Yowani 15

Pehngehngain na ni Yeso o kataotao na do meyngongyod a potaw a kayo

1“Yaken rana am akma koy meyngongyod a potaw a kayo. Si Ama o omaponged nya. 2O ji malasi a yangaw a macinapnap jyaken am akteben na. O malasi a yangaw na am vezeden na, kato na ngarokan no asi na. 3Inyo rana am kamo na akmey manownaw so onowned no nanao ko a yako ninanao jinyo. 4Ji nyo ngaroi yaken an. Akman jyaken a ji macisyay jinyo. Abo o yangaw no kayo a to meynakem no kapalasi na no ji macinapnap do kayo na. Akman kamo sang, ta no macikaop kamo jyaken am akman kamo so kayo a malasi.

5“Yaken am yakmey kayo. Inyo am yangayangaw na. O macikaop jyaken am macikaop ko jya a karo no akma ney asi. No si karwan nyo yaken am ji nyo amaog o vazay nyo. 6O komaro jyaken a tao am kapalangayan na o yangaw no kayo a nimapolcing a kawalit nya a karokop na rana a kabedbed da sya no tao a ipanotong a katemtem na rana. 7No si macikaop kamo jyaken a keyyan na rana no ciriciring ko do onowned nyo am no amyan so amin nyo jyaken am itoro ko jinyo. 8O azwazway ni Ama am akmey asi no kayo a macita da jinyo. No si makman kamo sang am manoyong kamo a omanop jyaken. 9Ko ikaglaw inyo. Akman si Ama a maglaw nyaken. Peyyanen nyo do onowned nyo o pangangarilawan ko an. 10No si pangozain nyo o nanao ko am manoyong kamo na mapeyyan sya do onowned nyo so pangangarilawan ko. Akman jyaken yaomonot do ciring na ni Ama a yamapeyyan sya do onowned ko so pangangarilawan na. 11Nipanci ko na jinyo akman sang a vazay. So yangay na jinyo no sarasaray ko a kapeyngongyod nyo na a masaray.

12“Masicyakarilaw kamo akman jyaken a yamarilaw ninyo. Ta ori rana am ciring ko jinyo. 13Ney rako na pangangarilawan am ji macivivyai o kagagan. 14No si pangononongan nyo o nanao ko am manoyong kamo na kagagan ko. 15Ji ko na abneka inyo a lamlamsoy ko. Ta o lamlamsoy am ji na tenngi o vazay no mapalamsoy sya tao. Ko na to abneka inyo a kagagan ko. Ta ko na nimimin o yako nimamizing ji Ama a yanipanci jinyo. 16Beken a inyo o yanimamnek jyaken, ta yaken o yanimamnek jinyo. So ko tovoyan jinyo a mangay meyvazay so makasidong so tao a vazay. Ta o akman rana sang a vazay am tey saray na ni Ama ta do to a mangay no makwa. Si akman kamo sang am no mapasyasi kamo ji Ama am itoro na jinyo. 17Masicyakarilaw kamo an, ta ori rana am ciring ko jinyo.

Ikaoya da sira o omanoyong ji Yeso

18“No pacioyyan da inyo no ji nganoyong jyaken am naknakmen nyo o kanimanoma da na nimacioya jyaken. 19No kamo meyyangay pa kano ji manganoyong a tao do karawan am isaray da inyo do kapeyyangay nyo. Am kamo na ji meyyangay a ka nira. Ta ko na nipapinpin inyo a omanoyong jyaken. Am ori o da pacioyyan jinyo no yaji nganoyong jyaken a tao. 20Peyyanen nyo do onowned nyo o yako nipanci jinyo. Ji na meyhavasi no lamlamsoy o mapavahay sya tao. No si peyrarehten da yaken am akman kamo sang a peyrarehten da. No si onotan da o ciring ko am onotan da o ipangnanao nyo a ciring. 21Mamimin o akman sang a alalaw a mangay jinyo, do kamonganay nyo jyaken. Ta ji da tenngi o nimapahanhan jyaken. 22No ko jya nimai do karawan a mapamizing sira no nanao ni Ama ta do to am ji da tenngi o keyyan no raraten da. Am sicyaikwaya am ji da rana tayo o raraten da. Ta ko na nipanci jira o nanao ni Ama ta do to. 23O macioya jyaken am macioya ji Ama. 24No ji ko nimeyvazay so ji da pa nimapeyvazay no tao do tangain da am abo raraten da. Am da kanimakacita rana sya so vazay ko. Am da kapacioya jyaken a kani Ama. 25Am da na nimacita o vazay ko. So ikanoyong no yadomket do Seysyo a ciring. Maniring am, ‘Yabo na agagazan no da kato macioyyan jyaken.’#15:25 Anwanood 35:19; 69:4.

26“O yasomidong jinyo a Seyzi am yapo ji Ama. Iya rana am mapatwaw so nanao ni Ama ta do to. So tovoyan ko sya apo ji Ama a mangay jinyo do dang a kapeylimwang na nyaken jinyo. 27Akman kamo sang a meylimwang nyaken. Ta nimeycicinda kamo a nimacihza jyaken no kavavayo ko pa mangnanao.

Currently Selected:

Yowani 15: snt

Highlight

Copy