Lucas 2

Jesuspa paqarisqan

(Mt 1.18-25)

1Chaypacha Romapi kuraj kamachej Augusto kamacherqa tukuy suyupi runa yupasqa kanankuta. 2Chay ñawpaj kaj runa yupay karqa Quirino Siriapi kamachishajtin. 3Jinapi tukuy yupachikunankupaj sapa uj llajtankuman rinanku karqa.

4Chantá Josepis Davidpa mirayninmanta kasqanrayku, Judea jap'iyman, Davidpa llajtan Belenkama rerqa Galileapi Nazaret llajtamanta. 5Paywan khuskataj warmin Mariapis rillarqataj. Chaypacha María may jatun onqojña kasharqa.

6Belenpiña kashajtinku, Maríaj onqokunan p'unchay chayamorqa. 7Jinapi payqa kuraj kaj qhari wawanta paqarichikorqa, janantawan k'iruykuspataj, uywa qaranapi siriykucherqa, tambo wasipi paykunapaj mana campo kasqanrayku.

Angelkuna michejkunaman rikhurinku

8Belén llajta qayllapi ovejata michejkuna kasharqanku, tutantin uywankuta qhawaspa. 9Jinallapi Tukuyta Kamachej Diospa angelnin paykunaman rikhurerqa, lliphipiynintaj paykunata muyuykojtin, anchata mancharikorqanku. 10Chantá ángel paykunata nerqa: Ama mancharikuychejchu, imaraykuchus noqaqa sumaj willayta apamuykichej, chaytaj tukuy runapaj may kusiy kanqa. 11Kunan Davidpa llajtanpi qhespichej paqarin. Payqa Tukuyta Kamachej Cristomin. 12Payta tarinaykichejpajtaj kay señal kanqa: Wawataqa janantapi k'irusqata tarinkichej, uywa qaranapi sirisqata, nispa.

13Jinallaman chay angelwan khuska ashkha angelkuna janaj pachamanta rikhurimorqanku, Diosta yupaychaspataj nerqanku:

14Janaj pachapi Dios jatunchasqa kachun,

kay pachapitaj allinpi kawsay kachun,

pikunawanchus Dios sonqo junt'asqa kashan,

chaykunapaj, nispa.

15Chay angelkuna janaj pachaman ripusqankutawan, michejkunaqa ninakorqanku: Jaku rina Belenman, imachus kasqanta yachamunanchejpaj, Tukuyta Kamachej Dios willachiwasqanchejman jina, nispa.

16Chantá usqhayllata rispa, michejkunaqa Mariata, Josetawan tariparqanku. Jinataj wawata uywa qaranapi sirisqata rikorqanku. 17Chayta rikuytawantaj, michejkuna ripuspa, imatachus chay ángel wawamanta nisqanta tukuyman willararqanku. 18Chayta uyarejkunataj michejkunaj willasqankumanta t'ukorqanku. 19Chaywanpis Mariaqa chay tukuy imata sonqonpi waqaychaspa, chaykunapi unancharqa. 20Chantá michejkuna kutiporqanku Diosta jatunchaspa, yupaychaspataj imakunatachus uyarisqankumanta, rikusqankumanta ima angelpa willasqanman jina.

Jesusta Temploman apanku

21Pusaj p'unchayninman Josewan, Mariawan wawata circuncidacherqanku, jinataj payta suticharqanku Jesús sutiwan, imaynatachus angelqa Mariaman nisqa manaraj María onqoj kashajtin.

22Moisespa kamachisqanman jina llimphuchakunanku tiempo junt'akojtintaj, Josewan Mariawan wawata Jerusalenman aparqanku Tukuyta Kamachej Diospaj t'aqanankupaj. 23Chayta junt'arqanku, Tukuyta Kamachej Diospa kamachisqanpi nisqaman jina: Tukuy kuraj kaj qhari wawa Tata Diospaj t'aqasqa kanqa,#Ex 13.2,12; Nm 3.13; 8.17. nispa. 24Jinallatataj Diosman uj jaywanata aparqanku, Diospa kamachisqanpi nisqanman jina: Iskay urpita chayrí iskay jurk'utata Diosman jaywankichej, nispa.#Lv 5.11; 12.8.

25Chaypacha Jerusalenpi uj runa Simeón sutiyoj tiyakorqa. Pay cheqanta ruwaj runa karqa, Diostataj may jatun respetowan qhawarqa. Chayrayku pay suyasharqa Dios Israelta qhespichinanta. Santo Espíritoj kamachiyninpipis kallarqataj. 26Jinataj Santo Espíritu payman sut'inchasqa manaraj wañupushaspa Diospa kachamusqan Cristota rikunanta. 27Chaypacha Santo Espiritoqa Simeonta Temploman pusarqa. Chaypachallataj Jesuspa tatankunapis payta Temploman aparqanku, Diospa kamachisqanman jina. 28Jinapi Simeonqa wawata marq'arikuspa, Diosta kay jinata yupaycharqa:

29Kunanqa Tukuyta Kamachej Dios,

sonqoy junt'asqata pusakapuway,

imaraykuchus niwasqaykeqa junt'akun.

30Noqaqa kikin ñawiywan kachamusqayki qhespichejta rikuni,

31pitachus qan kachamunki tukuy runapaj, chayta.

32Payqa tukuy suyupi kajkunaman k'anchanqa,#Is 9.2; 42.6; 49.6; 51.4; 60.1-3.

jinallataj Israel aylluyki jatunchasqa kananpaj kanqa, nispa.

33Jesuspa tatan, mamanwan t'ukorqanku, Simeón wawamanta imatachus nisqanmanta. 34Chantá Simeón paykunata saminchaytawan, wawaj maman Mariatañataj nerqa: Kay wawataqa Diosmin Israelpi churan, wakinkunata urmachinanpaj, wakinkunataj Diosman kutirichinanpaj. Dios payta señal kananpaj churajtinpis, ashkha runakuna payta qhesachanqanku. 35Jinataj ashkha runaj yuyasqanku sut'inchasqa kanqa. Chaywanpis llakeyqa sonqoykita espada jina t'ojsenqa, nispa.

36Templo chaynejpi kashallarqataj Aser jatun ayllumanta Fanuelpa ususin Ana, paytaj Diosmanta sut'inchaj karqa, payañataj. Sipaspacha casarakuspa, qanchis watallata qosanwan tiyakusqa. 37Paytaj warmisapa karqa, pusaj chunka tawayoj watayojtaj. Chantá Templomanta mana karunchakojchu, manachayqa tuta p'unchay Diosta yupaychaspa, ayunarqa Dioswantaj parlarikorqa. 38Simeón Jesuspa tatankunawan parlashajtin, Anaqa chimpaspa, Jesús wawarayku Diosman pachis nerqa. Chaymantapachataj wawa Jesusmanta willarqa, pikunachus Jerusalén llajta qhespichisqa kananta suyasharqanku, chaykunaman.

Nazaret llajtaman kutipunku

39Jesuspa tatankuna tukuy imata Tukuyta Kamachej Diospa kamachisqanman jina junt'aspa, Galileapi Nazaret llajtankuman kutiporqanku. 40Chantá wawaqa wiñarqa, Diosmanta yachaspataj kallpachakorqa. Jinataj astawan astawan yachayniyojman tukorqa. Diostaj paywan may kusisqa karqa.

Jesusqa Templopi

41Jesuspa tatankunaqa sapa wata Pascua raymipaj Jerusalenman rej kanku. 42Chantá Jesús chunka iskayniyoj watayoj kashaspa, tatankunawan khuska Jerusalenman rerqa, Pascua raymiman rina yachasqa kasqanman jina. 43Pascua raymi tukukuyta tatan maman kutipushajtinku, Jesús Jerusalenpi qhepakusqa paykunaj mana yachasqallanku. 44Wajkunawan rishasqanta yuyaspa, paykuna uj p'unchay puriypiña watukorqanku ayllunku ukhupi, rejsisqankukuna ukhupi ima. 45Jesusta mana tarispataj, Jerusalenkama kutirerqanku.

46Kinsa p'unchaymanta Jesuspa tatankuna Temploj pationpi payta tarerqanku Diospa kamachisqanmanta yachachejkunawan tiyashajta, parlasqankuta uyarispa, tapurispa ima. 47Uyarejkunataj mayta t'ukusharqanku Jesuspa yachayninmanta, kutichisqanmanta ima.

48Ajinata rikuspa, tata mamanpis t'ukullarqankutaj, mamantaj Jesusta nerqa: Wawáy, imaraykutaj kay jinata ruwawaykuri? Noqawan, tataykiwanqa may phutisqa mask'ashasorqayku, nispa.

49Jesustaj nerqa: Imaraykutaj mask'ashawarqankichejri? Manachu yachankichej Tataypa ruwananpi kanay kasqantari? nispa. 50Paykunarí chay nisqanta mana entienderqankuchu.

51Chantá Jesusqa tatan mamanwan Nazaretman kutiporqa, chaypitaj paykunata kasuspa tiyakorqa. Mamantajrí chay tukuyta sonqollanpi waqaycharqa. 52Chaykamataj Jesús wiñasharqa, jinallataj astawan astawan yachayniyojman tukusharqa. Paytaj Diospaj allinpaj qhawasqa karqa, jinallataj tukuy runapajpis.

Currently Selected:

Lucas 2: DQDC

Highlight

Copy