Marc 8

Yésʉs lɨ́ edwe bʉ̂r otɔ́ɔ́sin onâ mede

(Matthieu 15.32-39)

1Ɨ́ melû maá, entumo e bʉ̂r, lê nzě báʼǎ swâl súm Yésʉs á be yɨ́. Ɨ́ mpʉ bé á be abe e sá éde yɨ́, Yésʉs ntɔ̂ʼ jébe ómpʉ́n bé. Nye ó: 2«Me lɨ́ ejɨ̂ʼ bʉ̂r bâʼ nkoó, ebě, mɨná gá le onɔ́ɔ́, bɨ́ di mélú mélɛ̂l, bé akǎ be e sá ede. 3Mé bír ó, bé tôʼ mékwár mɔ́ɔ́ nó, bé óbuú tyɛʼ téme-nzɨ̌ ɨ́ nza, ebě, bʉ́ʉ́ bʉ̂r ɨ́ sɔ́má yɔ́ɔ́, bé duhó ó lɨ́ ejaa.» 4Nó ompʉ́n bé, bé á yala e né ó: «Bɨ̌h bé e nkul esâ nyá, ó bɨ̌h kœ́bɨɨ bím méde mé ójala e bʉr bâʼ má, bʉr témé lʉá mpʉ?» 5Yésʉs ntɔ̂ʼ dî e bé ó: «Bɨ̌n bé e biblêr yáǎ bím?» Bé e né ó: «Nzaangbá.»

6Nó nyé á lɛ́ɛ e bʉr ó, bé díʼee sí. Nye ntɔ̂ʼ nʉa bíblêr nzaangbá byaá, nzě dwě Nzyɛ̌m nzyǒo, ntɔ̂ʼ pɛ̂ʼ byé bipêh bipêh, dwidwe ómpʉ́n bé ó, bé kábaa bʉr byǎ. Bê nzě nʉa, kab bʉ̂r bɨ́bɛ̂h. 7Bé á be ntémé ó e bwá bé ósû, abuo. Yésʉs nzě dwě Nzyɛ̌m nzyǒo ɨ́ lɔ̌b ósû baá, ntɔ̂ʼ tîtimle ómpʉ́n bé ó, bé dwêʼ bʉr bǎ. 8Mʉr nyɨnyɛ̂h ntɔ̂ʼ de, díle. Bé ntɔ̂ʼ syɛŋ bípéh byé á buʼo bí, lóŋlo mékwám nzaangbá e byê. 9Bʉr o b'á be tɨ̂ʼ bá, bé á be ó kúnókúno e bʉr otɔ́ɔ́sin onâ. Píe tɨ̂, Yésʉs nzě bwóolo bé ó, bé tôʼ ɨ́ mekwár mɔ́ɔ́. 10Tyé e tyé gwár yaá, bé le ompʉ́n bé nzě kalwo ɨ́ byɛ̂l, ntɔ̂ʼ tô sí Dalmanutâ.

OFarizyɛ̂n lɨ́ edǐ bee mésimá

11OFarizyɛ̂n nzě pyâl, bé e boo Yésʉs ntɔ̂ʼ táare épére mékǎn. Lɨ́ esú lé ébóblɔɔ nyê, bê nzě dî e né ó, nye lɛ̂ʼlaa bé esimá e dí eduho ɨ́ jʉ́o kʉ́ lɨ́. 12Yésʉs nzě síme ɨ́ sísǐm wé tʉ́ŋlʉ̌. Nye ó: «Bʉr ó myǎ wɨ̂, bé lɨ́ ekpɛl ébee ésimá ɨ́ yé? Mě lɛ́ɛ́ bɨ́n lɨ́ otyeetye ó, bé ákóʼó bee ésimá egwár.» 13Nye ntɔ̂ʼ líʼe bê, báʼǎ nî ɨ́ byɛ̂l tʉ́ŋlʉ̌, tô lɨ́ ebʉ́m é mâŋ e kɔ́m nkɛ́ɛ́.

Egʉʼla lé ómpʉ́n mé Yésʉs

14Náǎ yé ó, ompʉ́n bé, bé á si kʉ jɨha lɨ́ enʉa bíblêr. Bé á nî ɨ́ byɛ̂l, ntɔ̂ʼ tô ɨ́ mâŋ ó, njɨ e blêr gwár. 15Yésʉs ntɔ̂ʼ cɨ̂l bé ó: «Gwá baʼ gá oFarizyɛ̂n le dyɛɛ́ Erôd ɨ́ lɔ̌b levure bé dí e yé yɨ́!» 16Nó ó ómpʉ́n bé, bé á lwibla páʼ nyɔ́ɔ́ ó: «Nye lɛ́ɛ́ nó ó, ebe mɨ́ná dí abe gá e biblêr.»

17Tó kœb ó, Yésʉs á si kʉ gʉ́a sá bé á lwibla páʼ nyɔ́ɔ́ yɨ́. Nó nyé á nze dî e bé ó: «Bɨ̌n bé lɨ́ elɛ́ɛ ó, mě lwǐb nó ó, ebe mɨ́ná dí, abe gá le biblêr ɨ́ yé? Nzê bɨ̌n dína wâʼ ó, apǎ twólwo le ejóʼǒ sá mé dí elɛ́ɛ yɨ́ ɛ́? Nzê milémé mín, myé ɨ́ lele lɨ́ ejóʼo ɛ̌? 18Nzê bɨ̌n bê wâʼ ó, bɨ̌n bɨɛ e mîh, abee ɛ̌? Le megwǎl, ajóʼo ɛ̌? Nzê bɨ̌n bé abaʼlě sɔ̂ʼ ɨ́ milémé mín ɛ̌? 19Jɔʼ mé á pɛ̂ʼ biblêr bitɛ̂n, dwe bʉ́rʉ̂m otɔ́ɔ́sin otɛ́n yɨ́, bɨ̌n bé á lóŋlo mekwám méntíá e bimpubuʼó méde maá?» Bê nzě yala e né ó: «Kám e mebá.» 20«Ndu e ɨ́ jɔʼ mé á pɛ̂ʼ biblêr nzaangbá, dwe bʉ̂r otɔ́ɔ́sin onâ yɨ́, bɨ̌n bé á lóŋlo mekwám méntíá e bimpubuʼó méde maá?» Bé e né ó: «Nzaangbá.» 21Nó nyé á dî e bé ó: «Nzê bɨ̌n bé apǎ gwá jóʼo ɛ̌?»

Yésʉs lɨ́ etiʼ ántím Bétsɛ́da

22Bê nzě pyâl Bétsɛ́da. Bʉr ntɔ̂ʼ nze nyé le ántím, nzě jɨʼla e né ó, nye kɛ́lɨɨ nye mbô. 23Nó nyé á nze mɛ̂r ántím waá ɨ́ mbô, bé ntɔ̂ʼ duho kwár. Nye ntɔ̂ʼ swóolo nyé metyéelé ɨ́ mîh, ntɔ̂ʼ kɛl nyé mebó ɨ́ nyʉ̂l, nzě dî ó: «Nzê go lɨ́ ebeě sɔ̂ʼ ɛ̌?» 24Ántím ntɔ̂ʼ bɛ́ɛ mîh. Nye e né ó: «Me lɨ́ ebee bʉ̂r, lɨ́ enwɨɨla e bilɨ́ lɨ́ etye.»

25Nó ó Yésʉs á baʼa kɛl nye mebô ɨ́ mîh, nye ntɔ̂ʼ dwɛ̂ʼ ɨ́ tooobó, ntɔ̂ʼ tiʼě mbɨ̂mbɨá. Nye á be ó, nye mû kǎ bee bísá bíbyɛ̂h ó ɨ́ sʉ́lʉ́lʉ́. 26Yésʉs ntɔ̂ʼ bwóolo nyé mbɛ̌r wé. Nye e né ó: «Sá abáʼǎ tô ɨ́ kwár nɨ̌.»

Yésʉs ó dí Mʉ̌r Nzyɛ̌m á lœm múló mé jwɨ́ɨ nyá

(Matthieu 16.13-20; Luc 9.18-21)

27Yésʉs, bé le ompʉ́n bé, bê nzě tô ɨ́ mekwár bǎʼ e Kesáre mé Fílipi. Ɨ́ téme-nzɨ̌, nye nzě dî e bé ó: «Bʉr, bé pʉgʉ́ lɛ́ɛ náǎ ó, me nzé?» 28Ompʉ́n bé ntɔ̂ʼ yala ó: «Bâʼ bʉ̂r, bé lɛ́ɛ́ ó, go ó Yʉánɛs Ndubʉr. Bʉ́ʉ́, bé ó, go ó Elie. Bʉ́ʉ́ ntémé, bé ó, go ó nyʉ́ʉ́ ngwíha milɔ̌b mé Nzyɛ̌m.» 29Nye ntɔ̂ʼ báʼǎ dî e bé ó: «Nó bɨ̌n bɨɛ̌ lɛ́ɛ́ ó, me nzé?» Pétrus ntɔ̂ʼ yala ó: «Go ó Mʉ̌r Nzyɛ̌m á lœm múló mé jwɨ́ɨ nyá.» 30Yésʉs ntɔ̂ʼ gbâ bé mpéné ó, bé l'alɛ́ɛ mʉ̂r swîh.

Túnó ɨ́ lɔ̌b éswie mé Yésʉs

(Matthieu 16.1-26; Luc 9.22-25)

31Yésʉs nzě táare édwe ómpʉ́n bé milɛ́ʼlá. Nye ó: «Yé jala ó, Mwân mé Mʉr, nye síaa e mitúú ɨ́ buo buo. Otɔ́má bʉ̂r, ojwɨ́ɨ o mpáh Nzyɛ̌m, le olɛ̂ʼla o métié, bé óbene nyê. Nye ntémé ójʉ́ŋɔɔ. Elú élɛ̂l píe tɨ̂, nyé opah ɨ́ soo.» 32Nye á lɛ́ɛ bé lɔ́ɔ waá ó ɨ́ hwɨ́m. Nó Pétrus á nze tô e né ɨ́ bʉm, nzě dwe nyé mebě. 33Yésʉs nyɨɛ nzě dwira, dwɛ̂ʼ nko ómpʉ́n bé, bé á be yɨ́, nzě dwě Pétrus mebě. Nye e né ó: «Sátan, duhaa mé náǎ. Mipahlá myô, myé abe myaá mé Nzyɛ̌m. Myé ó myaá mi bʉ̂r ó sí yɨ̂.»

34Nó nyé á nze jébe entumo e bʉ̂r le ompʉ́n bé. Nye ó: «Mʉ̂r sí kpɛl édû mé nó, nye bénaa nye mʉr tɨ̂. Nye e nkɛ́ɛ́ kolôs yé. Nye e dú mê. 35Ebě, mʉr kpɛ́l ékamle e twiʼ yé nyá, ódímle yê. Tó kœb ó, waá ngá dwě twiʼ yé lɨ́ esú lâm, le laá é Mbɨambɨa Lɔ́ɔ nyá, nyɨ́haá ótiʼe. 36Mʉ̂r nʉ́á sí yɨ̂ʼ yɨ́yɛ̂h, kǎ tó dímlě twiʼ yé nó, nyě e wáǎ nyɔm tɨ̂? 37Yáǎ sɔ̂ʼ mʉ̂r dí e nkul esyɛ́ɛla lɨ́ esú lé ébáʼǎ bǐ twiʼ yé? 38Bʉr ó myǎ wɨ̂, bé ó odûl bé ónzyɛ̌m oswîh. Mʉr nyɨnyɛ̂h jéʼé mê, jóʼo mílɛ́ʼlá myâm sôn témé osyɛ̂l o mísyóm ó myǎ wɨ̂ʼ nyá, Mwân mé Mʉr ójéʼe ntémé mʉr waá ɨ́ dʉ́ó nyé ngá nze ɨ́ mentyɛnwa me Sɔ́ŋ wé, pûhla e maá bééngeles dí ti bá yɨ́.»

Currently Selected:

Marc 8: ozm

Highlight

Copy