Marcos 4
4
Tarpoj runamanta rijch'anachina
(Mt 13.1-9; Lc 8.4-8)
1Ujtawan Jesús yachachiyta qallarerqa Galilea qocha kantupi. Chaymantaj ashkha runakuna tantakamorqanku. Chayrayku Jesús boteman yaykuspa tiyarikorqa, runakunataj qocha kantupi kasharqanku.#Mc 3.7-9; Lc 5.1-3. 2Jesustaj tukuy imata rijch'anachinawan paykunaman yachacherqa.
Ujta yachachishaspa, kay jinata nerqa: 3Kayta uyariychej: Uj runa tarpoj llojsisqa. 4Grano mujuta t'akashajtintaj, wakin muju ñanman urmasqa, p'isqokunataj jamuspa, mikhukapusqanku. 5Wakin mujoqa rumirara pisi jallp'ayojman urmasqa. Chay mujutaj usqhayllata p'utumusqa mana ukhu jallp'ayoj kasqanrayku. 6Chaywanpis inti llojsimuspa, p'utumojta qawirparichisqa, mana allin saphiyoj kasqanraykutaj ch'akipusqa. 7Wakin mujurí khishkarara qhora chawpinman urmasqa, qhorataj wiñaykuspa, p'utumojta p'ampaykusqanku. Chayrayku mana poqosqachu. 8Wakin mujutajrí sumaj jallp'aman urmaspa, p'utumusqa, jinataj poqonankama sumajta wiñasqa. Poqoynintaj kay jina karqa: Wakinpi uj mujullamanta kinsa chunkata poqosqa, wakinpi sojta chunkata, wakinpitaj pachajta, nispa. 9Chantá Jesús nerqa: Pichus nisqayta jap'ikuyta munajqa allinta uyarichun, nispa.
Imaraykutaj Jesús rijch'anachinawan yachachinri?
(Mt 13.10-17; Lc 8.9-10)
10Aswan qhepaman Jesús sapallan kashajtin, chay qayllapi kajkuna, chunka iskayniyoj yachachisqankuna ima payman chimpaykuspa, chay rijch'anachinamanta taporqanku. 11Jesustaj kuticherqa: Imachus kanqa Dios kamachishajtin, chay pakasqa yachayta Dios qankunaman rejsichisunkichej. Waj runakunamanrí rijch'anachinallawan yachachina tiyan. 12Ñawpa qhelqakunapi kay jinata nin:
Qhawashaspapis, mana yachakonqankuchu.
Uyarishaspapis, mana entiendenqankuchu.
Ajinamanta, Diosman mana kutirikonqankuchu,
juchankupis manallataj pampachasqachu kanqa,#Is 6.9-10; Jn 12.40; Hch 28.26-27. nispa.
Jesús tarpojmanta rijch'anachinata sut'inchan
(Mt 13.18-23; Lc 8.11-15)
13Chaymantataj Jesús paykunata taporqa: Manachu kay rijch'anachinata entiendenkichej? Imaynamantataj chantá waj rijch'anachinakunata entiendewajchejri? 14Mujuta tarpojqa Diospa simi nisqanta willarajmin. 15Wakin runaqa ñan patapi urmasqa muju jina kanku. Paykunaqa Diospa nisqanta uyarinku. Chaywanpis Supay Satanás jamuytawan, runaj sonqonpi tarpusqa Diospa nisqanta qonqachin.
16Ajinallataj wakin runakuna rumirara jallp'a jina kanku, maymanchus muju t'akakusqa, chay jina. Paykunaqa Diospa nisqanta uyariytawankama, kusisqa jap'ikunku. 17Chaywanpis mana allin saphichasqa kasqankurayku, mana unaytachu sayanku. Manachayqa Diospa nisqanta jap'ikusqankurayku llakiy jamojtin, chayrí qhatiykachasqa kanku chayqa, paykuna usqhayllata urmanku.
18Wakin runakuna khishkarara jallp'a jina kanku, maymanchus muju t'akakusqa, chay jina. Paykuna Diospa nisqanta uyarinku. 19Chantá sonqonkupi kay kawsaymanta phutikuykunawan, qhapajyayta munanawan, waj imakunata munapayaywan ima Diospa nisqanta p'ampaykunku. Chayrayku Diospa munasqanta mana ruwayta atinkuchu.
20Wakin runakunatajrí sumaj jallp'a jina kanku, maymanchus muju t'akakusqa, chay jina. Paykunaqa Diospa simi nisqanta uyarispa, sonqonkupi jap'ikunku, chaymantataj sumaj poqoyta jina rikuchinku. Chay runakunamanta wakenqa sapa mujumanta kinsa chunkata poqoj jina kanku, wajkuna sojta chunkata, wajkunataj pachajta, nispa.
Lamparamanta rijch'anachina
(Lc 8.16-18)
21Chantá Jesús nillarqataj: Pillapis lamparata jap'ichispaqa, wich'iwan k'umpuykunmanchu, chayrí, puñuna uraman churaykunmanchuri? Mana, icharí? Manachayqa allinta k'anchananpaj lamparataqa patamanpuni churana. 22Kikillantaj tukuy pakasqa kajpis, mana sut'inchasqa kajpis sut'inchakonqapuni. 23Pichus nisqayta jap'ikuyta munajqa allinta uyarichun, nispa.
24Jesús nillarqataj: Imatachus uyarisqaykichejta allinta watuychej. Imaynatachus wajkunawan ruwankichej, chay jinallatataj Dios qankunawan ruwanqa,#Mt 7.2; Lc 6.38. chaymantapis astawanraj. 25Kapuyniyojmanqa Dios astawanraj qonqa. Mana kapuyniyojmantatajrí pisi kapusqantapis qhechonqa, nispa.#Mt 13.12; 25.29; Lc 8.18; 19.26.
P'utoj mujumanta rijch'anachina
26Jesús nillarqataj: Diospa kamachiynenqa mujuta jallp'aman t'akaj runaman rijch'akun. 27Chay runaqa tuta puñun, p'unchaypitaj rijch'arin, chaykamataj mujoqa p'utumuspa, tuta p'unchay wiñan, mana paypa yachasqallan. 28Chantá jallp'aqa kikillanmanta p'utumoj yurata ñawpajta wiñachin, qhepanta espigachin, chantá sumaj granota espigapi poqochin. 29Trigo sumaj poqosqaña kajtintaj, runaqa hozewan ruthuyta qallarin, imaraykuchus ruthuna p'unchay chayamunña, nispa.#Jl 3.13; Ap 14.15.
Mostaza mujumanta rijch'anachina
(Mt 13.31-32; Lc 13.18-19)
30Chaymanta Jesús nillarqataj: Imaynataj kanman Diospa kamachiynin? Ima rijch'anachinawantaj chaymanta yachachisunmanri? 31Diospa kamachiynenqa mostaza mujuman rijch'akun. Chay mujoqa jallp'api tarpusqa mujukunamanta nisqa aswan juch'uysitu. 32Jinapis tarpusqaña kaspa, tukuy qhorata atipanankama wiñan. P'alqankunaqa jatuchajta wiñanku, p'isqokunapis thansankunapi thapachakunku,#Ez 17.23; 31.6; Dn 4.12,20-21. nispa.
Jesús rijch'anachinawan yachachin
(Mt 13.34-35)
33Jesús chay jina rijch'anachinakunawan runakunaman Diospa nisqanta willaj, maychus entiendeyta atisqankuman jina. 34Jesusqa runakunaman rijch'anachinakunawanpuni yachachej. Yachachisqankunamantajrí sapallankupi kajtinku tukuy imamanta sut'inchaj.
Jesús sinch'i wayrata, phiñarikoj qochatawan thañichin
(Mt 8.23-27; Lc 8.22-25)
35Chay p'unchay ch'isiyashajtinña, Jesús yachachisqankunata nerqa: Jaku, qochaj chimpanman rinachej, nispa. 36Runakunata kacharparipuspataj, yachachisqankuna Jesusta chimpaman pusarqanku, mayqen botepichus kasharqa, chaypi. Waj botekunapipis wajkuna rillarqankutaj. 37Chantá may sinch'ita wayramuyta qallarerqa, yakupis qhollchoqeyaspa, boteman junt'aykusharqaña.
38Jesustajrí botej qhepannejpi sawnanaman umanta atiykukuspa, puñukaporqa. Chantá yachachisqankuna payta rijch'arichispa, nerqanku: Yachachejniyku, manachu llakikunki, yakuman chinkaykushanchejñaqa? nispa.
39Jesustajrí jatarimuspa, wayrata k'amerqa, qochatapis nerqa: Ch'in kay. Thañiriy, nispa. Wayrataj thañerqa, yakutaj tiyaykorqa. 40Chantá Jesús paykunatañataj nerqa: Imaraykutaj kay jinatapuni mancharinkichejri? Manachu noqapi atinikunkichej? nispa.
41Paykunarí manchariywan t'ukuspa, ninakorqanku: Pitaj kay runari, wayrapis, mama qochapis payta kasunankupajri?#Sal 107.28-29. nispa.
Currently Selected:
Marcos 4: DQDC
Highlight
Share
Copy
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
