luka 11

e'usnu no 'inoli

(matai 6:9-13; 7:7-11)

1moso i'nʉskʉ, yonto concila 'oyona 'inoli 'o iesu. aepʉngʉ 'inoli, panto cihi ci tesi mo mi'usnu to iesu ho yainca: <nooe'oca, teko'so po'pa'cohivi 'inoli a'mi, mais'a 'o yohane ho lasi po'pa'cohivi 'o tesisi.> 2isi mi'usni to iesu ho yainca: <temula maica na temu hia 'inoli:

amo:

einva'sio ta cou na socofkoya ci ongkosu;

teko'so atʉkca 'e hpʉhpʉngʉ.

3pafi no temia huhucmasa#<huhucmasa> hocieno yainca <ho hucma>. titha ci 'oanʉ.

4peu'uzva na kuisimia,

maica lamia yaeza peu'uzva 'o kuisi tola afu'u tokvo'ʉ a'mia ci cou.

teav'aso poa elʉ no o'a temia pasvo'ha ci hʉsvʉta.>

5acnguhu, yainca to iesu 'o tesisi: <ta taicomu hoci panonte uhno emoo no nanghia homo taico feʉngna, mi'usni ho yainca: <<nanghia, teko'so poan'a yuevaho a'o note tuyu ci pang; 6maica panto cihi ci nanghia mo covnʉ ho esmi ta emoo'u, uk'a ci os'o maka p'aeni ho aʉt'ʉt'ʉca.>> 7honci i'mi ne mʉ'eona na nanghiasu ho yut'ingi: <<teav'a ptaʉnga a'o, micu emʉtʉ 'o phingi; mimzacu amzocni ta hopo 'e 'o'oko, 'anate'o meelʉ yʉc'ʉ ho fii no cuma suu.>> 8teeno peis'uvnu? te'o eʉsvʉta muu, 'upena hoci o'te 'ahʉyʉ nomio no zou'so nanghia ho fii no pang, 'anteeno mako nomio homo m'ehʉhʉyʉ ho yʉc'ʉ, faeni na isi 'ucia tititha. 9ko'ko te'o eʉsvʉta muu, hocimu m'ene, te m'elʉ; biebimi, te elʉa; tmo'totokʉ no phingi, te paavneni no phingi muu. 10maica i'ola m'ene, te m'elʉ; i'ola biebimi, te elʉa; tmo'totokʉ no phingi, cu maavo 'o phingi. 11ta taicomu na amohe, zou siya nate m'eya yoskʉ na oko, nama fii no fkoi? 12m'eya fcuyu no teo'ua, mayo no eepa ho faeni? 13lamu e'vono kokuzo lean'a cohivi ho fii nomo ʉmnʉ ci macucuma na iachi 'o'oko; namaeno na amomu ta pepe o'atesis'aeno afnasa faeni nomo afu'u m'ene ci cou na seilei?>

iesu ho i'o pesipu

(matai 12:22-30; maluko 3:20-27)

14isi popeoyafa to iesu 'omo coni ci hicu no tmusngʉsngʉ, ataveisi no yuyafo 'o hicu, cu ivaho meelʉ aomotʉ'ʉ 'o cou ic'o. mo acʉhʉ na'no yamci 'o botngonʉ, 15at'inghi to taicohe panto mo mainca ci cou: <ma mita noe'ocʉ to pesipu ci honte no hicu ho meya hicu.>

16panto mo maezo mici akuzkuzo to iesu ci cou, m'eya peispopo'e ho pa'teni 'e isi hioa na hia mio i'mi to hamo. 17isi cohivi to iesu cuma na ihe ta'to'tohʉngva, cu mi'usni ho yainca: <na afu'u hpʉhpʉngʉ hoci iachi youbobai, 'ate ahtuo'te suhcʉhcʉ; 'emo cono emoo hoci youbobai, maezo ahtuo'te auz'oz'o. 18hoci youbobai na satan, nte mainenu hoci meelʉ bʉʉlʉlʉ na hpʉhpʉngʉhe? imu yainca mi'o noe'ocʉ no pesipu ho meya hicu, 19hocieno a'ʉmtʉ maica, hola meya hicu 'o tesimu mamoeno noe'ocʉ no siya? 'aisicueno soomei ta tesimu ho mimu o'te emio! 20a'ʉmtʉsi, homi'o meya hicu honci noe'ocʉ to tonʉ to hamo, 'aiscueno soomei tan'e micu yonta taicomu na hamo ho titotonʉ.

21<cihi cimo noemʉhʉ na soanothʉ ci maotano isi noʉt'ʉci 'e iachisi emoo, o'ate sokoeva na yupasʉsi. 22at'inghi mo esmi 'omo asuhcuhe taso ci maotano, isi atpʉta, tesicu ti'einga 'o isi noe'oci ci soanothʉ, a'vinano cu aangaeza 'o ohsila peo'eoza ci macucuma.

23<inamo o'te bi'upu a'o; 'amoeno yu'hango a'o. namo o'te to'usnu a'o ho a'pʉ'pʉyʉ. 'amoeno atfʉngʉ eon'oi.>

yuovei 'o h'aokuv'o

(matai 12:43-45)

24<'o h'aokuv'o cu mongoi to isi ti'eopi ci cou, smaingabo to keolo ci hpʉhpʉngʉ, biebimi no tesi yoni amiocni, o'a mo ahtu elʉ, cu yainca: <<ma te'o yuovei to os'o anana'va yoni ci emoo.>> 25micu yuovei, aiti 'o emoo ic'o ohcu tusi'nga ho cofkoya maezo suce. 26mio ivaho yuyafo, e'vovei to pitu cimo kuzohe ta iachi ci h'aokuv'o, micu no'upu noteuyunu. maicac'o, 'o atavei a'a'ausna to cou ic'o mo kuzohe ne auyusi.>

a'ʉmtʉ ci ʉm'ʉmnʉ

27ne isin'a seolʉa no engha to iesu na eni, panto cihi ci mamespingi mo i'mi to botngonʉ ho tmunoi mi'usnu to iesu ho mainca: <ina moso ngho'ʉ suu ho paun'u suu. a'ʉmtʉs'a ʉm'ʉmnʉ!>

28yainca to iesu: <namo tmac'ʉhʉ to e'e to hamo ho noyʉyʉcʉ ci cou 'aeno eni 'emo a'ʉmtʉ ʉm'ʉmnʉ!>

m'eya tipo'e

(matai 12:38-42)

29ne mio ihe paikuyungvi to botngonʉ 'o iesu, mo e'cʉ'cʉnʉ 'o iesu ho yainca: <'e cou maitan'e mo mainenu na hia kokuzo! mihin'in'aso mici baito no po'e, at'inghi tapeoha 'o po'e to nia yoona, uk'anacu ci mocmo ci po'e cinte ivaha poa aitneni hin'i. 30'o yoona moso mainenu na hia ohe hupopo'ea to couninive, 'e oko cou tehe yaeza hupopo'ea ta cou maitan'e. 31to hiesi no yʉsvʉtʉ, 'o honte no mamespingi ne oi'ana tena yʉc'ʉ ho ehpʉngneni 'e cou maitan'e, maica homo smaina'o ho 'ahʉyʉ tmac'ʉhʉ to moutʉs'ʉ ci e'e to solomong. te'o eʉsvʉta muu, ta tan'e. panto mon'a meoisihe to solomong ci hi'hioa! 32to hiesi no yʉsvʉtʉ, tena yac'ʉ 'o couninive ho ehpʉngneni na muu, maica ne ohecu talʉi 'o e'e to yoona mohcu acʉhʉ ma'vovei ho yuovei peislʉlʉ. te'o eʉsvʉta muu, ta tan'e. panto mon'a meoisihe ci hi'hioa to yoona!>

tiskova ta feango

(matai 5:15; 6:22-23)

33<uk'a cite sotiskou ho soototoefʉnga no mʉ'eona hocieno sof'uf'a no pangka; apuyu, 'atesi ahtao'te siya no totnguca lampu, poa teolʉ no tiskova nate yʉmeʉmʉ ci cou. 34'e mcoo mais'a hoci lampu ta feango. hoci ʉmnʉ 'e mcoosu, te aucunu tiskova 'e feango; hoci kuzo 'e mcoosu, te aucunu voecʉvcʉ 'e feango. 35ko'koeno, la bumemealʉ, tes'a voecʉvcʉ na tiskova ta 'ayumonasu. 36hoci aucunu tiskova 'e feangosu, uk'a ake'i voecʉvcʉ, te meelʉ psoetiskou ta aukukuyungu, mais'a 'o tiskova to lampu ho psoetiskovi suu.>

koica 'o coufalisai ho lema'cohio hoolicu

(matai 23:1-36; maluko 12:38-40)

37pateʉpnga to iesu 'emo maica ci e'e, cihi ci coufalisai isi eoho'a 'o iesu ho poa bonʉa, mo yʉmeʉmʉ 'o iesu ho sʉʉlʉlʉ. 38'e coufalisai eni isi aiti 'o iesu ho o'amo auyu yoemucu hote bonʉ, isi na'na yamceni. 39isicu mi'usni to iesu ho yainca: <na muu coufalisai lamu toʉlʉi 'o yafana to 'ootohva, at'inghi lamu teongcʉngci to ma'konvosʉ ho kokuzo 'e 'ayumonasi. 40longkeckece ci cou, na moso mooyai ta yafanasi ci hamo o'aisis'aeno yaeza teo'upi na 'ayumonasi? 41hoci maka faeni no la thi'cia ci cou namo no'ayumonʉ ta 'ootohva ci macucuma, hoci e'usna muu, tec'u acʉha tamia no cofkoya.

42<temu ku'kuici 'e coufalisai! i'o koao'honga to macucuma, maito ha'ka, konamusngau ho i'o mocmo cila namusngau, lamu yaa 'omo amaska ucni ho sʉ'teni to hamo, at'inghi la peaezoni 'o moulʉlʉ ho i'o himngonghi no mi'usnu to hamo. a'ʉmtʉsi, 'aeno eni na temu atuhca pee'ofeihni; inacu mocmosi, yaeza o'ate peaezoni.

43<temu ku'kuici 'e coufalisai! lamu kaebʉ yusuhngu to afnaso ci ca'hʉ to kaitoo, kaebʉ hola yontola toehunga 'oyona ho p'ohkui ho tuayokeoi to cou. 44temucu ku'kuici! maica mimu mais'a uk'a humzi ci heuf'a, lahe 'op'eciha to cou hola coeconʉ, o'ala maka cohivi.>

45mo cihi ci lemao'cohio hoolicu mo mi'usnu to iesu ho yainca: <sensei, ho osko pat'usna yaica, cu a'upa aokoe'iya a'mi!>

46yut'inga to iesu: <'emimu cono lema'cohio hoolicu te maezo ku'kuici! lamu ngov'eni to ei'si to mocmo 'o cvʉhʉ tomo ngoveo ho isi sviei, iachi o'ala maka poa aot'ou namo coni ci lulku ho poa e'sop'o na mocmo. 47temucu ku'kuici! lamu teoteovahi 'o heuf'a to eyongensa, 'o nia eyongensa zoueno'so 'o ohela opcoza to nia maameoimu. 48maicac'o, imu cu soomei ho mimu tohmʉskʉ no ohela hioa no nia maameoimu; ohela opcoza na eyongensa, imu teoʉlʉlʉi na heuf'a to nia eyongensa. 49ko'koeno, na mosola toutʉs'ʉ to hamo ohela yainca: <<te'o popeoskuna 'o eyongensa ho sitoo ho uhta ihe yoni; panto tahe opcoza, panto tena noa pohtutumza.>> 50i'mi tan'e, ahoi ho ohon'a teyai 'e hpʉhpʉngʉ, na afu'u kuisi no opcoi to eyongensa, 51'aeno ahoi ho oho opcoza 'o yaapo, ac'ʉhʉ to hmuyu to ohe pohtohva to taico to 'oyona sʉ'tʉ ho ito seiten ci hmuyu to zakalia, te acʉha peʉezi ta cou maitan'e. 'aeno a'ʉmtʉ, te'o eʉsvʉta muu, 'e cou maitan'e te nomio ta acʉcʉhʉ tan'e ho noa patvovei!

52<'emimu cono lemao'cohio hoolicu temucu ku'kuici! lamu tʉyʉca 'o 'oyomza maavo to tvoisia mau'to'tohʉngʉ, lamu iachi o'te yʉmeʉmʉ, yaeza o'te poa yʉmeʉmʉ 'onte mici yʉmeʉmʉ ci cou!>

53cu mongoi to ic'o 'o iesu, 'o lemao'cohio seiso ho i'o coufalisai. ihecu ahoza emamacongvi ho eayaezoya 'o iesu. mi'usni ho tuocosʉ tomo man'i ci ngoveo ci e'e, 54te biebimi note 'eo'eongʉ no akuzkuzoa 'o iesu.

Currently Selected:

luka 11: bsnfe

Highlight

Copy