Luc 7

Yésʉs lɨ́ etiʼ syɛ̂l mesâ mé njwɨ́ɨ bisója mʉr Rôm

(Matthieu 8.5-13)

1Jɔ̌ʼ Yésʉs á sil elɛ́ɛ bʉr mekǎn maá mɨ́mɛ̂h yɨ́, nye nzě mɔa, ntɔ̂ʼ tô Kapernáʉm. 2Ɨ́ gúmo yaá, yé á be ó e nyʉ́ʉ́ kapitɛ̂n bisója bí Rôm. Nye á be ó e nyʉ́ʉ́ syɛ̂l mesâ nyé á be ɨ́ buú kpɛl nyá. Syɛ̂l mesâ wé waá á be ó mbêl. Wé á be ó, wé mû kúno edwe. 3Jɔʼ njwɨ́ɨ bisója waá á jóʼo bʉr lɨ́ elwilwib dumo e Yésʉs yɨ́, nye nzě lómo bʉ́ʉ́ ótɔ́má bʉ̂r óYúden ó, bé tôʼ dî e Yésʉs nkʉ̂ nye óbɛ̌m nzě tiʼ syɛ̂l mesâ wé waá. 4Bê nzě tô, tó jɨʼla e Yésʉs. Miléme, myé á be bé ɨ́ báná báná ó, nye tíʼɨɨ nye mwân bisyɛ́ɛ́. Bé e Yésʉs ó: «Mʉr bisójǎ nɨ̌ kʉ́ jala ó, go mvólɨɨ nye. 5Nye ɨ́ kpɛl bʉ̂r ó kûl gá yɨ́ná. Nye ntémé ó b'á sumo mpáh minjɨʼla gá nyɨ́ná.»

6Yésʉs, bé e boo nɔ́ɔ́, ntɔ̂ʼ tô mbɛ̌r mʉ̂r waá. Bé mû bǎʼ e mbɛ̌r waá nɛ́ɛ: kapitɛ̂n waá ntɔ̂ʼ lómo ósó bé ó, bé tôʼ lɛ́ɛ e Yésʉs ó: «Dâ ɛ̌, ayɨ́ ntɨ̂ʼ nyʉ̂l nyǒ dwêh. Mbi bɨ́bla mʉ̂r mé dí wɨ́, yé ajala ó, go níʼee ɨ́ mbɛ̌r wâm. 7Nó ntémé ó mê bee ó, yé ajala ó, mɛm mʉr tɨ̂ʼ sóhaa go yɨ́. Damá jóʼo ó, gó anze kwá nyám, cɨʼeě njɨ ekǎn egwár, syɛ̂l mesâ wǎm tíʼaa! 8Me lɨ́ egʉ́a ó, go e nkul esâ nó, ebě, me ó e bʉr o dí ejwɨ́ɨ mé bá. Mɛm ntémé, mé e bisója ɨ́ jwɨ́ɨ́ yâm. Mě jaá lɛ́ɛ e yɨ̂ʼ ó: “Tóʼ”, yê ntɔ̂ʼ tô. Me e yʉ́ʉ́ ó: “Ntáʼ”, yɨ́haá nze. Me kǎ lɛ́ɛ e syɛ̂l mesâ wǎm ó: “Sáʼ sɨ̂ʼ yɨ̂”, nye sâ.»

9Ejóʼǒ Yésʉs á jóʼo mekǎn maá yɨ́, nye á be ɨ́ kâm njwɨ́ɨ bisója waá, nzě dwira, dwɛ̂ʼ sɔ́má bʉ̂r yé á dû nye yɨ́. Nye ó: «Me lɨ́ elɛ́ɛ bɨ́n ó, mé apǎ kœ̌b mbǐ búʼó wɨ̂, damá jóʼo ó ɨ́ kúl bʉ̂r o b'Ɨ́zraɛ̂l tʉ́ŋlʉ̌.»

10Bʉ̂r o mílʉ́mlʉ́ baá ká swîʼ, tó kumǒ mbɛ̌r njwɨ́ɨ bisója nɛ́ɛ: bé kǎ kœb ó, syɛ̂l mesâ nɨ̌ mû sí tiʼe.

Yésʉs lɨ́ epɛh mwân mé kúhó mʉ́má

(Matthieu 5.21-24, 35-43; Yʉánɛs 11.1-44)

11Yésʉs nzě tô ɨ́ nyʉ́ʉ́ kwar, díé lé, Nayɨ̂n, bé e sɔ́má bʉ̂r le ompʉ́n bé. 12Jɔʼ nyé á be, nye mû kúno enî nkana yaá yɨ́, nye ntɔ̂ʼ bee bʉ̂r lɨ́ enkɛ́ɛ̌ múu, lɨ́ etóŋɔɔ e wé ɨ́ dɨlá. Yé á be ó múú étíʼé é mwân mé kúhó mʉ́má. Bʉr ó nkana yaá ɨ́ buo buo, bé á be ó lɨ́ etô e wé pemé mésoo. 13Mbeá Yésʉs á bee kúho yɨ́, nye kʉ́ nzě jɨ̂ʼ wé nkoó, ntɔ̂ʼ lɛ́ɛ e wé ó: «Sá akǎ jɨ.» 14Nye ntɔ̂ʼ sîhle, mɛ̂r mpɔra múu, yé dína apǎ diblɔɔ. Onkɛ́a ntɔ̂ʼ tyɛ̂b. Nye e múu ó: «Mâ sohó, mě lɛ́ɛ́ gó ó: gbɔlwáa.» 15Ndwe ntɔ̂ʼ gbɔlwa sí, dǐ ndîndǐl, nzě táare élwib. Yésʉs nzě tímle nyé nyɔ̌ŋ.

16Ekɛ̂n kʉ́ nzě swɨɨ bʉ̂r bɨ́bɛ̂h ɨ́ menyʉ̂l, bé ntɔ̂ʼ dwě Nzyɛ̌m kûm. Bé ó: «Ánɨ̂nɨ̂n ngwíha milɔ̌b, nyɨ́ pyâl ɨ́ mɨná gâ.» Le elɛ́ɔɔ ntémé ó: «Nzyɛ̌m, nyɨ́ nze bʉ̂r bé ɨ́ menɔɔlʉ.» 17Lɔ́ɔ́ syɛ́ɛla mé Yésʉs yaá, wê nzě myaŋla ɨ́ sí Yʉ́da yɨ́yɛ̂h, le ɨ́ mesí mé á bɔma Yʉ́da má.

Tíá mé Yʉánɛs Ndubʉr

(Matthieu 11.2-19)

18Ompʉ́n mé Yʉánɛs Ndubʉr, bê nzě lɛ́ɛ nyé milɔ̌b myaá mímyɛ̂h. Yʉánɛs nzě jébe bʉ́ʉ́ ómpʉ́n bé obá, 19lómo bé, bé díʼee Tî Yésʉs ó: “Nzê go ó mʉr bɨ́h dí ebóno ó, nye ónze nyá ɛ́? Nzê bɨ̌h bónaa mʉr swîh ɛ̌?” 20Bê nzě tô, tó pyâl gúmó Yésʉs á be yɨ́. Bé e né ó: «Yʉánɛs Ndubʉr lómó bɨ́h ó, bɨ̌h díʼee go ó: “Nzê go ó mʉr bɨ́h dí ebóno ó, nye ónze nyá ɛ́? Nzê bɨ̌h bónaa mʉr swîh ɛ̌?”»

21Lɨ́ ewala egwár le egwár laá, bé á kœb ó, Yésʉs lɨ́ etiʼ mímbêl ɨ́ buo buo, baá bé á be e mekpaa, le baá bé á be e bidyɛ̂m, le baá mímbɨ́a mísísǐm, byé á nzɨnzamra bá. Nye á si tiʼ ntémé baántím ɨ́ buo buo, le esâ ó, bé báʼa bee. 22Nye nzě yala e bé ó: «Tó lɛ́ɛ gá Yʉánɛs sá bɨ̂n beě le ejóʼo yɨ̂: ó baántím, bé mû ó lɨ́ ebáʼǎ bee. Bʉr o b'á nyɛɛ tɨ́a bá, bé lɨ́ etye mbɨ̂mbɨá. Minzɨ̂nzǎm, sí tiʼe. Mingʉʼ, myé mû ó lɨ́ ejóʼo. Odwe, bé lɨ́ epah ɨ́ mesoo. Mbɨambɨa Lɔ́ɔ mû ó lɨ́ elɛ́ɔɔ míndyêbndyéb, bé e bʉr o dí ɨ́ kpaa nkóó bá. 23Metyɛʼ me mpóm, mé díʼee e mʉr bísyɛ́ɛla byâm ngá be, abe ébɔ̌ʼ lé óbɨma nyé ɨ́ léme lɨ́ nyá.»

24Jɔʼ bʉ̂r o mílʉ́mlʉ́ mé Yʉánɛs, bé á búla yɨ́, Yésʉs nzě táare épâʼla éntumo e bʉ̂r laá mbi mʉ̂r Yʉánɛs á be wɨ́: «Yé bɨ́n á to bee ɨ́ lʉá yɨ́? Nzê ká dí epɨ̂ʼla ɨ́ pubó yɨ́ ɛ́? 25Á nó? Bɨ̌n bé á to bee yé? Nzê mʉr mbɔ́rá e bidimé míkán mí ójɔɔ́ ɛ̌? Bʉr o dí ɨ́ nkɛ́lɛm, lɨ́ ebwâr bídimé míkán le etiʼe ɨ́ mepwaʼ bá, bé ó dí edi ɨ́ mimbɛ̌r mí ójwɨ́ɨ. 26Á nó? Bɨ̌n bé á to bee yé ɛ́? Nzê ngwíha milɔ̌b mé Nzyɛ̌m ɛ̌? Yé ó nó. Mě lɛ́ɛ́ bɨ́n ó, laa ngwíha milɔ̌b mé Nzyɛ̌m! 27Ebě, yé ó waá bé á cɛma ɨ́ lɔ̌b wé nyá. Yê cɛmá ɨ́ Mekaná mé Nzyɛ̌m ó:

“Bɛɛngɛ́ɛ! Me múo nzě lómo mʉ̂r milʉ́mlʉ́ wǎm nzɨ́ nyǒ dóló ó,

nye tôʼ le edyɛŋle gó nzɨ̌ lɨ́ esôʼ lô.”»

28Yésʉs, nye e bé ó: «Me lɨ́ elɛ́ɛ bɨ́n ó, ɨ́ páʼ bʉ̂r bɨ́bɛ̂h o mû sí byɛ̂l ɨ́ sí yɨ̂ʼ bá, yé abe e mʉr dí entaǎ Yʉánɛs. Damá jóʼo nó, mʉr dí agbáŋɔɔ ɨ́ nkɔb ɨ́ Mpóʼo mé Nzyɛ̌m nyá, nyě e kûm, laa nyê.»

29«Minzɨnzɨ mi bʉ̂r mímyɛ̂h, damá jóʼo ónwɨa ó mɔnɨ́ tœ́a, myé á be lɨ́ egwá kʉ́ jôʼlǒ sá Yʉánɛs á lɨlɛ́ɛ yɨ́. Bé á be ɨ́ gʉ́a ó, Nzyɛ̌m ó dí e nkam. Nó ó bé á nze sâ ó, Yʉánɛs dúʼoo bê. 30Sâ gwár, oFarizyɛ̂n, le olɛ̂ʼla o métié, bé á si bene gwɨ́má mé Nzyɛ̌m yaá. Sá tɨ̂ʼ ó bé á be akam ó, Yʉánɛs dúʼoo bé yɨ́. 31Me ójwɨʼ bʉ̂r ó myǎ wɨ̂ʼ e wáa? Bé ntémé, bé lɨ́ enwɨɨla e wáǎ mbi bʉ̂r? 32Bé kʉ́ nwɨɨla ó e bwá ó ntwǒm dí lɨ́ ebɨ̌m é pátele mindîndǐl, dí ejébla páʼ nyɔ́ɔ́ bá. Bé ó: “Bɨ̌h bɨ́ dyɛɛ méjémé mé éswie, bɨ̌n l'ajɨ médwê. Bɨ̌h bɨ́ lʉ́o bɨ́n mindie, bɨ̌n l'abwal.” 33Ebě, Yʉánɛs, nyɨ́ nze: ade bíblêr, nkʉ̂ menyoʼ. Bɨ̌n ntɔ̂ʼ swêʼ nyé ó: “Nyě le eleme.” 34Jɔʼ yɨ̂, Mwân mé Mʉr, nyɨ́ kǎ pyâl: nye lɨ́ ede méde, de ményoʼ. Bɨ̌n bé ó: “Paá bee gá sâ ángʉ̂ngʉ̌l nɨ̌, ndɨ̂l menyoʼ, só bʉr o dí enʉǎ mɔnɨ́ tœ́a bá, só osyɛ̂l o mísyóm.” 35Sâ gwár, ocwóó mé Nzyɛ̌m, wɨ́ɛ, wɨ́ bi mékebe kwá bʉr bɨ́bɛ̂h o dí edû wé bá.»

Yésʉs ɨ́ mbɛ̌r mé Simon, mʉr Farizyɛ̂n

36Nyʉ́ʉ́ Farizyɛ̂n nzě jébě Yésʉs ó, bé tôʼ de. Yésʉs ntɔ̂ʼ tô mbɛ̌r wé, nzě nyɛl éde. 37Ɨ́ nkana yaá, yé á be ó e nyʉ́ʉ́ mʉ́má á be lɨ́ esâ syóm nyá. Jɔʼ nyé á jóʼo ó, Yésʉs mû lɨ́ ede ɨ́ mbɛ̌r Farizyɛ̂n waá yɨ́, nye ntɔ̂ʼ nze le ntǎʼ albâr lwɨ́ŋlá le lɔbína, 38ntɔ̂ʼ tyɛ̂b píe koo mé Yésʉs, píe mekʉ̌ mé, ntɔ̂ʼ jɨ ɨ́ buo buo, myɛ́ɛlé mé ntɔ̂ʼ bor mékʉ̌ mé Yésʉs. Nye ntɔ̂ʼ dû mékʉ̌ mé Yésʉs ɨ́ swííá, pîm mé le mpuo nyé, nzě lœm nyé lɔbína ɨ́ mekʉ̌. 39Nó ɨ́ jɔ̌ʼ Farizyɛ̂n á báŋle Yésʉs nyá, á bee syɛ́ɛla yaá yɨ́, nye ntɔ̂ʼ táare élwib ɨ́ lémé wé ó: “Yé bé mʉr nyâ, nyě tyeetye ó ngwíha milɔ̌b mé Nzyɛ̌m nó, lɛ́ɛ́, nyɨ́ gʉ́a ó, mʉmá dí ekúna e né nyâ, nye lɨ́ esâ syóm ɨ́ nwérédé.” 40Yésʉs nzě nʉǎ lwǐb. Nye e mʉr waá ó: «Simon, mě e sá élɛ́ɛ gô.» Simon, nye e né ó: «Lɛ̂ʼla, lɛ́yɨ́ɨ́ mé yǎ bé.»

41Yésʉs ntɔ̂ʼ lɛ́ɛ ó: «Bʉr obá, bé á be ó e mpʉ́lá mɔnɨ́ kwá nyʉ́ʉ́ mʉ̂r á kʉkʉl bʉr mɔnɨ́ nyá. Nyâʼ, minzaŋ mí mɔnɨ́ minter mitɛ̂n; nyʉ́ʉ́, minzaŋ mekám métɛ̂n. 42Mpʉ bɨ́bɛ̂h obá, bé á be abe e nkul ebwóolo mémpʉ́lá maá yɨ́, mʉr waá ntɔ̂ʼ bîr bé e mǎ. Ɨ́ bʉr obá baá, waá wáa ngá buú kpɛl mʉ̂r waá nyá?» 43Simon ntɔ̂ʼ yala e né ó: «Mě jwɨʼ ó, yé ó waá á bírɔɔ e mpʉ́lá ɨ́ buo buo nyá.» Yésʉs, nye e né ó: «Gǒ e nkam.»

44Nye ntɔ̂ʼ dwirǎ nko mʉ́má waá á be yɨ́. Nye e Simon ó: «Gʉ́ bee mʉ́má nyâʼ á? Me nzé ó, go, ɨ́ mbɛ̌r gô, gua l'adwe mé medíbé mé éjwɨɨ mékʉ̌. Mʉmá nyâʼ nyɨɛ, nyɨ́ jwɨɨ mé mekʉ̌ e myɛ́ɛlé mé, pîm ntémé mé e mpuo nyé. 45Gua, go bé adû mé koo ékœ̂h. Nyɨɛ, gbaa mê pyál, nyé agwâʼ édû mé mekʉ̌. 46Go bé alœm mé múlo ɨ́ lʉ̂. Nyɨɛ, nyɨ́ lœm mékʉ̌ mâm lɔbína. 47Sá tɨ̂ʼ ó mé dí elɛ́ɛ gó ó: mpʉ nyé mû sí lɛ̂ʼle mpwâʼ kpɛ̌l yé nó yɨ́, yé lɛ́ʼlé ó, Nzyɛ̌m, nyɨ́ pɛʼ nyé bibaa bí ébébe bíbyɛ̂h nyé á niʼe lɨ́ lɔ̌b mísyóm myé bí. Myé ntémé, myé á be ó, ɨ buú buo! Nó ó, ɨ́ jɔ̌ʼ Nzyɛ̌m ópɛʼ bíbaa bí ébébe bá bím yɨ́, mʉr á pɛʼɔɔ bibaa byaá nyá, ókpɛ̌l Nzyɛ̌m ó bá bím.»

48Nye ntɔ̂ʼ lɛ́ɛ e mʉmá ó: «Bibaa bí ébébe byô, bí pɛʼɔɔ!» 49Bʉr o bé le onɔ́ɔ́ bé á de bá, bé ntɔ̂ʼ lɛ́ɛ ɨ́ milémé myɔ́ɔ́ ó: «Nyâʼ mʉ̂r, nye nzé, dí ejwɨʼ ó, nyě e nkul epɛʼ bíbaa bí ébébě Nzyɛ̌m á niʼe bʉr ɨ́ lɔ̌b mísyóm myɔ́ɔ́ bí?» 50Yésʉs ntɔ̂ʼ lɛ́ɛ e mʉmá ó: «Búʼó yô, yɨ́ tiʼ gô! Tóʼ mbɨ̂mbɨá!»

Currently Selected:

Luc 7: ozm

Highlight

Copy