Luc 8

Yésʉs lɨ́ elɛ́ɛ bʉ̂r Mbɨambɨa Lɔ́ɔ

(Matthieu 13.1-23; Marc 4.1-20)

1Píe tɨ̂, Yésʉs nzě tô bínkana e bínkana le mékwár e mékwár, gúmó nyé á to le etúno Mbɨambɨa Lɔ́ɔ dí edumo e Mpóʼo mé Nzyɛ̌m wɨ́ yɨ́. 2Ompʉ́n bé kám le obá ti e bʉ́ʉ́ bʉ́bá nyé á pa tiʼ lɨ́ eso méleme bá, le mimbêl nyé á tiʼ mí, bé e boo nɔ́ɔ́ ó b'á tʉ̂to. Bʉbá baá, bé á be ó Maria mʉmá Magdalâ, waá á dwihɔɔ meleme nzaangbá nyá, 3bé e Yʉána, myaá mé Kúza, mbɔʼlʉ ekúró mé Erôd, le Susána, le bʉ́ʉ́ bʉ́bá ɨ́ buo buo bé á susúʼo sɔ́má mé Yésʉs e mebi mɔ́ɔ́ bá.

Kɨkɛna bíbwǎh binâ

(Matthieu 13.1-9; Marc 4.1-9)

4Bʉr, bé á bɨbe ó lɨ́ edua ɨ́ binkana byɔ́ɔ́, lɨ́ etô kwá mé Yésʉs. Mpʉ yʉ́ʉ́ bwaʼbwaʼ emɛl e bʉ̂r yé á swâl nó yɨ́, nye nzě sâ bé kɨkɛna yɨ̂.

5«Yé á be ó e nyʉ́ʉ́ mbêl mempeʼ á to myam mempeʼ ɨ́ pemé yé nyá. Mpʉ nyé á to le emyam mempeʼ pemé e pemé yɨ́, wɨ́ʼ pâʼ mpeʼ nzě kur nzɨ́ e nzɨ̌. Bʉr ntɔ̂ʼ nyal yé e mekʉ̌; binʉ̌n nzě tor. 6Gúú pâʼ mémpeʼ kur ɨ́ sí mékóʼ. Jɔ̌ʼ mpeʼ yaá, yé á pâh yɨ́, yê nzě swâh, ebě, yé á bé abe e medíbé tɨ̂. 7Gúú pâʼ mémpeʼ ntémé kur ɨ́ mindwínɨ́nɨ́. Mipáhá mémpeʼ myaá, myé e mindwínɨ́nɨ́ nzě gwɨ́ě sɔ́má. Mindwínɨ́nɨ́, myê nzě kâʼ myê, myé ntɔ̂ʼ líre. 8Damá jóʼo nó, gúú pâʼ mémpeʼ wɨ́ɛ, wé á si kur ɨ́ sí métyɛʼ. Mempeʼ maá nzě gwɨ́e le ekoʼo. Bumó gwár gúmo mpúmó nter.» Jɔ̌ʼ Yésʉs á sil elɛ́ɛ bé nó yɨ́, nye e bé ó: «Mʉr dí e megwǎl mé éjóʼo nyá, nye jóʼaa náǎ.»

Yésʉs, nye lɨ́ elwib e bʉr ɨ́ nzɨ̌ bikɨkɛna ɨ́ yé?

9Ompʉ́n bé ntɔ̂ʼ dî e né ó: «Kɨkɛna yɨ̂ʼ lɛ́ɛ́ yé ɛ́?» 10Yésʉs ntɔ̂ʼ yala ó: «Bɨ̌n ó Nzyɛ̌m á gwîh bisâ bi dí misolá ɨ́ Mpóʼo nyé bí, ó bɨ̌n gʉ́ŋaa byé ɨ́ pébébé. Sâ gwár, ɨ́ páʼ bʉ̂r oswîh bɨ́ɛ, bé kʉ́ gwá jóʼo ó, njɨ ɨ́ nzɨ̌ bikɨkɛna, lɨ́ esú ó, mekǎn me ngwíha milɔ̌b mé Nzyɛ̌m, mé díraa. Nye á cɛma ó:

“Bé lɨ́ edwɛ̂ʼ e mîh mimběʼ, abee.

Bé lɨ́ ejôʼlo e megwǎl, ajóʼo,

agʉ́a ntémé.”

11«Kɨkɛnǎ nɨ̌, yé lɛ́ɛ́ ó mbi wɨ̂: mpeʼ, yé ó lɔ́ɔ́ mé Nzyɛ̌m. 12Bâʼ bʉ̂r nwɨɨla ó e nkpâh nkpǎʼ. Bé á be ɨ́ jóʼǒ lɔ́ɔ́ mé Nzyɛ̌m. Sɔ́ŋ meleme ntɔ̂ʼ nze, nzě pɛʼ bé wǎ ɨ́ miléme, lɨ́ ekamle bé lɨ́ ebúʼla wê, nkʉ̂ bǐ twiʼ. 13Bʉ́ʉ́ bʉ̂r, bé ó mpʉ̌ mpeʼ dí mbeá ɨ́ sí mékóʼ yɨ́. Bé lɨ́ enʉǎ lɔ́ɔ waá jɔʼ bé dí ejóʼo wé yɨ́. Sâ gwár, bé abîr ó, lɔ́ɔ waá, wé páhaa mikaalé ɨ́ milémé myɔ́ɔ́. Bé jaá bûʼla wé ó, njɨ ɨ́ mâ jɔʼ. Bé ntɔ̂ʼ gbɔba e búʼó yaá ɨ́ jɔʼ bʉ̂r mû lɨ́ etíble bé lɨ́ esú é búʼó yaá yɨ́. 14Bâʼ bʉ̂r, bé ó mpʉ̌ mpeʼ dí ɨ́ mindwínɨ́nɨ́ yɨ́. Bé lɨ́ ejóʼo ntémé lɔ́ɔ waá. Píe tɨ̂, bé mû jaá yêʼwo ó, njɨ sí yɨ̂, le okúm, le ogbaa ndu e bigwɨ́má bí twiʼ yɨ̂. Bisâ byaá mû bé ɨ́ milémé myɔ́ɔ́ ó ɨ́ lárádá. Bé abe e nkul ekǎ sâ bísyɛ́ɛla bimpâ. 15Nó bʉ́ʉ́ bʉ̂r, bé ó mpʉ̌ mpeʼ, yé á kur ɨ́ bwǎh métyɛʼ yɨ́. Bé lɨ́ ejóʼǒ lɔ́ɔ́ mé Nzyɛ̌m e mimbɨambɨa míléme. Bé lɨ́ emɛ̂r lɔ́ɔ waá ɨ́ kpɨ́ɨ́ɨ́, le esâ bíhwó, gúmo ntémé mpumó ɨ́ buo buo.»

Kɨkɛna éláma

(Matthieu 5.14-15; Marc 4.21-22; Luc 11.33)

16«Mʉr túmó éláma nyá, nye ábúbló lé ɨ́ dɛa. Mʉr, nyé abe lɨ́ ebaʼlě twimá éláma sí joó. Nyě tyél lé ó ɨ́ tyélátyéla éláma kʉ́ lɨ́ esú ó, bʉr o ngá nî tɨ̂ʼ bá, bé díʼee ɨ́ myɛ́n. 17Yé abe e sá dí solá yɨ́, ngá be, agwíha kʉ̌l. Yé abe e sá dí ɨ́ mesǒ yɨ́, ngá be, agʉ́ŋɔɔ, ntɔ̂ʼ nyɨ̂n ɨ́ bʉr ɨ́ kpɛŋlɛm.

18«Gwá jôʼlo gá mekǎn mâm: mʉr dí e bisâ nyá, óbáʼǎ dweŋɔɔ byúú. Tó kœb ó, waá dí tʉ̂toʼó nyá, ópɛʼɔɔ mâ bím nyé dí e né nyá.»

Nyɔ̌ŋ le bɨ́ɔɔ́ mé Yésʉs

(Matthieu 12.46-50; Marc 3.31-35)

19Ɨ́ lʉ́ʉ́ dʉ́o, nyɔ̌ŋ mé Yésʉs le bɨ́ɔɔ́ bé, bé á si to bee nye, kœbɔɔ nyé témé entumo e bʉ̂r. Bé á bé akumǒ nko nyé á be yɨ́. 20Bʉr ntɔ̂ʼ lɛ́ɛ Yésʉs ó: «Nyɔ̌ŋ gǒ le bɨ́ɔɔ́ bô, bé ó wâʼ kʉ̌l lɨ́ egwɨ̂m ébee gô.» 21Yésʉs ntɔ̂ʼ lɛ́ɛ e bʉr bɨ́bɛ̂h ó: «Nyɔ̌ŋ wǎm, bɨ́ɔɔ́ bâm le okɛ́l bâm, bé ó baá o dí ejóʼǒ lɔ́ɔ́ mé Nzyɛ̌m, le esâ wé mejóʼo bá.»

Yésʉs lɨ́ enkáŋla e nkúo

(Matthieu 8.23-27; Marc 4.36-41)

22Ɨ́ lɨ̂ʼ dʉ́o, Yésʉs, bé le ompʉ́n bé nzě kalwo ɨ́ byɛ̂l. Nye ó: «Mɨná tôʼ gá lɨ́ ebʉ́m é mâŋ e dí kɔ́m nkɛ́ɛ́ lɨ́.» Bê nzě tɨ̂ tyen. 23Jɔʼ bé á be lɨ́ etô le edúʼo byɛ̂l yɨ́, Yésʉs nzě tô ɨ́ jô. Nkúo kʉ́ nzě táare ékwoolo ɨ́ mâŋ. Byɛ̂l ntɔ̂ʼ táare élóno ɨ́ medíbé. Byɛ̂l mû lɨ́ edǐ dihlɨ ɨ́ medíbé nɛ́ɛ: 24ompʉ́n bé, ntɔ̂ʼ sîhlě nko nyé á be yɨ́, jɨmɔɔ nyê. Bé e né ó: «Lɛ̂ʼla, lɛ̂ʼla, mɨná múo nzě dwe gâ!»

Yésʉs nzě mɔa sí, nkáŋla e nkúo le obóʼó ó mâŋ, byê nzě tala. Tɨ̂ʼ mû ɨ́ puuu. 25Yésʉs, nye le ompʉ́n bé ó: «Búʼó yɨ́n, yê nkoó?»

Bê nzě jóʼo bʉ́á le ekɛ̂n ɨ́ buo buo, ntɔ̂ʼ lɛ́ɛla páʼ nyɔ́ɔ́ ó: «Wɨ̂ʼ mbi mʉ̂r, wê nzé, dí, nyé sí lwib nɛ́ɛ: onkúo le obóʼó ó mâŋ, byé bánǎ sâ nyé mejóʼo nyâʼ ɛ̌?»

Yésʉs lɨ́ eso méleme

(Matthieu 8.28-34; Marc 5.1-20)

26Bê nzě kumǒ sí Gerázen. (Yé ó dí siesíe e sí Galilê.) 27Yésʉs dína sulo ɨ́ byɛ̂l, tyɛ̂b ɨ́ pɨ̌n nɛ́ɛ: nyʉ́ʉ́ mʉ́rʉ̂m nkana yaá ntɔ̂ʼ tó bɔma e né. Mʉr waá á be ó e meleme. Nye á didi ó, abe e kán e ndwê, adi ntémé ɨ́ mimbɛ̌r mi bʉ̂r. Nye á jaa didi ó, njɨ ɨ́ pemé mésoo. 28Nó mpʉ nyé á bee Yésʉs yɨ́, nye ntɔ̂ʼ bʉ̂ tím, tó bɨʼ mébóó sí ɨ́ mpǒm nyé. Nye e né ó: «Mɨná e go, bé e wáǎ lɔ̌b ɛ̌? Yésʉs, Mwân mé Nzyɛ̌m dí Lʉ́ bísá bíbyɛ̂h nyá, me lɨ́ ejɨʼla e go: ayɨ́ dwe mé ntɨ́ʼá.»

29(Nye á lwib nó ó, ebě, Yésʉs á be ɨ́ lɛ́ɛ le mbɨ́ǎ sísǐm waa ó, wé dúhaa mʉr waá ɨ́ nyʉ̂l. Wé á be lɨ́ eboó mɛ̂r nyé bijɔʼ bijɔʼ. Bʉr o kwár nyaá, bé á bɨbe ó, lɨ́ ekɨkâʼ nyé mebô e mekʉ̌ e mikʉ̂kɔ̌b, le ebaʼle nyê. Damá jóʼo nó, nye á be lɨ́ ebánǎ búʼo míkʉ̂kɔ̌b myaá. Eleme laá nzě tʉ̂to le edâʼre nyé ɨ́ lʉá e lʉá wɛ̂h.)

30Yésʉs ntɔ̂ʼ dî e né ó: «Díé lô, lê nzé?» Nye ntɔ̂ʼ yala e né ó: «Daa-e-Méleme.» (Nye á lwib nó ó, ebě, meleme ɨ́ buo buo, mé á si boo nî nye ɨ́ nyʉ̂l.) 31Meleme maá nzě jɨʼla e Yésʉs ó, nye ayɨ́ tyen mé ɨ́ bɨ́ dí sí ɨ́ kœ́ʼlɛ́ yɨ́.

32Náǎ yé á be ó e daa lé ónkʉ̌ ɨ́ buo buo, lɨ́ɛ lɨ́ etô le ede méde mɔ́ɔ́ lɨ́ ecwɨ̂ʼ. Meleme maá, mé ntɔ̂ʼ jɨʼla e Yésʉs ó, nye kámaa ó, mé níʼee tʉ́ŋlʉ̌ menyʉ́l mé ónkʉ̌ baá. Nye ntɔ̂ʼ kam ó, mé sâʼ nó. 33Nó méleme, mé á nze duho ɨ́ nyʉ̂l mʉr waá, ntɔ̂ʼ tó nî ɨ́ menyʉ̂l mé ónkʉ̌. Daa lé ónkʉ̌ nzě tulwa ɨ́ mbéʼé écwɨ̂ʼ kʉ́, ntɔ̂ʼ lʉ́ŋa ɨ́ mâŋ, ntɔ̂ʼ jɨ́bla, dwe.

34Jɔʼ ópála bé ónkʉ̌, bé á bee syɛ́ɛla yaá yɨ́, bé ntɔ̂ʼ kpɛ́ɛ, tô e lɔ́ɔ waá nkana, le bípɛr e bípɛr byɛ̂h. 35Bʉr nzě dua ɨ́ mekwár mɔ́ɔ́, lɨ́ enzě beɔɔ̌ sâ syɛ́ɛ́ yɨ́. Jɔʼ bé á pyâl gúmó Yésʉs á be yɨ́, bé kǎ kœb ó, mʉr á dwihɔɔ meleme nyá, nye mû ndîndǐl le mikán ɨ́ nyʉ̂l, le pɨʼ nyé nyɨnyɛ̂h. Nye á be ó bǎʼ e mekʉ̌ mé Yésʉs. Bʉr o b'á nze bá, kʉ́ nzě kámɔɔ nyê. 36Bʉr o b'á bee syɛ́ɛla yaá bá, bê nzě lɛ́ɛ bʉ́ʉ́ mpʉ mʉ̂r meleme, mé á nzɨnzamra nyá á ka tiʼe yɨ́. 37Nó ó bʉ̂r ó Gerázen bɨ́bɛ̂h, bê nzě jɨʼla e Yésʉs ó, nye pʉ́ʼaa ɨ́ sí yɔ́ɔ́, ebě, bé á be ó sí buú kâm syɛ́ɛla yaá. Yésʉs ntɔ̂ʼ kalwo ɨ́ byɛ̂l, swîʼ. 38Mʉrʉ̂m Yésʉs á dwih meleme nyá, nzě jɨʼla e Yésʉs ó, bé le onɔ́ɔ́, bé káa didǐ sɔ́má. Nó ó Yésʉs á nze bwóolo nye. Nye e né ó: 39«Tóʼ mbɛ̌r gô. Go e lɛ́ɛ́ sá yɨ́yɛ̂h Nzyɛ̌m sá gó yɨ́.» Nó ó mʉ̂r nɨ̌ á nze ka tô, tô le elwáŋlě lɔ́ɔ waá ɨ́ nkana yaá yɨ́yɛ̂h, le elɛ́ɛ̌ sá yɨ́yɛ̂h Yésʉs á sâ nye yɨ́.

Yésʉs lɨ́ etiʼ éséhé mé Yárwis

(Matthieu 9.18-26; Marc 5.22-43)

40Ɨ́ mpúla gʉ̂ʼ nɛ́ɛ: entumo e bʉ̂r nzě nʉa nyé e bisʉhʉʉ, ebě, lé á be ó lɨ́ ebóno nyê. 41Nyʉ́ʉ́ mʉ̂r, díé lé Yárwis, ntɔ̂ʼ pyâl. Nye á be ó tyɛ̂b esôʼ ɨ́ mpáh minjɨʼla. Nye ntɔ̂ʼ kúrwo sí, píʼe mpóm ɨ́ bibwǎh ɨ́ mpǒm mé Yésʉs, nzě jɨʼla e né ó, bé e nɔ́ɔ́ tôʼ mbɛ̌r wé, 42ebě, eséhé lé, mimbû kám e mimbá, lé á be etíʼé é mwân lɨ́, lé á be ó lɨ́ egûʼra.

Bé e Yésʉs mû ɨ́ mpúla nɛ́ɛ: entumo e bʉ̂r kʉ́ nzě mána nyé ɨ́ mempah me nyʉ̂l. 43Tó kœb ó, é bʉr baá, nyʉ́ʉ́ mʉ́má á be ó tɨ̂, metié lɨ́ esʉsolo nyé ɨ́ nyʉ̂l. Nye á si jâ le ekpaa laá mimbû kám e mimbá, sîl mɔnɨ́ yé yɨ́yɛ̂h ɨ́ pé lɨ́ esáa dʉ̂m, akœb mʉ̂r tíʼ nyê. 44Nye nzě pyâl bǎʼ e koo mé Yésʉs, tyěn mbô, kúna le odumo ó kán wé. Tyé e tyé yaá, ekpaa e métié laá, lé ntɔ̂ʼ síe lɨ́lɛ̂h jɔʼ gwár. 45Yésʉs ntɔ̂ʼ dî ó: «Nzê kúná e me?» Bʉr bɨ́bɛ̂h ntɔ̂ʼ kɛ́la. Pétrus nzě lɛ́ɛ e né ó: «Lɛ̂ʼla, sɔ́má bʉ̂r dí ebɔma gó ɨ́ nká yɨ̂, yé lɨ́ enyêhle gó ɨ́ mipáʼ mímyɛ̂h.» 46Yésʉs ntɔ̂ʼ lɛ́ɛ ó: «Nyʉ́ʉ́ mʉ̂r, nye bé ɨ́ kʉ́ kúna e me, ebě, mɨ́ jʉ̂ʼra nyʉ́ʉ́ nkûl lɨ́ epʉʼa mé ɨ́ nyʉ̂l.»

47Mʉmá waá mpʉ nyé á gʉ́a ó, nyɨ́ gwíha yɨ́, nye ntɔ̂ʼ nze, le esâʼ ɨ́ ngba ngba ngba, nzě bɨʼ mébóó sí ɨ́ mpǒm mé Yésʉs. Nye ntɔ̂ʼ gwîh ɨ́ kpɛŋlɛm sá yé á sâ ó, nye kúnaa e né yɨ́, le mpʉ ékpaa lé, lé á síe ɨ́ tyé e tyé yaá yɨ́. 48Yésʉs ntɔ̂ʼ lɛ́ɛ e né ó: «Mwân wǎm, búʼó yô, yɨ́ tiʼ gô! Mepyɛbla, mé díʼee go ɨ́ léme.»

49Yésʉs dína lɨ́ elwib nó nɛ́ɛ: nyʉ́ʉ́ mʉ̂r ntɔ̂ʼ pyâl, duhǒ mbɛ̌r mé Yárwis. Nye e Yárwis ó: «Eséhé lô, lɨ́ dwe. Ayɨ́ kǎ ntɨ̂ʼ lɛ̂ʼla dwêh!» 50Mpʉ̌ Yésʉs á jóʼo sá mʉ̂r waá á lɛ́ɛ yɨ́, nó ó nyé á nze lɛ́ɛ e Yárwis ó: «Ajóʼo bʉ́á. Búʼláa. Mónǒ ótiʼe!»

51Jɔʼ bé á pyâl ɨ́ mbɛ̌r yɨ́, Yésʉs ntɔ̂ʼ kamle bʉ̂r lɨ́ enî mbɛ̌r. Nye á jaa níŋle ó, njɨ Pétrus, Yʉánɛs, Jacques, le sɔ́ŋ e nyɔ̌ŋ me mwân waá. 52Bʉr bɨ́bɛ̂h, bé á be ó lɨ́ ejɨ médwê le ebʉ̂ bítím lɨ́ eswie laá. Yésʉs ntɔ̂ʼ lɛ́ɛ e bé ó: «Ayɨ́ kǎ jɨ gâ, ebě, nyé adwe. Nye ɨ́ jô.»

53Bê nzě pya nyê, ebě, bé á be ó sí kʉ́ gʉ́a ó, nyɨ́ dwě tyeetye. 54Yésʉs ntɔ̂ʼ mɛ̂r mwân waá ɨ́ mbô, le elɛ́ɛ e né kʉ́kʉ́ ó: «Mâ eséhe, gbɔlwaa sí!» 55Sísǐm wé, wé ntɔ̂ʼ tó búla, nî nyé ɨ́ nyʉ̂l. Nye ntɔ̂ʼ gbɔlwa sí ɨ́ tyé e tyé yaá. Yésʉs ntɔ̂ʼ lómo bʉ̂r ó, bé dwêʼ eséhe laá sá éde. 56Obyɛ̂l bé kʉ́ nzě kâm syɛ́ɛla yaá. Yésʉs ntɔ̂ʼ lɛ́ɛ e bé ó, bé l'anyamlě lɛ́ɛ mʉ̂r sâ syɛ́ɛ́ yɨ́.

Currently Selected:

Luc 8: ozm

Highlight

Copy