Mateo 26

Jesusta wañuchinankupaj yachachinakunku

(Mc 14.1-2; Lc 22.1-2; Jn 11.45-53)

1Jesús chay tukuy imata yachachiyta tukuytawan, yachachisqankunata nerqa: 2Qankunaqa yachankichej iskay p'unchaymantawan Pascua raymi kananta. Chaypacha Runaj Churinta jap'enqanku cruzman chakataykunankupaj, nispa.

3Chaypachallataj Caifás sutiyoj kuraj kaj sacerdotej pationpi kuraj sacerdotekuna, judiokunaj kurajninkukuna ima tantakorqanku. 4Chaypitaj yachachinakorqanku imaynamantapis Jesusta q'otiyaspa jap'inankupaj, chantá wañuchinankupaj ima. 5Jinapis ninakorqanku: Ama Pascua raymi p'unchaypeqa jap'ichinachu, imaraykuchus runa oqharikuspa, ch'ajwankuman, nispa.

Uj warmi sumaj q'apashaj jawinawan Jesuspa chakinta jawin

(Mc 14.3-9; Jn 12.1-8)

6Chaykama Jesús Betania llajtapi kasharqa, Simonpa wasinpi, pichus ñawpajta llejti onqoyniyoj karqa, chaypapi. 7Jesús mikhushajtintaj, uj warmi chayman yaykumorqa. Payqa sumaj q'apashaj nardo jawinata alabastro rumimanta juch'uy botellapi apamusharqa. Chay jawinataj manchay valorniyoj karqa. Chantá chay warmeqa jawinawan Jesuspa umanta jawiykorqa.

8Jesuspa yachachisqankunatajrí chayta rikuytawan, phiñakuspa nerqanku: Imapajtaj kay warmi jinata chay sumaj q'apashaj jawinata usuchinri? 9Chaytaqa pay ashkha qolqepi vendenman karqa, chay qolqewantaj wajchakunata yanapanman karqa, nispa.

10Jesustajrí chayta uyarispa, paykunata nerqa: Imaraykutaj kay warmipaj rimashankichejri? Chayta noqawan ruwaspaqa, allinta ruwan. 11Wajchakunaqa qankuna ukhupi kallanqankupuni. Noqarí manaña qankunawan unaytachu kasaj. 12Payqa kay sumaj q'apashaj jawinawan ukhuyta jawiwaspa, p'ampakunay p'unchaypaj wakichishawan. 13Kayta sut'ita niykichej: Mayllapipis noqamanta kay sumaj willay willakojtin, kay warmej ruwasqantapis willallanqankutaj, paymanta runa yuyarikunankupaj, nispa.

Judasqa Jesusta jap'ichinanta nin

(Mc 14.10-11; Lc 22.3-6)

14Chaypacha Jesuspa chunka iskayniyoj yachachisqankunamanta ujnin, Judas Iscariote sutiyoj kuraj sacerdotekunaman rerqa. 15Nerqataj: Jesustachus jap'ichiykichejman chayqa, mashkhatataj pagawankichejmanri? nispa. Paykunataj nerqanku: Kinsa chunka qolqeta qosqayku, nispa. 16Chaymantapachataj Judas mask'ayta qallarerqa imaynamantachus Jesusta jap'ichinanpaj.

Jesús Pascua mikhuyta mikhun

(Mc 14.12-25; Lc 22.7-23; Jn 13.21-30; 1 Co 11.23-26)

17Mana Levadurayoj T'anta Mikhuna Raymi qallariy p'unchayta Jesuspa yachachisqankuna payman qayllaykuspa, taporqanku: Maypitaj Pascua mikhuyta wakichinaykuta munankiri? nispa.

18Paytaj kuticherqa: Llajtaman yaykuychej, chay rejsisqanchej runaj wasinman rispataj, niychej: Yachachej Wiraqochiyku nisunki: Willarqayki, chay p'unchay chayamunña. Kunantaj wasiykipi Pascua mikhuyta yachachisqaykunawan khuska mikhusaj, nispa. 19Yachachisqankunataj Jesuspa kamachisqanman jina, Pascua mikhuyta wakichimorqanku.#Dt 16.5-8.

20Ch'isiyaykuytaña Jesusqa chay chunka iskayniyoj yachachisqankunawan mikhoj tiyaykorqa. 21Mikhushajtinkutaj, Jesús nerqa: Kayta sut'ita niykichej: Qankunamanta ujniykichej wasanchawaspa jap'ichiwanqa, nispa.

22Paykunataj ancha llakisqa, ujmanta uj tapuyta qallarerqanku: Wiraqochíy, chay wasanchasojqa mana noqachu kani, icharí? nispa.

23Jesustaj paykunaman kuticherqa: Pichus noqawan khuska kay chuwamanta mikhushan, chaymin jap'ichiwanqa. 24Kayta sut'ita niykichej: Runaj Churenqa wañunanpuni tiyan. Chaywanpis, ay, chay runamanta pichus payta wasanchaspa jap'ichin, chaymanta. Allin kanman karqa chay runapaj mana paqarinan, nispa.

25Chantá jap'ichinan karqa, chay Judasqa Jesusta taporqa: Yachachej Wiraqochi, noqachu kani? nispa. Jesustaj kuticherqa: Arí, qan kanki, nispa.

26Paykuna mikhushajtinku, Jesús t'antata oqharispa, Diosman pachis nerqa. Chantá chay t'antata partiytawan, yachachisqankunaman jaywaspa, nerqa: Jap'iychej, mikhuychejtaj. Kaymin ukhoyqa, nispa.

27Chantá copata oqharispa, Jesús ujtawan Diosman pachis nerqa. Paykunaman jaywaspataj, nerqa: Kaymanta tukuyniykichej ujyaychej. 28Kaymin yawarneyqa, chaywantaj Diosqa qankunawan mosoj tratota ruwan, chaytaj jich'asqa kanqa ashkha runaj juchanku pampachasqa kananpaj.#Ro 3.25; Ef 2.13; 1 Jn 1.7. 29Kayta sut'itapuni niykichej: Manaña ujtawan vinota ujyasajchu, Diospa kamachiyninpi kaspa, mosoj vinota qankunawan khuska ujyanaykama, nispa.

Jesusqa Pedro qhesachananta sut'inchan

(Mc 14.26-31; Lc 22.31-34; Jn 13.36-38)

30Chantá uj salmota takiytawan, Olivos orqoman rerqanku. 31Chaypacha Jesús paykunata nerqa: Kunan ch'isi tukuyniykichej noqata saqerpariwankichej. Diospa Qhelqachisqanpi nin: Michejta wañuchisaj, ovejakunataj ch'eqeranqanku,#Zac 13.7. nispa. 32Chaywanpis wañusqamanta kawsarimpuspa, noqa ñawpaqeykichejta Galileaman risaj,#Mt 28.7,10,16; Mc 16.7; Jn 21.1. nispa.

33Chantá Pedroqa Jesusta nerqa: Tukuyninku saqesojtinkupis, noqaqa manapuni jayk'ajpis saqerparisqaykichu, nispa.

34Jesustaj payta nerqa: Kayta sut'ita niyki: Kunan ch'isipacha, manaraj gallo waqashajtin, kinsa kutita ninki noqata mana rejsiwasqaykita, nispa.

35Pedrotajrí nillarqapuni: Qanwan wañunay kashajtinpis, manapuni nisajchu: Paytaqa mana rejsinichu, nispa. Chay ujkuna yachachisqakunapis kikillantataj nerqanku.

Jesús Getsemanipi Dioswan parlarikun

(Mc 14.32-42; Lc 22.39-46)

36Jesuswan, yachachisqankunawan Getsemaní sutiyoj cheqaman chayajtinku, pay nerqa: Kaypi tiyarikuychej, noqataj jaqayman rispa, Tata Diosniywan parlarikamusaj, nispa.

37Chantá Pedrota, Zebedeoj iskay churinkuna Santiagota, Juantawan ima aswan jaqaynejman pusarispa, Jesús sinch'i llakiywan ñak'ariyta qallarerqa. 38Chaypacha paykunata nerqa: Sonqoyqa llakiymanta manchay phutisqa kashan wañunaypaj jina. Qankuna kayllapi qhepakuychej, qhawaychejtaj ama puñuspalla, nispa.

39Aswan ñawpajman rispataj, Jesús pampakama k'umuykuytawan, Diosmanta mañakorqa: Tatáy, atikojtenqa, imatachus ñak'arinaymanta kacharichiway ari. Chaywanpis, ama noqaj munaynillay kachunchu, manachayqa qanpa munayniyki ruwasqa kachun, nispa.

40Chaymanta Jesús kutimuspa, chay kinsa yachachisqankunata puñurashajta tariparqa. Pedrotataj nerqa: Manachu uj phanillatapis mana puñuspalla noqawan kayta aterqankichej? 41Rijch'arisqa kaychej, ama puñuspa Dioswan parlarikuychej, juchaman tanqasqa kaspa ama kasunaykichejpaj. Sut'ita niykichej: Qankunaqa sonqoykichejpi kasuyta munankichej. Chaywanpis ukhuykichejqa pisi kallpayoj, nispa.

42Chantá Jesús ujtawan rispa, mañakullarqataj: Tatáy, ñak'arinaypuni kajtenqa, qanpa munayniyki ruwasqa kachun, nispa. 43Maypichus chay kinsa yachachisqankuna kasharqanku, chayman kutimuspataj, Jesús watejmanta paykunata puñushajta tariparqa, imaraykuchus paykuna puñuywan atichikuspa k'aywisharqanku.

44Jinapi paykunata saqespa, Diosmanta mañakoj kutillarqataj. Kinsa kaj mañakuyninpipis kikillantataj mañakorqa. 45Chaymanta kutimuspa, Jesús yachachisqankunata nerqa: Puñushallankichejrajchu? Samarikushankichejrajchu? Ñapis imachus kanan kashan, chay junt'akushanña. Runaj Churenqa juchasapakunaj makinpiña kashan. 46Jatariychej, jaku. Jap'ichiwajqa qayllapiña, nispa.

Jesusta presochanku

(Mc 14.43-50; Lc 22.47-53; Jn 18.2-11)

47Jesús parlashajtillanraj, Judas chayaykamorqa. Payqa Jesuspa chunka iskayniyoj yachachisqankunamanta ujnin kaj karqa. Jinallataj paywan khuska ashkha runakuna jamorqanku espadayoj, k'aspiyoj ima. Chay runakunata kuraj sacerdotekuna, llajtamanta kurajkuna ima kachamusqanku. 48Jesusta jap'ichej Judastaj chay presochajkunawan yachachinakusqaña imaynatachus Jesusta jap'ichinanta: Pitachari noqa much'aykusaj, chay kanqa. Payta jap'ispa, presota apankichej, nispa. 49Ajinataj Judasqa Jesusman qayllaykuspa, nerqa: Imaynalla Yachachej Wiraqochíy, nispa. Jinaspataj, uyanpi much'aykorqa.

50Chantá Jesús payta nerqa: Kawsaqe, ruwanaykitaqa ruwallayña, nispa. Jinapitaj Judaswan jamojkuna chimpaykuspa, Jesusta presocharqanku.

51Chayllapi Jesuswan kajkunamanta ujnenqa espadanta sik'iytawan, wajtaspa kuraj kaj sacerdotej kamachinpa ninrinta qholurparerqa. 52Jesustajrí nerqa: Espadaykita waqaychakapuy. Espadawan maqanakojkunaqa espadallawantaj wañuchisqa kanqanku. 53Manachu yachanki: Tataymantachus yanapanawanta mañakuyman chayqa, kunanpacha angelninkunamanta chunka iskayniyoj tropamanta astawan kachamuwanman? 54Ajinachus kanman chayqa, imaynamantataj Diospa Qhelqachisqan junt'akunmanri? nispa.

55Chantá Jesús chay runakunata taporqa: Suwata jinachu jap'iwaj jamunkichej, espadayoj, k'aspiyoj ima? Sapa p'unchay Temploj pationpi yachachishajtiy, imaraykutaj mana jap'iwarqankichejchuri? 56Chaywanpis kay jinata ruwashankichej, imaraykuchus Diosmanta sut'inchajkunaj nisqankoqa junt'akunan tiyan, nispa. Chantá tukuynin yachachisqankuna Jesusta sapallanta saqerparispa, ayqerikaporqanku.

Jesús Jatun Juntaj ñawpaqenpi

(Mc 14.53-65; Lc 22.66-71; Jn 18.12-14,19-24)

57Chantá Jesusta jap'ispa, presochajkunaqa payta pusarqanku kuraj kaj sacerdote Caifaspa wasinman, maypichus kuraj sacerdote, Diospa kamachisqanmanta yachachejkuna, kurajkuna ima tantasqa kasharqanku, chayman. 58Pedrotajrí karu qhepallanta Jesusta qhaterqa kuraj kaj sacerdotej wasinpa pationkama. Chayman yaykuspataj, Templota qhawaj soldadokunawan khuska tiyaykukorqa. Chaypi pay suyarqa imapichus chay tukuy ima tukukunanta yachananpaj.

59Chaykama kuraj sacerdotekuna, Jatun Juntamanta kajkunapiwan ima, llulla testigokunata mask'arqanku Jesusta ch'ataykunankupaj, jinamanta wañuchisqa kananpaj. 60Chaywanpis ni imatapis tarerqankuchu. Ashkha llulla testigokuna jamorqanku chaypis, mana Jesuspi ima juchatapis tarerqankuchu payta ch'ataykunankupaj jina.

Qhepamantajrí iskay llulla testigokunawan rikhurimullarqankutaj. 61Paykunataj nerqanku: Kay runata nejta uyarerqayku: Diospa Templonta urmachiyta atiyman, kinsa p'unchaypitaj ujtawan sayarichiyman, nispa.

62Chaypacha kuraj kaj sacerdote sayarispa, Jesusta taporqa: Manachu imatapis kutichikunki? Imamantataj kaykuna ch'ataykusunkuri? nispa. 63Jesustajrí ch'inlla kakorqa.#Mt 27.12,14; Lc 23.9; Jn 19.9; Is 53.7.

Chantá kuraj kaj sacerdoteqa Jesusta nerqa: Kawsashaj Diospa sutinpi niwayku: Qanchu Diospa kachamusqan Cristo kanki, Diospa Churin? nispa.

64Jesustaj kuticherqa: Arí, qan ninki. Astawanqa niykichej: Kunanmanta ñawpajman Runaj Churinta rikunkichej Tukuy Atiyniyoj Diospa pañanpi tiyashajta, jinallataj phuyu patapi janaj pachamanta jamushajta ima,#Sal 110.1; Dn 7.13. nispa.

65Chayta uyariytawankama, kuraj kaj sacerdote patanchana p'achanta llik'irakuspa, nerqa: Kay runaqa Diospa contranpi millayta riman. Imapajñataj testigokunata munanchejri? Qankuna uyarinkichejña Diospa contranpi imaynatachus millayta rimasqanta. 66Kunanqa ima ninkichejtaj? nispa. Paykunataj kuticherqanku: Payqa juchayoj. Chayrayku wañuchisqa kanan tiyan,#Jn 19.7; Lv 24.15-16. nispa.

67Chayta niytawantaj, paykuna Jesuspa uyanman thoqaykorqanku, laq'arqankutaj. Wajkunataj uyanpi sajmaspa, 68nerqanku: Yu Cristo, sut'inchawayku pichus sajmasusqanta, nispa.

Pedroqa Jesusta mana rejsejman tukun

(Mc 14.66-72; Lc 22.56-62; Jn 18.15-18,25-27)

69Pedro jawa patiopi tiyasqa kashajtin, uj sipas kamachi qayllaykuspa, nerqa: Qanpis Galilea llajtayoj Jesuswan purej kanki, nispa.

70Pedrorí tukuypa ñawpaqenpi nerqa: Mana jinachu, nitaj yachanichu imamantachus parlasqaykita, nispa.

71Pedro punkuman qayllashajtintaj, waj sipas kamachiñataj payta rikuspa, chaypi kajkunata nerqa: Kaypis Nazaret llajtayoj Jesuswan kasharqa, nispa. 72Pedrotajrí tiluspa, watejmanta nerqa: Mana chay runata rejsinichu, nispa.

73Uj chhikanmantawan, chaypi kashajkunañataj Pedroman qayllaykuspa, nerqanku: Qanqa paykunamantapuni kanki, imaraykuchus parlasqaykipi sut'i yachakun, nispa. 74Jinapi Pedroqa tiluspa, nerqa: Dios jasut'iwachun llullakushanichus chayqa. Manapuni chay runata rejsinichu, pichus kanpis, nispa. Chayta Pedro nisqantawankamataj, gallo waqarqa. 75Chantá Pedro yuyarikorqa Jesús kayta nisqanmanta: Manaraj gallo waqayta qallarishajtin, kinsa kutita ninki mana rejsiwasqaykita, nispa. Jawaman llojsispataj, Pedroqa sonqo nanayta waqarikorqa.

Currently Selected:

Mateo 26: DQDC

Highlight

Copy