Matta 15
15
Finaa-tawaaji maamiraaɓe
1*Fariisa'en he jannginooɓe *Tawreeta ƴuwi *Ursaliima, ngari to Iisa ƴami mo, mbi'i :
2—Ɗume waɗi ko *aahiiɓe maaɗa tokkataa laabi finaa-tawaaji maamiraaɓe meeɗen ? Ɓe lootataa juuɗe maɓɓe fadde maɓɓe nyaamude. #15.2 Lootol juuɗe no waɗee hanaa ngam itta tuuni, amma ngam joomum fonndita diina mum.
3Sey Iisa jaabii ɓe, wi'i :
—Onon nee, ɗume waɗi ko on tokkataa tilsinooje Alla, oɗon tokka finaa-tawaaji mooɗon ? 4Ngam Alla wi'i : Teddin inna maa he bammaa.#15.4 Burtaaki 20.12 ; Wi'itaade Tawreeta 5.16 O wi'i kaden : Kuɗuɗo innum naa bammum fuu no haani wareede.#15.4 Burtaaki 21.17 ; Lewinkooɓe 20.9 5Amma onon, oɗon njanngina ko neɗɗo no waawi wi'ude innum naa bammum, kam sakkani Alla ko haani wallirde ɓe ɗum. 6Oɗon mbi'a fotaay joomum teddina saarooɓe muuɗum. Ndenne ngam sabbu finaa-tawaaji mooɗon, oɗon ngartira haala Alla meere ! 7Munaafiki'en ! *Esaaya woofaay sam wakkati o waɗunoo annabaaku dow mooɗon. 8Nder maggu Alla wi'i :
Himɓe ɓee no mbi'an kam'en no teddina kam,
amma ɓerɗe maɓɓe no mboɗɗi kam.
9 Dewal maɓɓe no meere
ngam ko ɓe ngoni iɓe njanngina ɗum
to ɓiɓɓe aadama ƴuwi. # 15.9 Esaaya 29.13
10Nden Iisa noddi jama'aare ndeen, wi'i nde :
—Kettinee. 11Paamee ko hanaa ko naatata nder hunnduko neɗɗo, tunninta ɗum, amma ko wurtotoo nder makko.
12Sey *aahiiɓe ɓeen ɓattii mo, mbi'i :
—Aɗa anndi ko haalaaji maaɗa ɗiin metti ɓerɗe *Fariisa'en ?
13Nden Iisa jaabii ɓe, wi'i :
—Wasaango fuu ngo *Baaba am gonɗo dow aawaay, no ɗoofetee. 14Accee ɓe, ɓe wumɓe ɗowooɓe wumɓe ! Nde bumɗo ɗowi bumɗo, sey ɓe fuu ɗiɗo ɓe caamowan nder ngayka.
15Sey Piyer wi'i mo :
—Fiirtan min banndol ngool.
16Nden Iisa jaabii mo wi'i :
—Onon duu, faa hannden ɗum laaɓanaay on naa ? 17On anndaa ko naati nder hunnduko fuu no yahan nder reedu, gaɗa mum ɗum yehee gaɗa wuro naa ? 18Amma ko wurtotoo nder hunnduko ɗum, nder ɓerne ɗum ƴuwata, kanƴum jaati tunninta neɗɗo. 19Ngam nder ɓerne neɗɗo miilooji bonɗi, uppooji neɗɗo itta yonki, yeena, fija, wujja, seedo dow fewre, he mbonka fuu ƴuwata. 20Ɗum woni ko tunninta neɗɗo. Amma nyaama tawee lootaay juuɗe muuɗum hano no finaa-tawaaji wi'iri ɗum nii tunnintaa neɗɗo.
Goonɗinol Kanananke debbo gom
21Nyannde gom Iisa ummidii *aahiiɓe mum, fonndi seraaji Tirus he Sidon. 22Sey Kanananke debbo gom tawaaɗo nder seraaji ɗiin waddi bojji mum to makko, wi'i :
—Joomam, taan Daawda, yurmam ! Ɓiyam debbo, ginnaaru woni dow mum, indu torra mo sanne !
23Amma Iisa jaabaaki mo. Nden *aahiiɓe ɓeen ɓattii mo, mbi'i :
—Riiwu debbo oo, omo nii gaɗa meeɗen, omo wulla.
24Sey Iisa jaabii ɓe, wi'i :
—Ngam baali *Isra'el majjuɗi ɗiin waɗi lilaami.
25Nden debbo oon wari, sujidi yeeso makko, wi'i :
—Joomam, wallam !
26Iisa jaabii mo, wi'i :
—Hegaaki neɗɗo hooƴa nyaamdu sukaaɓe, faɗɗana dawaaɗi.
27Debbo oon jaabitii mo, wi'i kaden :
—Goonga non, Joomam. Amma dawaaɗi duu no nyaama nyaamdu joomiraaɓe mum'en ɓiltotoondu nder le'e maɓɓe no saama.
28Nden, Iisa jaabii mo, wi'i :
—Goonɗinol maa ngool no mawni ! Ɗum laatane no ngiɗirɗaa fuu.
Nder wakkati mum, ɓiyiiko debbo nyawti.
Nyawtol nyawɓe heewɓe
29Iisa dilli Tirus he Sidon, o tokkitii daane peta Galili yahde. O ƴeenyi waamnde gom, o jooɗowi toon. 30Himɓe heewɓe ngari to makko, ngaddani mo laƴooɓe, wumɓe, larɗuɓe, pahuɓe, he nyawɓe heewɓe. Ɓe ngaddi ɓe yeeso makko, nden o nyawti ɓe. 31Wakkati ɓe ngi'unoo pahuɓe ɓeen no kaala, larɗuɓe ɓeen no larɗita, laƴooɓe ɓeen no laƴita, wumnooɓe ɓeen no ngi'a. Ɗum haayɗini ɓe sanne. Ɓe tinni iɓe njetta Alla mo *Isra'el.
Nyamnol worɓe ujunaaji nayo
32Iisa noddi *aahiiɓe mum, wi'i ɓe :
—Himɓe ɓee no njurminii. Balɗe tati nii hannden ko iɓe ngondi he am, ɓe ngalaa fuu ko nyaamee. Mi hiɗaa ɓe ndilla tawee ɓe nyaamaay, to rafo liɓoy ɓe dow laawol.
33Nden *aahiiɓe ɓeen mbi'i mo :
—Toy keɓeten ko nyamni jama'aare ndee fuu nder ladde yeeruure ndee ?
34Sey o ƴami ɓe, o wi'i :
—Buuruuje foti njogiɗon ?
Ɓe njaabii mo, ɓe mbi'i :
—Buuruuje jeɗɗi, he likkoy seɗɗa min njogii.
35Nden o wi'i jama'aare ndeen jooɗoo he leydi. 36O hooƴi buuruuje jeɗɗi ɗeen he likkoy koy. O yetti Alla, o helti ɗe, o hokki *aahiiɓe ɓeen, njeddani jama'aare ndeen. 37Ɓe fuu ɓe nyaami faa ɓe kaari. *Aahiiɓe ɓeen kawri kelte ɗeen, ɗe kebbini kandeeje jeɗɗi. 38Worɓe nyaamuɓe ɓeen tan no ngaɗa ujunaaji nayo, sukaaɓe he rewɓe ɓeen ngalaa nder. 39Gaɗa Iisa waynii himɓe ɓeen, o naati laana, o fa'i leydi Magadan.
Currently Selected:
Matta 15: FUH
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators Inc.; © SIM Niger, 2018
