Mataos 28

Epàh e foo mo Yesʉs

(Markus 16.1-8; Lʉkas 24.1-11; Yʉanes 20.1, 11-18)

1Pie moho saba, é molama mo mɛn, dobo e sono#28.1 É lwib grɛk, yé ó «dobo le efoʼ é sono»., Maaria, sile Magdala, bé e yʉʉ Maaria, bé ze nkɛɛ, toŋɔ nko foo. 2No ó, si kʉ ze ncyeŋa é buobuo, ebe, engles mo Da a be ó si fulo, duho é jobo kʉ, ze biŋle ekoʼ lé a be é nʉm nguʼ ekoʼ e. Pie tɨ, nye ze di si tɨʼ kʉ. 3Mbi nye a nyin ɨ, wé a be ó mpʉ ndweh mpie. No nteme, mɨkan nye a be e mye é nyʉl ɨ, myé a be ó é pumo-pumo mpʉ epɛm. 4Obɔʼlʉ o foo, bé a si bil ekɛn le esaʼ é zɔm-zɔm-zɔm, ntɔʼ nkaŋa si mpʉ mɨmuu.

5No ó engles a lɛɛ e bʉba baa ó: «Bɨn bɛɛ, daʼ joʼo ga bʉa, ebe, mɨ gʉa ó, bɨn bé esaa ó, Yesʉs, mʉr bé a cyèl é klos kʉ ɨ. 6No ó, nye aka be wâ! Nyi pàh mpʉ nye a bɛa lɛɛ-lɛɛ ɛ! Ntaʼ, ze bee ga gumo nye a be njaʼa si ɨ. 7Kpahba to ga. Toʼ, to lɛɛ ga ompʉn be ó: “Nyi pàh é foo! Mbe ga: nyi samle, lé eto bono bɨn ɨ Galɨle! Gʉʼ ó bɨn bé óbee nye e!” Bɨn bɨ joʼo mpʉ me lɛɛ ɛ.»

8Bé ntɔʼ mʉa é foo, ntɔʼ kpɛɛ gumo yaa, bʉa ndwe e bɨsʉhʉ, byé mu be é mɨleme lwɨŋla. Bé nteme ntɔʼ kpahbe to, lé eto cen ompʉn mo Yesʉs mpaŋla waa. 9Cye e cye yaa, bé ka twɨra ó, Yesʉs lé eze bɔma e be. Nye ó: «Me esoho bɨn!» Bé ze to, to bɨʼ mompom mɔɔ si é mih mo Yesʉs, lé edwiibɨ nye, mobo mɔɔ lé emɛr nye é mokʉ. 10No ó Yesʉs a lɛɛ e bʉba baa ó: «Ajoʼo ga bʉa. Toʼ, to lɛɛ ga yɛɛ obɨɔ bam ó, bé toʼ Galɨle, ebe, gʉʼ ó bé óbee me e.»

Lɔɔ odwiila o foo, bé a to le emyɛʼ ɛ

11É jɔʼ bʉba bé a be lé eto zi e zi ɨ, odwiila o foo ze to nkana, lé eto lɛɔ ojwɨɨ be opara sa yiyɛh yé a laa ɛ. 12Ojwɨɨ be opara ndwe e l'otamabʉr o lal ze gwɨhla, bònɔ pɨʼ, ntɔʼ dweŋɔ bɨzima bibyɛh mɔn. 13Bé e bye ó: «Lɛŋɨ ga bʉr ó, ompʉn be, bé be ó si ze díbe nye é pum, bɨn bɛɛ é bɨdwo. 14ǃƗ ngoman si fuuba joʼo lɔɔ waa nɛʼɛ, bɨh bé ógʉa mpʉ bɨh bé ólwib, cyeʼ nye, ó bɨn nkʉʼ di, akabɔ bɨntɨʼa tɨʼ ɨ.» 15No ó bé a ze nʉa mɔn yaa, ze sa mpʉ bé a lɛɛ e be ó, bé saʼ ɛ. No ó bé a to le emyɛʼ lɔɔ waa é l'oYʉden, ze pyal é muh é dobo lɨ.

Yesʉs lé enyin boo ompʉn be

16Esama le ompʉn ewʉm e ngwar mo Yesʉs baa ze to Galɨle, to pyal é l'ecwɨʼ Yesʉs a bɛa tɨe be e. 17No ó, mbea bé a bee nye e, bé ze dwiibɨ nye. Sa gwar, bʉʉ bʉr o sama yɔɔ, bé a be yɛɛ ó lé esoŋlo. 18Yesʉs ntɔʼ dihle nko bé a be e. Nye e be ó: «Mɨ bi nkul mojwɨ̀ʼa mo kʉ ndwe e maa mo si nwaʼ nyiwɛh. 19Ebe no, toʼ ga é si nwaʼ nyiwɛh. Bɨn bé à sa bɨkul bibyɛh ompʉn bam. Bɨn bé òdù be é die mo Sɔŋ e Mwan ndwe e Mbɨambɨa Sisim. 20Bɨn bé à yeʼle be ó, bé duʼo motie mɨmɛh me a tiile bɨn ɨ. Mbe ga: me ódi é bɨn molu mɨmɛh, to pyal é l'esie e mbi jɔʼ yi.»

Currently Selected:

Mataos 28: ozmBad

Highlight

Copy