Lucas 22

Jesusta wañuchinankupaj yachachinakunku

(Mt 26.1-5,14-16; Mc 14.1-2,10-11; Jn 11.45-53)

1Mana Levadurayoj T'anta Mikhuna, Pascua sutiyoj raymiman qayllaña karqa. 2Chantá kuraj sacerdotekuna, Diospa kamachisqanmanta yachachejkuna ima mask'asharqanku imaynamantachus Jesusta wañuchichinankuta. Chaywanpis runakunata manchachikorqanku.#Lc 19.47-48; 20.19.

3Chantá Supay Satanasqa Judas Iscarioteman yaykorqa, pichus Jesuspa chunka iskayniyoj kuraj kachankunamanta ujnin karqa, chayman. 4Jinapi Judasqa kuraj sacerdotekunawan, chantá Templota qhawajkunaj kamachejninkukunawan parlamorqa, imaynatachus Jesusta jap'ichinanmanta. 5Paykunataj kusikuspa, Judasman qolqeta qonankupaj parlarqanku. 6Chaymantapachataj Judas mask'ayta qallarerqa, imaynamantachus runaj mana rikusqallanta Jesusta jap'ichinanpaj.

Jesús Pascua mikhuyta mikhun

(Mt 26.17-29; Mc 14.12-25; Jn 13.21-30; 1 Co 11.23-26)

7Mana Levadurayoj T'anta mikhuna raymi chayamorqa, maypachachus Pascua corderota wañuchej kanku, chaypacha. 8Chantá Jesusqa Pedrota, Juantawan kachaspa, nerqa: Rispa, Pascua mikhunata wakichimuychej, khuska mikhunanchejpaj, nispa.

9Paykunataj taporqanku: Maypitaj munanki wakichinaykutari? nispa.

10Jesustaj kuticherqa: Llajtaman yaykushaspa, tinkukunkichej p'uñupi yakuta apashaj runawan. May wasinmanchá yaykonqa, chaykama payta qhatinkichej. 11Chay wasiyojmantaj ninkichej: Yachachejniyku nichimusunki: Maypitaj cuarto kashan, yachachisqaykunawan Pascua mikhunata mikhunaykupajri? nispa. 12Chantá wasiyojqa alto patapi k'uchunchasqa jatun cuartota rikuchisonqachej, chaypitaj tukuy imata Pascua mikhunata mikhunanchejpaj wakichinkichej, nispa.

13Paykuna rispa, imaynatachus Jesús nisqanman jina tarerqanku, chaypitaj Pascua mikhunata wakicherqanku.

14Mikhuna phani chayamojtin, Jesusqa kuraj kachankunawan khuska mikhunanpaj tiyaykorqa. 15Jinapi pay nerqa: Manaraj ñak'arishaspa, noqa maytapuni kay Pascua mikhunata qankunawan mikhuyta munarqani. 16Noqataj niykichej: Manaña ujtawan Pascua mikhunata qankunawan mikhusajchu, Diospa kamachiyninpi chay junt'akunankama, nispa.

17Chantá Jesús copata oqharispa, Diosman pachis niytawan, nerqa: Sapa ujniykichej kay copamanta ujyaychej. 18Nillaykichejtaj: Manaña uva poqoymanta ujtawan ujyasajchu Dios kamachiyta qallarinankama, nispa. 19Chaymanta, t'antatañataj oqharispa, Diosman pachis nerqa, paykunaman jaywaspataj, nerqa: Kayqa ukhuymin, mayqenchus qankunarayku qosqa kanqa. Kay jinata ruwaychej noqamanta yuyarikunaykichejpaj, nispa.

20Jinallatataj mikhojtinkukama, Jesús vinoyoj copata oqharispa, nerqa: Kay copapi vinoqa yawarniywan ninakun, chaywantaj Dios qankunawan mosoj tratota ruwan, chaytaj qankunarayku jich'asqa kanqa. 21Chaywanpis, pichus wasanchawaspa awqayman jaywaykuwajqa kunan noqawan khuska mikhushan. 22Kayta sut'ita niykichej: Runaj Churin wañunanpuni tiyan, kamachisqa kasqanman jina. Chaywanpis ay, chay runamanta, pinejtachus jap'ichisqa kanqa, chaymanta, nispa.

23Chantá Jesuspa yachachisqankuna paykunapura tapunakuyta qallarerqanku, mayqenchus paykunamanta chayta ruwaj kanman, chaymanta.

Pitaj aswan kurajpaj qhawasqa kanman?

24Chantá Jesuspa kuraj kachankuna siminakuyta qallarerqanku mayqenninkuchus aswan kurajpaj qhawasqa kanankumanta. 25Jesustajrí nerqa: Kuraj kamachejkunaqa suyukunata kamachishaspa, chay llajtayojkunata munayninkuman jina apaykachanku. Chaywanpis paykuna allin ruwajkuna, nispa sutichachikunku. 26Qankuna ukhupirí mana ajinachu kanqa. Manachayqa qankunamanta pichus kuraj kayta munajqa sullk'a jinalla kachun, kamachej kayta munajtaj kamachi jinalla kachun. 27Chantapis mayqentaj aswan kurajpaj qhawasqa kanmanri: Mesapi tiyaspa qarachikojchu, chayrí mikhunata qarajchu? Manachu mesapi tiyaykuspa mikhunata qarachikoj kurajpaj qhawasqa kanman? Chaywanpis noqa yachachejniykichej kaspa, qankuna ukhupi mikhunata jaywaj jinalla kashani.

28Noqata mana allinkuna qhatirishawajtin, qankunaqa noqallawanpuni karqankichej. 29Chayrayku imaynatachus Tatay kuraj kamachej kanaypaj noqata churawarqa, ajinallatataj noqa qankunatapis churaykichej kamachejkuna kanaykichejpaj. 30Ajinamanta noqa kamachishajtiy, qankuna noqawan mikhunkichej, ujyankichejtaj ima. Jinallataj kamachina tiyanapi tiyaykunkichej Israelpa chunka iskayniyoj jatun ayllunkunata juzganaykichejpaj, nispa.

Jesús nin Pedro payta qhesachananta

(Mt 26.31-35; Mc 14.27-31; Jn 13.36-38)

31Jesús nillarqataj: Ay, Simón, Supay Satanasqa munan qankunata trigota jina trillaspa wayrachiyta. 32Noqarí qanpaj mañapuyki, mana llawch'iyaspa noqapi atinikunaykipaj. Chayrayku maypachachus noqaman kutirimunki chaypacha, wawqe masiykikunata sinch'ita sayanankupaj kallpachay, nispa.

33Simontaj kuticherqa: Kamachejníy, qanwanqa mana carcelllamanchu rinaypaj wakichisqa kani, astawanqa wañunaypajpis, nispa.

34Jesustajrí kuticherqa: Pedro, ujta nisqayki: Manaraj gallo waqashajtin, qanqa kinsa kutitapuni ninki mana rejsiwasqaykita, nispa.

Ñak'ariy chayamunanmanta

35Chantá Jesús paykunata taporqa: Maypachachus sumaj willayta willaramojta kacharqaykichej mana qolqeyojta, mana wayaqayojta, nitaj waj juk'utayojta chaypacha, imallapis pisisorqachejchu? nispa. Paykunataj kuticherqanku: Mana imapis pisiwarqaykuchu, nispa.

36Jesús nillarqataj: Kunantajrí, qolqeykichej kajtenqa, apakuychej, jinallataj wayaqaykichejtapis. Mana espadayojpis qhatanan p'achanta vendespa, espadata rantikuchun. 37Noqa niykichej: Diospa Qhelqachisqanpi kay qhelqasqa noqapiraj junt'akunan tiyan: Payqa juchasapakunawan yupasqa karqa,#Is 53.12. nispa. Ajinaqa noqamanta imachus qhelqasqa kaj junt'akunanpuni tiyan, nispa.

38Chaypacha paykuna nerqanku: Tukuyta Kamachej Jesús, iskay espadakuna tiyapuwayku, nispa. Paytaj kuticherqa: Chaylla kachun, nispa.

Jesús Getsemanipi Dioswan parlarikun

(Mt 26.36-46; Mc 14.32-42)

39Jesuswan, kuraj kachankunawan ima altopata wasimanta llojsispa, Olivos orqoman rerqanku yachasqa kasqankuman jina. 40Jaqayman chayajtinkutaj, Jesús paykunata nerqa: Diosmanta mañakuychej juchallinaman tanqasqa kaspa ama kasunaykichejpaj, nispa.

41Chantá Jesús paykunamanta karunchakorqa uj rumi choqayman jina, chaypi qonqoriykukuspataj, Diosmanta mañakorqa: 42Tatáy, munankichus chayqa, noqamanta karunchay, imatachus ñak'arinay kashan, chayta. Chaywanpis ama noqaj munaynillay kachunchu, manachayqa qanpa munayniyki ruwasqa kachun, nispa.

43Jinallapi janaj pachamanta uj ángel rikhurimorqa Jesusta kallpachananpaj. 44Anchatañapuni ñak'arishaspataj Jesús aswan sinch'ita Dioswan parlarqa, jump'iynintaj jatuchaj yawar sut'uy jina pampaman sut'orqa.

45Chantá Dioswan parlasqanmanta sayarispa, Jesús yachachisqankunaman kutirerqa, paykunatataj puñushajta tariparqa, sinch'i llakisqa kasqankurayku. 46Chantá Jesús nerqa: Imaraykutaj puñushankichejri? Sayariychej, Diosmanta mañakuychej juchallinaman tanqasqa kaspa ama kasunaykichejpaj, nispa.

Jesusta presochanku

(Mt 26.47-56; Mc 14.43-50; Jn 18.2-11)

47Jesús parlashajtillanraj, ashkha runakuna chayamorqanku, ñawpaqenkutataj ujnin kuraj kachan, Judas sutiyoj jamusharqa. Paytaj qayllaykuspa, Jesusta uyanpi much'aykorqa. 48Jesustajrí nerqa: Judas, ujta much'aykuspachu Runaj Churinta jap'ichinki? nispa.

49Jinapi Jesuswan kajkuna imachus kananta yachaspa, taporqanku: Tukuyta Kamachej Jesús, espadawanchu qonakusqayku? nispa. 50Paykunamanta ujnintaj espadawan wajtaspa, kuraj kaj sacerdotej kamachinpa paña ninrinta qholurparerqa. 51Jesustajrí nerqa: Amaña jinaychejchu, nispa. Jinapitaj chay kamachejpa ninrinta llankhaykuspa, qhaliyacherqa.

52Jesuspa contranpi jamojkuna ukhupi karqanku kuraj sacerdotekuna, Templota qhawajkunaj kamachejninkuna, waj kurajkuna ima. Jesustaj paykunata nerqa: Espadayoj, k'aspiyoj ima noqata jap'ej jamusqankichejqa suwapis kayman jina. 53Sapa p'unchay qankunawan Templopi kashajteyqa, mana jap'iwarqankichejchu. Chaywanpis kunanqa ruwanaykichej phani chayamun, jinallataj laqhayaypa atiynin kallpawan oqharikun, nispa.

Pedroqa Jesusta mana rejsejman tukun

(Mt 26.57-58,69-75; Mc 14.53-54,66-72; Jn 18.15-18,25-27)

54Jesusta presochaspa, chay runakuna kuraj kaj sacerdotej wasinman payta pusarqanku. Pedrotaj karu qhepallanta risharqa. 55Chantá Jesusta presochajkuna chawpi patiopi ninata jap'ichispa, muyuyninman tiyaykorqanku. Chaypi Pedropis tiyaykullarqataj paykunawan khuska. 56Jinallapi uj sipas kamachi Pedrota nina qayllapi tiyashajta rikuytawan, allinta qhawarispa, nerqa: Kay runapis Jesuswan kasharqa, nispa.

57Pedrotajrí nerqa: Mana payta rejsinichu, nispa.

58Qhepatataj wajñataj Pedrota rikuspa, nerqa: Qanpis paykunamanta kanki, nispa. Pedrotajrí kuticherqa: Mana paykunamantachu kani, nispa.

59Chantá tumpamantawan wajñataj nerqa: Kay runapis Jesuswanpuni karqa, imaraykuchus paypis Galileamanta, nispa.

60Jinapi Pedroqa nerqa: Uyariway, manapuni yachanichu imatachus nisqaykita, nispa. Pedro chayta nisqantawankamataj, gallo waqarqa. 61Jinallapi Tukuyta Kamachej Jesús kutirikuspa, Pedrota qhawarerqa. Pedrotaj yuyarikorqa paypa nisqanmanta: Manaraj gallo waqashajtin, kinsa kutita ninki mana rejsiwasqaykita, nispa. 62Patiomanta jawaman llojsispataj, Pedro sonqo nanayta waqarikorqa.

Jesusmanta alqochakunku

(Mt 26.67-68; Mc 14.65)

63Chantá Jesusta qhawaj soldadokuna paymanta alqochakusharqanku, sajmasharqankutaj. 64Ñawinta qhataykuytawantaj, uyanpi laq'arqanku, chantataj taporqanku: Sut'inchawayku: Pitaj sajmasorqa? nispa. 65Paymanta alqochakuspataj, imaymanatawanraj nerqanku.

Jesús Jatun Juntaj ñawpaqenpi

(Mt 26.57-68; Mc 14.53-65)

66Sut'iyamojtenqa, kurajkuna, kuraj sacerdotekuna, Diospa kamachisqanmanta yachachejkuna ima Jatun Juntapi tantakorqanku. Chantá Jesusta chay juntaman pusachimuspa, taporqanku: 67Sichus Diospa kachamusqan Cristo kanki chayqa, sut'ita niwayku, nispa.

Jesustaj kuticherqa: Nisqaykichejchus chayqa, mana nisqayta jap'ikunkichejchu. 68Imamantapis tapojtiy, manallataj kutichiwankichejchu. 69Chaywanpis, kunanmantapacha Runaj Churenqa Tukuy Atiyniyoj Diospa pañanpimin tiyaykukonqa,#Sal 110.1. nispa.

70Chaymanta tukuyninku taporqanku: Chantá qan Diospa Churinchu kanki? nispa. Paytaj kuticherqa: Arí, qankuna ninkichej, nispa.

71Chayta uyarispa, paykunapura ninakorqanku: Imapajña astawan testigokunata munasunmanri? Noqanchej kikinchej paypa siminmanta chayta uyarinchej, nispa.

Currently Selected:

Lucas 22: DQDC

Highlight

Copy