Yowaana 13

Yesu yoosa abatume bae amakulu

1Hu ludaalo lutaangirira lw'esidyaalo sya Paasaka, Yesu yamanya ati, esiha syae sy'ohutula mu syaalo muno achie eyiri Laatang'ene syali syoolere. Yali niyaheera muno abaandu bae abali mu syaalo, haandi yaabaheera ohwoolera elalira hu njakamo. 2Nibali nibalya esy'engoloobe, Sitaani n'amalire ohuta mu mwooyo kwa Yuda, omwaana wa Simooni Yisikarioti, esibaaso syohulya mu Yesu olukwe, 3Yesu yali amalire ohumanya ati Laatang'ene yali amudiisire ebiindu byoosi, haandi n'amanyire ati yatula eyiri Nasaae haandi ali ohukobola eyiri Nasaae. 4Sakira Yesu yatula yi yali niyehaale naali ohulya, yefwaalulamo engubo yae yohumukulu, mani yeeboya etawulo mu sibuno. 5Yachuha amaachi hu bbeseeni, mani yachaaka ohwoosa abeeki bae amakulu, haandi n'akapanguusa neende etawulo yi yali niyeboyere mu sibuno. 6Yoola hu Simooni Petero; nae Petero n'amuteeba ati, “Omwaami, ewe wahaanjosa otye amakulu?” 7Yesu yamukobolamo ati, “Esiindu si ndi ohuhola, ewe haba soosimanyire bulaanu, nae wahasimanye luunyuma.” 8Petero yaangalala yaamuboolera ati, “Ewe haba siwahanjoseho amakulu kata nabudiidi.” Yesu yamukobolamo ati, “Nitahwoosa amakulu, haba sooba oli silala naange daawe.” 9Mani Simooni Petero naamuboolera ati, “Omwaami, otoosa sa amakulu kaange koong'ene daawe, nae neende amahono kaange, neende omutwe kwaange kwosi!” 10Yesu yamuboolera ati, “Oweyokere omubiri haba s'adaha esiindi ohutusaho ohweeyosa amakulu koong'ene, olwohuba aba alabire yeesi.#13:10 ohweeyosa amakulu koong'ene: Ebyandiiko bihuluundu bihale biindi bileha sino mbwe, ohutusaho ababa bahoyera ohweyosa amakulu kae koong'ene. Eng'we mweesi muli abalafu, nae haba si mweesi daawe.” 11Olwohuba Yesu yali amanyire oyo owali ochia ohumuhoba; esyo nisyo esyakera yaboola ati, “Mweesi, haba simuli abalafu daawe.”

12 # Luk 22:27. Yesu niyamala ohuboosa amakulu, yefwaala haandi engubo yae yohumukulu, yaakobolayo ohwiihala, yabateeba ati, “Mumanyire amahuluundu k'esiindu si ndula ohubaholera? 13Eng'we munaanga muti Omweekesa haandi Omwaami weeng'we. Muli abadyeeri, olwohuba nilwo lu ndi. 14Mani sakira koti lu ese Omwaami haandi Omweekesa weeng'we, njosere amakulu keeng'we, nilwo lu eng'we mwesi muhoyere ohwosanaanga amakulu. 15Olwohuba mbabeerese esyohuboneraho hu mwesi muholereenge abasyeeng'we koti lu mbaholeere. 16#Mat 10:24; Luk 6:40; Yow 15:20. Mbaboolera obwadyeeri endi, omuhalaabani #13:16 omuhalaabani: Oba ‘omuhalaabani muyiike’ haba siyahahira omwaami wae; haandi wamwaanda siyahahira oyo owamutuma daawe. 17Bulaanu koti lu mumanyire ebiindu bino, muli neende ehabi nimubihola. 18#Sab 41:9. Haba si ndi ohulomalomaanga hu eng'we mweesi daawe. Ese manyire abo ba ndadoolamo. Nae ebyandiiko byoolerefu bihoyere ohwosereswa abweene biti, ‘Oyo owalichaanga omugaati kwaange, niye haandi owundekaluhaniire.’ 19Sino mbaboolera bulaanu nisisisiiri ohukwaao, hu mufukiirire muti Ndi Oyo Yi Ndi. 20#Mat 10:40; Mrk 9:37; Luk 9:48; 10:16. Mbaboolera obwadyeeri bweene endi, oyo yeesi obukaanira buli yi nduma, aba yambukaaniire, haandi oyo owumbukaanira, aba abukaaniire oyo owaanduma.”

Yesu atuumbula ohuhobwa hwae

(Mat 26:20-25; Mrk 14:17-21; Luk 22:21-23)

21Yesu niyamala ohulomaloma ebyo, yachuunwa muno mu mwooyo, mani n'ababoolera ati, “Mbaboolera obwadyeeri endi, mulala hweeng'we achia ohuuhoba.” 22Abeeki bae batingaalanaho abeene-na-beene, nibaakana-kana ohuloondana neende oyo yi Yesu yali n'aboolereho. 23Nae mulala hu beeki bae, oyo yi Yesu yali yaheera muno, yali niyehaale aambi muno neende Yesu. 24Simooni Petero yamusakula n'aboola ati, “Tuboolereho oyo yi ali ohulomalomaangaho.” 25Mani n'asudira elalira aambi neende Yesu, n'amuteeba ati, “Omwaami niye wiina?” 26Yesu yakobolamo ati, “Niye oyo yi njia ohudoonga esituundu sy'omugaati mu sikae mani mubeerese.” Mani niyamala ohudoonga esituundu sy'omugaati, yasiberesa Yuda, omwaana wa Simooni Yisikarioti. 27Nga lu yamala sa ati ohulya esituundu sy'omugaati esyo, Sitaani yamwiingiramo. Mani Yesu n'amuboolera ati, “Esyo syoodaha ohuhola, sihole bwaangu.” 28Nae hu bali nibalya, abulao kata mulala owamanya esyakera Yesu n'amuboolera atyo. 29Abaandi babaasa bati, koti lu Yuda yali naali omubiihi w'eseende, Yesu yali ohumubooleraanga ati, “Chia okule bi hudaha hulw'esidyaalo”; oba ati, ahoyere ohuchia ohuberesaho abamanani esiindu sidiidi. 30Mani sakira, luunyuma lw'ohulya esituundu sy'omugaati esyo, Juda yasiingiraniramo bwaangu ohutula erwaanyi; kata neende nisyali esiro.

Elako yaaha

31Yesu mani niyamala ohutula erwaanyi, yaboola ati, “Bulaanu Omwaana w'Omuundu yeeswamo oluyaali, haandi ohumubitiramo Nasaae yeeswamo oluyaali. 32Mani Nasaae niyeeswamo oluyaali ohumubitiramo, Nasaae yesi achia ohwiisa oluyaali mu Mwaana w'Omuundu niyebitiramo omweene haandi achia ohumwiisamo oluyaali bwaangu muno. 33#Yow 7:34. Baana baange, nae sisiiri naang'we esiha esidiidi muno. Muchia ohungoonya; nae koti lu ndaboolera Abayudaaya, nilwo lu bulaanu mbaboolera endi, ‘Eyo yi njia, haba simunyala ohwiichayo.’ 34#Yow 15:12,17; 1 Yow 3:23; 2 Yow 1:5. Mbaberesa elako yaaha, endi muheeraneenge abeene-na-beene; koti lu syesi ndabaheera, endi mwesi muheeraneenge mutyo. 35Nimunaheerana, nisyo esiba sinakeraanga abaandu baandi boosi bamanya bati muli abeeki baange.”

Yesu atuumbula ohwekana hwa Petero

(Mat 26:31-35; Mrk 14:27-31; Luk 22:31-34)

36Simooni Petero yateeba Yesu ati, “Omwaami, ochia yeena?” Yesu yakobolamo ati, “Yi njia, ewe haba soonyala ohunoondaho bulaanu buti daawe; nae ochia ohunoondaho luunyuma.” 37Petero yamuteeba ati, “Omwaami, lwasiina obaasa oti haba siinyala ohuhuloondaho bulaanu buti? Ese ndeetusire ohufwa hulwao.” 38Yesu yakobolamo n'amuteeba ati, “Ewe mubwadyeeri bweene onyala ohufwa hulwaange? Huboolera obwadyeeri endi, edaaywa niyitaholyooha onaba wuundekaanire amahabi kadatu.

Currently Selected:

Yowaana 13: SAMIA

Highlight

Copy