Yowani 9
9
Niwakwakan na o mavota tao
1Mangonong si Yeso do rarahan am makacita so nimeycicinda no kalyalikey na mavota tao. 2Maniring sira o macinanao ji Yeso am, “Mo Mangnanao, nimeycicinda ya nimavota no kalyalikey na. Sino raraten a na kakman sang. Manngwa, kataotao na an? No inyapwan na.” 3Maniring si Yeso am, “Beken a raraten na. Beken a inyapwan na o na ikavota. Ta peymatamatan da jya no tao so vazay na ni Ama ta do to do yamavota a tao eya. 4Ahapen ta o vazay na no yanimapahanhan jyaken do ikavyay ta pa. Ta no si mawakwak ta rana am ji ta na makapeyvazay. 5No keyyan ko pa do teyrahem eya am zezak nyo yaken a tao do karawan.”
6Iptad na o ciring na am meycicipa si Yeso do tana a kapazavoz na sya do tana a kapakoris na sya do mata no mavota tao. 7Maniring jya si Yeso am, “Angay oyasi do nibneng da ranom a yameyngaran so Siloya.” O peypeypangayan no Siloya am Nipahanhan. Karahan am mangay na rana oyasan. Meysinaoli am makacita rana. 8Macita da no katakataib na kano kararay na am maniring sira am, “Beken a oya asyo o yamyamyan do jya yamacikakanen asyo?” 9Maniring o kadwan jira am, “Iya saon am.” Am tatasa jira o manci no, “Beken a iya. Na kakman sya so kamamagenan.” Maniring o nimavota ori am, “Yaken o yanyo malavat ang.” 10Maniring sira do tao ori am, “Yanimakongo so wanjin o mata mo a yamo kato makacittan rana ang.” 11Maniring o tao ori am, “O yasa ka tao a meyngaran so Yeso am yanimapakoris do mata ko so tana, na kapanci nya jyaken so, ‘Angay oyasi mata mo do nibneng da ranom a yameyngaran so Siloya.’ Ko mangay oyasan am ko na to makacita rana.” 12Maniring sira do tao ori am, “Wanjin na yanan.” Maniring o tao ori am, “Ko na jyatenngi.”
Ikazyak da no tao a macyagom do Vadisay o nimavota tao a to rana makacita
13Yangay da o mavota tao a nimapya rana do tao a macyagom do Vadisay. 14No keywakwak na ni Yeso do mavota tao am ipeywalam no tao o araraw na. 15Ipirwa da pacicin no tao a macyagom do Vadisay o nimapya rana so mata tao am maniring o tao ori am, “Na nipakorisan so tana o mata ko. Ko kangay moyas jya am ori o ko ipakacita rana.” 16Maniring o tatasa ka tao a macyagom do Vadisay am, “O yanimapeyvazay so sang a tao am jyabo na kanimapo ji Ama ta do to a. Ta ikongo na ji mangozai do nanao do ipeywalam no tao.” Am maniring sira o karwan da am, “O meyraraten a tao am ikongo na to mapeyvazai so yamapeyzokab a vazay.” Am ori o peyhatay da so onowned a ji macipaswasovoy. 17Makarahan am pacicin da pa o tao ori. Maniring sira am, “Yana imo niwakwakan so mata am ikongo o ciring mo so tao ang.” Maniring o tao ori am, “Iya rana am panoyonoywan na so ciring ni Ama ta do to.”
18Sira rana aro a tao do Yotay am ji da nganoyngi o kanimavota no tao ang. Ipanci da o inyapwan na. 19Maniring sira am, “Anak nyo ya? Manngwa, nimeycicinda o anak nyo ya nimavota? Ikongo na to makacitai rana sicyaikwaya.” 20Maniring o inyapwan na am, “Yamanoyong a anak namen. Iya rana am nimakalapo no kalyalikey na o kaji na makacittan. So namen ipakateneng jya. 21Am namen jyatenngi o na to makacitai rana sicyaikwaya. Namen jyatenngi o yaniomiwakwak jya. To kamo nangay a mapacici sya. Cyaha, ta yarana makaveyvow. Jyabo kaji na mancyan nya jinyo a.” 22O pancyan da no akman sang no inyapwan na am ikanyahey da o panipanirsirngen da no tao do Yotay. Ta maniring sira am, “No si myan so tao a omanoyong ji Yeso a Misayya am to na pagcina do peyneynozyan.” 23Ori o to da rana mancii nira no inyapwan na mangay mapacici so anak da.
24Karahan am ipirwa sira mangay manci no nimapya so mata tao ang. Maniring sira jya am, “Ji ka mangononong so malas do tangain ni Ama ta do to. Ta namen katenngan na kapeyraraten a tao ni Yeso.” 25Maniring o nimavota tao ori am, “Ko jyatenngi na kapeyraraten a tao. Am ko katenngan o kanimavota ko am ko na makacita sicyaikwaya.” 26Maniring sira jya am, “Ikongo na mina vazay jimo. Yanimakongo so wanjin a yaniomiwakwak do mata mo.” 27Maniring o tao ori am, “Ko na nipanci jinyo am nyo kaji ngamizngan sya. Ikongo nyo kakdayan pa sya amizngen. Nyo ikakza saon a kabnek jinyo a macilocilolo jya?” 28Am ori o nyavayan da sya. Maniring sira am, “Imo o na abneken a yamacilocilolo jya. Yamen am namen macilocilolo ji Moyse. 29Namen katenngan o kanimacisirsiring ni Ama ta do to ji Moyse. Am o tao ori am tamo jyatenngi o na nikapwan.” 30Maniring ori am, “Asyo ori nyo jyatenngi na kapwan no yaniomiwakwak do mata ko ang. 31Tamo katenngan o kaji na ngamizngan so pasyasyan da ji Ama ta do to no meyraraten a tao. Ta omraralay nya kano mahap so apyahen na vazay o amizngen na. 32No kamaog no karawan eya am abo pa o tao a to mangiwakwak so mata no nimeycicinda a mavota tao. 33Jyabo na kaji nimapwan ji Ama ta do to no nya. Ta ikongo na to makapeyvazay so akman sang a vazay.”
34Karahan am ioya da o tao ang. Maniring sira jya am, “Si mangnanao ka yameyraraten eya am makongo.” Karahan am pagcinen da do peyneynozyan da.
Mavota so onowned
35Mamizing ni Yeso sira nimapagcin sya do peyneynozyan am mangay na kalahen. Karahan am pacicin ni Yeso. Maniring jya am, “Mo anoyngan o Nipamnekan na ni Ama ta do to a tao an?” 36Maniring am, “Pancyaney jyaken. Sino o tao ang. Ta anoyngan ko.” 37Maniring jya si Yeso am, “Mo rana nimacita. O yamacisirsiring jimo am iya ori.” 38Maniring am, “Mo Panirsirngen, ko anoyngan imo.” Karahan am meylilitod do tangain ni Yeso a omraralay nya. 39Maniring si Yeso am, “O peypeypangayan no yako nyai do teyrahem am ko mapeykapyapinpin so tao. Ko iwangan o mata da no yakmey mavota so pahad a tao a kapakacita da rana. O mapakateneteneng do nanao na ni Ama ta do to am meyvaliw rana sira akmey mavota, abo so katentenngan.” 40Mamizing da o ciring eya no amyan dang a tao a macyagom do Vadisay am pacicin da si Yeso. Maniring sira am, “Manngwa, mo patpehen yamen do mavota tao?” 41Maniring si Yeso am, “No kamo manoyong a makateneng do na kakmey mavota no pahad nyo am abo raraten nyo. Am si pazwain nyo o kapakateneng nyo rana jya am kamo manoyong a yamyan so raraten.”
Currently Selected:
Yowani 9: snt
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan
