maluko 4
4
epo'usa no miyapo
(matai 13:1-9; luka 8:4-8)
1mo ivaho yonto aaskiti to etʉpʉ ne ngalilaya 'o iesu ho mo'ma'cohio to cou. maica homo angu tva'oyʉ 'omo yu'eteuyunu to aukukuyungusi, micu moezʉ bohsifou tomo coni ci 'apangʉ, cu yusuhngu. mo yonto etʉpʉ 'o 'apangʉ, yac'ʉ to aaskiti 'o botngonʉ. 2mo boemi to epo'usa 'o iesu ho po'pa'cohivi tomo man'i ci hi'hioa, nemo mo'ma'cohio isi mi'usni ho yainca: 3<temu bumemeala talʉi! panto cihi cimo miyapo to tutu mo yuyafo ho yapneni 'o tutu. 4ne isi yapneni, piyo ci tutu mo suaskiti to ceonʉ, isi mei'usni to zomʉ ho ana. 5piyo 'omo su'to mo 'oha ceoceoa ci yuyu'eo, maica ho o'amo mʉ'eona 'o ceoasi, mo na'no mon'i cmʉfeʉ, 6ne micu hie. cu hikeololva 'o cʉfeʉsi. maica ho o'a mo bimsʉ'eonʉ 'o emisisi. micu oemi'mi. 7panto mo sutaico to cʉcʉmʉ, ne micu cmʉfeʉ 'o cʉmʉ, isicu ta'poe'i 'o cʉfeʉ, 'anamo meelʉ beahci. 8panto tutu cimo su'to mo ʉmnʉ 'o ceoasi, mo yʉepʉngi, beahci ho yʉho'a, pantomo mtuehu 'o isi tov'oha, pantomo monmʉhʉ, pantomo se'conza.>
9ivaha yainca to iesu: <namo yaa koyua, acʉhʉ'so tmalʉ!>
na atuhcusi ta epo'usa
(matai 13:10-17; luka 8:9-10)
10ne mo noachi 'o iesu, i'o moso tmalʉ to hiasi eʉsvʉsvʉtʉ ci cou ho i'o tesi mo nʉthʉ baito to iesu, m'eya esansana na e'ausnasi tamo maica ci epo'usa. 11yainca to iesu: <ina moumsʉ'eonʉ to hpʉhpʉngʉ to hamo isicu pafeni muu; i'ecu cou ta yafana, na tehe afu'a talʉi te acʉha ieni ta epo'usa. 12aʉlʉ mais'a 'o e'e to seiso:
<ihe aiti ho i'vaha aiti, o'a ihec'o honga,
talʉi ho i'vaha talʉi, o'aihec'o ta'hongi;
hoci mimho miezuhu miovei na 'tohʉngʉhe,
tesicu peteongasa to hamo.>
esansana 'o epo'usa no miyapo
(matai 13:18-23; luka 8:11-15)
13isi ivaha tuocosi to iesu: <o'a imueno ta'hongi 'e epo'usa eni. mate mainenu hocimu peelʉi ta'hongi 'o mocmo ci epo'usa? 14'o isi yapneni to mo miyapo ci cou 'aeno 'o e'e to hamo. 15piyo ci cou la mais'a 'omo suaskiti to ceonʉ ci tutu; holasicu talʉi 'e e'e, tena osni cmʉ'ho 'o satan, ti'einga 'o micu yonto 'tohʉngʉsi ci e'e. 16panto mon'a h'unasi ci cou; la mais'a 'omo su'to yuyu'eo ci tutu; hola tmalʉ to e'e la osni smoekaebʉ ho tiova, 17at'inghi o'a mo bimsʉ'eonʉ ta 'tohʉngʉhe 'e e'e, o'ala meelʉ bina'o, hoci nomio ta e'e ho elʉ no ngoveo hocieno pohtutumza, la osnia teongasi. 18panto la mais'a isi yapneni to cʉcʉmʉ ci tutu; lahe talʉi 'e e'e, 19at'inghi na ma'tipvongʉ no h'oyunsova, eepecvazi no mici yuyupasʉ, ho ina mav'ov'o ci ma'konvosʉ la acʉhʉ esmi, hocu timcoza na ntohsi nsou ta e'e. 'anamo meelʉ beahci. 20at'inghi, mo 'enepio ci cou la mais'a isi yapneni tomo bangnu 'o ceoasi ci tutu; lahe talʉi 'e e'e, tiova, a'vinano beahci, 'o isi tov'oha pantola mtuehu 'omo apuhngu, pantola monmʉhʉ 'omo apuhngu, pantola se'conza 'omo apuhngu.>
sof'uf'a to pangka ci lampu
(luka 8:16-18)
21ivaha yainca to iesu: <siya nala sotiskou ho sof'uf'a no pangka hocieno f'uf'u no hopo? o'a tesis'aeno pasopaeva to totnguca lampu? 22'ola afu'a efʉefʉnga ci hi'hioa la conino epeaska; 'ola feʉ'sa ci hi'hioa. la yaeza epopayoa. 23namo yaa koyua, acʉhʉ'so tmalʉ!>
24isi ivaha eʉsvʉta: <la busisiya no 'tohʉngʉ 'e imu afu'a talʉi! hocimu boemi nomo mainenu ci peosvʉta ho meosvʉtʉ, tesi yaeza titheni nomo totiski ci peosvʉta to hamo ho peosvʉtneni muu, a'vinano poahe man'i na tesi faeni muu. 25i'omo afu'u pano, te fii tomo asuhcu man'i; i'omo afu'u uk'a, te tas'upa 'o nian'a ake'isi ho yaeza ti'einga.>
epo'uso no yuepʉngi ci tutu
26mo e'cʉ'cʉnʉ 'o iesu: <'o hpʉhpʉngʉ to hamo mo mais'a cihi ci cou isi yapneni ta ceoa 'o tutu. 27oengʉtʉ ne mo feʉngna, yʉc'ʉ ne micu hie, 'o tutu micu cmʉfeʉ ho yusuhci, mo mainci maica, o'a isi cohivi. 28'e ceoa lasi invonva poa yusuhci 'e cacʉfea, beahci, la auyu cʉfeʉ, tac'u omcu, ataveisi tena yʉho'a to mcuusi 'o tutu. 29ho lac'u yʉepʉngi 'e heʉm'ʉ, tasicu osnia yomza to fu'fu ho efeuta, maica ho micu mic'ʉhi 'o hiesi no a'pʉ'pʉya.>
epo'uso to chae enghova
(matai 13:31-32; luka 13:18-19)
30tuocosi to iesu: <teto yainca mo mais'a cuma na hpʉhpʉngʉ to hamo? teto boemi nomo mainenu ci epo'usa ho esansana? 31'o hpʉhpʉngʉ to hamo mo maihoci 'o tutu to chae enghova, mo atva'esi okosi ta maututu ta hpʉhpʉngʉ. panto cou isi yaa ho emʉ'a ta ceoa, 32mo aomane. micu yʉʉlʉlʉ. maamtanʉhe to mav'ov'o ci machachae; la yukahkʉmnʉ 'o ehtisi. la no'sohngu 'o zomʉ ho mooyai sku'u.>
33la boemi tamo man'i ci mo totiski ci epo'usa 'o iesu ho mi'usnu ta mo botngonʉ ho eʉsvʉsvʉtʉ, maito tehe peelʉi ta'hongi ho po'pa'cohivi. 34la conino boemi ta epo'usa ho eʉsvʉsvʉtʉ tamo botngonʉ; at'inghi ho la noisi 'e tesisi, lasi mi'usni ho esansana 'e acʉcʉhʉ.
eususeoma to iesu 'o poepe ho smahu
(matai 8:23-27; luka 8:22-25)
35yofnasi ne mio, isi mi'usni to iesu 'o tesi ho yainca: <teton'a ohpihi ta apihana ta etʉpʉ.> 36cu mongoi to botngonʉ. micu yonto 'apangʉ 'o iesu ho mooteo, ne micu bohsifou to 'apangʉ 'o tesi ihecu hafa 'o iesu ho e'ohʉ; panto mocmo ci 'apangʉ ci mo nʉthʉ. 37mo akameosʉ kuici poepe 'o etʉpʉ, smoftongʉ 'o smahu, sa'usni 'o okono 'apangʉ, cu nia'te sangcʉngci to chumu 'o 'apangʉ. 38ne mio mo yonto civci to 'apangʉ 'o iesu, yohcoyʉ to otueva ho oengʉtʉ. ihecu'so poecʉ'va, yainca: <sensei, temiacu mon'i mcoi, o'a tekoeno cumasa?>
39mo yʉc'ʉ 'o iesu, pashʉi 'o poepe: <amzocnicu!> ivaha yainca 'o smahu: <tosvocu!> micu tosvo 'o poepe, hocu amiocni 'o etʉpʉ. 40isicu mi'usni 'o tesi ho yainca: <mainci t'oe'ʉya, o'a mocu mimueno yaa singkooa?>
41micu kuici ngoheʉngeʉ 'o tesi, yupa mainca: <ma atuhcu siyas'a na taini, ci ac'ʉhʉ ta poepe ho smahu 'emo tmalʉ taini!>
Currently Selected:
maluko 4: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
