yohane 7

iesu ho i'o nanat'ot'ohaesasi

1ataveisi ta hi'hioa, mo mimimiyo to mia'usnu ne ngalilayasoo 'o iesu, o'amo mici yuavovei ta mia'usnu ta yutaya, maica ho ihe'so 'ucia opcoza to so'ehti to couyutaya. 2tec'u mon'i esmi 'o meeteova to couyutaya, 3ko'ko ihe mi'usni to nat'ohaesasi 'o iesu ho yainca: <teko mongoi tan'e ho uhne yutaya, ko'ko poa aitneni to tesisu 'e osko hi'hioa. 4'e cou hote mici yaa ongkoa, o'ate meelʉ auc'oc'ou yaahioai. ho oskoeno peelʉi hioa 'emo maica, 'antekoeno peispa'teni ta tuhcu ta yatatiskova!> ( 5'iya mamo'so maezo o'temocu tmaa'uzo 'o nanat'ot'ohaesasi.)

6isi mi'usni to iesu ho yainca: <o'amocu mo mic'ʉhi 'e hie'u; at'inghi lamu asngʉcʉ meemeelʉ. 7o'atehe sʉ'nova ta yatatiskova muu, maihe sʉ'nova a'o, maica ho la'u conino pas'osi homo kokuzo 'o lahe peipeis'ausna. 8'atemueno iachi toa meesi, o'amocu te'o uhne'e maitan'e#<o'amocu te'o uhne'e maitan'e> panto piyo ci tposʉ noana'o isi yainca <o'a te'o uhne'e>., maica ho o'amocu mo mic'ʉhi 'e hie'u.> 9ataveisi ne isi e'e to iesu eni. mosoc'on'a nongaco ta ngalilaya.

meeteova 'o iesu

10ataveisi ne mohcu e'ohʉ 'o nat'ohaesa to iesu, mo maezo e'ohʉ 'o iesu ho toa meesi. o'amo apa'to emoyafo, moc'o auc'oc'ou e'ohʉ. 11to hiesi no meesi, ihe eikikieingza i'ima to so'ehti to couyutaya 'o iesu, 'ucia cohivi na isi yoni.

12ihe yu'tiee'ei tamo botngonʉ ci cou 'o iesu, panto mo mainca: <mo ʉmnʉ ci cou 'o iesu>; pantomo mainca: <ma o'a, mala poot'ou ta 'tohʉngʉ ta mo botngonʉ ci cou.> 13at'inghi o'aihe seecʉ'ha apa'ta engha 'o lasi hi'hioa, maica la ngoheʉngeʉ to masoso'ehti to couyutaya.

14cu asonʉ taicosi no memeesi, micu uhto seiten 'o iesu ho mo'ma'cohio to cou. 15'o masoso'ehti to couyutaya mo acʉhʉ na'no yamci, yainca: <'e cou eni o'a mosola ahtu fiifiho no lema'cohio, maincis'a maica 'e hiasi motposʉ?>

16yainca to iesu: <'e os'o po'pa'cohivneni o'amo i'mi ta iachi'u, mamo i'mi tomo popeosmuhnu a'o. 17'emo cihi ci cou hoci ma'po'ʉ'ʉmtʉ peis'ofeihni no 'tohʉngʉ to hamo tesicu cohivi, 'e hia'u mo'ma'cohio nenusino mo i'mi to hamo hocieno c'o iachia'u e'e. 18i'o lac'o envonvo, la micic'o biebimi no iachi psoevohngʉ; at'inghi 'ola bikoyu no poa psoevohngʉ 'o mo popeosmuhnu, 'aeno ic'o namo mou'ʉmtʉ ho o'te emeknuyu. 19o'aisis'aeno epeaska muu to moose 'o hoolicu? at'inghi uk'a ci mimu cihi cinte noyʉcʉ to hoolicu. cuma na imu koa 'ucia opcoza a'o?>

20mo yut'ingi 'o botngonʉ: <isi cʉnghi no hicu suu, siya namo mici opcoi suu?>

21yainca to iesu: <os'o hioa 'omo meoino hi'hioa nemo 'ansokunici, mimu acʉhʉ yamci. 22at'inghi ohsi cucufni to moose na muu ho hioa na s'e'honga (a'ʉmtʉsi o'amo i'mi to moose na s'e'honga. mamo i'mi no nia maameoimu), lamucu yonta 'ansokunici ho hioa na s'e'honga ta foinana. 23hoci yono 'ansokunici ho hioa ta cou na s'e'honga, na atuhcusi te noʉt'ʉci 'o hoolicu to moose, hocieno maica, ho mi'o yonta 'ansokunici ho a'sʉftona poa yov'o yoayokeo 'emo cihi ci cou, mainci temu aac'o yu'hanga a'o? 24'ote buhmi ta yafana ho yʉsvʉtʉ no zou ho o'a, la boemi no mouhmʉskʉ ci svʉta teno emio.>

zounana kilisto na taini

25pantola mainca ci cou ta 'elusalemu: <o'as'aeno taini 'o lahe yuseiseita to masoso'ehtito ho 'ucia opcoza? 26tekoeno aiti, mita apa'to ya'ei, ci uk'a cimoeno yuyafo ho yu'hango! ihen'asi a'ʉmta cohivi zou kilisto taini? 27at'inghi'so hotena esmi 'o kilisto, uk'a cite bochio te i'mi no nenu, ina'so taini ito na'na asansana 'o ita i'mizi.>

28tuhcusi ne mio, mo yonto seiten 'o iesu ho mo'ma'cohio to cou, mo tmunoi ho mainca: <imu a'ʉmta honga a'o, ho cohivi na os'o i'mizi? ho mi'o cmʉ'ho, o'amos'a i'mi no iachi'u 'tohʉngʉ. i'omo popeosmuhnu a'o zou mou'ʉmtʉ. o'a imu honga, 29ma os'o honga; maica ho mi'o i'mi to lasi yoni. 'aeno ic'o 'omo popeosmuhnu a'o.>

30ihecu 'ucia tʉtpʉta 'o iesu, at'inghi uk'a cimo smeecʉ'ho, maica ho o'amocumo esmi na hiesi. 31to 'ayumona tamo botngonʉ mio maezo botngonʉ 'omo tmaa'uzo to iesu; ihe yainca: hote cmʉ'ho na kilisto teenana man'ihe taini na ntesi hioa ci po'e?>

tʉtpʉta to kengsacu 'o iesu

32talʉi to coufalisai ho ihe yu'tiee'ei to botngonʉ 'o iesu, mo toehungu 'o saisicoo ho smuhnu to kengsacu ho tʉtpʉta 'o iesu. 33isi yainca to iesu: <a'en'a ake'i'u hie ho te'o no'upu muu, ataveisi ta'ucu yuovei to isi yoni tomo popeosmuhnu a'o ci ic'o. 34tamu i'ima a'o, at'inghi o'a temu elʉa; maica i'o te'o usa ci hpʉhpʉngʉ, o'atemu peelʉi usa.>

35mo yupa tuocosʉ 'o masoso'ehti to couyutaya: <ma mitas'a akoyu no uhnenu, te o'te poa elʉaneni a'to. tetan'asi uhto mo nopeaski to mahohosa ne ngilisia ci couyutaya ho mo'ma'cohio to coungilisia? 36'o isi yainca <<temu i'ima a'o, at'inghi o'a temu elʉa>> ho <<i'o te'o usa ci hpʉhpʉngʉ, o'atemu peelʉi usa>> ma cuma na e'ausnasi ta e'e tan'e?>

yaansou ci chumu no c'oeha

37'o sotavei ci hie to meesi la atva'esi 'aanana'o ci hie. mo yʉc'ʉ 'o iesu, ho tmunoi mainca: <hoci mecu 'e cou, nte uso a'o ho mimo. 38yainca to seiso: <<i'omo tmaa'uzo a'o ci cou. panto mo yaansoua ci chumu te mais'a c'oeha ho i'mi to 'tohʉngʉsi ho moheafo#<hoci mecu 'e cou...moheafo> hocieno yainca <hoci mecu 'e cou, nte uhta os'o yoni, hoci tmaa'uzo a'o 'e cou, nte uhtan'e ho mimo; yainca to seiso: <<panto chumu to c'oeha te i'mi to 'tohʉngʉsi ho moheafo>> >..>> > 39'e e'e to iesu isi pas'usna engha 'ote tmaa'uzo ci cou te tiou no seilei. ne mio o'amocumo ohpueho 'o seilei, maica ho o'amocumo mayo no psoevohngʉ 'o iesu.

nomio to iesu 'o botngonʉ ho youbobai

40to 'ayumona ta mo botngonʉ mo 'enepio ci cou ne ihecu talʉi 'e e'e eni, cu yainca: <ma a'ʉmtʉ i'o eyongensa na 'e cou eni!>

41panto mo maezo mainca ci cou: <zou kilisto taini!>

panto h'unasi ci cou mo mainca: <mainci tes'a i'mi ne ngalilaya 'o kilisto? 42maica ho isi tposi to seiso: 'o kilisto zou mʉntʉ'ca to tavite, te yayo to iachisi emooana to tavite ci veculehemu.> 43micu nomio to iesu 'omo botngonʉ ho youbobai. 44mo piyo ci cou ihe 'ucia tʉtpʉta 'o iesu, at'inghi uk'a cimo smeecʉ'ho.

o'aihe taa'uzva to masoso'ehti to couyutaya 'o iesu

45mo yuovei to saisicoo ho coufalisai 'o kengsacu; ihe tuocosi: <mainci o'te hafa uhtan'e 'o iesu?>

46yut'ingi 'o kengsacu: <uk'a mocu ci moso la mais'a 'o iesu nala hia aomotʉ'ʉ ci cou!>

47yainca to coufalisai: <isicun'asi yaeza pasloʉngvi na muu? 48'o masoso'ehtito ho i'o coufalisai pano mohculaeno tmaa'uzo? 49'emo maica ci o'a mo bocbochio to hoolicu to moose ci maloloʉngʉ mante tiou no patkuzoi!>

50ta taicohe panto nikotemu; ne auyusi ohsicula aiti 'o iesu. isi engahva: 51<'e hoolicuto auyusi no uk'a mocu emzi hocieno o'te auevan'a asansana na a'ʉmtʉsi. isieno teomneni hocic'u yʉsvʉta na kuisisi?>

52ihe yainca: <zoun'asi maezo yane ngalilaya suu? hʉʉlʉlʉi 'o seiso tec'u cohivi, o'ate yuyafo ne ngalilaya na eyongensa#<o'ate yuyafo ne ngalilaya na eyongensa> panto h'unasi ci tposʉ noana'o isi yainca <'o eyongensa ic'o o'ates'a ahtu yuyafo ne ngalilaya>..>

Currently Selected:

yohane 7: bsnfe

Highlight

Copy