Matay 27

Yangay da a itoro si Yeso ji Pilato

(Make 15:1; Locya 23:1-2; Yowani 18:28-32)

1Apnezak am malovot sira o panipanirsirngen no mapatanatanang so nakem da si Ama ta do to a kano kamanrarakehan da no tao do Yotay a meykaygi no kawakwak da si Yeso. 2Ahapen da si Yeso am vaoden da yangay a itoro do panirsirngen da no Loma a meyngaran so Pilato.

Mawakwak si Yota

(Nimlivolivon 1:18-19)

3Katenngan na rana si Yeso no nimanazang nya a meyngaran so Yota a wakwaken da am maneneseh rana. Karahan am mangay na paolin o atlo a poo (30) a nizpi do panipanirsirngen da no mapatanatanang so nakem da si Ama ta do to a kano kamanrarakehan da no tao do Yotay. 4Maniring am, “Ko meyraraten a yatodey manazang no inawan no yabo so raraten a tao.” Maniring sira am, “Vazay mo saon am. Namen macivazay jimo.” 5Karahan am iwalit na o nizpi do rako a panaralayan a kapakowbot na rana amvitkeh so kataotao na lalavicinen do kayo. 6O panipanirsirngen no mapatanatanang so nakem da si Ama ta do to am peysinsinmowen da rana o nizpi. Maniring sira am, “Ngina no inawan na ya. Am ori o ji palovoci sya do kingking a itoro ji Ama ta do to, ta marahet.” 7Meykaygi sira am akmey yasa sira ommya so kasazang da do nihakawan no meyteytanatana tao a mangay da bobwan no ji macikeylyan jira tao. 8So na todangai sicyaikwaya no yada pancyan no nihakawan ori a “Nivoyogan no rala no tao.” 9O vazay rana ya am yatodey mangononong do mina ciring no panoyonoywan na so ciring ni Ama ta do to a meyngaran so Yedimi. Ta maniring am, “Nyahap da o atlo a poo (30) a nizpi a nipamnekan da no Isedi a ipalit da so inawan no tao, 10a nipamalit da so nihakawan no meyteytanatana tao. Ori rana am nakenakem na jyaken ori ni Ama ta do to.”#27:10 Sacyadiya 11:12-13; Yedimi 32:6-9.

Pacicin da si Yeso do tangain ni Pilato

(Make 15:2-15; Locya 23:3-5,13-35; Yowani 18:33-19:16)

11Yangay da si Yeso do tangain ni Pilato. Maniring jya am, “Manngwa, panirsirngen da imo no tao do Yotay?” Maniring si Yeso am, “Noon, manoyong ori.” 12O iraherahet da sya no panipanirsirngen no mapatanatanang so nakem da si Ama ta do to a kano kamanrarakehan am abo nipasapa na ni Yeso. 13Maniring si Pilato jya am, “Yabo cicilwan mo do da iraherahet jimo a vazay ang?” 14Akman sang ta abo o asa ka ciring a pasapahen na ni Yeso. Ori o nisavasavakan na nya ni Pilato.

15Mangday do Iyeci o kato na mangozayan jya no panirsirngen do pamnekan da no tao a mapasaway so asa ka nyaneban da tao. 16No kanang am amyan so asa ka nyaneban da meyngaran so Palapa katenngan da ori no tao a tey marahet so iyangay. 17Nimalovot o aro a tao. Maniring si Pilato jira am, “Sino nyo kakzeben a pasawain ko. Si Palapa o pasawain ko an? No si Yeso a ipanci da Misayya o pasawain ko.” 18Katenngan ni Pilato o nyahapan da si Yeso a itoro jya do keynanahet da nya.

19Pacicin ni Pilato am manovoy o mavakes na so tao a mangay manci nya jya so kaji na manaptan do abo so kararatan a tao, ta tey manganyahey o tatateynep na. 20Am kapasozisozi da so aro a tao no panipanirsirngen no mapatanatanang so nakem da si Ama ta do to a kano kamanrarakehan a manci ni Pilato a mapasaway si Palapa a kawakwak da si Yeso. 21Maniring si Pilato jira am, “Sira rana o yararwa eya am sino jira ya o apyapyahen nyo a pasawain ko.” Maniring sira am, “Si Palapa.” 22Maniring jira si Pilato am, “Kongwen ko so wanjin si Yeso a da ipanci no tao a Misayya.” 23Maniring sira o aro a tao am, “Padketen do jyojika.” Maniring si Pilato am, “Ikongo na mina vazay a marahet.” Meyratateng am ikeykavevek da amlololos no aro a tao a manci no kapadket sya do jyojika.

24Ileylamdamen na sira ni Pilato am katenngan na rana o kabo na rana no pasapahen na jira ciring, ta ikanyahey na kapeyzavozavoz da no aro a tao. Meyratateng am mangap so ranom a pangain na do tangain no aro a tao a kapavanaw na. Maniring am, “No si mawakwak ya am cyaha, ta beken a raraten ko, ta monganay jinyo.” 25Karahan am akma sirey asa o tao a manci no, “No si mawakwak o tao ori am cyaha, ta monganay jyamen a kano sivosivovoong namen o mapeyraraten sya.”

26Meyratateng am pasawain na ni Pilato si Palapa a kapanci na rana no tao a somipsipzot ji Yeso a katoro na rana nya jira a padketen do jyojika.

Peyyaliliman da no itaysang si Yeso

(Make 15:16-20; Yowani 19:2-3)

27O imong ni Pilato a itaysang no Loma am yangay da na si Yeso do pantaw no vahay ni Pilato a limoten. 28Meyratateng am opsowen da o ayob ni Yeso a kapayob da jya so akmey ayob no panirsirngen, 29kapamalikawag da so tazici a pasakopen da jya a kapakemkem da sya do wanan na so vazit a kapeylilitod da do tangain na meykeykaming nya. Maniring sira am, “Makapintek a Panirsirngen da no tao do Yotay,” 30a kacicipa da jya a sipsipzotan no vazit so oo. 31Teyka da peyyaliliman am opsowen da o nipeyyayob da sya akmey ayob no panirsirngen a kapayob da rana so meyngongyod a ayob na a kangay da rana mapadket sya do jyojika.

Padketen da si Yeso do jyojika

(Make 15:22-32; Locya 23:26-43; Yowani 19:17-27)

32Makowbot sira am makasinmo sira so tao do Cidinay a meyngaran so Simong. Karahan am gacigatan da somabway no jyojika ni Yeso, 33a kangay da nya do meyngaran so Keketa. O peypeypangayan na am Yanga no oo no tao. 34Meyratateng am mangap sira so nipazavozan da so kosozi a makopad a ranom a ipeyyop da si Yeso. Am mina kataham na jya a ji na niyop. 35Padketen da rana si Yeso do jyojika am macipangoyongoyot sira amvonong so mina ayob na.#27:35 Anwanood 22:18. 36Karahan am amlisna sira do dang a omzat jya. 37Amyan so nivatvatkan da do kayo a nipayoray da do jyojika a raraten na. O nivatvatkan da ciring am, “Iya ya am Panirsirngen da no tao do Yotay,” 38a kapazasing da so rarwa nimanakaw a tao do wanan na kado ozi na a padketen do jyojika.

39O meyhatay jya tao am to da ligaligana o oo da mapasnesnek si Yeso. 40“Ipanci mo asyo o kakava mo so rako a panaralayan a kapakatlo na araw no ipatnek mo sya. No ka manoyong a Anak ni Ama ta do to am avyay pala o kataotao mo. Peyhekas pala do jyojika.” 41O panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to a kano kamanrarakehan am akman sang sira meykeykaming nya. Maniring sira am, 42“Na mavyay o karwan no tao a na jyatenngi o kataotao na na avyain. No manoyong a Panirsirngen no Isedi am na ji meyhekasi do jyojika. Ta ori o anoyngan ta jya. 43Na ipeyhanhan si Ama ta do to. Na ipanci o kataotao na Anak no Tao do to. No komwan am citahen ta pala. Manngwa, ala avyain na ni Ama ta do to an?” 44Akman sang sira o yamacitazing jya do jyojika nimanakaw a tao a mapeyleylak sya.

No kawakwak ni Yeso

(Make 15:33-41; Locya 23:44-49; Yowani 19:28-30)

45Meyigen o araw am mina todakedep o teyrahem so atlo a ka vatvatek. 46Ikatlo na ka vatvatek do makoyab am amlololos si Yeso. Maniring am, “Idi, Idi, lama sapahetani.” O peypeypangayan na am, “Mo Ama do to, mo Ama do to, mo peymakarwan jyaken.”#27:46 Anwanood 22:1. 47Maniring sira o makamizing sya tao am, “Na tawagan si Idiya.” 48Amyan so asa ka tao a mina to malalayo a mangay mangap so akmey tapaik a katahem na sya do makopad a ranom a kapalibed na sya do anaro a avyao a itoro ji Yeso a ipeyyop na sya. 49Maniring sira o karwan no tao am, “Nanalahen ta pala. Ala mai si Idiya mahap sya ang.” 50Ipirwa na kalolos ni Yeso am mazavat o inawan na.

51No kanang am o bengbeng no rako a panaralayan a milakayob am mina todapising a kapeykanini na kapeykezi no pongow. 52So mina to na iwangi no heseb da a mina todavyai rana no amraralay ni Ama ta do to a tao. 53Mirwa mavyay si Yeso am karwan da o heseb da a mangay rana do Yelosaleng. So ikaro no tao a nimakacita sira ang. 54Macita na no panirsirngen no itaysang no Loma kano kararay na nimamzat ji Yeso o nimeykanini a kano makakaday a vazay am manyahey sira. Maniring sira am, “Yamanoyong ya Anak no Tao do to.”

55Amyan dang so aro a mavakes a makacita sya a macyatovang jya. Sira rana am apo sira do Cyadidi a nimacihza ji Yeso a mapeyveyveken sya. 56O amyan do dang am Matelyan Madiya kano asa ka Madiya a ina da Yake a kani Yoseyvo a kano mavakes ni Sipitay.

Nipakakasa da si Yeso

(Make 15:42-47; Locya 23:50-56; Yowani 19:38-42)

57Maseyrem rana am amyan so meynakem a tao a nimapo do Adimatay a meyngaran so Yoseyvo. Iya rana am nimacinanao ori ji Yeso. 58So nyangay na ji Pilato a manci no kakas na so kataotao ni Yeso. Karahan am manovoy si Pilato so lamlamsoy na a manci no kapya na mangay da hapen no kataotao ni Yeso, 59a kahap na rana sya ni Yoseyvo a kapongos na jya no malavang a milakayob, 60a mey pakakasahen do nidokdokan da rako a mao a akmey azcip. Ori rana am vayo pa ori a nidokdokan na, a kalolog na so rako a vato a pazevngen na do ngoso na a kangay na rana. 61Si Matelyan Madiya kano asa ka tao a meyngaran si Madiya am amhezsad sira do katovangan no ngoso no heseb ni Yeso.

62Ikadwa na araw am araraw no ipeywalam no tao do Yotay. O panipanirsirngen no mapatanatanang so nakem da si Ama ta do to a kano tao a macyagom do Vadisay am mangay sira ji Pilato. 63Maniring sira am, “Mo maran, namen pa manakem o ciring no yamangalalas a tao no kavyay na pa manci no, ‘Ikatlo na araw am mavyay ko pa.’ 64Am ori o pancyan mo no tao a makapzat do heseb na so katlo araw a kaji da makatakawan so kataotao na no macinanao jya, ta todey mancyan do tao o kanimirwa na mavyay. Ta manginanawa o ciring da a malalas pa kano ciring na no kakwa.” 65Maniring jira si Pilato am, “Palolo kamo so mamzamzat a itaysang kapakapya nyo a mamzat do heseb na.” 66Karahan am pangayan da so itovil da jya do vato a somengseng do ngoso no heseb na a kato da rana vezedan do dang no itaysang a mamzat do heseb na.

Currently Selected:

Matay 27: snt

Highlight

Copy