yohane 21

mi'usnu tomo pitu ci tesi ho aopa'to

1ataveisi ta hi'hioa tan'e. mo i'vaho i'nʉskʉ yonto aaskiti to etʉpʉ ne tipilia 'o iesu ho aopa'to to tesi. 'o hiasi aopa'to maitan'e mo maica: 2ne mio, i'o saimong petelo, hopngo 'o tos'ongkasi ci tomas, 'o natanyo ci coukaana ne ngalilaya, 'o yoso ci oko to sipitai, ho i'omon'a yoso ci tesi mo acʉhʉ noteuyunu. 3isi mi'usni to saimong petelo ho yainca: <te'on'a tokeʉpʉ no yoskʉ.>

acʉhʉ mainca: <temia to'ofeihni suu.> micu acʉhʉ yuyafo, smo'apangʉ; at'inghi cono feʉngna uk'a ci isi maka tolʉi ci cuma. 4ne mon'a aʉlʉ esmomho 'o hie, mo yac'ʉ to aaskiti to chumu 'o iesu, at'inghi o'a ihe cohivi to tesi ho zou i'o iesu. 5isi mi'usni to iesu ho yainca: <nanghia, pano imucu tolʉi ci yoskʉ?>

ihe yut'inga: <ma uk'a.>

6yainca to iesu: <to'seni ta vhona ta 'apangʉ si keʉpʉ, 'apanto yoskʉsi.> ihecu to'seni 'o keʉpʉ, at'inghi o'aihe ev'ohi esifova, maica homo angu man'i 'o isi tolʉi ci yoskʉ.

7isi yainca to lasi ngohia to iesu ci tesi 'o petelo: <'a i'o nooe'oca!> isi talʉi to saimong petelo ho isi yainca zou nooe'oca, osni mayo to yʉsʉ ho efkʉezeni to feangosi (moso yuesih'i ne mio), mofti'i su'to chumu. 8'o mocmo ci tesi mo smo'apangʉ te sma'usnu to aaskiti, acʉha esifova 'omo cono keʉpʉ ci yoskʉ. ne mio o'anamo covhi 'o aaskiti, mon'a asonʉ 100 meeta 'o hiasi covhi. 9micu tmo'poyapo, aiti 'omo yuhcuyu ci ksiksi, panto yoskʉ ho pang to skoskopnasi. 10mi'usni to iesu ho yainca: <poa piyo to imun'a tolʉi ci yoskʉ.>

11mo uhto 'apangʉ 'o saimong petelo, tas'usna to aaskiti 'o keʉpʉ; 'o yoskʉ to keʉpʉ mo acʉhʉ maamtanʉ, mo se'conza meemohʉuteu 'o hiasi man'i. e'vono maica 'o hia man'i to yoskʉ, o'a mo aekieki 'o keʉpʉ. 12isi mi'usni to iesu ho yainca: <tamucula uhtan'e ho otaseoni.> uk'a cimo cihi cinte smeecʉ'ho tuocosʉ to tesi ho mainca <zou siya suu>, maica mo acʉhʉ bochio ho zou i'o nooe'oca. 13cu emo'usnu 'o iesu, aangaeza 'o pang, yaica ho aangaeza 'o yoskʉ.

14na eni zou ataveisi ne moso smoevovei 'o iesu, mo i'toteuhu aopa'to to tesi.

petelo ho iesu

15ataveisi ne micu acʉhʉ oepʉngʉ, isi tuocosi to iesu 'o saimong petelo: <oko to yohane saimong, na lako hia ngohia a'o mio tosa'ohe tamo ma'maica?>

isi yut'inga: <nooe'oca, 'aos'o, osko cohivi la'u ngohia suu.>

yainca to iesu: <teko p'ooyoskui 'e okono moatʉ'nʉ'u.> 16isi i'vaha tuocosi to iesu: <oko to yohane saimong, osko ngohia a'o?>

isi yut'inga: <nooe'oca, 'aos'o, osko cohivi la'u ngohia suu.>

mi'usni to iesu ho yainca: <teko aʉt'ʉca 'e moatʉ'nʉ'u.> 17isi i'toteuha tuocosi to iesu: <oko to yohane saimong, osko ngohia a'o?>

maica ho isi acngucnguha i'toteuha tuocosi to iesu 'o petelo ho yainca <osko ngohia a'o> micu aha'o nac'o, mi'usnu to iesu ho yainca: <nooe'oca, uk'a ci osko o'te cohivi, osko cohivi la'u ngohia suu.>

yainca to iesu: <teko p'ooyoseʉi 'e moatʉ'nʉ'u. 18te'o bumemeala eʉsvʉta suu, ne mosun'a haah'o, mosula iachi smoeputu to snoeputa, maino koyu ho biyavovei; at'inghi ho takocu mameoi, takola hoʉsʉzneni si emucusu, tahela seo'eisi no mocmo, ho e'usna no o'a teko 'ucia usa.> 19('e e'e to iesu isi pahsansana tena mainenu na tasi hia mcoi to petelo, ho psoevohngʉ to hamo.) ecnguhu, isi ivaha mi'usni to iesu ho yainca: <teko to'ofeihni a'o!>

iesu ho i'o mocmo ci tesi

20miezuhu 'o petelo, aiti 'o lasi songohia to iesu ci tesi mo to'ofeihni. ('o tesi ic'o moso smacmu'u to iesu ne moso oyofonʉ, tuocosi <nooe'oca, zou siya nate himhohioa ho phieni suu>.) 21isi teolʉi to petelo, cu tuocosi 'o iesu: <nooe'oca, 'e cou eni tena mainenu na tasi atotavei?>

22yut'inga to iesu: <hoci'u poa yaansoua ho toc'ʉha ho ta'ucu cmʉ'ho, o'ate natʉ'ca no teko hi'hioa. tekoc'o iachi to'ofeihni a'o!>

23'e e'e eni ohela na'na psoyom'a to 'ayumona to mosola to'ofeihni to iesu ci cou, yainca o'ate mcoi 'o tesi ic'o, a'ʉmtʉsi, o'a isi yainca to iesu o'ate mcoi, maisi yainca <hoci'u poa yunsoua ho toc'ʉha ho ta'ucu cmʉ'ho, cuma na tesi natʉ'ca no teko hi'hioa>.

24'e cou eni 'aeno 'omo 'akasi ta hi'hioa tan'e ci tesi; isi acʉha tatotoyangzi 'e hi'hioa eni. ito cohivi 'e isi 'akasi zou acʉhʉ aʉ'ʉmtʉ.

pahtaveiya

25'o ohsila hioa to iesu ci mocmo ci hi'hioa moson'a engha man'i, hoci macoconi tatotoyangzi, os'o yainca no koyu'u na tesi hia man'i no tposʉ o'ate nomso ta hpʉhpʉngʉ.

Currently Selected:

yohane 21: bsnfe

Highlight

Copy