Luc 4
4
Sátan lɨ́ ebóblǒ Yésʉs
1Yésʉs mû lwɨ́ŋlá e Sísǐm mé Nzyɛ̌m nɛ́ɛ: nye ntɔ̂ʼ duhǒ díbé Yɔrdên. Bé e Sísǐm mé Nzyɛ̌m ó b'á be ɨ́ lʉá. 2Sɔ́ŋ meleme ntɔ̂ʼ bóblo nyé gʉ̂, tâŋ melû mekám ménâ. Ɨ́ melû maá, nye á bɨbe ó, ade méde. Nye nzě jóʼo nzâ píe tɨ̂. 3Sɔ́ŋ meleme ntɔ̂ʼ lɛ́ɛ e Yésʉs ó: «Yé bé go ó Mwân mé Nzyɛ̌m nó, lɛ́yɨ́ɨ́ e mekóʼ mâʼ ó, mé líŋaa mede!» 4Yésʉs ntɔ̂ʼ lɛ́ɛ e né ó: «Yê cɛmá ɨ́ Mekaná mé Nzyɛ̌m ó: “Mʉr, nyé abe e nkul etiʼě njɨ ɨ́ lɔ̌b méde mé omér.”»
5Sɔ́ŋ meleme nzě nʉa nyé náǎ, nzě lɛ̂ʼle nyé mesí mɨ́mɛ̂h jɔʼ gwár. 6Nye nzě lɛ́ɛ e né ó: «Me ódwe gó nkul nyɨnyɛ̂h ɨ́ mesí mâʼ mɨ́mɛ̂h, le okúm le ogbaa o tɨ̂. Me á si boo dweŋɔɔ byé ó, me dwêʼ mʉr nyɨnyɛ̂h mé kpɛ̂l nyá. 7Gó bɨ́ʼ mébóó sí ɨ́ mpǒm nyǎm nó, bisâ bínɨ̌ bíbyɛ̂h, byê di byaá byô!» 8Yésʉs ntɔ̂ʼ yala e né ó: «Heʼé, yê cɛmá ɨ́ Mekaná mé Nzyɛ̌m ó:
“Dwéʼ Dâ, dí Nzyɛ̌m gǒ nyá, kûm.
Go e dwé dúu, njɨ nye omér.”»
9Sɔ́ŋ meleme nzě báʼǎ nʉa nyê, nzě tô e né ɨ́ Yerʉ́zalɛm, nzě tyêl nyé ɨ́ mié mpáh Nzyɛ̌m kʉ́. Nye e né ó: «Yé bé go ó Mwân mé Nzyɛ̌m nó, lyáháa! Ebě, yê cɛmá ó: 10“Nzyɛ̌m ólómlo gó beéngeles bé, bé ónzě kamle e go.” 11Yê cɛmá ntémé ó: “Bé óbyɛɛle gó ɨ́ mebó mɔ́ɔ́. Sɨ́ǎ yaá ó kʉ̌ ngá be, abɨma gó lɨ́ ekóʼ yɨ́.”»
12Yésʉs nzě yala e né ó: «Heʼé, ebě, yê cɛmá ɨ́ Mekaná mé Nzyɛ̌m ó: “Ayɨ́ bóblǒ Dâ, dí Nzyɛ̌m gǒ nyá.”»
13Ɨ́ jɔʼ sɔ́ŋ meleme á sil ebóblo nyé mimbi mímyɛ̂h yɨ́, nye ntɔ̂ʼ pʉʼa gúmó Yésʉs á be yɨ́, lɨ́ ebóno lʉ́ʉ́ dʉ́o.
Metááré mé syɛ́ɛ́ mé Yésʉs ɨ́ sí Galilê
14Yésʉs ntɔ̂ʼ tô sí yé Galilê, nye mû lwɨ́ŋlá e nkul Sísǐm mé Nzyɛ̌m. Bʉr nzě jʉŋlǎ lɔ́ɔ́ wé á dumo e né wɨ́ ɨ́ sí yaá yɨ́yɛ̂h. 15Nye nzě lɨlɛ̂ʼle bʉ̂r ɨ́ mempáh mínjɨʼla mɔ́ɔ́. Bʉr bɨ́bɛ̂h bé á jʉjóʼo nye bá, bê nzě sêʼlɔɔ nyê.
Yésʉs lɨ́ ebenɔɔ kwár nyé, Nazarɛ̂t
16Yésʉs nzě tô kwár nyé, Nazarɛ̂t, gúmó nyé á bwaʼ mʉr yɨ́. Móhó sábat, wê nzě pyâl. Nye nzě nî ɨ́ mpáh minjɨʼla, ebě, yé á boo be ó ɨ́ metum mé. Nó nyé á nze tyɛ̂b tîtyěl, láǎ péh Mékaná mé Nzyɛ̌m. 17Bê nzě dwe nyé mekaná ngwíha milɔ̌b Ésayie á cɛma má. Nye nzě bɛ́ɛ mê, kœ̌b gúmó yé á be cɛmá ó:
18«Bɨ̌h e Sísǐm mé Nzyɛ̌m ó mû.
Nzyɛ̌m á lœm me múlo ó,
me tôʼ le etúnǒ Mbɨambɨa Lɔ́ɔ́ wé
kwá baántéʼenteʼe o bʉ̂r.
Nye á lómo me ó, me tôʼ le elɛ́ɛ míkómó ó, mí pɛʼɔɔ.
Me lɛ́yɨɨ ntémé baá o dí e ntím bá ó,
bé mû ó lɨ́ ebee.
Me lɛ́yɨɨ baá o dí ejaʼra e mpêl bá ó, bɨ́ bírɔɔ.
19Me lɛ́yɨɨ bʉr bɨ́bɛ̂h ó,
mbú Dâ Nzyɛ̌m á kɛʼ ó,
nye ócwɨ́a e bʉr wɨ́, wɨ́ pyâl!»
20Nó ó Yésʉs á nze dible mekaná maá, dwe mʉ̂r á kʉkomo mekaná maá nyá. Nye ntɔ̂ʼ di sí. Bʉr bɨ́bɛ̂h o b'á be ɨ́ mpáh minjɨʼla bá ntɔ̂ʼ bɨʼɔɔ nyé mejwôʼlʉ ɨ́ nyʉ̂l ɨ́ tooobó. 21Nó nyé á nze lɛ́ɛ bé ó: «Mûh, péh Mékaná mé Nzyɛ̌m bɨ̂n jóʼó nɨ̌, yɨ́ dira!»
22Bʉr bɨ́bɛ̂h, bé á si sêʼle sá nyé á sâ yɨ́, le ekâm Yésʉs ɨ́ mimbɨambɨa mékǎn nyé á cɨ má. Bé ntémé nzě lɛ́ɛ ó: «Ntʉ mwân mé Yóseb nyâʼ ǎ?» 23Nó nyé á nze lɛ́ɛ e bé ó: «Bɨ̌n dǐ lɛ́ɛ mé yé? Abe e mesónó, bɨ̌n bé ólɛ́ɛ̌ náǎ mûh ó, me sâʼ bɨ̌n sá kɨkɛna dí elɛ́ɛ yɨ́, ó: “Dɔ́bra, paá nyɛɛ́ jomo gó mʉr tɨ̂.” Ntémé, bɨ̌n bé ólɛ́ɛ e me ó: “Sáʼ bɨ́h wâʼ ɨ́ sí gó á byɛ̂l yɨ́ mbi mésimá bɨ́h jʉ́jóʼó ó, gó á sâ ɨ́ Kapernáʉm má.”»
24Yésʉs nzě kɛl mékǎn mâʼ ó: «Mě lɛ́ɛ́ bɨ́n lɨ́ otyeetye ó, abe e ngwíha milɔ̌b ngwár dí enʉŋɔɔ̌ mbɨ̂mbɨá ɨ́ sí yé. 25Mě lɛ́ɛ́ bɨ́n lɨ́ otyeetye ó, yé á be ó e mikúhó mí bʉ́bá ɨ́ buo buo ɨ́ sí Ɨ́zraɛ̂l ɨ́ melû mé Elie, jɔʼ mpíé á be akǎ nwɨ́ɨ tâŋ mimbú mílɛ̂l e pêh yɨ́. Nza á si nyaŋla ɨ́ sí yɨ́yɛ̂h. 26Sâ gwár, Nzyɛ̌m á bé atyěn Elie kwá gúú kúhó Ɨ́zraɛ̂l. Nye á jaa lómo nye ó, njɨ kwá bʉr ó Sidɔ̂n bé omér, ɨ́ kwár Sárɛpta, gúmó kúhó mʉ́má, wé á didi yɨ́. 27Minzɨ̂nzǎm, myé á be ɨ́ buo ɨ́ sí Ɨ́zraɛ̂l ɨ́ jɔ̌ʼ Élisée á be ngwíha milɔ̌b mé Nzyɛ̌m yɨ́. Sâ gwár, nye á bé atiʼ myaá myé á be gʉ̂ʼ mí, njɨ Naamân, mʉr Sirî.»
28Bʉr o b'á be ɨ́ mpáh minjɨʼla bá, bɨ́bɛ̂h, bé á be ó, bé mû le ebúʼ ɨ́ miléme lɨ́ ejóʼo mékǎn ménɨ̌. 29Bê nzě so nyé ɨ́ nkana, tínɔɔ nyé lɨ́ odumo o kwár, gúmó mbéʼé, wé á be yɨ́, lɨ́ esú lé énzéŋle nyé tɨ̂ʼ sí. 30Sâ gwár, Yésʉs á si laa témé entumo e bʉ̂r laá, tô.
Nkul jwɨ́ɨ mé Yésʉs
31Yésʉs á si baʼa tô Kapernáʉm, nyʉ́ʉ́ kwár ɨ́ sí Galilê. Nye nzě báʼǎ dwe bʉ̂r milɛ́ʼlá ɨ́ móhó sábat. 32Bé á be ɨ́ buú kâm mbi mílɛ́ʼlá nyé á dwidwe bé mí, ebě, nye á dwe myé ó e nkul jwɨ́ɨ. 33Ɨ́ sɔ́má bʉ̂r o b'á be ɨ́ mpáh minjɨʼla bá, nyʉ́ʉ́ á be ó le eleme, mbɨ́ǎ sísǐm. Eleme, lê nzě tíne nyé ó, nye tímaa kʉ́kʉ́ le elɛ́ɛ ó: 34«Ywííí, Yésʉs, mʉr Nazarɛ̂t, mɨná e go bé e wáǎ lɔ̌b ɛ̌? Nzê go nzé ó, nzě sîl bɨ́h ɛ̌? Mɨ́ gʉ́a gô. Go ó Mʉr mé Nzyɛ̌m dí ti nyá!» 35Yésʉs ntɔ̂ʼ nkáŋla le eleme. Nye e lé ó: «Diblaǎ num náǎ. Duhaa mʉ̂r nɨ̌ ɨ́ nyʉ̂l.»
Eleme laá nzě nkɛŋ mʉ̂r nɨ̌ sí témé bʉr baá bɨ́bɛ̂h, ntɔ̂ʼ duho nyé ɨ́ nyʉ̂l, asâ nyé ebébe. 36Bʉr bɨ́bɛ̂h nzě kâm, nzě gɔ́na le elwibla páʼ nyɔ́ɔ́ ó: «Wɨ̂ʼ mbi mékǎn duho wó? Nyě e nkul jwɨ́ɨ dí ó, nye lɨ́ ejwɨ́ɨ mímbɨ́a mísísǐm, myê bánǎ duho!» 37Kûm nyé nzě myaŋla ɨ́ sí yaá yɨ́yɛ̂h.
Yésʉs lɨ́ etiʼ mímbêl ɨ́ buo buo
38Yésʉs nzě duho ɨ́ mpáh minjɨʼla nyaá, nzě tô mbɛ̌r mé Simon. Tǐ mʉmá mé Simon á be ó náǎ lɨ́ ebíle, nyʉ̂l lɨ́ edúo ɨ́ bɨl bɨl. Nó bé á nze dî e Yésʉs ó, nye tíʼɨɨ nye. 39Yésʉs ntɔ̂ʼ tyɛ̂b bǎʼ e né, nzě nkáŋla le ekpaa. Ekpaa laá ntɔ̂ʼ síe. Mʉmá nɨ̌ ntɔ̂ʼ gbɔlwa sí, nzě táare éséa e bê.
40Yé á be ó, yé mû bíí kʉ̌ʼ, bʉr bɨ́bɛ̂h bé á be e mimbêl mimbi mimbi bá, bé ntɔ̂ʼ nkɛ́ɛ myê, tóŋɔɔ e myé kwá mé Yésʉs. Nye á jaa kɛl bé ó, njɨ mebô, bé ntɔ̂ʼ tiʼe! 41Meleme ɨ́ buo buo, mé á be ó lɨ́ eduho bʉ̂r ɨ́ menyʉ̂l. Mé á si bʉ̂ bítím, lɛ́ɔɔ ó: “Go ó Mwân mé Nzyɛ̌m!” Nó ó Yésʉs á nze nkáŋla e meleme maá, pɨr mé lwǐb, ebě, meleme maá, mé á si kʉ gʉ́a ó, nye ó dí Mʉ̌r Nzyɛ̌m á lœm múló mé jwɨ́ɨ nyá.
Yésʉs lɨ́ etúnǒ Mbɨambɨa Lɔ́ɔ
42Mɛ́n wé á lɔ́ma nó, Yésʉs nzě pɔhwa, tô kʉ̌l, tô ɨ́ mâ lʉ̌n, súm nyé á be nye omér yɨ́. Entumo e bʉ̂r nzě sáa nyê. Mpʉ bé á bee nye yɨ́, bê nzě bii nyé ó, nye díʼee, akǎ líʼe bê. 43Nó ó Yésʉs á nze lɛ́ɛ e bé ó: «Yé jɨ ó, me tôʼ ɨ́ byúú bínkana biswîh. Me túnaa Mbɨambɨa Lɔ́ɔ dí edumo e Mpóʼo mé Nzyɛ̌m wɨ́, ebě, Nzyɛ̌m á lómo me ó, me sâʼ nó.» 44Nó nyé á nze tô le elɛ́ɛ̌ lɔ́ɔ waá ɨ́ mempáh mínjɨʼla mé á bě sí Yʉ́da má.
Currently Selected:
Luc 4: ozm
Highlight
Share
Copy
Want to have your highlights saved across all your devices? Sign up or sign in
Luc 4
4
Sátan lɨ́ ebóblǒ Yésʉs
1Yésʉs mû lwɨ́ŋlá e Sísǐm mé Nzyɛ̌m nɛ́ɛ: nye ntɔ̂ʼ duhǒ díbé Yɔrdên. Bé e Sísǐm mé Nzyɛ̌m ó b'á be ɨ́ lʉá. 2Sɔ́ŋ meleme ntɔ̂ʼ bóblo nyé gʉ̂, tâŋ melû mekám ménâ. Ɨ́ melû maá, nye á bɨbe ó, ade méde. Nye nzě jóʼo nzâ píe tɨ̂. 3Sɔ́ŋ meleme ntɔ̂ʼ lɛ́ɛ e Yésʉs ó: «Yé bé go ó Mwân mé Nzyɛ̌m nó, lɛ́yɨ́ɨ́ e mekóʼ mâʼ ó, mé líŋaa mede!» 4Yésʉs ntɔ̂ʼ lɛ́ɛ e né ó: «Yê cɛmá ɨ́ Mekaná mé Nzyɛ̌m ó: “Mʉr, nyé abe e nkul etiʼě njɨ ɨ́ lɔ̌b méde mé omér.”»
5Sɔ́ŋ meleme nzě nʉa nyé náǎ, nzě lɛ̂ʼle nyé mesí mɨ́mɛ̂h jɔʼ gwár. 6Nye nzě lɛ́ɛ e né ó: «Me ódwe gó nkul nyɨnyɛ̂h ɨ́ mesí mâʼ mɨ́mɛ̂h, le okúm le ogbaa o tɨ̂. Me á si boo dweŋɔɔ byé ó, me dwêʼ mʉr nyɨnyɛ̂h mé kpɛ̂l nyá. 7Gó bɨ́ʼ mébóó sí ɨ́ mpǒm nyǎm nó, bisâ bínɨ̌ bíbyɛ̂h, byê di byaá byô!» 8Yésʉs ntɔ̂ʼ yala e né ó: «Heʼé, yê cɛmá ɨ́ Mekaná mé Nzyɛ̌m ó:
“Dwéʼ Dâ, dí Nzyɛ̌m gǒ nyá, kûm.
Go e dwé dúu, njɨ nye omér.”»
9Sɔ́ŋ meleme nzě báʼǎ nʉa nyê, nzě tô e né ɨ́ Yerʉ́zalɛm, nzě tyêl nyé ɨ́ mié mpáh Nzyɛ̌m kʉ́. Nye e né ó: «Yé bé go ó Mwân mé Nzyɛ̌m nó, lyáháa! Ebě, yê cɛmá ó: 10“Nzyɛ̌m ólómlo gó beéngeles bé, bé ónzě kamle e go.” 11Yê cɛmá ntémé ó: “Bé óbyɛɛle gó ɨ́ mebó mɔ́ɔ́. Sɨ́ǎ yaá ó kʉ̌ ngá be, abɨma gó lɨ́ ekóʼ yɨ́.”»
12Yésʉs nzě yala e né ó: «Heʼé, ebě, yê cɛmá ɨ́ Mekaná mé Nzyɛ̌m ó: “Ayɨ́ bóblǒ Dâ, dí Nzyɛ̌m gǒ nyá.”»
13Ɨ́ jɔʼ sɔ́ŋ meleme á sil ebóblo nyé mimbi mímyɛ̂h yɨ́, nye ntɔ̂ʼ pʉʼa gúmó Yésʉs á be yɨ́, lɨ́ ebóno lʉ́ʉ́ dʉ́o.
Metááré mé syɛ́ɛ́ mé Yésʉs ɨ́ sí Galilê
14Yésʉs ntɔ̂ʼ tô sí yé Galilê, nye mû lwɨ́ŋlá e nkul Sísǐm mé Nzyɛ̌m. Bʉr nzě jʉŋlǎ lɔ́ɔ́ wé á dumo e né wɨ́ ɨ́ sí yaá yɨ́yɛ̂h. 15Nye nzě lɨlɛ̂ʼle bʉ̂r ɨ́ mempáh mínjɨʼla mɔ́ɔ́. Bʉr bɨ́bɛ̂h bé á jʉjóʼo nye bá, bê nzě sêʼlɔɔ nyê.
Yésʉs lɨ́ ebenɔɔ kwár nyé, Nazarɛ̂t
16Yésʉs nzě tô kwár nyé, Nazarɛ̂t, gúmó nyé á bwaʼ mʉr yɨ́. Móhó sábat, wê nzě pyâl. Nye nzě nî ɨ́ mpáh minjɨʼla, ebě, yé á boo be ó ɨ́ metum mé. Nó nyé á nze tyɛ̂b tîtyěl, láǎ péh Mékaná mé Nzyɛ̌m. 17Bê nzě dwe nyé mekaná ngwíha milɔ̌b Ésayie á cɛma má. Nye nzě bɛ́ɛ mê, kœ̌b gúmó yé á be cɛmá ó:
18«Bɨ̌h e Sísǐm mé Nzyɛ̌m ó mû.
Nzyɛ̌m á lœm me múlo ó,
me tôʼ le etúnǒ Mbɨambɨa Lɔ́ɔ́ wé
kwá baántéʼenteʼe o bʉ̂r.
Nye á lómo me ó, me tôʼ le elɛ́ɛ míkómó ó, mí pɛʼɔɔ.
Me lɛ́yɨɨ ntémé baá o dí e ntím bá ó,
bé mû ó lɨ́ ebee.
Me lɛ́yɨɨ baá o dí ejaʼra e mpêl bá ó, bɨ́ bírɔɔ.
19Me lɛ́yɨɨ bʉr bɨ́bɛ̂h ó,
mbú Dâ Nzyɛ̌m á kɛʼ ó,
nye ócwɨ́a e bʉr wɨ́, wɨ́ pyâl!»
20Nó ó Yésʉs á nze dible mekaná maá, dwe mʉ̂r á kʉkomo mekaná maá nyá. Nye ntɔ̂ʼ di sí. Bʉr bɨ́bɛ̂h o b'á be ɨ́ mpáh minjɨʼla bá ntɔ̂ʼ bɨʼɔɔ nyé mejwôʼlʉ ɨ́ nyʉ̂l ɨ́ tooobó. 21Nó nyé á nze lɛ́ɛ bé ó: «Mûh, péh Mékaná mé Nzyɛ̌m bɨ̂n jóʼó nɨ̌, yɨ́ dira!»
22Bʉr bɨ́bɛ̂h, bé á si sêʼle sá nyé á sâ yɨ́, le ekâm Yésʉs ɨ́ mimbɨambɨa mékǎn nyé á cɨ má. Bé ntémé nzě lɛ́ɛ ó: «Ntʉ mwân mé Yóseb nyâʼ ǎ?» 23Nó nyé á nze lɛ́ɛ e bé ó: «Bɨ̌n dǐ lɛ́ɛ mé yé? Abe e mesónó, bɨ̌n bé ólɛ́ɛ̌ náǎ mûh ó, me sâʼ bɨ̌n sá kɨkɛna dí elɛ́ɛ yɨ́, ó: “Dɔ́bra, paá nyɛɛ́ jomo gó mʉr tɨ̂.” Ntémé, bɨ̌n bé ólɛ́ɛ e me ó: “Sáʼ bɨ́h wâʼ ɨ́ sí gó á byɛ̂l yɨ́ mbi mésimá bɨ́h jʉ́jóʼó ó, gó á sâ ɨ́ Kapernáʉm má.”»
24Yésʉs nzě kɛl mékǎn mâʼ ó: «Mě lɛ́ɛ́ bɨ́n lɨ́ otyeetye ó, abe e ngwíha milɔ̌b ngwár dí enʉŋɔɔ̌ mbɨ̂mbɨá ɨ́ sí yé. 25Mě lɛ́ɛ́ bɨ́n lɨ́ otyeetye ó, yé á be ó e mikúhó mí bʉ́bá ɨ́ buo buo ɨ́ sí Ɨ́zraɛ̂l ɨ́ melû mé Elie, jɔʼ mpíé á be akǎ nwɨ́ɨ tâŋ mimbú mílɛ̂l e pêh yɨ́. Nza á si nyaŋla ɨ́ sí yɨ́yɛ̂h. 26Sâ gwár, Nzyɛ̌m á bé atyěn Elie kwá gúú kúhó Ɨ́zraɛ̂l. Nye á jaa lómo nye ó, njɨ kwá bʉr ó Sidɔ̂n bé omér, ɨ́ kwár Sárɛpta, gúmó kúhó mʉ́má, wé á didi yɨ́. 27Minzɨ̂nzǎm, myé á be ɨ́ buo ɨ́ sí Ɨ́zraɛ̂l ɨ́ jɔ̌ʼ Élisée á be ngwíha milɔ̌b mé Nzyɛ̌m yɨ́. Sâ gwár, nye á bé atiʼ myaá myé á be gʉ̂ʼ mí, njɨ Naamân, mʉr Sirî.»
28Bʉr o b'á be ɨ́ mpáh minjɨʼla bá, bɨ́bɛ̂h, bé á be ó, bé mû le ebúʼ ɨ́ miléme lɨ́ ejóʼo mékǎn ménɨ̌. 29Bê nzě so nyé ɨ́ nkana, tínɔɔ nyé lɨ́ odumo o kwár, gúmó mbéʼé, wé á be yɨ́, lɨ́ esú lé énzéŋle nyé tɨ̂ʼ sí. 30Sâ gwár, Yésʉs á si laa témé entumo e bʉ̂r laá, tô.
Nkul jwɨ́ɨ mé Yésʉs
31Yésʉs á si baʼa tô Kapernáʉm, nyʉ́ʉ́ kwár ɨ́ sí Galilê. Nye nzě báʼǎ dwe bʉ̂r milɛ́ʼlá ɨ́ móhó sábat. 32Bé á be ɨ́ buú kâm mbi mílɛ́ʼlá nyé á dwidwe bé mí, ebě, nye á dwe myé ó e nkul jwɨ́ɨ. 33Ɨ́ sɔ́má bʉ̂r o b'á be ɨ́ mpáh minjɨʼla bá, nyʉ́ʉ́ á be ó le eleme, mbɨ́ǎ sísǐm. Eleme, lê nzě tíne nyé ó, nye tímaa kʉ́kʉ́ le elɛ́ɛ ó: 34«Ywííí, Yésʉs, mʉr Nazarɛ̂t, mɨná e go bé e wáǎ lɔ̌b ɛ̌? Nzê go nzé ó, nzě sîl bɨ́h ɛ̌? Mɨ́ gʉ́a gô. Go ó Mʉr mé Nzyɛ̌m dí ti nyá!» 35Yésʉs ntɔ̂ʼ nkáŋla le eleme. Nye e lé ó: «Diblaǎ num náǎ. Duhaa mʉ̂r nɨ̌ ɨ́ nyʉ̂l.»
Eleme laá nzě nkɛŋ mʉ̂r nɨ̌ sí témé bʉr baá bɨ́bɛ̂h, ntɔ̂ʼ duho nyé ɨ́ nyʉ̂l, asâ nyé ebébe. 36Bʉr bɨ́bɛ̂h nzě kâm, nzě gɔ́na le elwibla páʼ nyɔ́ɔ́ ó: «Wɨ̂ʼ mbi mékǎn duho wó? Nyě e nkul jwɨ́ɨ dí ó, nye lɨ́ ejwɨ́ɨ mímbɨ́a mísísǐm, myê bánǎ duho!» 37Kûm nyé nzě myaŋla ɨ́ sí yaá yɨ́yɛ̂h.
Yésʉs lɨ́ etiʼ mímbêl ɨ́ buo buo
38Yésʉs nzě duho ɨ́ mpáh minjɨʼla nyaá, nzě tô mbɛ̌r mé Simon. Tǐ mʉmá mé Simon á be ó náǎ lɨ́ ebíle, nyʉ̂l lɨ́ edúo ɨ́ bɨl bɨl. Nó bé á nze dî e Yésʉs ó, nye tíʼɨɨ nye. 39Yésʉs ntɔ̂ʼ tyɛ̂b bǎʼ e né, nzě nkáŋla le ekpaa. Ekpaa laá ntɔ̂ʼ síe. Mʉmá nɨ̌ ntɔ̂ʼ gbɔlwa sí, nzě táare éséa e bê.
40Yé á be ó, yé mû bíí kʉ̌ʼ, bʉr bɨ́bɛ̂h bé á be e mimbêl mimbi mimbi bá, bé ntɔ̂ʼ nkɛ́ɛ myê, tóŋɔɔ e myé kwá mé Yésʉs. Nye á jaa kɛl bé ó, njɨ mebô, bé ntɔ̂ʼ tiʼe! 41Meleme ɨ́ buo buo, mé á be ó lɨ́ eduho bʉ̂r ɨ́ menyʉ̂l. Mé á si bʉ̂ bítím, lɛ́ɔɔ ó: “Go ó Mwân mé Nzyɛ̌m!” Nó ó Yésʉs á nze nkáŋla e meleme maá, pɨr mé lwǐb, ebě, meleme maá, mé á si kʉ gʉ́a ó, nye ó dí Mʉ̌r Nzyɛ̌m á lœm múló mé jwɨ́ɨ nyá.
Yésʉs lɨ́ etúnǒ Mbɨambɨa Lɔ́ɔ
42Mɛ́n wé á lɔ́ma nó, Yésʉs nzě pɔhwa, tô kʉ̌l, tô ɨ́ mâ lʉ̌n, súm nyé á be nye omér yɨ́. Entumo e bʉ̂r nzě sáa nyê. Mpʉ bé á bee nye yɨ́, bê nzě bii nyé ó, nye díʼee, akǎ líʼe bê. 43Nó ó Yésʉs á nze lɛ́ɛ e bé ó: «Yé jɨ ó, me tôʼ ɨ́ byúú bínkana biswîh. Me túnaa Mbɨambɨa Lɔ́ɔ dí edumo e Mpóʼo mé Nzyɛ̌m wɨ́, ebě, Nzyɛ̌m á lómo me ó, me sâʼ nó.» 44Nó nyé á nze tô le elɛ́ɛ̌ lɔ́ɔ waá ɨ́ mempáh mínjɨʼla mé á bě sí Yʉ́da má.
Currently Selected:
:
Highlight
Share
Copy
Want to have your highlights saved across all your devices? Sign up or sign in