Yowaana 2

Esidyaalo sy'ohudeehisania esyali Kana

1Hu ludaalo lwohudatu, waliwo obweeya bwali Kana mu Galilaaya; ng'ina Yesu yaliyo. 2Yesu yesi bamulaanga hu sidyaalo alala neende abeeki bae. 3Efiini niyawa, ng'ina Yesu yamuboolera ati, “Efiini yibaweereho.” 4Nae Yesu yamuboolera ati, “Muhasiing'ene, ndehe mbe! Esiha syaange sisiiri ohwoola.” 5Ng'ina yaboolera abahalaabani ati, “Muhole buli siindu sy'ababoolera syoosi.” 6Bulaanu waliwo esyoongo ch'amaachi chisaasaba echali nichiteerwe ao hulw'omusiro kwohweelabya kw'Abayudaaya, buli syoongo niyirimo amaachi koola elita emia ndala. 7Yesu yababoolera ati, “Yichuse amaachi mu syoongo echo.” Mani baachiichusira elalira. 8Yesu yababoolera ati, “Bulaanu dayeho amaachi kaandi, mukayirire omuhuluundu w'esidyaalo.” Mani nibamuyirira. 9Omuhuluundu w'esidyaalo niyahoombaho amaachi ako akali bulaanu kakaluhaane kali efiini, haba siyamanya yi yitusiirwe (ohutusaho abahalaabani badaya amaachi ako nibo abali bamanyire). Omuhuluundu w'esidyaalo yalaanga owali adehiisye 10mani yaamuboolera ati, “Buli muundu ataangiraanga ohukabula efiini ndai; abaandu nibaba nibamalire ohung'wa nibeekuute, hu yeemao aleeta efiini njalaafu; nae ewe obiihire efiini ndai ohwoola bulaanu buti.” 11Mu bulolero bu Yesu yahola, aho niho ahalolero hataangira. Yaholera Kana mu Galilaaya, niyeekesa oluyaali lwae; mani abeeki bae nibamufukiiriramo. 12#Mat 4:13. Ebyo nibyawa, Yesu yachia Kaperanaumu, alala neende ng'ina, bamwaanang'ina neende abeeki bae; mani nibamalayo endaalo njeraanu.

Yesu achia mu Nyuumba ya Nasaae

(Mat 21:12-13; Mrk 11:15-17; Luk 19:45-46)

13 # Hut 12:1-27. Esidyaalo sya Paasaka sy'Abayudaaya syali aambi ohwoola, mani Yesu n'achia Yerusalemu. 14Niyeengira mu Nyuumba ya Nasaae, yanyoolamo abaandu nibakusa eng'oombe ndaawu, amakoondi, amabburuuku, neende abafuunjisi b'eseende nibali hu mulimo kwaabwe. 15Yesu yabukula omukoye, y'aakuluhamo olubbariki lw'endereechi, mani yaaberusamo boosi, alala neende amakoondi neende eng'oombe ndaawu chosi, baatula mu Nyuumba ya Nasaae; haandi yaabbwomoola erwaanyi eseende ch'amatoongolo ch'abafuunjisi b'eseende, haandi yaafuumamya emeesa chaabwe. 16Mani n'aboolera abakusaanga amabburuuku ati, “Mutuse muno ebiindu bino; mutahola enyuumba ya Laata ohuba enyuumba y'obuhala.” 17#Sab 69:9. Abeeki bae nibeechulisa bati syali syandiikwa mu byandiiko byoolerefu siti, “Ohudaha enyuumba yao hwahandyeemo omwooyo.” 18Ao Abayudaaya nibamuteeba bati, “Halolero siina h'otweekesa ahakera n'ohola bino.?” 19#Mat 26:61; 27:40; Mrk 14:58; 15:29. Yesu yabakobolamo ati, “Mukwiise Enyuumba ya Nasaae yino, nae mu ndaalo chidatu njia ohuyisiingisa yeeme.” 20Abayudaaya baboola bati, “Byayira emyaaka amahumi kane neende chisaasaba ohwoombaha Enyuumba ya Nasaae yino, nae ewe ochia ohuyisiingisa mu ndaalo chidatu?” 21Nae Yesu yali alomaloma hu Nyuumba ya Nasaae eyali omubiri kwae. 22Niyamala ohusyuuha ohutula mu bafu, abeeki bae mani nibeechulisa bati yali amalire ohusilomalomaho; mani nibafukiirira ebyaandiikibwa byoolerefu neende mu mboosi yi Yesu yali n'alomaloome.

Yesu amanyire obulamu bw'abaandu

23Nae bulaanu niyali Yerusalemu hu sidyaalo sya Paasaka, abaandu baangi bafukiirira muno mu liita lyae, nibabona obulolero bu yahola. 24Nae Yesu haba siyabeesika muno, 25olwohuba yali n'amanyire buli muundu koti lu ali, haandi siyadaha omuundu wuundi amuboolere ebibadiiraho; olwohuba omweene yali amanyire ebiri mu mwooyo kw'abaandu.

Currently Selected:

Yowaana 2: SAMIA

Highlight

Copy