luka 16
16
epo'usa no ma'pongpangnʉ'ʉ ci leaʉt'ʉcʉ emoo
1isi mi'usni to iesu 'o tesi ho yainca: <panto cihi ci le'aʉt'ʉcʉ emoo tomo yuyupasʉ ci tauke; mo yaa mi'usnu ci cou ho ehpʉngʉ, yainca 'e leaʉt'ʉcʉ emoo eni la tiu'hi'hisi to yupasʉ to tauke. 2isi eyoho'a to thauke 'e leaʉt'ʉcʉ emoo, mi'usni ho yainca: <<mio mainenu na a'a'ausnasi to la'u totalʉi ci lako hi'hioa? tuyafa 'o lako aʉt'ʉca ci tposʉ no yupasʉ, 'anateko peelʉi i'vaha hioa 'e leaʉt'ʉcʉ emoo.>> 3isi yainca no koyusi to leaʉt'ʉcʉ emoo: <<tesicu poa tosvo to thauke a'o, no ataveisi maitan'e ma cuma na ta'ula hioa? tibangnu? uk'a ci tonʉ; noa bonʉ? pa'hikokoe'i. 4'ia, os'ocu cohivi na te'o peipeis'ausna, ta'u ko'ko yaa nanghia ho ta'ucu uk'ana hioa ho poa yono emoohe.>>
5<isicu macicihi eyoho'a 'o mosola yuevaho to thauke. isi ahoza mi'usni 'omo cihi ho yainca: <<mo piyo na osko yuevaha to thauke?>> 6isi yut'inga: <<mo se'conia no kunkunu ci hʉsʉ no 'olivu.>> yainca to leaʉt'ʉcʉ emoo: <<a'eni 'e tposno yuevahasu, aupcio yusuhngu, taʉezi hoc'o poa meemohʉa.>> 7isi mi'usni 'o mon'a cihi ho yainca: <<naeno suu, mio piyo na osko yuevaha?>> isi yut'inga: <<mo se'conza no peosvʉta ci heome.>> isi yainca to leaʉt'ʉcʉ emoo: <<a'eni 'e tposnosu yuevaha, taʉezi hoc'o poa mvoevʉhʉ.>>
8<isi emomoengʉa to thauke 'e hiasi ma'pongpangnʉ'ʉ tamo lolekoknuyu ci leaʉt'ʉcʉ emoo. maica yontala hia mi'usnu ta hi'hioa ta hpʉhpʉngʉ, 'emo tma'usnu ta hpʉhpʉngʉ ci cou la tʉhtʉs'ʉhe tala popeislʉlʉ ci cou.>
9ivaha ecnguha to iesu ho yainca: <te'o eʉsvʉta muu, la boemi ta yupasʉ maitan'e ho eananghia, maicac'o, hotac'u uk'ana a'a'ausna 'e yupasʉ, teko meelʉ noa tiova ho uhno 'auesiesi emooana. 10'emo cihi ci cou hoci peelʉi noe'oci no moc'o okosi ci hi'hioa, te yaeza peelʉi noe'oci tomo meoino hi'hioa; 'emo cihi ci cou, hoci totpiei tamo okono hi'hioa. teec'o maezo totpiei tamo meoino hi'hioa. 11hoci o'te peelʉi tae'oci na lamu hia titho no yupasʉ ta maitan'e, siya nante tovoei no mou'ʉmtʉ ci yupasʉ? 12hoci o'te peelʉi tae'oci no macucuma no mocmo ci cou na muu, siya nate mofi muu no iachimu macucuma?
13<'emo cihi ci soskuskunu o'ate meelʉ aʉt'ʉcʉ nomo yoso ci thauke. hocisi o'te kuzoa eni, ʉmnʉa ic'o, te einva eni potfʉnga ic'o, o'atemu ahtu meelʉ soskuskunu to hamo, ho maezo tolei no yupasʉ.>
mocmo ci hia mo'ma'cohio
(matai 5:31-32; 11:12-13; maluko 10:11-12)
14i'ola kokaebʉ to yupasʉ ci coufalisai ihe talʉi 'e e'e eni, cu cocvi 'o iesu. 15isi mi'usni to iesu ho yainca: <ho lamu yonto tuhcu to cou la mais'a mimunana mitohʉngʉ ci cou, at'inghi lasi so'eusoya to hamo na 'tohʉngʉmu; maica nala huecvʉhʉa ta cou, hola yono mcoo to hamo lasi so'eʉsʉ'nova.
16<na isin'a suseolʉi to hoolicu to moose ho ito tposʉ to mayoyongensa moc'o ac'ʉhʉ to letoonono yohane; ahoi maitan'e, cu psoyaska 'o fukuin to hpʉhpʉngʉ to hamo, 'e yatatiskova la acʉhʉ mici 'aanana'o yʉmeʉmʉ. 17at'inghi, hoci aapayo'a 'e hpʉhpʉngʉ maten'a sonʉhe to aapayo'a 'o cono topca cono meesʉzʉ ta hoolicu!
18<'upena na siya hoci teongasi na vcongʉ ho meezuhu ta mocmo ci mamespingi micu yaa kuisi no mseezo; hoci vcongʉ 'e ihe ciha ci mamespingi teec'o maezo yaa kuisi no mseezo.>
yuyupasʉ ho i'o lazalu
19<ne noana'o pano cihi cimo yuyupasʉ, huhucmasi sʉ'eʉsʉ to 'ukini ci yʉsʉ, la au'hi'hisi ci h'oyunsova. 20conosi ne mio panto cihi ci la noabonʉ, zou lazalu 'o ongkosi, aucunu h'ooh'o 'o feangosi; lahe asngʉcva hafa uhto phingi to emoo tomo yuyupasʉ, 21mooteo no matmʉtʉ tola i'mi to pangka tomo yuyupasʉ ci pu'pucu ho ana; ac'ʉhʉ to av'u la uso ho paceicei 'o h'oh'osi.
22<atavei cu mcoi 'omo thi'cia, ihe hafa to tensi ho poa no'upu to 'avulahamu. cu maezo mcoi 'omo yuyupasʉ, a'vinano cu efo'a. 23mo yone vooecʉvcana 'o yuyupasʉ ho kuici 'atutumzo; mo mʉengʉcʉ teolʉi 'o 'avulahamu mo yonto mo covhi, yaeza hu'upi 'o lazalu mo bichipi, 24cu moozoyʉ ho mainca: <<maameoi'u ci 'avulahamu, coveoza a'o! skunan'a si lazalu ho boemi ta lulkusi ho tʉspʉci co umo'u ho poa coheʉceʉ, maica mi'o yonta yafeu ci puzu, kuici 'atutumzo!>>
25<at'inghi isi yainca to 'avulahamu: <<'o'oko, 'antekoeno talʉa ne mosun'a yayo ohsucu noʉcʉcʉha na ʉm'ʉmnʉ, at'inghi 'e lazalu o'a mohtala ahtu yunsou nomo ʉmnʉ ci hie; maitan'e mita yontan'e ho noa ao'pova, miko apuyu yonta 'ayumona ta 'atutumio. 26a'vinano, ta taicoto isi yupaevaza ta mʉ'eona, 'e cou hoci i'mi ta tan'esi ho uhta imu yoni o'ate ahtu meelʉ, hoci i'mi ta imu yoni ho uhta tan'esi maezo o'ate meelʉ.>> 27yainca to yuyupasʉ: <<maameoi, homoeno maica, tekon'a skuna si lazalu ho poa uhto emoo to amo'u; 28panto eimo ci nanat'ot'ohaesa'u, poa usneni ho engahva, te o'te maezo uhta mo 'atutumio ci hpʉhpʉngʉ.>>
29<yainca to 'avulahamu: <<'o nanat'ot'ohaesasu panto moose ho maeyoeyongensa tehe usa ho engahva, 'atekoeno poa uso 'o nanat'ot'ohaesasu ho tmalʉ.>> 30yainca to yuyupasʉ: <<maameoi ci 'avulahamu, o'ates'a ahtu amso. hoci yaa i'mi no mcoi ho smoevovei, uhto ihe yoni, 'atec'u mimho ma'vovei.>> 31at'inghi isi yainca to 'avulahamu: <<hocihe o'te talʉi 'o e'e to moose ho maeyoeyongensa, 'upena hoci panonte i'mi no mcoi ho smoevovei ci cou, yaeza o'atehes'a taa'uzva!>> >
Currently Selected:
luka 16: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
