Milʉ́mlʉ́ 9

Ndwirá léme mé Saʉ̂l

(Milʉ́mlʉ́ 22.6-16; 26.12-18)

1Ɨ́ jɔʼ yaá, Saʉ̂l á bé apǎ gwâʼ égúno, ó nyě jʉ́ ó, ompʉ́n mé Tî Yésʉs. Nye nzě tó bee njwɨ́ɨ opara, 2lɨ́ etó dî nyé mekaná mé édwe nyé nkul etô ɨ́ mempáh mínjɨʼla mé Damâs. Nye á be ó, nyě tó mɛ̂r ó, baá bɨ́bɛ̂h o nyé ókœb gʉ̂ʼ bá, táare e bʉbá, kala e bʉrʉ̂m. Nye ómɛ̂r ó, baá o dí edû nzɨ́ mé Krîst bá, kâʼ bé e mikʉ̂kɔ̌b, búla, tô e bé Yerʉ́zalɛm.

3Nó nyé á nkɛ́ɛ lɨ́ etô Damâs. Nye mû lɨ́ ekúnwo e nkana yaá nɛ́ɛ: nyě kǎ twɨra ó, mimbah lɨ́ epan, duho ɨ́ njʉl wé á duho ɨ́ jʉ́o kʉ́ wɨ́. Myé á jaa kʉn ó, njɨ ɨ́ gúmó nyé á be yɨ́. 4Nye ntɔ̂ʼ duma sí, nzě jóʼo twíí lɨ́ elɛ́ɛ e né ó: «Saʉ̂l, Saʉ̂l, gǒ bá tíble mé mpʉ́nʉ̌ ɨ́ yé?»

5Nye ntɔ̂ʼ dî ó: «Dâ ɛ̌! Gua, go nzé ɛ́?»

Twíí ntɔ̂ʼ yala ó: «Mɛm, me ó Yésʉs, mʉr gó dí etíble nyá. 6Nó ó, gbɔlwaa sí. Go e ní ɨ́ nkana. Bé ólɛ́ɛ gó sá gó jálá le esâ gʉ̂ʼ yɨ́.»

7Bʉr o bé e boo nɔ́ɔ́ bé á titye bá, bé á be ó, abe le ekǎn bé cɨ́ʼee. Bé á si kʉ jóʼo etyêl. Bé á be yɨ́ɛ ó, abee mʉ̂r á lwib nyá. 8Saʉ̂l nzě gbɔlwa sí. Nyé gwá kǎ sâ ó, nyě bɛ́ɛ́ ó mîh nɛ́ɛ: akǎ bee. Bʉr ó njoo yé nzě mɛ́rɔɔ nyé ɨ́ mebô, tóŋɔɔ e né Damâs. 9Nye á be ɨ́ lɛŋ mélú mélɛ̂l, akǎ bee. Nye á be ntémé ó, abɔmǎ mbô e num.

10Ɨ́ Damâs, yé á be ó e nyʉ́ʉ́ mpʉ́n, díé lé Ananías. Tî Yésʉs nzě pyâl nyé ɨ́ bilíma. Nye e né ó: «Ananías!»

Nye ntɔ̂ʼ yala ó: «Dâ, me bê.»

11Tî Yésʉs ntɔ̂ʼ lɛ́ɛ e né ó: «Gbɔlwáa. Tóʼ ɨ́ nkpǎʼ dí e díe ó, “Tîtyěl” wɨ́ ɨ́ báánâ. Go e ní ɨ́ mbɛ̌r mé Yʉ́das. Gó odî mʉ̂r Tarsôs dí tɨ̂, díé lé Saʉ̂l nyá. Mʉr waá mû ó lɨ́ ejɨʼla e me. 12Ɨ́ líma nyê jɨ́m yɨ́, nye sí bee mʉ̂r, díé lé Ananías. Ananías waá lɨ́ enî ɨ́ mbɛ̌r, lɨ́ etó kɛl nyé mebô lɨ́ esú ó, nye báʼa bee.»

13Ananías ntɔ̂ʼ lɛ́ɛ ó: «Dâ ɛ̌, bʉr ɨ́ buo buo, bé á si lɛ́ɛ me lɔ̌b wé. Bé sá ó lɛ́ɛ ébébe lɨ́lɛ̂h nyé á sâ bʉr o dí egúmo e go, baá o dí ɨ́ Yerʉ́zalɛm bá lɨ́. 14Nye nzé wâʼ ó e nkul duho lɨ́ ojwɨ́ɨ o mpáh Nzyɛ̌m ó, nye mɛ́rɨɨ bʉr bɨ́bɛ̂h o dí ekɛn díé lô bá.»

15Nó ó Tî Yésʉs á lɛ́ɛ e né ó: «Tóʼ, ebě, me á si twâr mʉ̌r nɨ̌. Lɔ́ɔ́ wâm, wé ótó lɛ́ɔɔ kwá byúú bíkûl bi bʉ̂r ó, ɨ́ nzɨ̌ nyé. Nye ólɛ́ɛ ntémé ojwɨ́ɨ́ bɔ́ɔ́ wǎ, bé e bʉr o b'Ɨ́zraɛ̂l. 16Mɛm mʉr tɨ̂, me ólɛ̂ʼle nyé bím mítúú nyé jálá le esia e myé ɨ́ buo buo ɨ́ lɔ̌b wâm mí.»

17Nó nyé á nze mɔa, tó pyâl ɨ́ mbɛ̌r waá. Nye ntɔ̂ʼ kɛ̌l Saʉ̂l mebô. Nye e né ó: «Saʉ̂l, mɨ́ɔɔ́ wǎm, Tî Yésʉs á si pyâl go ɨ́ nzɨ̌ ɨ́ jɔʼ gó á be lɨ́ enze kâʼ yɨ́. Nye lómó mé ó, me sâʼ ó, go báʼa bee, le ntémé ó, go díʼee lwɨ́ŋlá e Sísǐm mé Nzyɛ̌m.»

18Tyé e tyé yaá, byúú bísɔ̂ʼ, nwɨɨla e bipapâ, byé ntɔ̂ʼ pɔʼǎ Saʉ̂l ɨ́ mîh, nye ntɔ̂ʼ báʼǎ beě mbɨ̂mbɨá. Nye nzě gbɔlwa ɨ́ joó, ntɔ̂ʼ duŋɔɔ. 19Píe tɨ̂ʼ ó nyé á ka baʼa nyɛl ede méde, le ebi nkûl ɨ́ nyʉ̂l yɨ́.

Saʉ̂l lɨ́ etúnǒ Mbɨambɨa Lɔ́ɔ ɨ́ Damâs

Saʉ̂l le ompʉ́n mé Yésʉs bé á bě Damâs bá, bé ntɔ̂ʼ di gʉ̂ʼ bwá mélû abuo. 20Píe tɨ̂, nye nzě táare élɛ́ɛ̌ lɔ́ɔ́ dí edumo e Yésʉs wɨ́ ɨ́ mempáh mínjɨʼla mé óYúden. Nye á lɨlɛ́ɛ e bé ó, Yésʉs ó dí Mwân mé Nzyɛ̌m. 21Baá bɨ́bɛ̂h bé á jôʼlo nye bá, bé á si bu kâm, nzě díila páʼ nyɔ́ɔ́ ó: «Ááʼ! Ntʉ mʉ̂r nyâʼ á tîtible bʉr o dí ekɛn díé mé Yésʉs ɨ́ Yerʉ́zalɛm bá? Nye á bé anze wâʼ lɨ́ enzě mɛ̂r bʉ̂r baá, ó nyě tó e bé ó, Yerʉ́zalɛm kwá ojwɨ́ɨ o mpáh Nzyɛ̌m ɛ̌?»

22Saʉ̂l nyɨɛ á jaa lɨ̂lɛɛ bé sɔ̂ʼ ó, njɨ lɔ́ɔ waá e nkul nyɨnyɛ̂h. OYúden bé á didǐ Damâs bá, bé á bé agʉ́a ékǎn bé cɨ́ʼee. Nye á si kʉ lɛ̂ʼle bé ó, Yésʉs ó dí Krîst: Mʉ̌r Nzyɛ̌m á lœm múló mé jwɨ́ɨ nyá.

23Melû, mé osí laa nɛ́ɛ: oYúden nzě di twíí ó, bé jʉ́ ó nye. 24Saʉ̂l ntɔ̂ʼ boó jʉ̂ʼrǎ bʉm yɔ́ɔ́ yaá. Bé á bʉbóno nye ɨ́ mebé mé nkana móhó e pum ó, bé nkʉ̂ jʉ̂ nyê. 25Nó ómpʉ́n mé Saʉ̂l, bé á nʉa nye ɨ́ pum, gbáŋɔɔ nyé tʉ́ŋlʉ̌ kwám, ntɔ̂ʼ ntɛŋ nyé ɨ́ gúú páʼ kôʼ, ebě, kóʼ nkana, wé á be ó, le egʉ́á gúmo yaá.

Saʉ̂l ɨ́ Yerʉ́zalɛm

26Jɔ̌ʼ Saʉ̂l á pyâl Yerʉ́zalɛm yɨ́, nye á si gwa sáa etiʼe ɨ́ mpúhlá le ompʉ́n mé Yésʉs. Bɨ́bɛ̂h, bé á jaa kpɛ́ɛ nye ó, kpɛ́yɨ́ɨ, ebě, bé á bé abûʼla ó, nye á be ntémé ó mpʉ́n mé Yésʉs. 27Nó ó Banabâs nyɨɛ á nze nʉa nye, bé e nɔ́ɔ́ ntɔ̂ʼ tô nko bʉ̂r o mílʉ́mlʉ́, bé á be yɨ́. Nye ntɔ̂ʼ lɛ́ɛ bé mpʉ̌ Saʉ̂l á bee Tî Yésʉs téme-nzɨ̌ yɨ́, le elɛ́ɛ bé ntémé ekǎn Tî Yésʉs á cɨ nye lɨ́. Nye ntɔ̂ʼ lɛ́ɛ ntémé mpʉ̌ Saʉ̂l á tô Damâs, lɨ́ etô le elwib mílɔ̌b mé Nzyɛ̌m ɨ́ díé mé Yésʉs, abe e bʉ́á yɨ́. 28Táare ɨ́ jɔʼ yaá ntémé ó Saʉ̂l á ka nî ɨ́ sɔ́má yɔ́ɔ́. Bé e boo nɔ́ɔ́ ó b'á titye sɔ́má ɨ́ Yerʉ́zalɛm, le elɨlɛ́ɛ mílɔ̌b mé Nzyɛ̌m ɨ́ díé mé Tî Yésʉs. 29Nye á si lwib ntémé le oYúden bé á lwilwib grɛ̂k bá, bê nzě gɔ́na le edo e bê. Bɨ́ɛ jaá sɨ̂saǎ njɨ ó, bé jʉ́ ó nye. 30Jɔʼ bɨ́ɔɔ́ bé, bé á jóʼo nó yɨ́, jóʼo bé tô e né sá yɔ́ɔ́ Kesáre, ntɔ̂ʼ tyenɔɔ nyé ɨ́ Tarsôs.

31Mbɛ̌r-Nzyɛ̌m nzě bi mépyɛbla, táare ɨ́ sí Yʉ́da, kala ɨ́ yaá Samarî, kumǒ kumáa ɨ́ yaá Galilê yɨ́yɛ̂h. Wé á si bu nʉa pîm le megwɨ́e. Mbɛ̌r-Nzyɛ̌m ntɔ̂ʼ bwaʼ ɨ́ nzɨ̌ Sísǐm mé Nzyɛ̌m. Wé á titiʼe ntémé ó, lɨ́ ekʉ́ dwáawo Tî Yésʉs.

Etiʼe mé Ayɨnéas

32Pétrus á be lɨ́ etô le etye mésí e mésí mɛ̂h. Nye nzě tó bee óbûʼla bé á dǐ Lída bá. 33Nye nzě kœb nyʉ́ʉ́ mʉ̂r gʉ̂, díé lé Ayɨnéas. Nye á be ó mbʉ́mbʉ́ʼ, mbwamle ɨ́ myɛɛla, tâŋ mimbû mwom. 34Nó ó Pétrus á lɛ́ɛ e né ó: «Ayɨnéas, Yésʉs-Krîst, nyɨ́ tiʼ gô! Gbɔlwaa sí, go e kómló joó yô.»

Tyé e tyé yaá, Ayɨnéas ntɔ̂ʼ gbɔlwa sí. 35Mpʉ bʉ̂r ó Lída bɨ́bɛ̂h ndu e baá ó Sarɔ̂n bé á bee nó yɨ́, bé ntɔ̂ʼ dwira míléme, dyɛ̂ʼwɔɔ e Tî Yésʉs.

Pahá mé Dɔ́rkas

36Yé á bě Yópe ó e nyʉ́ʉ́ mpʉ́n mʉmá, díé lé Tabitâ. Díe laá, lé lɨ́ epâʼlɔɔ ɨ́ lwǐb grɛ̂k ó “Dɔ́rkas”: “Mpwaŋ-ebeɔɔ”. Nye á be ɨ́ jɔʼ yɨ́yɛ̂h ó, lɨ́ ebuú cwɨ́a e bʉr, le esusúʼo báántéʼenteʼe o bʉ̂r. 37Lɨ̂ʼ dʉ́o nɛ́ɛ: nye nzě bíle, ntɔ̂ʼ dwe. Jɔʼ bé á sil ejwɨɨ múú wé yɨ́, bé ntɔ̂ʼ nɛŋ wé ɨ́ nyʉ́ʉ́ ntɔ́ɔ tólóm mbɛ̌r. 38Mpʉ̌ Yópe dí ɨ́ kúnwo e Lída yɨ́, ompʉ́n ó Yópe, bé ntɔ̂ʼ jʉ̂ʼra ó, Pétrus, á be ó Lída. Bé ntɔ̂ʼ tyen nyé mpáŋla e bʉr obá. Bé e bé ó, tó lɛ́ɛ gá nye ó: “Bɨ̌h bé lɨ́ ejɨʼla e go, ó go ntâʼ wâ. Adeʼ.” 39Nó Pétrus á mɔa sí, bé e boo nɔ́ɔ́ nzě tô. Jɔʼ bé á pyâl yɨ́, bê nzě tô e né ɨ́ ntɔ́ɔ mbɛ̌r nyaá. Mikúhó mí bʉ́bá mímyɛ̂h, myé ntɔ̂ʼ sîhlě bǎʼ e né, le ejɨŋɔɔ médwê. Bé ntɔ̂ʼ lɛ̂ʼle Pétrus mintɔra mi kʉ́ le okʉ̂r Dɔ́rkas á lar bé ɨ́ jɔʼ nyé á be apǎ dwe yɨ́. 40Nó Pétrus á nze pyêl bʉr bɨ́bɛ̂h kʉ̌l, nye ntɔ̂ʼ bɨʼ mébóó sí, jɨʼla e Nzyɛ̌m. Nye ntɔ̂ʼ dwirǎ nkǒ múu, wé á be yɨ́, nzě lɛ́ɛ ó: «Tabitâ, gbɔlwaa sí.»

Nye ntɔ̂ʼ bɛ́ɛ mîh, beě Pétrus, ntɔ̂ʼ dǐ ndîndǐl. 41Pétrus ntɔ̂ʼ mɛ̂r nyé ɨ́ mbô, gbɛl nyé sí. Nye nzě jébe bʉ̂r o mé Nzyɛ̌m ti e mikúhó mí bʉ́bá, lɛ̂ʼle bé nyǎ, nye mû sí pah. 42Bʉr nzě jóʼǒ lɔ́ɔ́ tɨ̂ʼ ɨ́ Yópe yɨ́yɛ̂h. Bʉr ɨ́ buo buo nzě dyɛ̂ʼwo e Tî Yésʉs. 43Pétrus nzě di gʉ̂ʼ bá ɨ́ bea bea ɨ́ mbɛ̌r mé Simon, mʉr á be lɨ́ eséa bíkʉ́r bí ótír nyá.

Currently Selected:

Milʉ́mlʉ́ 9: ozm

Highlight

Copy