MWANDUSO 10
10
Ndewa Zilawile Mng'holo za Wanage Nuhu
(1Vipig. 1:4-23)
1Uno uwo msululu wa wana wa Nuhu, wakala Shemu, Hamu, na Yafeti, wanhu wano wadatu walela wana vuwishile ummemelo wa mazi.
2Wana wa Yafeti wakala Gomeli, Magogu, Madai, Yavani, Tubali, Meshaki, na Tilasi. 3Wana wa Gomeli wakala Ashikenazi, Lifati, na Togama. 4Wana wa Yavani wakala Elisha, Talishishi, Kitimu, na Lodanimu. 5Wana wa Yavani wakala wahenga wa wanhu awo wakalile wokala mhwani na m'visiwa. Wano wao wana wa Yafeti, wakalile wapwililike muisi mmadale na kuigola mmitala na mzindewa, na kila dale dikala na ulonzi wake. 6Wana wa Hamu wakala Kushi, Misili, Puti, na Kanaani. 7Wana wa Kushi wakala Seba, Havila, Sabita, Laama, na Sabiteka. Wana wa Laama wakala Sheba na Dedani. 8Kushi kakala na mwana iyagwe yakemigwe Nimlodi, ayo yakalile munhu wa ichanduso muulumwengu kuwa galu wa ng'hondo. 9Heyo kakala galu wa kusaka wang'onyo mkutazigwa na MNDEWA, na kija kicho kilamso cha wanhu kulonga, “MNDEWA yakutende kuwa galu wa kusaka wang'onyo kamba Nimlodi!” 10Miwambo ya ichanduso ya undewa wake ikala Babeli, Eleki, Akadi na Kaline, miwambo ino yose ikala muisi ya Shinali.#10:10 Shinali iyo isi ya Babelonia. 11Kalawa muisi ija kachola mbaka Ashulu na kuizenga miwambo ya Ninawi, Lehoboti-Ili, Kala, 12na Leseni, ili hagatigati ya Ninawi na wambo kulu da Kala.
13Wana wa Misili wakala Waludi, Waanamu, Walehabi, Wanafutuhi, 14Wapatilusi, Wakasiluhi awo wakalile sina da Wafilisti, na Wakafitoli.
15Mwana mkulu wa Kanaani kakala Sidoni, muhenga wa Wasidoni. Kanaani vivija kakala muhenga wa Wahiti, 16Wayebusi, Waamoli, Wagiligashi, 17Wahivi, Waaliki, Wasini, 18Waalivadi, Wasemali, na Wahamati. Abaho madale ga Wakanaani gapwililika, 19mbaka muna izimbaka za Wakanaani kulawa mwambu wa kusi wa Sidoni mbaka Gelali behi na Gaza, na mwambu wa ulawilo wa zua mbaka Sodoma, Gomola, Adima, na Seboimu behi na Lasha. 20Wano wao wana wa Hamu, wakalile wapwililike mmadale gakalile na ulonzi wao wenyego, isi zao wenyego, na ndewa zao wenyego.
21Shemu, mkulu wake Yafeti, yakalile muhenga wa lukolo lose lwa Ebeli, kakala na wana. 22Wana wa Shemu wakala Elamu, Ashulu, Alufaksadi, Ludi, na Alamu. 23Wana wa Alamu wakala Uzi, Huli, Geteli, na Mashi. 24Alufaksadi kamulela Shela, Shela kamulela Ebeli. 25Ebeli kakala na wana wabili, waichanduso kakemigwa Pelegi,#10:25 Mkieblania Pelegi nhegulo yake wokiigola. kwavija kipigiti cha ugima wake wanhu wa ulumwengu wakala waigolile. Mdodo wake kakemigwa Yokitani. 26Wana wa Yokitani wakala Alimodadi, Shelefu, Hazamaweti, Yela, 27Hadolamu, Uzali, Dikila, 28Obali, Abimaeli, Sheba, 29Ofili, Havila, na Yobabu. Wano wose wakala wana wa Yokitani. 30Isi iwakalile wokala ikala yolawa Mesha mbaka Sefali, muisi ya vigongovigongo ili ng'ambu ya ulawilo wa zua. 31Wano wao wana wa Shemu, wakalile wapwililike mmadale gakalile na ulonzi wao wenyego, isi zao wenyego, na ndewa zao wenyego.
32Gano gago madale ga wanage Nuhu, kulingana na ng'holo zao mgati ya ndewa zao. Ndewa zose za ulumwengu zilawa muno kipigiti vuumalile ummemelo wa igamazi.
Currently Selected:
MWANDUSO 10: Kizalamo
Highlight
Share
Copy
Want to have your highlights saved across all your devices? Sign up or sign in
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators
