matai 22
22
epo'usa no eabobonʉ no tovcongʉ
(luka 14:15-24)
1mo i'vaho boemi to epo'usa 'o iesu ho mi'usni ho yainca: 2<'o hpʉhpʉngʉ ne pepe mo mais'a na mo cihi ci honte te smouyu'ho no eabobonʉ no tovcongi 'o okosi. 3isi popeoskuna 'o 'enepio ci soskuskunusi ho eucucufna 'o ohsi eho'a ci cou ho poa uso hote eabobonʉ no tovcongʉ, at'inghi o'amo mimho uso 'o isi eho'a. 4mo i'vaho popeosmuhnu tomo h'unasi ci soskuskunu, eutotaveiya ho eʉsvʉta to ohsi eho'a: <<os'ocu ae'ayoca 'ote 'o'ana, isicu acʉha chua 'o 'uachumu ho snoecavʉ, isicu acʉha aepʉnga ae'ayoca, temucu uhtan'e tec'u eabobonʉ.>> 5at'inghi, 'o ohsi eho'a o'aihec'o cumasa, ianan'ou to ihe hi'hioa: 'omo cihi mo uhto ezoezoyʉ, 'omo cihi isi usa ho aiti 'o momhinosi, 6'o mocmo ihe tʉtpʉta 'o masososkuskunu. tutva ho po'poti. ho opcoza. 7mo meoino sʉ'no 'o honte, smuhnu to heetai ho suapapayo'i 'omo yu'papak'i, hmoi 'o hosahe. 8ataveisi isi mi'usni 'o soskuskunu ho yainca: <<micu acʉhʉ noemʉhʉ 'ete eabobonʉa, at'inghi o'amo 'aseolʉ 'o oho aueva eho'a. 9temun'a uhta papae'ohsa, natemu afu'a lʉa ci cou acʉha eho'a ho poa uhtan'e ho eabobonʉ.>> 10'o soskuskunu micu uhto papae'ohsa, 'o ihe aiti ci cou, 'upena namo kuzo ho ʉmnʉ acʉha eho'a, poa sʉngcʉngceni to isi eho'a 'e isi yoni tovcongʉ.
11<nemo yuyafo 'o honte ho baito tomo 'u'uso, aiti 'omo cihi mo o'te maceofʉ no yʉsʉ no aʉlʉ, 12cu tuocosi: <<nanghia, maincis'a o'te maceofʉ no yʉsʉ no aʉlʉ ho miko uhtan'e?>> o'amo ake'i yut'ingi 'o cou ic'o. 13isi eutotaveiya to honte 'o fafeifeiha: <<seo'eisi si t'ango ho emucusi, to'seni tamo voecʉvcʉ ta yafana. te yonto ic'o, mongsi ho sihsikiki.>> >
14sotaveisi. isi yainca to iesu: <mo botngonʉ 'o isi eho'a ci cou, at'inghi mo kakutia 'o isi epeiya!>
mo'engho no mofi no tmuhnoa to kaisa
(maluko 12:13-17; luka 20:20-26)
15mo yuyafo 'o coufalisai, yupa toʉsvʉsvʉtʉ te yainenu te i'mi to e'esi ho eya 'eo'eongʉ no akuzkuzoa 'o iesu. 16ihe popeoskuna 'o iachihe tesi, nʉthʉ 'o 'oahngʉ to helotetoo ho uhto iesu, tuocosi 'o iesu: <sensei, imza cohivi zou 'o'elʉlʉ ci cou na suu; 'upena hoci mainenu nala hia ma'to'tohʉngʉ ta cou, lako conino bumemeala po'pa'cohivneni ta cou na e'e to hamo, maica o'alako yumzi na sapci ta cou. 17tekon'a eʉsvʉta a'mi na hiasu ma'to'tohʉngʉ: hoci mofi no tmuhnoa to kaisa ci honte ne looma teenana pef'uhu to hoolicuto?>
18isi cohivi to iesu 'o kuici 'tohʉngʉhe, cu yainca: <'emimu me'ʉ'ʉmnʉ ci cou, mainci 'ucia akuzkuzoa a'o? 19mayo nomo coni ci peisu no tmuhnoa te'o aiti!>
ihe fii to mo conci peisu no nging. 20isi tuocosi to iesu: <zou hu'ongka ho tposʉ no siya 'emo yonta peisu?>
21ihe yut'inga: <'a ongko to kaisa.>
isicu mi'usni to iesu ho yainca: <hoci maica. 'ateeno faeni to kaisa na macucuma to kaisa, faeni to hamo na macucuma to hamo.>
22ihe talʉi 'e e'e eni, mo a'sʉftonʉ yamci, cu mongoi ho emo'usnu maita'e.
e'usnu no smoevovei
(maluko 12:18-27; luka 20:27-40)
23conoc'o hie, piyo ci o'ala tmaa'uzo no smoevovei ci cousatukai mo uhto iesu, tuocosi: 24<sensei, ohsila po'pa'cohivi to moose a'mi, 'emo cihi hoci uk'a oko, 'o ohaesasi tesi ahtao'te pecngiha 'e ahngʉsi ho seotaveineni 'o ohaevasi. 25ne noana'o, panto mosola pitu ci nanat'ot'ohaesa tan'e, moso mevcongʉ 'o ohaevahe, cu mcoi, uk'a ci okosi, teongasi 'o vcongʉsi isicu pecngiha to ohaesasi; 26i'omo yuso, tuyu ac'ʉhʉ tomo pitu moc'o acʉhʉ totiski 'o a'a'ausnahe. 27atavei, cu maezo mcoi 'o mamespingi ic'o. 28n'a tuocosi, ho mosoeno acʉhʉ himhovcongʉ to mamespingi, ho tac'u hiesi no smoevovei, siya na tena atuhcu himhovcongʉ ta mamespingi?>
29isi yut'inga to iesu: <o'a mimu emio! o'a imu asansana 'o seiso, yaeza o'a imu cohivi na tonʉ to hamo. 30'omicu mcoi ci cou ho tenac'u smoevovei, te totiski to tensi ne pepe, o'anate yupa totovcongʉ. 31e'usna no a'a'ausna no smoevovei, o'a ohmulaeno ahta engha 'o ohsila eʉsvʉta muu ci e'e to hamo? 32yainca to hamo: <<na a'o zou hamo to 'avulahamu, hamo to 'isaku, hamo to yakovu.>> na e'ausnasi tan'e isi yainca, 'o hamo zou hamo tamo yaansou ci cou, o'as'a hamo no micu mcoi ci cou.>
33ihe talʉi tamo botngonʉ 'e mo maica ci hia mahsʉsʉftʉ, acʉhʉ na'no ma'eayamci.
someoisa ci h'oesvʉta
(maluko 12:28-34; luka 10:25-28)
34ihe tac'ʉhi to coufalisai ho isi pʉsngʉsngi to iesu 'o ngayo to cousatukai, cu acʉhʉ yu'eteuyunu. 35mo cihi ci lema'cohio hoolicu isi 'ucia yomza to conci a'a'ausna ho akuzkuzoa 'o iesu. 36isi tuocosi: <sensei, to hoolicu to moose, nenu namo sotva'esi?>
37yainca to iesu: < <<tekola acʉcʉha na 'tohʉngʉ, yu'ausna, koyu, ho himngonghi to nooe'oca - to hamosu.>> 38'aeno eni namo sotva'esa ta h'oesvʉta. 39'emo toueso mioc'o totiski: <<tekola ngohia na ehuehungusu, mais'a hola ngohia 'e iachi.>> 40acʉcʉhʉ ci hoolicu to moose ho i'o hia mo'ma'cohio to eyongensa moc'o acʉhʉ i'tohungu ta mo yuso ci h'oesvʉta tan'e.>
e'usnu to kilisto
(maluko 12:35-37; luka 20:41-44)
41nemo yu'eteuyunu 'o coufalisai, isi tuocosi to iesu: 42<mo mainenu na hiamu baito to kilisto? zou mʉntʉ'ca no siya?>
ihe yut'inga: <zou mʉntʉ'ca to tavite.> 43yainca to iesu: <mainci isieno yainca to tavite ne isi poot'ova to seilei <<nooe'oca>>? yainca to tavite:
44isi mi'usni to nooe'oca 'o nooe'oca'u ho yainca:
teko yusuhngu ta vhona'u.
totea ho ta'ucu poa peteozu ta t'angosu 'o hangʉ.
45hoci isieno yainca to tavite <<nooe'oca>>, mainci te aac'o yainca zou mʉntʉ'ca to tavite 'o kilisto?>
46uk'a cimo meelʉ matnʉskʉ ho yut'ingi ta e'e to iesu. ahoi ne mio, uk'a na cimo smeecʉ'ho i'vaho mi'usnu to iesu ho tuyafo nomo ngoveo ci e'e.
Currently Selected:
matai 22: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
