Lucas 14
14
Jesús punkisqa runata qhaliyachin
1Samarina p'unchaypi Jesús uj kuraj fariseoj wasinman mikhoj yaykorqa, wakin fariseokunataj payta wateqasharqanku. 2Chaypitaj punkiywan uj onqosqa runa Jesuspa ñawpaqenpi kasharqa. 3Chantá Jesús Diospa kamachisqanmanta yachachejkunata, fariseokunata ima taporqa: Samarina p'unchaypi onqosqakunata qhaliyachina atikunmanchu? nispa.
4Paykunatajrí ch'inlla karqanku. Chantá Jesús onqosqa runata makinmanta jap'ispa qhaliyacherqapacha, chaymantataj kachaporqa. 5Chaypi kajkunamantaj nerqa: Wawaykichej, chayrí wakaykichej pujyuman urmaykojtin, qankuna chay ratopacha orqhowajchej, samarina p'unchay kashajtinpis, icharí? nispa. 6Paykunatajrí Jesuspa nisqanman mana kutichiyta aterqankuchu.
K'umuykukoj sonqoyoj kanamanta
7Jesús qhawasharqa imaynatachus jatun mikhunaman wajyarisqakuna aswan sumachaj tiyanakunata ajllarakusqankuta. Chayrayku paykunata kay jinata yuyaycharqa: 8Casarakuman wajyarisqa kaspaqa, ama aswan sumaj kaj tiyanapichu tiyarikuy. Ichapis qanmanta aswan jatunpaj qhawasqa waj runapis wajyarisqallataj kanman. 9Chantá pichus iskayniykichejta wajyarikoj runa nisunkiman: Chay tiyanata payman qoy, nispa. Qantaj p'enqayta qhepanejman tiyaj rishawaj.
10Chayrayku wajyarisqa kaspaqa, qhepanejllapi tiyarikamuy. Chantá pichus wajyasorqa, chay runa jamuspa, nisonqa: Kawsaqéy, aswan ñawpajpi tiyakamuy, nispa. Ajinapeqa allinpaj qhawasqa kanki qanwan khuska wajyarisqakunaj ñawpaqenkupi.#Pr 25.6-7. 11Chayqa ajina, imaraykuchus jatunchakojqa k'umuykuchisqa kanqa, k'umuykojtajrí jatunchasqa#Pr 29.23; Mt 23.12; Lc 18.14. kanqa, nispa.
12Mikhunaman wajyarikoj runatapis Jesús nillarqataj: Jayk'ajllapis almuerzota, chayrí cenata wayk'uchispaqa, ama kawsaqeykikunata, nitaj wawqeykikunata, nitaj aylluykikunata, nitaj qhapaj llajta masiykikunatapis wajyarikunkichu. Paykuna qanta kikillantataj mikhunaman wajyarisunkuman, chayllawantaj t'inkachisqa kawaj. 13Manachayqa jatun mikhuyta wayk'uchispaqa, wajyarikuy wajchakunata, ñuk'ukunata, suchukunata, ñawsakunata ima. 14Chaywanqa aswan kusikuyniyoj kanki, imaraykuchus paykuna mana imatapis kutichipusuyta atenqankuchu. Chantá cheqan runakuna wañusqamanta kawsarimpojtinku, chaypachamá Diosmin t'inkaykita qosonqa, nispa.
Jatun mikhunamanta rijch'anachina
(Mt 22.1-10)
15Chayta uyarispataj, Jesuswan khuska mikhojkunamanta ujnin kaj Jesusta nerqa: Kusikuyniyojmin kanqa, Dios kamachishajtin pichus jatun mikhunaman wajyarisqa kaj, nispa.
16Jesustajrí uj rijch'anachinata willaspa, kuticherqa: Uj runa manchay jatun mikhuyta wakichisqa, ashkha runatataj wajyarikusqa. 17Mikhunankuña kashajtintaj, chay runaqa ujnin kamachinta wajyarisqa kajkunaman willamojta kachasqa: Usqhayta jamullaychejña, imaraykuchus tukuy ima wakichisqaña, nispa. 18Chaywanpis tukuyninku, ujmanta uj, mana riyta munaspa, achakita churayta qallarisqanku. Ñawpaj kaj nisqa: Noqaqa kunallanraj jallp'ata rantikuni. Qhawamoj rinay tiyan. Ama jinachu kay, saqerillaway rejta ari, nispa. 19Qhepan kajtaj nisqa: Phishqa yunta rantisqayta llank'achimunayraj tiyan. Mana jamuyta aterqoymanchu, nispa. 20Chay ujnintaj nillasqataj: Kunallanraj casarakuni. Chayrayku noqaqa mana jamuyta atisajchu, nispa.
21Chantá chay kamacheqa kutimuspa, chay tukuyta patronninman willasqa. Patronrí sinch'ita phiñakuspa, kamachinta nisqa: Riy usqhayta kay llajtaj plazanta, callenkunata ima, pusaramuytaj tukuy wajchakunata, ñuk'ukunata, ñawsakunata, suchukunata ima, nispa. 22Kamachitaj kutimuytawan, nisqa: Patrón, nisqaykiman jina ruwani. Chaywanpis raymi wasi manaraj junt'achu, nispa. 23Chaymantataj patronqa kamachita nisqa: Jina kajtenqa, tukuy chaki ñankunaman riy, jatun ñankunaman ima, jinataj wajkunata usqhay usqhayta pusaramuy, wasiy junt'a kananpaj, nispa. 24Noqa niykichej: Ñawpaj wajyarisqa runakunamantaqa manapuni mayqenpis mikhunayta llamirillanqapischu, nispa.
Cristowan purinapajqa tukuy imata saqena
(Mt 10.37-38)
25Ashkha runa paypa qhepanta jamushajtinku, Jesús paykunaman kutirispa, nerqa: 26Pipis yachachisqay kayta munajqa noqatapuni astawan munakunawan tiyan. Tatanmanta, mamanmanta, wawanmanta, wawqe pananmanta, kikin kawsayninmantapis astawan noqata munakunawan tiyan. 27Jinallataj manachus cruzninta oqharispa qhepayta jamun chayqa, mana yachachisqay kayta atinchu, nispa.
28Chantá rijch'anachinata willaspa, nerqa: Sichus mayqenniykichejpis alto patayoj wasita sayachiyta munanman chayqa, manachu tiyaykukuspa, ñawpajta allinta qhawarinman, qolqen kapunchus manachus, chayta, chay wasita sayachiyta tukuychananpaj? 29Manachus ñawpajta allinta qhawarikunman chayqa, cimientota churaspaña, mana tukuychayta atinmanchu, chayta rikojkunataj asikunkuman: 30Kay runaqa wasita qallariyta yachasqa, tukuychaytarí mana atisqachu, nispa.
31Jinallatataj, pi kuraj kamachejpis waj kuraj kamachejwan maqanakoj yaykunanpajqa, manachu ñawpajta qhawarikunraj, atenqanchus manachus atipayta, chayta yachananpaj? Ajinamanta yachanqa sichus 10.000 soldadokunallawan chay ujninta atipayta atinanta, chay ujnin 20.000 soldadokunawan jamushajtin? 32Mana atipananta reparaspataj, payqa kachakunata kachan chay ujnin kamachej karullapiraj kashajtin, ajinamanta paywan allinyakapunanpaj. 33Jina ari, qankunamanta pillapis tukuy tiyapusqanta mana saqejqa mana yachachisqay kayta atinmanchu, nispa.
Kachimanta rijch'anachina
(Mt 5.13; Mc 9.50)
34Jesús nillarqataj: Kacheqa sumajmin. Chaywanpis kachichus q'aymayanman chayqa, imaynatataj watejmanta k'araman kutinmanri? 35Mana allinñachu jallp'apaj, nitaj wanupajpis, manachayqa wijch'unallapajña. Pichus nisqayta jap'ikuyta munajqa allinta uyarichun, nispa.
Currently Selected:
Lucas 14: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
