luka 15
15
epo'usa no eapayo'ʉ ci moatʉ'nʉ
(matai 18:12-14)
1moso i'nʉskʉ, 'enepio ci letmuhno ho i'o kuici cou mo uso ho tmalʉ to iesu homo eʉsvʉsvʉtʉ. 2mo eubut'u 'o coufalisai ho i'o lema'cohio seiso ho yainca: <maincis'a tiou ta kuici cou na taini, a'vinano toehungneni eabobonʉ!> 3i'mitan'e micu mo'engho tomo coni ci epo'usa 'o iesu:
4<ta taicomu, honci panomo yaa se'conia ci moatʉ'nʉ, ta 'ayumonasi mo eapayo'ʉ namo coni. tee peis'u'uvnu? 'atesi ahtao'te teongasi ta cpucpuhu namo msiohʉ usio, usa ho i'ima 'omo eapayo'ʉ cimo coni, ac'ʉhʉ ho tasicu elʉa. 5ho tasicu elʉa, ahtuo'te kokaekaebʉ ho efkʉezeni to ei'sisi 'o moatʉ'nʉ, 6hafa maine'e, eho'a 'o nanghia ho i'o ehuehungusi, mi'usni ho yainca: <<uhtan'e, tetona'a toehunga peeseni, os'ocu elʉa 'e moso eapayo'ʉ ci moatʉ'nʉ'u!>> 7totiski, te'o eʉsvʉta muu, 'e cihi cimo yaa kuisi ci cou hoci ma'vovei, na 'aveoveoyʉ hote yone pepe te tosa'ohe no 'aveoveoyʉ to o'ate nama ma'vovei cimo msiohʉ usio ci cou moulʉlʉ!>
epo'usa no payo'ʉ no peisu
8<'emo cihi ci mamespingi honci yaa maskʉ ci peisu no nging, payo'a namo coni, teno peis'u'uvnu? 'ate ahtuo'te sotiskou, tusi'nga 'e emoo, bumemeala engongaboa i'ima, ac'ʉha ho tasicu elʉa. 9ho tasicu elʉa, tasi eyoho'a 'o nanghiasi, i'o ehuehungusi ho yainca: <<uhtan'e teton'a toehunga peeseni, 'e o'u payo'a ci peisu os'ocu elʉa!>> 10totiski, te'o eʉsvʉta muu, 'o tensi to hamo te maezo nomio homo ma'vovei namo cihi ci coukuisi ho kokaekaebʉ.>
epo'usa no ma'cocacni ci amo
11e'cʉ'cʉnʉ 'o iesu ho yainca: <pantomo cihi ci cou mo yoso 'o okosi. 12'omo okohe to okosi mo mi'usnu to amohe ho yainca: <<amo. teko'so faeni a'o maitan'e na nte'o anana'va tanua ci ezoyʉ.>> isicu a'ʉmta apaevaza to amohe 'o ezoezoyʉ ho faeni tomo yoso ci okosi. 13micu mipiyohi, isicu phieni tamo okohe 'e isi tanua ci ezoyʉ, hafa 'o peisu, hocu mongoi to emoo. uhtomo covhi ci hpʉhpʉngʉ, yonto ic'o ho tiu'hi'hisa 'o nia peisusi, 'aʉnpʉnpʉ 'o h'oyunsovasi. 14ne ohsicu tʉcʉcʉha 'o nia acʉcʉhʉsi, 'oc'ocic'o esmi to meoino hoseova 'o hpʉhpʉngʉ to ic'o, cu a'sʉftonʉ thi'cia, 15cuc'o moezʉ noe'ocʉ to cihi ci cou to ic'o; isi skuna to cou ho uhto ezoyʉsi ho poa pocengi to feʉ'ʉ. 16mo ma'bubut'u ho mici o'upu to isi ana to feʉ'ʉ ci tahia; at'inghi, uk'a cimo mako mofi no ntesi ana ci macucuma. 17atavei, micu ma'tʉtʉs'ʉ, yainca: <<'o amo'u mo botngonʉ 'o soskuskunusi, la otngaso to 'oanʉ ho yaa ang'osʉa, mate'o apuyu yontan'e ho tumio no sieo? 18mate'o yʉc'ʉ, yuovei to amo'u, mi'usni ho yainca: amo, mi'o tokvo'ʉ ta pepe, maezo tokvo'ʉ suu. 19'anate 'aseolʉ hociko ta'okoa a'o; tekocuc'o ta'upa no soskuskunusu a'o!>> 20micueno e'ohʉ ho yuovei to amosi.
<mion'a nomcovhi to emoo, isicu teolʉi to amosi, cu ma'ngʉcngʉcʉ na himngonghisi, toe'usna ho sʉyʉci sʉ'fʉni, o'te tosveni kisua. 21yainca to oko: <<amo, mi'o tokvo'ʉ ta pepe, maezo tokvo'ʉ suu; o'anate 'aseolʉ hociko i'vaha oko a'o.>> 22at'inghi isi eutotaveiya to amohe 'o soskuskunu ho yainca: <<aupcieva yaa 'omo so'ʉmnʉa to yʉsʉ ho poa paceofneni, yaa 'o yoolulku ho pooeveni ta lulkusi, yaa 'o sapiei ho poa msapieia, 23yaakaka 'o mo noyʉnʉ to oko no 'uachumu ho chua, teto na'a eabobonʉ ho peeseni! 24maica 'e oko'u eni mo mcoi ho smoevovei, payo'a ho eyoveiya.>> micu toehungu kokaekaebʉ ho eabobonʉ.
25<ne mio, mon'a seolʉa no yonto ezoyʉ 'omo mameoi to oko. nemo maine'e, mion'a covhi to emoo, talʉi 'o fihngau no pasunaeno ho 'otole. 26isi eyoho'a 'omo cihi to soskuskunu, tuocosi mo mainenu co hi'hioa. 27yut'inga to soskuskunu: <<micu yuovei 'o ohaesasu, isi aiti to amosu homo yoayokeo ho maine'e, isicu chua 'omo noyʉnʉ to oko no 'uachumu.>> 28mo na'no sʉ'no 'omo mameoi to oko, o'amo mimho yʉmeʉmʉ; mo yuyafo 'o amosi ho eucufna. 29isicu mi'usni 'o amosi ho yainca: <<'alakoeno aiti, tamo topioha, la'u mais'a tolei ho yaahioaneni suu, o'ala'u yutasufku no lako pashʉya, cuma na ohsucula faeni a'o? o'a lako ahta maka fii no oko no moatʉ'nʉ ho poa i'nʉskʉ toehungu kokaekabʉ 'o maananghia'u! 30at'inghi 'e okosu eni, isi tʉcʉcʉha no noasisi 'o nia ezoyʉsu, mo yuovei maitan'e, oskocu chueni ta oko no 'uachumu!>> 31mi'usni to amosi ho yainca: <<oko, lako asngʉcʉ no'upu a'o; 'e afu'u acʉcʉhʉ'u 'aeno acʉhʉ nuusu. 32at'inghi 'e ohaesasu eni. mo mcoi ho smoevovei, payo'a ho eyoveiya, 'antetoeno anana'va peeseni ho 'aveoveoneni.>> >
Currently Selected:
luka 15: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
