Locya 17
17
Kalittan a meyraraten
(Matay 18:6-7,21-22; Make 9:42)
1Maniring si Yeso do macinanao jya am, “O raraten no tao am kangay na ori. Am o tao a yapwan na am ney rako na o oyaoya na no akman sang a tao ni Ama ta do to. 2Ta o akman rana sang a tao am apyapya rana o kapila jya mangay itbong do awa. Ta maraherahet o kapeypalanginan na no ji makapatak nya a tao do peyraratenan da. 3Azimanen nyo an. No meyraraten o kakteh nyo am vavagan nyo an. No si mamlis am to nyo peykabobwa o raraten na. 4No ipipito a meyraraten jinyo do kasaraw a kapangday na manci nya jinyo so, ‘Cyaha, ta mamlis ko na,’ am to nyo peykabobwa o raraten na jinyo an.”
Rako a nakenakem da no meyhanhan ni Ama ta do to
5Maniring sira o nipamnekan na ni Yeso a omlivolivon no ciriciring na am, “Ipanta mo yamen so rako a onowned namen ji Ama ta do to an.” 6Maniring si Yeso am, “Tana akman kamo so alikey a vettow no nappa so kakdekdeng no nakem am tana to mo nirsirnga o kayo a manci no, ‘To ka botbot a kangay mo amlida do awa,’ am jyabo kaji na ngonotan jinyo a.
Vazay no lamlamsoy a tao
7“No si myan jinyo so tao a mapeylamlamsoy so meymowamowa kano mapamangamangan so kagling am no nimapo rana do vazay na am manngwa, ipanci nyo jya o, ‘Lisna jito a kakan mo.’ 8Jyabo kakman nyo sang a. Ji nyo mancyan jya o, ‘Alici rana o ayob mo a kapanotong mo pa nyaken so yaven ko. Si mabsoy ko rana am ori o yakan mo.’ 9No teyka na rana o vazay na no lamlamsoy am manngwa, isaray na no lawpan na jya? Jyabo a. 10Akman kamo so sang an. No teyka nyo a peyvazain o vazay na jinyo ni Ama ta do to am ji kanyo mapakazwazway an. Ta adan ori a vazay no omraralay ni Ama ta do to a tao.”
Niwakwakan na ni Yeso o asa ngarnan (10) a omlabyab so kolit a tao
11Meypangay si Yeso do Yelosaleng am meyhatay do peyyawwan no Samadiya kano Cyadidi. 12So nyangay na do asa ka ili do dang. Amyan so asa ngarnan (10) a omlabyab so kolit a tao a mangay sominmo sya. Am ori o nipeytatanek da do marai pa, 13amlololos a manci no, “Mo Yeso, Panirsirngen namen, ikasyasi mo pa yamen eya an.” 14Macita na sira ni Yeso am ipanci na jira o, “Angay kamo ipacita o kataotao nyo do mapatanatanang so nakem ji Ama ta do to.” Mangay sira am todapya rana sira. 15Maliliw na no asa ka tao jira o kanimapya na rana no kataotao na am meysinaoli pa a somaray nya ji Ama ta do to, 16a kapeylilitod na do tangain na ni Yeso a somaray nya jya. O tao rana ori am tao do Samadiya. 17Maniring si Yeso do aro a tao am, “Da kasa ngarnan no yanimapya so kataotao ori am wanjin jya sira o yasasyam. 18Ikongo na ikaveyvow a yasomaray nya ji Ama ta do to a beken a Isedi a tao.” 19Maniring si Yeso jya am, “Tanek rana kangay mo na. Ta yaka manoyong a meyhanhan ni Ama ta do to. So mo ikapya rana no kataotao.”
No mirwa meysinaoli si Yeso
(Matay 24:23-28,37-41)
20Amyan so tao a macyagom do Vadisay a mapacici si Yeso. Naknakmen da o ipakateneng da do ipakasasnad na no talamozongan na no tao ni Ama ta do to. Maniring si Yeso am, “O talamozongan na ninyo ni Ama ta do to am beken a todacita no mata ori an. 21Abwata o tao a manci no, ‘Cita pala, ta yamyan do jya.’ Ta o italamozong na ni Ama ta do to am yamyan do onowned no tao.”
22Maniring pa do macinanao jya am, “No marateng o araraw na am tana ikeykakza nyo o kapakacita nyo jyaken a mai a omahap jinyo am jyabo kapakacita nyo jyaken a. 23Amyan so tao a manci nya jinyo so, ‘Cita pala, ta yamyan do kwang si Yeso.’ ‘Cita pala, ta yamyan do jya.’ Am ji nyo ngonoci sira an. 24Ta o araraw na no yai ko a Nipamnekan na ni Ama ta do to am abo ji makacita sya tao, akmey meycicilat a maniray. 25Am manmanma o keyyan no aro a alalaw ko do peymakarwan da jyaken no tao sicyakwaya. 26No meygegcin o Nipamnekan na ni Ama ta do to a tao am akman so cinasasaodan da da Noya no kakwa. 27No kaji na pa meykehnepan am to sirangned so ninyakan a kapazagzagpit da mangay do araraw no isdep da rana da Noya do avang da. Am meykehnep rana am nimamimin sira nimabalinas. 28O araraw na no ipeysinaoli ko am akman no kapeyigegen na pa ni Lote. O tao no kano nang am nikoman sira. Nimanazang sira. Nimhakakaw sira. Nimeypinapinan sira. 29Marateng o araw no ikaro na ni Lote do Sotoma am pakasen na rana ni Ama ta do to o apoy a kano makwat a vato a kamimin da nimaliman. 30O araraw no yai ko a Nipamnekan na ni Ama ta do to a tao am akman so sang.
31“O araraw na no nang am jindep do vahay da o myan do atep no vahay a mangap so apzapzatan. Akman sang o myan do nihakawan da, ta ji sira to ngoli. 32Naknakmen nyo o mavakes na ni Lote a nimapaoli so mata na a kapeyvaliw na a tomigzang a asin. 33Omnakenakem so ipeypapya na tao am ji na meypapyan ori. O mawakwak no vazay ko am dompeh jira o ikavyay no pahad da. 34Ko pa ciring jinyo am do ahep no nang do ipeysinaoli ko am o rarwa ka tao a mitkeh do asa ka ititkehan am o asa jira o ahapen ko. O asa am vezeden ko. 35O rarwa ka mavakes a manworod so kanen da am asa ahapen ko. O asa am vezeden ko. 36[O rarwa ka mahakay do nihakawan da am asa o ahapen ko. O asa am vezeden ko.]” 37Pacicin da no macinanao jya. Maniring sira am, “Mo Panirsirngen, do wanjin mangay na kasasnadan no akman sang a vazay ang.” Maniring si Yeso jira am, “O yanan no nimawakwak a omalalam am ori o pacilolwan da no meyyasasalap.”
Currently Selected:
Locya 17: snt
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan
