Yowani 16

1“Ji kamo na haha so nakem, ta nipanci ko na ya jinyo. 2Mangay kapasyay da jinyo do peyneynozyan. Amyan so araraw no iwakwak da jinyo. Am ipanci da ori a agoman da ni Ama ta do to. 3O ikakman da sang so vazay jinyo no tao am ji da tenngi si Ama ka nyaken. 4No makaranes rana o akman sang a vazay am cyaha, ta nipaziman ko na jinyo. Ji ko nipeycicinda nipanci jinyo o akman sang a vazay, ta macikaop ko pa jinyo.

Vazay no Seyzi

5“Ko meysinaoli rana sicyaikwaya do yanitomovoy jyaken an. Am yabo jinyo o yanimapacici jyaken a manci no, ‘Do wanjin mo angayan.’ 6Am yako ipanci rana jinyo sicyaikwaya am kamo na marahet so nakenakem. 7Am to ko na macitangayan jinyo am no si mangay ko am apya ori jinyo. No si ji ko angay am ji makaranes jinyo o somidong jinyo a Rarey nyo. Am no si mangay ko am tovoin ko a mangay jinyo. 8Si mai ori am patwawen na do tao do karawan o meyngongyod a raraten a kano meyngongyod a apya vazay a kano ipasingkad na so tao ni Ama ta do to. 9O raraten da no tao do karawan am da ji nganoyngi yaken. 10Da jyatenngi o manoyong a vazay. Ta yaken rana am yako mangay ji Ama. So ji nyo rana makacitai jyaken. 11Yamalas o yada naknakmen a na ipasingkad so tao ni Ama ta do to. Ta yarana nimeydedna o peyoyaoyyan na do mimong no karawan.

12“Yaro pa o yako ipanci jinyo am ko ihawa kaji nyo makatenngan jya sicyaikwaya. 13No mai rana o Seyzi a yamapatwaw so manoyong a nanao ni Ama ta do to am ipeypalanginan na inyo. Am ji na mangozai o oyowyat na. Ta nimamizing na o ipanci na jinyo. So pancyan na nya jinyo so omanam pa vazay. 14Azwain na yaken, ta ahapen na o ciring ko a ipanci jinyo. 15Yatodamimin o nanao ni Ama yamyan jyaken. Am ori o ko pancyan no na kayapo jyaken no inanao na jinyo no Seyzi.

Sarasaray a kano alalaw

16“Alikey rana kaji nyo na makacittan jyaken. Am ji meyyonownay ori a kapakacita nyo na jyaken.” 17Maniring o tatasa ka macinanao jya am, “Ikongo peypeypangayan no nang. A na kapanci no kalikey na rana kaji ta na makacittan sya, a na kapanci pa no na kangay ji Ama na do to. Ikongo peypeypangayan no ciring na ang. 18Ikeykongo peypeypangayan no na ipanci ori a kalikey na rana. Tamo jyatenngi o na hetehtawan no ciring na.”

19To na tenngi ni Yeso o kapacici da sya. Am ori o nipancyan na nya jira. Maniring am, “Nyo ikazyak o ko kapanci no na kalikey rana no kaji nyo na makacittan jyaken? A kano, ‘Ji meyyonownay a kapakacita nyo na jyaken?’ 20To ko na macitangayan jinyo am mangay kalavi nyo a meykaoo. Am somaray sira o tao a ji nganoyong jyaken. Am cyaha, ta o lavyan nyo am no meyvoga am sarasaray nyo na. 21No marateng rana o araraw no kapaw no totowang no mamlis so kanen a mavakes am manoyong karako no alalaw na. Am no mapaw rana ori am kahamangan na rana o alalaw na, do katey masaray na a makacita so anak na nimatazak rana tao do karawan. 22Ori an, nyo ikakman sang an. Tana kamo marahet so aktokto sicyaikwaya am cyaha, ta mai ko pa tomita jinyo a kasaray nyo a makacita jyaken. So ikabo no tao a makapehes sya jinyo so sarasaray nyo. 23No si marateng o araraw ori am abo rana asa ka ciring a ipacici nyo jyaken. To ko na macitangayan jinyo am no mapasyasi kamo ji Ama kapeyhanhan nyo no ngaran ko am itoro na jinyo. 24Sicyaikwaya am yanyo pa ji meyhanhanan o ngaran ko a mapasyasi ji Ama ta do to. So amin nyo sya an, ta itoro na jinyo. Am ori o ikanoyong nyo a tey masaray rana.

Haragen ni Yeso o marahet do karawan

25“Amyan rana so nipehngehngay ko a ciring ko jinyo. Am yarana makeykai o araraw na a makaranes. So ji ko rana mapowzibi so ciring ko. Ta ko na pasononga o vazay ni Ama a ipanci ko jinyo. 26No si marateng rana o araraw am mapasyasi kamo ji Ama ta do to a meyhanhan no ngaran ko. So ikabeken a yaken o mapasyasi ninyo. 27Ta na ikarilaw inyo ni Ama ta do to. O na karilawan ninyo am nyo ikaglaw yaken a yaomanoyong jyaken a apo ji Ama ta do to. 28Ko apo ji Ama ta do to a yanimai do teyrahem. Sicyaikwa rana ya am ko na karwan o karawan a yamangay rana ji Ama ta do to.”

29Maniring o macinanao jya am, “Ka manoyong a yaji manayotayo so ciring, ta namen katenngan rana o peypeypangayan no mo ipanci. 30Namen katenngan imo a yabo so yajyatenngi. Mo katenngan o yamyan do onowned namen. Ori o namen anoyngan jimo a yapo ji Ama ta do to.” 31Maniring si Yeso jira am, “Nyo na anoyngan yaken sicyaikwaya? 32Naknakmen nyo an. Ta makeykai rana o kasyasyay nyo rana mangay do peycyavakavahayan nyo a ika yaken rana no yamaveyvow. Am ko jyaveyvow, ta macikaop jyaken si Ama. 33O ko pancyan no nang jinyo am ko ipadnadna so nakem nyo a macikaop jyaken. Am mangay o kalalaw da jinyo no ji manaralay a tao. Am ji kamo a zabab so onowned an. Ta ko na niharag o yamrahet so karawan.”

Currently Selected:

Yowani 16: snt

Highlight

Copy