Luc 5

Yésʉs lɨ́ ejébe ómpʉ́n bé ésôʼ onâ

(Matthieu 4.18-22; Marc 1.16-20; Yʉánɛs 1.40-42)

1Ɨ́ lʉ́ʉ́ dʉ́o, Yésʉs á si to tyɛ̂b lɨ́ ebʉ́m é mâŋ mé Genezarɛ̂t. Nó éntumo e bʉ̂r, lé á nze bɔma nye ɨ́ nká. Bé á nze ó, lɨ́ enzě jôʼlǒ lɔ́ɔ́ mé Nzyɛ̌m nyé á tutúno wɨ́. 2Nó nyé á nze bee mɛ̂l mebá mityeelá ɨ́ pɨ̌n. Ojʉ̂l bé ósû o tɨ̂, bé á si sulo ɨ́ mɛ̂l maá, lɨ́ etó sohlɔɔ méntám mɔ́ɔ́. 3Nó ó Yésʉs á nze kalwo ɨ́ nyʉ́ʉ́ byɛ̂l, waá mé Simon. Nye ntɔ̂ʼ jɨʼla e né ó, bé bâ cɛra e pɨ̌n. Nye ntɔ̂ʼ dǐ ndîndǐl ɨ́ byɛ̂l, nzě nyɛl édwe éntumo e bʉ̂r milɛ́ʼlá.

4Jɔʼ nyé á sil elɛ̂ʼle bé yɨ́, nye e Simon ó: «Síhláá byɛ̂l dóló, gúmó dí ɨ́ díme yɨ́. Bɨ̌n e bʉr ó njoo yô, bɨ̌n e súl méntám mɨ́n ɨ́ gúmo yaá.» 5Simon ntɔ̂ʼ yala e né ó: «Lɛ̂ʼla, bɨ̌h bɨ́ sia e túú lɨ́ esáa ósû pum ntinɨ̂, amɛ̂r sɔ̂ʼ. Damá jóʼo nó, me óguho méntâm ó ɨ́ lɔ̌b lwǐb yô.»

6Nó ó bé á nze guho mentâm yɨ́. Osû, bê nzě kwɨa tɨ̂ʼ ɨ́ buo buo. Mentâm ntɔ̂ʼ táare ényɛɛ. 7Bé ntɔ̂ʼ kwâb bʉ̂r ó njoo yɔ́ɔ́ bé á be ɨ́ nyʉ́ʉ́ byɛ̂l bá ó, bé ntáa nzě kœb bé lɨ́ edulo méntâm ɨ́ medíbé. Bê nzě pyálɔɔ, kœbɔɔ bê. Osû bé á pɛʼ ɨ́ mentâm bá, bé á si lóŋlo mɛ̂l mebá maá. Mé ntɔ̂ʼ táare édihlɨ ɨ́ medíbé ɨ́ lɔ̌b mpúo osû ndu e medile me tɨ̂. 8Jɔ̌ʼ Simon Pétrus á bee syɛ́ɛla yaá yɨ́, nye ntɔ̂ʼ bɨʼ mébóó sí ɨ́ mpǒm mé Yésʉs. Nye e né ó: «Dâ ɛ̌, ayɨ́ di bǎʼ e me, ebě, me ó mʉrʉ̂m dí syɛ̂l misyóm nyá.»

9Simon á be ó lɨ́ ejóʼo ékɛ̂n ɨ́ buo buo. Bʉr o bé le onɔ́ɔ́ bé á be bá, bé ntémé, bé á si jóʼo ekɛ̂n jwɨʼ gwár yaá, ebě, osû bé á ka jʉ̂ bá, bé á be ɨ́ buú buo. 10Jacques, bé e Yʉánɛs, bwán mé Zebedê, bé ntémé á be lɨ́ ejóʼo ékɛ̂n laá. Bé e Pétrus ó b'á syɛŋa mebô lɨ́ ebwâm byɛ̂l waá. Yésʉs nzě lɛ́ɛ e Simon ó: «Sá akpɛ́ɛ. Táare ɨ́ báánâ, go óbe ó ndul bʉr.» 11Nó ó bé á nze syel mɛ̂l mɔ́ɔ́ ɨ́ pɨ̌n, nzě líʼe bísá byɔ́ɔ́ bíbyɛ̂h, dúŋɔɔ̌ Yésʉs.

Yésʉs lɨ́ etiʼ nzɨ̂nzǎm

(Matthieu 8.24; Marc 1.40-44)

12Jɔ̌ʼ Yésʉs á be ɨ́ yʉ́ʉ́ nkana yɨ́, nye nzě bɔma e nyʉ́ʉ́ mʉ̂r, nzǎm ɨ́ nyʉ̂l ɨ́ nyʉá. Mbeá nyé á bee Yésʉs yɨ́, nye ntɔ̂ʼ kúrwo sí, píʼe mpóm ɨ́ bibwǎh. Nye e né ó: «Dâ ɛ̌, gó kpɛ̂l nó, go óbɛ̌m tiʼ mê. Nyʉ̂l díʼee me ɨ́ deŋé.» 13Yésʉs ntɔ̂ʼ syɛ̂m mbô, nzě kúna e né. Nye e né ó: «Mɨ́ kpɛl. Nyʉ̂l díʼee go ɨ́ deŋé.» Tyé e tyé yaá, nzǎm ntɔ̂ʼ síe mʉ̂r waá ɨ́ nyʉ̂l! 14Yésʉs ntɔ̂ʼ lɛ́ɛ e né ó: «Alɛ́ɛ mʉ̂r mpʉ gô tiʼé yɨ́. Tó lɛ̂ʼle pára nyʉ̂l nyǒ mpʉ nyé mû yɨ́. Go e tó dwe míndwéá Moyɨ̂z á lɛ́ɛ mí, bé nkʉ̂ pubo gô!»

15Damá jóʼǒ mpʉ̌ Yésʉs á lɛ́ɛ nye nó yɨ́, lɔ́ɔ́ mʉ̂r waá, wé á si bu myaŋla, tó pyâl ɨ́ jɔʼ éntumo e bʉ̂r lé á swâl, lɨ́ enzě jôʼlo mílɛ́ʼlá mé Yésʉs, le enzě sáa ntémé ó, nye pɛ́ʼɛɛ mekpaa mɔ́ɔ́ yɨ́. 16Tó kœb ó, Yésʉs nyɨɛ á si dulo nyʉ̂l nyé, nzě tô ɨ́ bilʉ̌n, lɨ́ etó jɨʼla.

Yésʉs lɨ́ etiʼ nzwóó

(Matthieu 9.2-8; Marc 2.3-12)

17Ɨ́ lʉ́ʉ́ dʉ́o, Yésʉs á be ó lɨ́ edwe éntumo e bʉ̂r milɛ́ʼlá. OFarizyɛ̂n, le olɛ̂ʼla o métié, bé á be ó tɨ̂ʼ ɨ́ sɔ́má yaá mindîndǐl. Bé á duho ó ɨ́ mekwár mɨ́mɛ̂h mé sí Galilê le maá mé sí Yʉ́da; bâʼ duho ntémé Yerʉ́zalɛm. Nkul mé Nzyɛ̌m á be lɨ́ enyɨ̂n ɨ́ nye ɨ́ tiʼá nyé á titiʼ bʉr wɨ́. 18Nó bʉ́ʉ́ bʉ́rʉ̂m bé á ka nze le enkɛ́ɛ̌ mbʉ́mbʉ́ʼ ɨ́ myɛɛla wé. Bê nzě sáa nzɨ́ ekpâhla e nzwoó wɔ́ɔ́ ɨ́ mpǒm mé Yésʉs, ɨ́ sáa, sáa, abee. 19Nó mpʉ bé á be abee gúmó bé cɨ́yɨɨ yɨ́, bê nzě bére ɨ́ mié kʉ́, ɨ́ mbɛ̌r Yésʉs á be tɨ̂ʼ wɨ́, túbɔɔ égʉ́á ɨ́ mié, ntɔ̂ʼ sulɔɔ̌ myɛɛla nzwóó wɔ́ɔ́ tɨ̂ʼ lɨ́ egʉ́á. Mbêl wɔ́ɔ́ nzě sulɔɔ tɨ̂ʼ ɨ́ mpǒm mé Yésʉs, kwahaá témé bʉr.

20Mbeá nyé á bee mpʉ bé á dyɛ̂ʼwo e né yɨ́, nye ntɔ̂ʼ lɛ́ɛ ó: «Mʉr nyâ, bibaa bí ébébe lô, bí pɛʼɔɔ ɨ́ páʼ gô!»

21Nó ó ólɛ̂ʼla o métié, bé le oFarizyɛ̂n, bé á nze taare esóŋlo nye. Bé ó: «Nyâʼ mʉ̂r dí esâ Nzyɛ̌m nkěh nyâ, nye nzé? Nzé dí e nkul epɛʼ bíbaa bí ébébě Nzyɛ̌m á niʼe bí? Njɨ Nzyɛ̌m nye omér!» 22Sâ gwár, Yésʉs á be ɨ́ gʉ́a mésónó bé á sóŋlo nye má. Nó nyé á yala e bé ó: «Bɨ̌n bé lɨ́ esóŋlo ɨ́ milémé mín ɨ́ yé? 23Yé dí ɨ́ kpâhwa lɨ́ esâ? Le elɛ́ɛ e nzwoó ó: “Baa ébébe lô, yɨ́ pɛʼɔɔ”, nkʉ̂ lɛ́ɛ e né ó: “Gbɔlwáa. Bʉŋláa!”? 24Sâ gwár, mě gwɨ́m ó, bɨ̌n gʉ́ŋaa ó, Mwân mé Mʉr ó dí e nkul jwɨ́ɨ ɨ́ sí yɨ̂ʼ lɨ́ esú ó, nye pɛ́ʼɛɛ bʉr bibaa bí ébébě Nzyɛ̌m dí eniʼe bé bí.»

Nye ntɔ̂ʼ lɛ́ɛ e mbʉ́mbʉ́ʼ ó: «Mě lɛ́ɛ́ gó ó, gbɔlwáa. Go e nkɛ́ɛ́ joó yô. Go e tó kwár nyǒ.»

25Tyé e tyé yaá, mʉ̌r nɨ̌ nzě gbɔlwa ɨ́ míh mé bʉ̂r bɨ́bɛ̂h, ntɔ̂ʼ nkɛ́ɛ̌ myɛɛla nyé á pa nkɛ́ɔɔ tɨ̂ʼ wɨ́, ntɔ̂ʼ tô mbɛ̌r wé, tô le edwě Nzyɛ̌m kûm. 26Bʉr bɨ́bɛ̂h, bé á si kâm syɛ́ɛla yaá, ntɔ̂ʼ dwě Nzyɛ̌m kûm, le ejóʼo bʉ́á. Bé ó: «Mɨná bɨ́ bee gá bisá bí ékâm mûh!»

Yésʉs lɨ́ ejébě Levî

(Matthieu 9.9-13; Marc 2.14-17)

27Píe tɨ̂, Yésʉs nzě tô kʉ̌l, tó bɔma e nwɨa mɔnɨ́ tœ́a. Díé lé, Levî. Nye á kœb nye ó ndîndǐl ɨ́ gúmó nyé á nʉnʉa mɔnɨ́ tœ́a yɨ́. Nye nzě lɛ́ɛ e né ó: «Dúʼóó mê!» 28Levî ntɔ̂ʼ mɔa sí, líʼe bísá byé bíbyɛ̂h, dû Yésʉs.

29Nó Levî á nze tyêl ánɨ̂nɨ̂n nzɔɔ lɨ́ esohǒ Yésʉs ɨ́ mbɛ̌r wé. Nye á si báŋle bʉ́ʉ́ ónwɨa ó mɔnɨ́ tœ́a ɨ́ buo buo, bé e bʉ́ʉ́ bʉ̂r oswîh. Bé á be ó lɨ́ ede, bé e boo nɔ́ɔ́. 30OFarizyɛ̂n, bé le olɛ̂ʼla o métié bé e boo nɔ́ɔ́ bé á be nkɔ̌m mpwár bá, bê nzě gɔ́na le elwib ɨ́ bébe bébe dumo le ompʉ́n mé Yésʉs, le elɛ́ɛ ó: «Bɨ̌n bé lɨ́ ede méde le menyoʼ, bɨ̌n le onwɨa ó mɔnɨ́ tœ́a le osyɛ̂l o mísyóm ɨ́ yé?» 31Yésʉs ntɔ̂ʼ yala e bé ó: «Minjɨ̂h, myé ajɨ ójomo o bʉ̂r. Mimbêl myé omér ó dí ejɨ bê. 32Me á bé anzě jébe ótîtyěl o bʉ̂r. Me á nze jébe ó, osyɛ̂l o mísyóm, ó bé túmaa mikoo e misyóm myɔ́ɔ́, le edwira míléme.»

Eti méde

(Matthieu 9.14-17; Marc 2.18-22)

33Bʉ́ʉ́ bʉ̂r, bé á si dî e Yésʉs ó: «Ompʉ́n mé Yʉánɛs, bé e baá bé óFarizyɛ̂n, bé lɨ́ etiti méde nzɔʼ nzɔʼ jɔʼ bé dí ejɨʼla yɨ́. Sâ gwár, bô ómpʉ́n, bé lɨ́ ede méde le menyoʼ. Bé sá nó ɨ́ yé ɛ́?» 34Yésʉs, nye e bé ó: «Jɔʼ mʉ̂r bém mʉ́má yɨ́, nyě sá ó tyêl nzɔ́ɔ, báŋle ósó bé, bé le onɔ́ɔ́ ntɔ̂ʼ kʉ́ de méde e bisʉhʉʉ. Nzê bɨ̌n jwɨʼ ó, bɨ̌n bé e nkul etil ósó mé mbɛ̂l mʉmá mede, nye dína tɨ̂ʼ ɨ́ duo nzɔ́ɔ ɛ̌? 35Jɔʼ, yé ópyâl. Ɨ́ melû maá ó bé ókǎ ti méde yɨ́, jɔʼ mbɛ̂l mʉmá ópɛʼɔɔ ɨ́ sɔ́má yɔ́ɔ́ yɨ́.»

Kɨkɛnǎ kán dwân le menyoʼ medwân

(Matthieu 9.16; Marc 2.21)

36Nó nyé á lwib e bé ɨ́ nzɨ̌ bikɨkɛna. Nye ó: «Mʉr, nyé anʉǎ péh kán dwân, tó sâ ébágá ɨ́ njʉ̌m kán, ebě, nyě nyǎ ó, kán dwân. Tó kœb ó, njʉ̌m kán, yé ásíŋá le ebágá é kán dwân. 37Nó ntémé, bé abe lɨ́ elwan ményoʼ medwân ɨ́ minjʉ̌m bíntaʼ bi dí misɛ́á e bikʉ́r bí ótír bí. Bé sá nó wá, ɨ́ jɔʼ ményoʼ maá, mé ógʉ́lwa yɨ́, minjʉ̌m bíntaʼ byaá, byé ótʉ̂l, menyoʼ kʉ́ma sí, bintaʼ dwě ntuʼ. 38Bé lulwan ményoʼ medwân ó ɨ́ bintaʼ bidwân. 39Mʉr mû sí de ményoʼ me myâ nyá, nye ákǎ kpɛl maá medwân. Nye ólɛ́ɛ ó: “Maá me myâ ó dí ɨ́ mbɨa.”»

Currently Selected:

Luc 5: ozm

Highlight

Copy