamuspa, mana paykunaman parlayman karqa chayqa, mana juchayojchu kankuman karqa. Kunanrí juchallisqankumanta mana imatapis niyta atinkuchu. 23Pillapis noqata chejnikuwajqa Tataytapis chejnikullantaj. 24Manachus paykuna ukhupi ni pejpa ruwasqan t'ukunata ruwayman karqa chayqa, mana juchayojchu kankuman karqa. Kunanrí t'ukuna ruwasqayta rikunkuña. Chaywanpis noqata, Tataytapis chejnikuwayku. 25Chayqa ajina, Diospa Qhelqachisqanpi kay nisqan junt'akunanpaj: Manakajmanta chejnikuwanku,#Sal 35.19; 69.4. nispa.

26Noqarí qankunaman Sonqochajta kachamusaj, chay Santo Espiritutaj Tataymanta jamuspa, cheqa kajmanta yachachisonqachej. Maypachachus Santo Espíritu Tata Diosmanta jamonqa chaypacha, pay noqamantamin willanqa. 27Qankunapis rikojkuna jina noqamanta parlallankichejtaj, imaraykuchus qallariymantapacha noqawan karqankichej, nispa.

Currently Selected:

Juan 15: DQDC

Highlight

Copy