Yowaana 18

Ohudiirwa hwa Yesu

(Mat 26:47-56; Mrk 14:43-50; Luk 22:47-53)

1Yesu niyamala ohulomaloma emboosi chino, yasiingira yaawaao neende abeeki bae, nibachia engereha w'ehooho lilaangwa liti Kidironi. Endalo yali abuundu ao, mani Yesu neende abeeki bae nibayiingiramo. 2Nae Yuda, oyo owali achia ohumuhoba, yali amanyire abuundu ao; olwohuba Yesu yachichaangao amahabi maangi neende abeeki bae. 3Yuda yanyoola omukaanda kw'abasikaari neende abahalaabani ohutula ew'abalaamisi bahuluundu neende Abafarisaayo. Bali neende amataara neende etoochi neende ebilwaaniso. 4Yesu yali amanyire ebyo byoosi ebyali bicha ohumukwaaho, mani omweene niyeecha yi bali naabateeba ati, “Mukoonyaanga wiina?” 5Mani nibamukobolamo bati, “Yesu wa Nasareeti.” Yesu yababoolera ati, “Niise oyo.” Nae Yuda wamuhoba, yali niyeemere nabo. 6Yesu niyababoolera ati, “Niise oyo,” beseenda enyuma mani beesiinduha baakwa aasi. 7Yesu haandi yaabateeba ehabi lyohubiri ati, “Mukoonyaanga wiina?” Mani nibamukobolamo bati, “Yesu wa Nasareeti.” 8Yesu yakobolamo ati, “Mbabooleere endi Niise oyo; mani nimuli ohuungoonya, mulehe bano baweeo.” 9Yesu yaboola atyo, hu mboosi yi yalomaloma yoolerere abweene yiti, “Hu abo ba wamberesa, haba sindakosaho kata mulala daawe.” 10Simooni Petero yali neende olugaanga, mani n'alusobolayo, n'atema omuwaambe w'Omulaamisi muhuluundu, n'amumalaho ohutwi hw'omuhono muluungi. Eliita ly'omuwaambe oyo lyali mbwe Malukusi. 11#Mat 26:39; Mrk 14:36; Luk 22:42. Yesu yaboolera Petero ati, “Kobosa olugaanga lwao mu silaalo syalwo. Obaasa oti siindang'wa esikoombe syohusaanda si Laata yambereese daawe?”

Yesu naali mu moni wa Anasi

12Omukaanda kw'abasikaari neende abeemirisi baabwe alala neende abahoongo b'Abayudaaya beemao baadiira Yesu, mani baamuboya. 13Bataangira ohumuyira eyiri Anasi; olwohuba Anasi oyo yali muhweeng'ene Kayaafa, owali Omulaamisi muhuluundu mu mwaaka okwo. 14#Yow 11:49,50. Kayaafa oyo niye owali hale niyakerakiraho Abayudaaya ati, silai omuundu mulala ohufwiira abaandu boosi.

Petero yekaana Yesu

(Mat 26:69-70; Mrk 14:66-68; Luk 22:55-57)

15Simooni Petero neende omweeki wuundi bamala baaloonda hu Yesu. Omweeki wuundi oyo owali naamanyihaane eyiri Omulaamisi muhuluundu, yeengira mu lwaanyi lw'Omulaamisi muhuluundu oyo alala neende Yesu. 16Petero nae yadoong'era erwaanyi hu siruwa. Omweeki wuundi oyo, owali naamanyihaane eyiri Omulaamisi muhuluundu, yatula erwaanyi yaalomaloma neende omuhalaabani muhaana owali naaliindire esiruwa, mani niyeengisa Petero yesi mukati. 17Omuhalaabani muhaana owali n'aliindire esiruwa yateeba Petero ati, “Ewe wesi haba sooli mulala hu beeki b'omusaacha wuno?” Petero yakobolamo ati, “Haba daawe.” 18Bulaanu abahalaabani #18:18 abahalaabani: Oba bati, ‘abayiike’ alala neende abahoongo bali nibabwaanire omuliro kw'amaanda, olwohuba emboo nyiingi yaliho, bali nibeemere ao niboota omuliro.

Omulaamisi muhuluundu ateeba Yesu ebiteebo

(Mat 26:59-66; Mrk 14:55-64; Luk 22:66-71)

19Omulaamisi muhuluundu yeemao yaateeba Yesu ebidiira hu beeki bae neende hu njekesa yae. 20Yesu yamukobolamo ati, “Ndalomalomaanga neende abaandu alafu, buli siha ndeekesaanga mu Sinagoogi neende mu Nyuumba ya Nasaae, yi Bayudaaya boosi bebuusiraanga alala; sibulao esiindu syoosi si ndalomalomaanga mu bweekisi. 21Lwasiina ewe wundeeba otyo? Teeba abo abawuliraanga bi ndababooleraanga; abo bamanyire bi ndababooleraanga.” 22Yesu niyamala ohuboola atyo, mulala hu bahoongo owali niyeemere aambi nae yamupaama oluyi mani yaamuteeba ati, “Eyo niyo engeri yi wahakoboleramo Omulaamisi muhuluundu?” 23Yesu yamukobolamo ati, “Nikali mbwe nomanoome bubi, yekesaho abaandu bali anao obubi obwo; nae nikali mbwe nomanoome bulai, lwasiina wumbaama?” 24Mani Anasi naatuma Yesu eyiri Kayaafa owali Omulaamisi muhuluundu.

Petero haandi yekaana Yesu

(Mat 26:71-75; Mrk 14:69-72; Luk 22:58-62)

25Simooni Petero yali yeemere ao niyoota omuliro. Bamuteeba bati, “Wesi oli mulala hu beeki bae?” Nae yekaana n'aboola ati, “Haba daawe.” 26Mulala hu bahalaabani #18:26 bahalaabani: Oba bati, ‘abayiike’ b'Omulaamisi muhuluundu, owali omunaluyia w'omusaacha yi Petero yatemaho ohutwi yateeba ati, “Ese haba siihubweeneho nae mu ndalo?” 27Petero haandi naasyekaana. Abweene-na-bweene ao, mani edaaywa niyiholyooha.

Yesu aleetwa mu moni wa Pilato

(Mat 27:1-2,11-14; Mrk 15:1-5; Luk 23:1-5)

28Nibwahya oludaalo luloondaho mu mabwiibwi, batusa Yesu ewa Kayaafa ohumuyira, mani nibamuyira mu dooho lya gafana elilaangwa liti “Purayitorio”. Abayudaaya beene haba sibeengira mu Purayitorio, nibatadaha ohuhalaka omusiiro kwohweelabya, hu banyale ohulya esidyaalo sya Paasaka. 29Pilato yatula yaachia yi bali mani yaabateeba ati, “Musaango siina ku musitaaka omuundu wuno?” 30Bamukobolamo bati, “aba naataali neende omusaango, haba sihwahamuleetere yooli.” 31Pilato yababoolera ati, “Eng'we mumuyire mani abeene mumuheengere omusaango nimuloondakana neende amalako keeng'we abeene.” Abayudaaya bamuboolera bati, “Efwe haba sihufukiirirwa ohwiita omuundu yeesi.” 32#Yow 3:14; 12:32. Esyo syeelomaloma ohwooseresa emboosi yi Yesu yali naalomaloome, niyeekesa engeri yi yali achia ohufwiiramo.

33Pilato yeengira haandi mu Purayitorio mani yaalaanga Yesu, yaamuteeba ati, “Niiwe omutuki w'Abayudaaya?” 34Yesu yakobolamo n'ateeba ati, “Esyo osilomaloome hulwao omweene, kose abaandi nibo abahuboleere ebindiiraho?” 35Pilato yakobolamo ati, “Ese ndi Omuyudaaya? Abaandu b'esyaalo syao beene alala neende abalaamisi bahuluundu nibo abahundeeteere ano. Oholere siina syeene?” 36Yesu yakobolamo ati, “Obutuki bwaange haba si bwohu syaalo huno daawe; obutuki bwaange buba nibuli obwohu syaalo huno, abahalaabani baange bahaanwaaniire, ndaahaya ohudiirwa neende Abayudaaya; nae obutuki bwaange haba si bwohu syaalo huno daawe.” 37Pilato yamuteeba ati, “Syeekesa oli omutuki?” Yesu yakobolamo ati, “Oboola oti ndi omutuki. Olwohuba sino nisyo esyakera ndeebulwa, haandi nisyo eyakera ndeecha hu syaalo, ohweekesa obwadyeeri. Buli muundu odaha obwadyeeri, awulira ekono lyaange.” 38Pilato yamuteeba ati, “Obwadyeeri nisyo siina?”

Yesu aheengerwa omusaango kw'ohufwa

(Mat 27:15-31; Mrk 15:6-20; Luk 23:13-25)

Pilato niyamala ohulomaloma atyo, yatula haandi yaachia erwaanyi eyiri Abayudaaya, mani yaababoolera ati, “Ese haba siimubonahooho omusaango kwoosi. 39Nae eng'we mwanala muti hoyeere ohubalehuuliraanga omuboye mulala hu buli sidyaalo sya Paasaka; bulaanu mudaha mbalehuulire omutuki w'Abayudaaya?” 40Nabo bayokerera aakulu nibaboola bati, “Wuno haba, nae Bbarabba!” Bbarabba oyo yali omunyaka.

Currently Selected:

Yowaana 18: SAMIA

Highlight

Copy