Marc 1

Lɔ́ɔ́ Yʉánɛs Ndubʉr á túno wɨ́

1Metááré mé Mbɨambɨa Lɔ́ɔ́ mé Yésʉs-Krîst, [Mwân mé Nzyɛ̌m], mé ó mâ. 2Yé ó mpʉ Ésayie, ngwíha milɔ̌b mé Nzyɛ̌m á boo cɛma yɨ́. Nye á cɛma ó:

«Bɛɛngɛ́ɛ! Me múo nzě lómo mʉ̂r milʉ́mlʉ́ wǎm nzɨ́ nyǒ dóló ó,

nye tôʼ le esyɛŋle gó nzɨ̌.

3Mʉr waá, nye lɨ́ etyɛ̂b le túnó ɨ́ lʉá tʉ́ŋlʉ̌, lɨ́ elɛ́ɛ ó:

“Komlaa gá nzɨ̌ mé Dâ.

Bɨ̌n a tyél ménzɨ̌ mé ɨ́ lîm.”»

4Kwahá mpʉ̌ Ésayie á cɛma yɨ́, nó ntémé ó Yʉánɛs Ndubʉr á be yɨ́. Nye á be ó ɨ́ lʉá, lɨ́ edu bʉ̂r le elɛ́ɛ bé ó, bé túmaa mikoo e mebébe mɔ́ɔ́, le edwira míléme, bé e dúŋɔɔ, Nzyɛ̌m pɛ́ʼɛɛ bibaa bí ébébe byɔ́ɔ́.

5Nó ó bʉ̂r ó Yʉ́da le baá ó Yerʉ́zalɛm bɨ́bɛ̂h, bé á nzě gúmó nyé á be yɨ́, bé ntɔ̂ʼ gwîh mébébe mɔ́ɔ́, Yʉánɛs nzě du bé ɨ́ díbé Yɔrdên.

6Kán Yʉánɛs á bubwâr wɨ́, wé á be ó tiá e myě mé chameau. Kaná nyé á tityeele lɨ́ odyɛ́m nyá, á be ó sɛ́á e kʉ́r tír. Nye á dɨde ó océmebiká le egbɔ́ʼ. 7Nye á be ó lɨ́ etúnǒ Mbɨambɨa Lɔ́ɔ. Nye e bé ó: «Yé e nyʉ́ʉ́ mʉ̂r dí e jwɨ́ɨ, laa mé nyá. Nye lɨ́ ebɔma mé píe koo. Mé abě tyé mʉ̂r dí ó, me díʼee nye túʼǎ nyá.» #1.7: Nye á tile ɨ́ lwǐb grɛ̂k ó: «Mé abě tyé mʉ̂r dí ó, me tíyɨɨ mikǒl mí ósípah myé», sá dí elɛ́ɛ ɨ́ lwǐb Nzíme ó: «Mé abe e nkul eŋmɛn nyê.» Tó kœb ó, yé á bé abě jwɨʼ mé Yʉánes Ndu-bʉr. 8Mɛ̌m du bɨ́n ó e medíbé. Nyɨɛ, nye ódu bɨ́n ó e Sísǐm mé Nzyɛ̌m.»

Ndubó mé Yésʉs

(Matthieu 3.13-17; Luc 3.21-23; Yʉánɛs 1.29-39)

9Ɨ́ melû maá, Yésʉs nzě duhǒ Nazarɛ̂t ɨ́ sí Galilê, nzě tô díbé Yɔrdên. Tɨ̂ʼ ó Yʉánɛs á du nye yɨ́. 10Le nyé á pʉʼa ɨ́ medíbé, le ntɔ̂ʼ nyé á bee ó, jʉ́o, yɨ́ nyɛɛ ɨ́ kwiií. Sísǐm mé Nzyɛ̌m ntɔ̂ʼ sulo ɨ́ báaa mpʉ épɨbaa, nzě berwo nyé ɨ́ nyʉ̂l. 11Etyêl, lê nzě duho ɨ́ jʉ́o kʉ́ lɨ́ elɛ́ɛ ó: «Go ó mwân wǎm mé dí ɨ́ buú kpɛl nyá. Sʉhʉʉ yâm yɨ́yɛ̂h, yé e go.»

Sátan lɨ́ ebóblǒ Yésʉs

(Matthieu 4.1-11; Luc 4.1-13)

12Píe tɨ̂, Sísǐm mé Nzyɛ̌m nzě tíne nyé ɨ́ lʉá. 13Nye á jâ gʉ̂ʼ ɨ́ lʉá ó melû mekám ménâ. Ɨ́ melû maá, Sátan á be ó lɨ́ ebʉ̂boblo nyê. Ɨ́ gúmo yaá, bé le otír ó b'á didi, beéngeles bɨ́ɛ lɨ́ eséa e né.

Yésʉs lɨ́ ejébe ómpʉ́n bé ésôʼ onâ

(Matthieu 4.18-22; Luc 5.1-11)

14Bê nzě gbâ Yʉánɛs ɨ́ mbʉʼ. Píe tɨ̂, Yésʉs nzě tô sí Galilê, tô le etúnǒ Mbɨambɨa Lɔ́ɔ dí eduho kwá mé Nzyɛ̌m wɨ́. 15Nye á lɨlɛ́ɛ ó: «Jɔʼ, yɨ́ pyâl! Nzyɛ̌m, nye mû ó kúno etyêl Mpóʼo nyé ɨ́ sɔ́má yɨ́n! Túmáá gá mikoo e mebébe mɨ́n. Bɨ̌n a dwírá míléme. Búʼláá gá Mbɨambɨa Lɔ́ɔ.»

16Ɨ́ jɔ̌ʼ Yésʉs á be lɨ́ etye ɨ́ nkpâh máŋ mé Galilê yɨ́, nye ntɔ̂ʼ beě Simon, bé e mɨ́ɔɔ́ wé, André. Bé á be ó lɨ́ eguho méntâm ɨ́ mâŋ le edulo mê, ebě, bé á be ó ogwih o méntâm. 17Yésʉs ntɔ̂ʼ lɛ́ɛ e bé ó: «Dúʼóó gá me. Me ókǎ sâ ó, bɨ̌n díʼee odul o bʉ̂r.» 18Tyé e tyé yaá, bé ntɔ̂ʼ bîr méntám mɔ́ɔ́, dúŋɔɔ nyê.

19Nye nzě laa, bá tô dóló, nzě beě Jacques, bé e mɨ́ɔɔ́ wé, Yʉánɛs, bwán mé Zebedê, bé osí syel byɛ̂l wɔ́ɔ́. Bé á be ó tɨ̂ʼ mindîndǐl lɨ́ ekomlo méntâm. 20Tyé e tyé yaá, nye ntɔ̂ʼ jébe bê. Bé ntɔ̂ʼ mɔa, líʼɔɔ sɔ́ŋ wɔ́ɔ́ Zebedê, bé le osyɛ̂l o mésá bé ɨ́ byɛ̂l, ntɔ̂ʼ dúŋɔɔ̌ Yésʉs.

Nkul jwɨ́ɨ mé Yésʉs

21Bê nzě tô Kapernáʉm. Ɨ́ móhó sábat, bê nzě nî ɨ́ mpáh minjɨʼla. Yésʉs nzě nyɛl édwe bʉ̂r milɛ́ʼlá ɨ́ milɔ̌b mé Nzyɛ̌m. 22Bé á be ɨ́ buú kâm mbi mílɛ́ʼlá nyé á dwidwe mí, ebě, nye á bé anwɨɨla le olɛ̂ʼla o métié bɔ́ɔ́. Nye á lɨ̂lɛʼle bé ó e nkul jwɨ́ɨ.

23Ɨ́ sɔ́má bʉ̂r o b'á be ɨ́ mpáh minjɨʼla bá, nyʉ́ʉ́ á be ó e mbɨ́ǎ sísǐm. Nye nzě bʉ̂ tím. Nye ó: 24«Yésʉs, mʉr Nazarɛ̂t, mɨná e go bé e wáǎ lɔ̌b? Go nzé ó, nzě sîl bɨ́h ɨ́? Mɨ́ gʉ́a gô. Go ó Mʉr mé Nzyɛ̌m dí ti nyá!»

25Yésʉs ntɔ̂ʼ nkáŋla e mbɨ́ǎ sísǐm. Nye e wé ó: «Diblaǎ num. Duhaa mʉ̂r nɨ̌ ɨ́ nyʉ̂l.» 26Sísǐm waá nzě ntyeŋ mʉ̂r nɨ̌ e nkul, nye ntɔ̂ʼ bʉ̂ tím ɨ́ bwaʼ bwaʼ. Wé ntɔ̂ʼ duho nyé ɨ́ nyʉ̂l. 27Bʉr bɨ́bɛ̂h bê kʉ́ nzě kâm. Bê nzě gɔ́na le elwibla páʼ nyɔ́ɔ́ ó: «Wáǎ mbǐ lɔ̌b wɨ̂? Edwán é lɛ́ʼlá lwɨ́ŋlá e nkul jwɨ́ɨ! Damá jóʼo mímbɨ́a mísísǐm, nye lɨ́ ebánǎ jwɨ́ɨ myê, myê bánǎ sâ nyé mejóʼo!» 28Kûm nyé nzě myaŋla, jala ɨ́ sí Galilê yɨ́yɛ̂h.

Yésʉs lɨ́ etiʼ mímbêl ɨ́ buo buo

(Matthieu 8.14-17; Luc 4.38-41)

29Bê nzě duho mpáh minjɨʼla nyaá, ntɔ̂ʼ tóŋɔɔ̌ mbɛ̌r mé Simon bé e André. Jacques, bé e Yʉánɛs ntémé, bé á be ó ɨ́ sɔ́má yaá. 30Tǐ mʉmá mé Simon á be ó njáʼ sí lɨ́ ebíle, nyʉ̂l lɨ́ edúo ɨ́ bɨl bɨl. Nó bé á kpahwa lɛ́ɛ Yésʉs lɔ́ɔ́ ékpaa laá, 31nye nzě sîhlě bǎʼ e né, nzě mɛ̂r nyé ɨ́ mbô, gbɛl nyé sí. Ekpaa, lé ntɔ̂ʼ síe. Mʉmá waá nzě táare éséa e bê.

32Ɨ́ bíí kʉ̌ʼ yaá, bʉr ntɔ̂ʼ tô kwá nyé e mimbél myɔ́ɔ́ mímyɛ̂h le bʉr o méleme, mé á nzɨnzamra bá. 33Bʉr ó nkana yaá bɨ́bɛ̂h nzě swâl bǎʼ le ebé é mbɛ̌r wɔ́ɔ́. 34Nye nzě tiʼ mímbêl ɨ́ buo buo myé á be e mekpaa ɨ́ menyʉ̂l mimbi mimbi mí. Nye á si so buobuo bʉr meleme mé á nzamra bé bá. Nó nyé á bé abîr ó, mé lwíbɨɨ, ebě, mé á be ó lɨ́ edweʼe nyê.

Yésʉs lɨ́ etúnǒ Mbɨambɨa Lɔ́ɔ

(Matthieu 4.23-25; Luc 4.42-44)

35Ɨ́ mɛ́n tɨ̂ʼ kúnó, Yésʉs nzě pɔhwa, tô kʉ̌l, tô ɨ́ mâ lʉ̌n, súm nyé á be nye omér yɨ́. Tɨ̂ʼ ó nyé á jɨjɨʼla e Nzyɛ̌m yɨ́. 36Simon, bé e bʉ́ʉ́ ómpʉ́n, bê nzě tô ɨ́ misɔ́ɔlʉ myé. 37Bê nzě bee nyê, nzě lɛ́ɛ e né ó: «Bʉr bɨ́bɛ̂h, bé lɨ́ esáa gô.» 38Nó ó Yésʉs á lɛ́ɛ e bé ó: «Ncʉ̂ʼ gâ. Mɨná tôʼ gá ɨ́ mekwár me dí kâʼ má, ebě, me ótúnǒ Mbɨambɨa Lɔ́ɔ ntémé gʉ̂. Yé ó sá mé á nze sâ kâʼ yɨ́, yé ó nɨ̌.» 39Nó nyé á to le elɛ́ɛ̌ lɔ́ɔ́ wé waá ɨ́ mempáh mínjɨʼla mɔ́ɔ́ ɨ́ sí Yʉ́da yɨ́yɛ̂h le eso méleme ɨ́ bʉr.

Yésʉs lɨ́ etǐʼ nzɨ̂nzǎm

40Nyʉ́ʉ́ mʉ̂r nzě pyâl kwá mé Yésʉs, nzǎm ɨ́ nyʉ̂l ɨ́ nɛ̌m. Nó nyé á nze jɨʼla e né. Nye e né ó: «Gó kpɛ̂l nó, bɛ̌m tiʼ mê. Nyʉ̂l díʼee me ɨ́ deŋé.» 41Yésʉs ntɔ̂ʼ jɨ̂ʼ nyé nkoó, syɛ̂m mbô, nzě kúna e né. Nye e né ó: «Mɨ́ kpɛl. Nyʉ̂l díʼee go ɨ́ deŋé!»

42Tyé e tyé yaá, nzǎm ntɔ̂ʼ pʉʼa mʉ́rʉ̂m nɨ̌ ɨ́ nyʉ̂l. Nyʉ̂l nyé nzě di ɨ́ deŋé. 43Nó ó Yésʉs á nze so nyé le mempám. 44Nye e né ó: «Anyamlě lɛ́ɛ mʉ̂r mpʉ gô tiʼé yɨ́. Tááráá étó lɛ̂ʼle ópara mpʉ gó mû yɨ́. Go e tó dwe míndwéá Moyɨ̂z á lɛ́ɛ ó, go lɛ̂ʼlaa bê, bé nkʉ̂ pubo gó mí.»

45Damá jóʼo ó mpʉ̌ Yésʉs á lɛ́ɛ nye nó yɨ́, mʉr waá á jaa to le etúno le egwîh lɔ́ɔ waá ó, tûtuno ó túnáa ɨ́ gúmó yɨ́yɛ̂h. Sá tɨ̂ʼ ó Yésʉs á be abe e nkul ekǎ nî ɨ́ binkana ɨ́ ponó yɨ́. Nye á ka jaa didi ó, njɨ ɨ́ bilʉ̌n, bisúm bʉ̂r, bé á be abe bí. Bʉr bé á be lɨ́ etô kwá nyé, duduho ɨ́ bigúmó bíbyɛ̂h.

Currently Selected:

Marc 1: ozm

Highlight

Copy