Yowani 8

Nikarilaw na ni Yeso o nisomagpyan a mavakes

1Am nimangay si Yeso do meyngaran so Kanlan a tokon. 2Apnezak do ikadwa na araw am meysinaoli a mangay do rako a panaralayan. Aro sira tao a mangay komala sya. Karahan am amlisna si Yeso amnanao sira. 3No kanang am nyangay da no mangnanao no iwawalam ni Moyse a tao a kano tao a macyagom do Vadisay o asa ka mavakes. Iya rana am nisomagpyan a nyapisan da. Karahan am patanken da ori do tangain ni Yeso. 4Maniring sira ji Yeso am, “Mo Mangnanao, yanisomagpyan o mavakes eya. Namen nyapisan. 5Maniring do iwawalam ni Moyse am to rana abhebhesi a patoposen o somagpyan a akman so mavakes eya. Manngo ka do akman sang, mo Yeso.” 6O peycirngan da sang am ileylamdamen da si Yeso. Ta no si ori pa o ipakakala da so iraherahet da sya am. Karahan am meylologod si Yeso a kapeyvatvatek na no tanoro na do tana. 7Am ji da kwan si Yeso a pacicin. Karahan am meytatanek si Yeso. Maniring jira am, “Sino jinyo o yabo so raraten, ta manma gomseh jya no veysen.” 8Teyka na ori a ciring ni Yeso am mirwa pa meylologod a meyvatvatek no tanoro na do tana. 9Mamizing da o ciring na am to sira teyteyras a mangay rana, amyapo do ney rakeh na kangay na do ney anak na a to rana teyteyras a mangay, a kararwa da rana ni Yeso a kano mavakes ang nimavezed. 10Karahan am meytatanek si Yeso. Maniring do mavakes ori am, “Wanjin da nyangayan no aro a tao ang. Yabo rana sira o yamakalavat so raraten mo ang?” 11Maniring o mavakes ori am, “Jyabo rana.” Maniring si Yeso am, “Ko na to peykabobwa o raraten mo. So to mo na angai. Am ji mo na peyneynama o kapeyraraten mo an.”]

Zezak no karawan si Yeso

12Maniring si Yeso jira am, “Yaken rana am zezak no karawan. O macilolo jyaken a tao am amyan jira o zezak no onowned da. So ji da rana ngyani do kasarisaryan.” 13Maniring jya o tao a macyagom do Vadisay am, “Mo ipeylimwang o kataotao mo. Ikongo na angangayan no ciring mo.” 14Maniring si Yeso am, “Tana ipeylimwang ko o kataotao ko am ikongo na kalasan no ciring ko. Ko katenngan o ko kapwan. Ko katenngan o ko angayan. Am inyo am nyo jyatenngi o ko kapwan a kano ko angayan. 15No kamo manita so tao am nyo citahen o kapyapyan no iwawalam no tao. Am yaken am ko jingwana sang. 16No si amyan so oyaoyyan ko no tao am abo kalasan no ahahapan ko sya. Ta beken a ko asa ka tao a yamamnek jya. Ta namen rarwa si Ama a nimapahanhan jyaken do teyrahem. 17O iwawalam nyo a yadomket do vakong am no rarwa rana o tao a meyyanoyong jya am ori o ikanoyong na, ta nimacita da no rarwa. 18Ko ipeylimwang o kataotao ko am yakman sang si Ama a yanitomovoy jyaken a yamacyanoyong jyaken.” 19Maniring sira am, “Wanjin na yanan ni Ama mo.” Maniring si Yeso am, “Nyo jyatenngi yaken a kani Ama. Ta no si katenngan nyo yaken am akman sang si Ama katenngan nyo.”

20O ciring rana ya am mina ciring ni Yeso do pangapangayan da so kingking da a kavangan do rako a panaralayan da. No kanang am abo tao a amrakep sya. Ta beken pa araw na no irakep da si Yeso.

21Maniring pa si Yeso jira am, “Ko na mangay. So ikanoyong nyo a komala jyaken. Mangay kawakwak nyo a jyavonas so raraten no si ji nyo a hamangi o peyraratenan nyo. O angayan ko am ji kamo angay dang.” 22Maniring sira o tao do Yotay am, “Yamaniring am, ‘O angayan ko am ji kamo angay dang.’ Manngwa, na rana to manmai o kataotao na saon?”

23Maniring si Yeso am, “Inyo am tao kamo do teyrahem. Am yaken am tao ko do teyngato. O nakenakem nyo am nakenakem no tao do teyrahem. Am yaken am yamacitarek. 24Am ori o ko pancyan no kawakwak nyo a jyavonas so raraten, no si ji nyo a hamangi o peyraratenan nyo. No si ji nyo nganoyngi yaken a meyngongyod a Tao do to am manoyong o kawakwak nyo a jyavonas so raraten.” 25Maniring sira ji Yeso am, “Sino sino ka ya.” Maniring si Yeso am, “Nipeycicinda ko rana jinyo a nipanci. 26Yaro pa yako ipanci jinyo a vazay a ipamizing ko so marahet a icicirawat nyo. So ikanoyong na no yanitomovoy jyaken do teyrahem. Ta o ko nimamizing jya am ipeylimwang ko do tao do teyrahem.”

27Ji da tenngi no tao o malavat na ni Yeso a si Ama na do to. 28Am ori o nipancyan na nya jira ni Yeso. Maniring jira am, “No si marateng o araraw no padketan nyo so Nipamnekan na ni Ama ta do to a tao do jyojika am katenngan nyo rana yaken a meyngongyod ko a Tao do to. So ko ji mangozai do nakenakem ko. Ta ko pangozayan o nakenakem no yanimapahanhan jyaken a si Ama. 29Yabo na ji nidongi jyaken ni Ama a yanitomovoy jyaken do teyrahem. Ko peyvazain o na isaray ni Ama. Am ori o na jya to paveyvowi jyaken.” 30Mamizing da o ciring ni Yeso no aro a tao am anoyngan da rana.

Manoyong a akma ney anak ni Ama ta do to

31Maniring si Yeso do omanoyong jya tao do Yotay am, “No si hapen nyo o nanao ko am manoyong kamo na omonot jyaken. 32Mangay kapakateneng nyo do manoyong a nanao na ni Ama ta do to. So ikanoyong nyo na a somaliway.” 33Maniring sira am, “Yamen rana am komownongan ji Apolahan. So na ikabo pa no yanimapeylamsoy jyamen. Mo ipanci o kasaliway namen no makwa. Ikongo peypeypangayan no ciring mo ang.” 34Maniring si Yeso jira am, “To ko na macitangayan jinyo am o meyraraten a tao am mamimin sira ori a lamlamsoy no raraten. 35O pavahain a lamlamsoy do vahay am abo o panadnaden so akman sang. Ta o meyngongyod a anak o panadnaden. 36O Anak ni Ama ta do to o amvonas so raraten nyo. So ikanoyong nyo na somaliway a abo rana so raraten. 37Ko inyo katenngan a komownongan ji Apolahan am inyo am nyo naknakmen o nyo kawakwak jyaken. Ta nyo ji ngapa o nanao ko. 38O yako ipanci am nipakoyokoy na pa jyaken ni Ama. Am o yanyo vazay am nyo hapen o ciring na jinyo no ama nyo.”

39Maniring sira am, “Si Apolahan am ineynapo namen.” Maniring si Yeso am, “No kamo manoyong a komownongan ji Apolahan am ahapen nyo o vazay ni Apolahan. 40O ko vahangsowen jinyo am nimahap ko ji Ama ta do to a nanao. Am inyo am nyo naknakmen o nyo kawakwak jyaken. Abo o akman sang a mina vazay ni Apolahan. 41O nyo peyvazain a vazay am vazay no ama nyo.” Maniring sira am, “Yabo na ikararwa ni Ama ta do to a ama namen. So namen ikanoyong a anak na.” 42Maniring jira si Yeso am, “No yamanoyong si Ama ta do to a ama nyo am ikongo nyo jyarilawi nyaken. Yaken rana am ko apo ji Ama ta do to. Ko na nimai do teyrahem. Am beken a nakenakem ko o ko kai, ta si Ama ta do to a yanimapahanhan jyaken. 43Ikongo nyo ji makatenngi do ciring ko. O na ikakman sang am nyo jyakzan a amizngen o ciriciring ko. 44Inyo am anak kamo ni Satan. Ta nyo pangozayan o nakenakem no ama nyo a nimakalapo no kakwa o kapangap na so tao. Ji nakzan o manoyong a nanao, ta abo jya o manoyong a nanao. Cinatao na o kapangalalas na, ta iya rana am kapangalalas na a yapwan no makakaday a malas. 45O nyo ji nganoyngi jyaken am ko malavat o manoyong a nanao. 46Pancyan kamo pala o yongkad no raraten ko. Ikongo nyo ji nganoyngi jyaken a yamanci no yamanoyong a nanao. 47O akma ney anak ni Ama ta do to a tao am ori omamizing so ciriciring na ni Ama ta do to. Inyo rana am beken a akma ney anak inyo ni Ama ta do to. Am ori o nyo ji ngamizngi sya.”

Si Yeso a kani Apolahan

48Maniring sira o tao do Yotay ji Yeso am, “Namen ipanci imo a tao do Samadiya a yakovotan. Manngwa, yamalas ori?” 49Maniring si Yeso am, “Yabo a yakomovot jyaken. Ko ikanig si Ama. Am inyo am nyo jyasnesnekan yaken. 50Ko ji ngakzeba o ko kazwayan. Ta si Ama o yazomwazway jyaken a yameylimwang nyaken. 51To ko na macitangayan jinyo am o mahap so nanao ko am to meyyonong o akman sang a tao a ji rana wakwak.”

52Maniring sira o tao do Yotay jya am, “Namen rana katenngan imo a yakovotan. Yarana nimawakwak si Apolahan a kano panoyonoywan na so ciring ni Ama ta do to. Am no ka maniring am, ‘O mahap so nanao ko am to meyyonong o akman sang a tao a ji rana wakwak.’ 53Yamo kadketan a ipanci o mo kahamahama pa kani Apolahan a inapo namen? Yana nimawakwak si Apolahan a kano panoyonoywan na so ciring ni Ama ta do to. Ikongo mo ahahapan so kataotao mo.”

54Maniring si Yeso am, “No si azwain ko o kataotao ko am abo peypeypangayan no akman sang a azwazway. O yazomwazway jyaken am si Ama a yanyo abneken a Tao nyo do to. 55Iya rana am nyo jyatenngi. Am ko katenngan. No si ipanci ko o kaji ko makatenngan jya am akman ko jinyo ori a mangalalas. Am ko katenngan a yamahap so nanao na. 56Tod na ji nala o araraw no yai ko ni Apolahan a inapo nyo. Katenngan na o kai ko am masaray rana.” 57Maniring sira jya o tao do Yotay am, “Ala yaka pa jyanet a yasikalima (50) so kakawakawan eya an. Manngwa, manoyong kanimakacita mo rana si Apolahan an?” 58Maniring si Yeso am, “To ko na macitangayan jinyo am ji pa nimatazak a tao si Apolahan am amyan ko rana.” 59Mangap sira so veysen a igseh da ji Yeso am kanitomayo na makowbot do rako a panaralayan.

Currently Selected:

Yowani 8: snt

Highlight

Copy