Luc 6

Yésʉs e metié mé á dwɛ̂ʼ móhó sábat ma

1Ɨ́ gúú móhó sábat, Yésʉs, bé le ompʉ́n bé, bé á be ó lɨ́ ecɨɨ témé bipemé méde. Ompʉ́n bé nzě nyɛl ébúʼo mítú mí mpíha ɨ́ bipemé byaá, goblɔɔ, mwâʼlɔɔ mpúmó, nzě gɔ́na le ede. 2Nó bʉ́ʉ́ óFarizyɛ̂n, bé á nze dî e bé ó: «Bɨ̌n bé lɨ́ esâ sá dí ajala le esyɛ́ɛ ɨ́ móhó sábat ɨ́ yé?»

3Yésʉs ntɔ̂ʼ yala e bé ó: «Bɨ̌n bé á bé así láǎ mpʉ̌ David á sâ ɨ́ jɔʼ nzâ á mɛ̂r bé e sɔ́má yé yɨ́ ɛ́? 4Nzê bɨ̌n bé agʉ́a ó, bé á si nî mpáh Nzyɛ̌m ɛ̌? David bánǎ nʉa bíblêr byé á nɛŋɔɔ lɨ́ edwě Nzyɛ̌m kûm bí, de yʉ́ʉ́. Píe tɨ̂, nye nzě pɛ̂ʼ bʉ̂r ó sɔ́má yé, bɨ́bɛ̂h nzě de. Tó kœb ó, mʉr ngwár ɨ́ sɔ́má yaá, nye á bé ajala le ede bíblêr byaá, njɨ opara mé Nzyɛ̌m bé omér.» 5Yésʉs ntɔ̂ʼ lɛ́ɛ e bé ó: «Mwân mé Mʉr ó dí njwɨ́ɨ sábat.»

Yésʉs lɨ́ etiʼ mʉ̂r ɨ́ móhó sábat

6Ɨ́ gúú móhó sábat, Yésʉs ntɔ̂ʼ nî ɨ́ nyʉ́ʉ́ mpáh minjɨʼla, nzě lɛ̂ʼle bʉ̂r tɨ̂. Yé á be ó e nyʉ́ʉ́ mʉ̂r á be e mbó éjʉ́m wé ɨ́ swâm swâm nyá. 7Nó olɛ̂ʼla o métié, bé l'oFarizyɛ̂n, bé á be ó lɨ́ etirwǒ Yésʉs, lɨ́ edwɛ̂ʼ nkʉ̂ nye ótiʼ mʉ̂r waá ɨ́ móhó sábat. Nyé ósâ nó wá, bé opur nyê. 8Tó kœb ó, Yésʉs á be ó lɨ́ ekʉ́ gʉ́a bíjwɨʼ byɔ́ɔ́ bíbyɛ̂h. Nye e mʉrʉ̂m á be e mbô ɨ́ swâm swâm nyá ó: «Gbɔlwaa sí. Tyɛ́bɨ́ɨ́ tîtyěl témé bʉr bâ.» Nye ntɔ̂ʼ gbɔlwa sí, tyɛ̂b tîtyěl. 9Yésʉs nzě lɛ́ɛ e bé ó: «Me lɨ́ edî bɨ́n ó: le embɨa, le ebébe, etié gá lɨ́ná, lé kamle ó, mʉr sâʼ yé ɨ́ móhó sábat? Le etiʼ mʉ̂r, le ejʉ̂ mʉ̂r: lé kamle yé?» 10Nye kʉ́ nzě bɨʼ bɨ́bɛ̂h mejwôʼlʉ. Nye e mbêl ó: «Syɛ́mɨ́ɨ́ mbó gô. Mbêl ntɔ̂ʼ sâ nó, mbó mû nye mbɨ̂mbɨá.» 11Bʉ́ʉ́ bʉ̂r o b'á bee nó bá, bê kʉ́ nzě jóʼo mébúʼ. Bé ntɔ̂ʼ lwibla lɨ́ esáǎ mbi ébébe bé dí e nkul esâ Yésʉs wɨ́.

Yésʉs lɨ́ etwâr bʉ̂r o mílʉ́mlʉ́ bé

(Matthieu 10.2-4; Marc 3.16-19)

12Jɔʼ yaá, Yésʉs ntɔ̂ʼ bére lɨ́ ecwɨ̂ʼ kʉ́, lɨ́ etó jɨʼla e Nzyɛ̌m. Nye á si lɛŋ pum ntinɨ̂ gʉ̂, njɨ lɨ́ ejɨʼla. 13Nó ɨ́ jɔ̌ʼ mɛ́n wé á lɔ́ma yɨ́, nye ntɔ̂ʼ jébe ómpʉ́n bé, ntɔ̂ʼ twâr bʉ́ʉ́. Bím nyé á twâr yɨ́, bʉr kám le obá. Nye ntɔ̂ʼ jɨ̂jebe bé ó, bʉr o mílʉ́mlʉ́ bé. 14Nye á twâr ó, Simon, mʉr nyé á jwɨr “Pétrus” nyá, bé e mɨ́ɔɔ́ wé, André, ndu e Jacques, Yʉánɛs, Philippe, Barthélemy, 15Matthieu, Thomas, Jacques, mwân mé Alfê, Simon, mʉr á jébɔɔ ó, “kɔmlʉ sí” nyá, 16bé e Yʉ́da, mwân mé Jacques, le Yʉ́das Iskariôt, mʉr á bɛ́ma nye nyá.

Yésʉs lɨ́ edwe bʉ̂r milɛ́ʼlá

(Matthieu 5.3-12)

17Jɔ̌ʼ Yésʉs, bé le ompʉ́n bé, bé á sulo lɨ́ ecwɨ̂ʼ, pyálɔɔ̌ gúmó dí ɨ́ bɛɛ́ɛ yɨ́, bê nzě bɔma le ompʉ́n ɨ́ buo buo. Yé á be ntémé ó le entumo e bʉ̂r. Bâʼ á duho ó ɨ́ Yerʉ́zalɛm ndu e mekwár mé sí Yʉ́da. Bʉ́ʉ́ duho bínkana bibá byé á be lɨ́ ebʉ́m é mâŋ bí, Tîr e Sidɔ̂n. 18Bé á nze ó, bé jôʼlaa milɛ́ʼlá mé Yésʉs, le enzě sáa ntémé ó, nye pɛ́ʼɛɛ mekpaa mɔ́ɔ́. Nye á si tiʼ bʉr o mímbɨ́a mísísǐm, myé á nzɨnzamra bá. 19Mʉr nyɨnyɛ̂h ɨ́ sɔ́má bʉ̂r baá á be lɨ́ esáa édǐ kúna e né ɨ́ lɔ̌b nkûl á duduho ɨ́ nye, nyé á be e né ɨ́ nyʉ̂l nyɨ́. Nye á si tiʼ bɨ́bɛ̂h.

Nzé dí e metyɛʼ me mpóm?

20Nó nyé á nze dwɛ̂ʼ nko ómpʉ́n bé, bé á be yɨ́, nzě lɛ́ɛ e bé ó:

«Metyɛʼ me mpóm, mé díʼee e bɨ̌n,

baántéʼenteʼe o bʉ̂r.

Mpóʼo mé Nzyɛ̌m á tyélɔɔ ó,

lɨ́ esú é bʉ̂r o dí mpʉ bɨ́n bá.

21Metyɛʼ me mpóm, mé díʼee e bɨ̌n,

bʉr o dí ejóʼo ménza ɨ́ báánâʼ bá,

ebě, bɨ̌n bé óde, díle.

Metyɛʼ me mpóm, mé díʼee e bɨ̌n,

bʉr o dí ejɨ ɨ́ báánâʼ bá,

ebě, medwé mɨ́n, mé ókǎ sûʼla ó bisʉhʉʉ.

22«Bɨ̌n bé e metyɛʼ me mpóm ɨ́ jɔʼ bʉ̂r nwím bɨ́n yɨ́, le ɨ́ jɔʼ bé pɨ́m bɨ́n, pya bɨ́n, le eláa bɨ́n ɨ́ sɔ́má ósyɛ̂l bé ébébe ebe bɨ́n dí ebúʼla Mwân mé Mʉr yɨ́. 23Sohaa gá ɨ́ dʉ́o laá. Lyáháá gá ɨ́ lɔ̌b bísʉhʉʉ, ebě, myɛ́na mɨ́n, mé ɨ́ buo. Mé ó komá ɨ́ jʉ́o kʉ́. Bimpám bi bʉ̂r o dí ebene bɨ́n bá, byé á bɨbe ó lɨ́ esâ bísyɛ́ɛla bimpwár byaá, lɨ́ etíble ógwíha o mílɔ̌b mé Nzyɛ̌m.

24Nkoó, nye ó e bɨ̌n, okúmá ó bʉ̂r,

ebě, bɨ̌n bɨ́ boó bi nkûl ɨ́ miléme

lɨ́ okúm le ogbaa wɨ́n.

25Nkoó, nye ó e bɨ̌n, bʉr o mû sí díle bá,

ebě, bɨ̌n bé ódi ɨ́ nza.

Nkoó, nye ó e bɨ̌n,

bʉr o dí ejo ɨ́ báánâʼ bá,

ebě, bɨ̌n bé ójɨ médwê mpʉ míkúho.

Bɨ̌n bé ótíme.

26Nkoó, nye ó e bɨ̌n ɨ́ jɔʼ bʉ̂r dí ebuú sêʼle bɨ́n yɨ́, ebě, bimpám byɔ́ɔ́, byé á sɨ̂seʼle ogwíha o mílɔ̌b o bíbɛr ó nó.»

Kpɛlɨɨ gá ontɨ̂m le obɨn bɨ́n

(Matthieu 5.39-42)

27«Ɨ́ páʼ wɨ́n, bʉr o dí ejóʼo mé bá, mě lɛ́ɛ́ bɨ́n ó: kpɛlɨɨ gá ontɨ̂m le obɨn bɨ́n. Cwɨ́áá gá e bʉr o dí enwim bɨ́n bá. 28Sʉʼoo gá bʉr metyɛʼ me mpóm ɨ́ jɔʼ bé dí esyɛm bɨ́n yɨ́. Bʉ̂r sá bɨ́n ebébe nɛ́ɛ: jɨʼlaa gá lɨ́ esú lɔ́ɔ́! 29Mʉ̂r ŋmɛ́h gó bɛ̂h ɨ́ lɨ̂ʼ émúʼ nɛ́ɛ: bírɨ́ɨ́ nyé ó, nye ŋmɛ́hɛɛ go ntémé lʉ́ʉ́. Mʉ̂r dɛ́ʼ gó kʉ̂r nó, bírɨ́ɨ́ nyê, nye nʉ́aa ndu e dur. 30Mʉr nyɨnyɛ̂h jáʼ gó sɔ̂ʼ nyá, bɨ̌n e dwé nyé yǎ. Ató dû bísá bʉ̂r, bé á dɛn bí. 31Mpʉ bɨ́n dí egwɨ̂m ó, bʉr sâʼ bɨ̌n yɨ́, sáʼ gá ntémé bé nó.

32«Yé bé bɨ̌n kpɛl ó, njɨ baá kpɛ́l bɨ́n bá nó, bɨ̌n bé lɨ́ enkɛ́ɛ ményʉ̂l ó, bʉr sêʼlaa bɨ̌n ɨ́ yé ɛ́? Damá jóʼo ósyɛ̂l o mísyóm, bé lɨ́ ekpɛl ntémé baá o dí ekpɛl bé bá. 33Yé bé bɨ̌n cwɨ́á njɨ e bʉr o dí ecwɨ́a e bɨ̌n bá nó, ayɨ́ nkɛ́ɛ gá menyʉ̂l ó, bʉr sêʼlaa bɨ̌n. Damá jóʼo osyɛ̂l o mísyóm, bé lɨ́ esâ ntémé nó. 34Yé bé bɨ̌n kʉl bímɔnɨ́, dwě njɨ bʉr o ngá báʼǎ kʉl bɨ́n byaá byɔ́ɔ́ bá nó, ayɨ́ nkɛ́ɛ gá menyʉ̂l ó, bʉr sêʼlaa bɨ̌n. Osyɛ̂l o mísyóm, bé lɨ́ ekʉl bʉ́ʉ́ ósyɛ̂l o mísyóm mɔnɨ́ ó, bé nkʉ̂ báʼǎ nʉa bímɔnɨ́ byɔ́ɔ́ byaá píe tɨ̂. 35Sâ gwár, ɨ́ wɨ́n pâʼ, kpɛlɨɨ gá ontɨ̂m le obɨn bɨ́n. Sáʼ gá bé embɨa. Kʉlɨɨ gá bʉr mɔnɨ́, akǎ bûʼla ó, bé óbwóolo bɨ́n yǎ. Bɨ̌n bé ókʉ́ bi myɛ́na tɨ̂! Nó ó bɨ́n óbe bwán mé Nzyɛ̌m dí Lʉ́ bísá bíbyɛ̂h nyá yɨ́, ebě, nye lɨ́ ecwɨ́a e bʉr o dí adwe nyé nzyǒo bá ti e bʉr ó jélé. 36Jɨ́ʼɨ́ɨ́ gá bʉr nkoó mpʉ Sɔ́ŋ wɨ́n dí ejɨ̂ʼ bɨ́n yɨ́!»

Adwe gá bʉr mebě

(Matthieu 7.1-5)

37«Ayɨ́ dwe gá bʉr mebě, ebě, Nzyɛ̌m ámû jaá dwe bɨ́n mebě tɨ̂. Ayɨ́ dwe gá bʉr mpono. Nzyɛ̌m nkʉ̂ be, adwe bɨ́n mpono. Pɛʼɛɛ gá bʉr bibaa bí ébébe bɨ́n á niʼe bé bí, Nzyɛ̌m nkʉ̂ pɛʼ bɨ́n byaá nyé á niʼe bɨ̌n bí. 38Dwéʼ gá bʉr bisâ, bɨ̌n ntémé bé ódweŋɔɔ byê. Nzyɛ̌m ójwɨʼ bɨ́n byǎ e kǎr dí ɨ́ bwǎʼ mo yɨ́. Nye ókaale bɨ́n byǎ ó, le esʉ, le edine, le esʉ, le edine, gúú pâʼ tɨ̂ʼ swɨɨ sí. Bím bɨ́n dí ekaale bʉ́ʉ́ bʉ̂r yɨ́, bím yaá ntémé ó nyé ngá kaale bɨ́n yɨ́.»

39Yésʉs á si baʼa lwib e bé ɨ́ nzɨ̌ bikɨkɛna. Nye ó: «Ántím, nyé abe e nkul etɨ́e nyʉ́ʉ́ ántím ɨ́ nzɨ̌. Nyé sá nó wá, bɨ́bɛ̂h obá, bé ólʉ́ŋa ɨ́ bɨ́. 40Mpʉ́n antaa lɛ̂ʼla wé ɨ́ dúu. Sâ gwár, nyé sí jɨ̂ʼ, ɨ́ jɨ̂ʼ, jɨ̂ʼ, yé mû nye ɨ́ lʉ̂ ɨ́ sɨ́lɨ́lɨ́ nó, mpʉ́n waá ósûʼlǎ dǐ mpʉ mʉ̂r á pa lɛ̂ʼle nye nyá.

41«Go lɨ́ ebee mâ sâ dí mɨ́ɔɔ́ gǒ ɨ́ dîh nyá, gua yɨ́ɛ apǎ jʉ̂ʼrǎ mbʉ́ŋʉʉ̌ ntinɨ̂ gó dí enkɛ́ɛ ɨ́ díh lô ɨ́ yé? 42Wáǎ mbi gó dí e nkul elɛ́ɛ e mɨ́ɔɔ́ gǒ ó: “Paá nze! Mɨ́ɔɔ́ wǎm, me pɛ́ʼɛɛ go mâ sɔ̂ʼ dí go ɨ́ dîh nyá,” gua yɨ́ɛ apǎ pɛ̌ʼ mbʉ́ŋʉʉ dí go ɨ́ dîh wɨ́ ɛ́? Baányâ-mikóo bâ, tááráá épɛ̌ʼ mbʉ́ŋʉʉ dí ɨ́ díh lô wɨ́! Jɔʼ yaá ó gó ngá bee ɨ́ sʉ́lʉ́lʉ́, pɛ̌ʼ mpǔm dí mɨ́ɔɔ́ gǒ ɨ́ díh yɨ́.»

Bé dweʼě lɨ́ ó ɨ́ mpumó nyé

(Matthieu 7.16, 18, 20)

43«Mbɨambɨa lɨ́, yé abe e nkul egúmo bíbol bi mpúmó. Bǒl lɨ́ agúmǒ mbɨambɨa mpumó. 44Mʉ̌r dwidweʼě lɨ́ yɨ́yɛ̂h ó ɨ́ wé mbi mpúmó. Bé abe lɨ́ emwâʼ mpúmó sá lɨ́ esyɛh. Bé abe lɨ́ emwâʼ sɔɔ́ ɨ́ bikpâʼ míkǒl. 45Lémé mʉ̂r, wé ó ekʉ̌m, gúmó mʉ̂r tɨ̂ʼ dí ekomo bísá byé yɨ́. Mbɨambɨa mʉr pípyél tɨ̂ʼ ó bisá bí émbɨa. Bɨ́bla mʉ̂r jaá pyél tɨ̂ʼ ó, njɨ byaá bí ébébe. Mbǐ lwǐb mʉ̂r dí elwib mílɔ̌b wɨ́, wé ó dí elɛ̂ʼlě sá dí nye ɨ́ buo buo ɨ́ lémé wé yɨ́.»

Kɨkɛna ménzumó mebá

(Matthieu 7.24-27)

46«Bɨ̌n bé lɨ́ ejébe mé “Dâ, Dâ”, bɨ̌n yɨ́ɛ akpɛl esâ mpʉ mé dí elɛ́ɛ bɨ́n ɨ́ yé? 47Me ólɛ̂ʼle bɨ́n dweʼle mʉ̂r dí enze kwá nyǎm, jóʼo mékǎn mâm, ntɔ̂ʼ dû mé nyá. 48Nyě nwɨɨlá ó e mʉr á sumo mbɛ̌r wé nyá. Nye á bɨ̂r bipǎb bi tɨ̂ʼ ó, nyé osí pǎ pû sí, dímle óbɨ́ʼ, kumo lɨ́ ekóʼ énɨ́nɨ́ɨ́. Nye ntɔ̂ʼ tyêl bípǎb lɨ́ ekóʼ laá. Jɔʼ mpɨ́ɨ á ka mamle yɨ́, mpɨɨ nyaá nzě mâʼla ɨ́ mbɛ̌r wé waá. Sâ gwár, wé á bé abîʼ ɨ́ mpɨɨ ɨ́ lɔ̌b mbɨambɨa nzumó nyé á sumo wé nyɨ́. 49Mʉr dí ejóʼo mékǎn mâm, adû mé nyá, nyě nwɨɨlá ó e mʉr waá á sumo mbɛ̌r njɨ ɨ́ bibwǎh kʉ́ nyá. Nye á bé apû óbɨ́ʼ, nkʉ̂ tyêl bípǎb lɨ́ ekóʼ. Jɔʼ mpɨ́ɨ á mâʼla ɨ́ bíhaá bípǎb yɨ́, mbɛ̌r wé nɨ̌ ntɔ̂ʼ bîʼ wɨ́wɛ̂h.»

Currently Selected:

Luc 6: ozm

Highlight

Copy