luka 12

engahva 'ola me'ʉ'ʉmnʉ

(matai 10:26-27)

1ne mio, mo yu'ec'ʉc'ʉ 'omo posibotngonʉ ci cou, ac'ʉhʉ no yupa m'em'ecihi. mo auyu mi'usnu to tesi 'o iesu ho yainca: <temula etngoeva 'o smoof'o to coufalisai, 'ai'oeno me'ʉ'ʉmnʉhe. 2acʉcʉhʉ 'ola efʉefʉnga ci hi'hioa. te ahtao'te acʉha epopayoa; 'ola auc'oc'ova ci hi'hioa. la yaeza epopayoa. 3ko'koeno, na lamu noototoefʉngʉ ho engha ci e'e tena tapopaevi ta yafana; na lamu euc'oc'ova to mʉ'eona te yaeza i'mi ta sofʉ ho psoevaha.>

'ote smoyo

(matai 10:28-31)

4<maananghia, te'o eʉsvʉta muu, na tec'o opcoi ta feango, ho o'tena meelʉ asuhcu akuzkuzo muu, teav'a 'ahʉya smoyoa. 5te'o eʉsvʉta muu zou siya nate a'ʉmta smoyoa: temu smoyoa i'ote ti'eingi ta nsou ta cou, ataveisi ten'a yaa tonʉ no to'seni ne vooecʉvcana ci hamo. 'aeno a'ʉmtʉ, te'o eʉsvʉta muu, 'aeno ic'o na ntemu a'ʉmtʉ smoyoa!

6<i'omo eimo ci uhngu e'vono tec'o psuv'ohi no mo yuso ci peisu, at'inghi 'o hamo o'amo coni na isi ta'payo'a; 7ac'ʉhʉ ta f'ʉsʉmu ohsicu yaeza acʉha spʉya to hamo. ko'koeno, o'a temu ngoheʉngeʉ, mimu na'no pepehe tomo man'i ci uhngu!>

ehohonga 'o kilisto

(matai 10:32-33; 12:32; 10:19-20)

8<te'o eʉsvʉta muu, namo afu'u yonta tuhcu ta cou ho ebobohngʉ a'o, 'e okocou ho tena yonto tuhcu to tensi to hamo tasi yaeza ehohonga; 9namo afu'u yonta tuhcu ta cou ho o'te ehohonga a'o, 'e okocou ho tena yonto tuhcu to tensi to hamo tasi yaeza o'te ehohonga.

10<hoci ya'ei ho akvo'ʉ to oko cou, ten'a peelʉi peteongasa; i'oc'o mo boevovoyo to seilei, o'ate meelʉ noa peteongasa.

11<ho tahe e'usna to kaitoo muu, hocieno e'usna to tuhcu to taicini ho ito leaʉt'ʉcʉ ho tuucocosi, 'ote 'ahʉyʉ ma'tipvongʉ no mainenu nate hia ehcʉvheni 'e iachi, hocieno cuma nate pateafa ci e'e; 12maica ho mio, tasi pa'cohivneni to seilei na ntemu pateafa ci e'e.>

nongonongo cimo yuyupasʉ

13ta taico tamo botngonʉ panto cihi cimo mi'usnu to iesu ho yainca: <sensei, teko'so cucufni 'o ohaesa'u temia apaevaza 'o ezoezoyʉ to nia amo.>

14yut'inga to iesu: <nanghia, siya namo esvʉtʉ a'o ho yʉsvʉtʉ muu. hocieno poa aangae ta ezoezoyʉmu?> 15micu e'cʉ'cʉnʉ 'o iesu mi'usnu to botngonʉ ho yainca: <temu bumemeala noyʉci 'e iachi, meʉfngʉ ta mo mav'ov'o ci ma'konvosʉ; maica, 'emo cihi ci cou 'upena hoci mainenu na hia atngaso, na a'ʉmtʉ nsou o'ate tamza no hiasi yuyupasʉ.>

16micu mo'engho tomo coni ci epo'usa 'o iesu: <panto cihi cimo yuyupasʉ, atngaso to ezoezoyʉ; 17isi tohtasvʉta to 'tohʉngʉsi: <<uk'a cimo amso meoisi ci nte'o sii to afu'u 'oanʉ, ma te'o'so buacuma?>> 18mo ec'ecachi: <<'ia, mate'o mooeza eon'ozi 'e anana'o tvoisia 'oanʉ, ho m'eʉe note asuhcu meoisi, te sii no 'oanʉ ho ito mocmo ci macucuma, 19ataveisi te'ocu mi'usni 'e iachi ho yainca, ʉm'ʉmnʉ ci cou, osko tanua 'emo afu'u ʉmnʉ ci macucuma, te amso toaveiveiya ho teko tititha, tiupopoha'va, eabobonʉa ho 'amamimimo, sohuyu ho sucaefi tamo macocono hie!>> 20at'inghi, tesi mi'usni to hamo ho yainca: <<si lako hia nongonongo ci cou, ta yofna maitan'e, te'ocu yaa si nsousu; si ohsula a'pʉ'pʉneni ta iachi ci yupasʉ siya nate himnonu?>> >

21isi pahtaveiya to iesu: <i'ola a'pʉ'pʉneni to yupasʉ 'e iachi, ho thi'cia ci cou ho lasi aiti to hamo. 'amoeno maezo maica.>

tmae'ocʉ to hamo

(matai 6:25-34)

22isi ivaha mi'usni to iesu 'o tesi ho yainca: <ko'koeno, te'o eʉsvʉta muu, 'otela nomio no temu tititha no h'oyunsova ci 'oanʉ, hocieno 'i'ihosa ho ma'tipvongʉ. 23'e nsou mo pepehe no 'oanʉ; 'e feango mo maezo pepehe no 'i'ihosa. 24aitieno 'o tfua'a. o'ala emʉm'ʉ ho a'pʉ'pʉyʉ, uk'a ci tvo'oanʉa, leasin'a aʉt'ʉca to hamo, ma mimu na'nohe pepe to zomʉ! 25ta taicomu siya nate meelʉ boemi no ma'tipvongʉ ho asuhcu nomameoi#<asuhcu nomameoi> hocieno yainca <asuhcu bankake>.? 26hocimu o'te maka peihcʉ'hi 'e moc'o maica okono hi'hioa, mainci te 'ahʉyʉ ma'tipvongʉ no mocmo ci hi'hioa? 27yue'iya 'o tafiseongʉ lea mainenu na lasi hia cmʉfeʉa. o'ala yaahioa o'ala tme'si no yʉsʉ, at'inghi te'o eʉsvʉta muu, ac'ʉhʉ to hia taotofsi'i to solomong, 'o 'i'ihosasi maezo o'amo h'unano toc'ʉhʉ to bʉvnʉ ta yafana na hiasi yonghu. 28'e maukukuzo ho bʉvnʉ ta yʉn'ʉ la cmʉfeʉ ta taseona maitan'e, oemi'mi ho micu hucma, lac'u to'seni to pupuzu ho hmoi, leasin'aso yaica ci hia paehongsa to hamo, o'atesis'aeno afnasa pafi no yʉsʉ na muu? la angu okosi na singkoomu! 29ko'koeno, o'atemu ma'tipvongʉ no cuma nate ana, cuma nate ima, nomio tamo maica ci hi'hioa ho ma'tutumzo. 30'emo maica ci hi'hioa malahe atva'esa peehʉhʉi to o'ala tmaa'uzo ci cou. 'o amomu pepe lasi cohivi ho temu titha 'emo maica ci macucuma. 31temula i'ima hoci esmi 'o hpʉhpʉngʉ to hamo, 'e mo maica ci macucuma tesi ahtao'te acʉha faeni muu.>

e'usnu no yupasʉ ne pepe

(matai 6:19-21)

32<'emimuc'o hochia, 'ote smoyo, maica 'o amomu lasi soekaebeni no pafeni muu na hpʉhpʉngʉsi. 33la phieni na acʉcʉhʉmu, titha to'usnu nomo thi'cia ci cou na peisu; la ayocneni no o'ate aekieki ci tvopeisua 'e iachi, siya ne pepe na yupasʉ. ne ne'e, o'ate tiepʉnga na yupasʉ; o'a tehe peelʉi peo'eoza no thokeainʉ, maezo uk'a cite bonʉ ci yoi. 34mo yonenu na yupasʉmu, te maezo yono ic'o na 'tohʉngʉmu.>

aʉtʉs'ʉ ci soskuskunu

35<temula asngʉcʉ ae'ayocʉ, taseʉca na snoeputa, poa tiskova na lampu, 36mais'a 'o soskuskunu ho tesi totea hocic'u maine'e 'o moso toamimo ci thauke. ho tec'u cmʉ'ho 'o thauke ho tmo'totokʉ to phingi, tahecu osnia paavneni to phingi. 37cmʉ'ho 'o thauke, aiti homo aʉtʉs'ʉ 'o soskuskunu, 'e soskuskunu tena ʉm'ʉmnʉ! te'o a'ʉmta eʉsvʉta muu, te smoeputu to snoeputa 'o tauke, poa yusuhngua ho bonʉ, iachia aʉt'ʉt'ʉca 'e soskuskunu. 38ac'ʉhʉ hoci cmʉ'ho no taico feʉngna hocieno cmʉ'ho no taseona 'e thauke, hocisi aiti 'e soskuskunu homo aʉtʉs'ʉ, 'e soskuskunu 'atena ahtuo'te ʉm'ʉmnʉ! 39la atatalʉa 'e eni: 'e thauke ta cono emoo. hocisi cohivi ho homna nate esmi na thokeainʉ, o'atesis'a ahta poa yʉmeʉmʉ no phingi na thokeainʉ. 40temula maezo asngʉcʉ ae'ayocʉ, maica 'e okocou tena cmʉ'ho no o'atemu ake'a ta'eoyoca ci hie.>

peelʉi noe'oci ho o'te peelʉi noe'oci ci soskuskunu

(matai 24:45-51)

41yainca to petelo: <nooe'oca, ho osko engha 'e epo'usa eni, nenusi no osko mi'usneni a'mi hocieno o'te mi'usnu tamo botngonʉ ho engha?>

42yainca to nooe'oca: <siya namo toutʉs'ʉ ho peelʉi noe'oci ci le'aʉt'ʉcʉ emoo? 'ai'omoeno tiou no skuna to taukesi ho aʉt'ʉcʉ ta emoo, maino huomza hie ho aangaeza to mocmo ci soskuskunu na 'oanʉ. 43hotena yuovei 'o thauke, aiti 'e soskuskunu eni homo a'ʉmtʉ meot'ʉt'ʉcʉ ho noyʉci 'e tesi hi'hioa; 'e soskuskunu eni tena a'ʉmtʉ ʉm'ʉmnʉ! 44te'o a'ʉmta eʉsvʉta muu, 'o tauke tesi popeoskuna ho poa aʉt'ʉcneni 'o afu'usi ezoezoyʉ. 45at'inghi, 'e soskuskunu eni hocisi tohtasvʉta no koyusi, <<tees'aeno ahtu mon'i yuovei 'o tauke>>, micu ti'usnu to mocmo ci soskuskunu, a'vinano bonʉ ho mimo ho peismoyomo, 46'o tauke te yono o'aisi ta'tuhca to soskuskunu ci hie ho aemo'au cmʉ'ho, tesi a'sʉftona tinoza#<tinoza> hocieno yainca <peteoyafa>. ti'usna 'e soskuskunu eni, poa tiou no patvovei 'o mocmo cila maezo 'oha meot'ʉt'ʉcʉ ci soskuskunu.

47<hocisi cohivi to soskuskunu na ntesi poa hioaneni to tauke, ho o'te ae'ayocʉ, maezo o'te fiho no koyu to tauke ho hioa; maicac'o, tena noa tinoza ti'usna. 48i'ocu 'omo o'te bochio no koyu to tauke ho peismi tote noa ti'usna ci hi'hioa, tasi ake'a tiha'va. siya na isi yotmuzi to hamo, tasi mi'usni ho p'etmuzi; siya namo man'i na isi toveineni, tena mi'usnu no siya ho m'etmuzu.>

i'mizi no apopaevai

(matai 10:34-36)

49<ho mi'o uhta ceoa mate'o tupsusu ho phophomeo, os'o tata'za hocic'u a'ʉmtʉ hov'ohʉ! 50nte'o anana'o tiou no toonono no 'atutumio. auyusi ho te'o mia 'e 'atutumio eni, mainenu na hia'u a'ʉmtʉ ma'pap'ʉcʉ! 51'atemus'a ta'unano te'o mahafo no moususeomʉ ho mi'o cmʉ'ho ta hpʉhpʉngʉ. te'o eʉsvʉta muu, ma'i te'o hafneni no moususeomʉ, ma os'o hafneni no apopaevai. 52ataveisi maitan'e, 'omo eimo ci conoemoo te apaevai, 'omo tuyu te yu'konvosʉ tomo yoso, 'omo yoso te eyobai tomo tuyu. 53tena ec'ʉ no youbobai: 'o amo te yu'konvosʉ 'o oko, eyobai to amo 'o oko; 'o ino te yu'konvosʉ 'o oko no mamespingi, 'o oko no mamespingi te eyobai to ino; te yu'konvosʉ to okonosi cou 'o ba'isi, te eyobai to ba'i 'o oko nosi cou.>

bohbohngʉ ta mouhpʉhpʉngʉ

(matai 16:2-3)

54mo ivaho mi'usnu to botngonʉ 'o iesu ho yainca: <ho lamu teolʉi ta meoveana 'o tatposa ci cmʉcmʉ, osnia yainca <<tec'u mon'i mʉchʉ>>, tena a'ʉmtʉ maica. 55hoci i'eovcu na poepe, tamu yainca <<tenac'u mu'ei ho keolo>>, tena a'ʉmtʉ maica. 56'e la me'ʉ'ʉmnʉ ci cou, lamu bohbohngʉ ta tatposa ta pepe ho ceoa, maincis'a o'te so'eʉh'ʉta 'e huomza ta hpʉhpʉngʉ maitan'e?>

eususeomʉ tola tokvo'ʉ

(matai 5:25-26)

57<mainci lamu o'te iachia hʉsvʉta cuma namo 'aseolʉ ci hi'hioa? 58hoci pano cou cite ehpʉngʉ suu, te e'usna ne hooin na suu, teko pnanfi nate peelʉi, ieni ho tec'on'a mita ceonʉ ho eususeomʉ, ci tesis'a 'ahʉya ec'ʉhneni to hookang, 'o hookang tasi faeni to hookei, 'o hookei tasicu po'usna to poo'usna na suu. 59te'o eʉsvʉta suu, hociko o'te yoepʉngi namo sotavei ci oko no peisu na tmuhnoa, o'a tekos'a meelʉ yuyafo to poo'usna.>

Currently Selected:

luka 12: bsnfe

Highlight

Copy