Markus 2
2
Yesʉs lé etiʼ mbʉmbʉʼ
(Mataos 9.1-8; Lʉkas 5.17-26)
1Bwa molu, bé osi laa nɛʼɛ, Yesʉs ntɔʼ bâʼle to Kapernaʉm. Bʉr ze joʼo ó, nyi bula, nye mu ó mbɛr. 2Buobuo bʉr ze maʼlɔ tɨʼ é mbɛr we. Bé ze kœb ó, yé a baaka be e gumo ecyɛb, dam be ó é l'ebe kʉl. No ó nye a ze dwe be sikʉlʉ é mɨlɔb mo Zyɛm.
3Di é di di di, bʉʉ bʉr onâ ze pyal nye e mbʉmbʉʼ, wé ndɨ mbwamle é tɔɔ. 4No ó mpʉ bé a baabee gumo bé cwɨŋɨ é lɔb mpuo bʉr ɨ, bé ze jʉ̀ kʉ é mie mbɛr Yesʉs a be e, tubɔ egʉa é mie, ntɔʼ filɔ tɔɔ syoblʉ wɔɔ tɨʼ é l'egʉa. 5Mpʉ Yesʉs a bee mpʉ bé a jyɛʼ taa buʼo yɔɔ boo nye e, nye e mbʉmbʉʼ ó: «Mwan wam, bɨbaa bɨ ebebe byo, bi pɛʼɔ!»
6No ó, é sama oyeʼle o motie bé e l'oFarizyɛŋ bé a be tɨʼ ondindil ɨ, bʉʉ ze taare lé esoŋlo nye, le elɛɛ é mɨleme myɔɔ ó: 7«Ebe yé mʉr nwaʼ lé epa kʉ lwib mpʉnʉ nɨ ɨ? Nye ekʉ pyeh yɛɛ Zyɛm! Zé ndɨ e nkul epɛʼ bɨbaa Zyɛm lé eniʼe mʉr é lɔb mɨsyem mo mʉr waa ɛ, pie nye mʉr tɨ?» 8Yesʉs a be ó si kpahbe gʉa é sisim we tʉŋlʉ bɨjwɨʼ bé a be e bye é mɨmo si ɨ. No ó nye a lɛɛ e be ó: «Wáa mbi mosono ndɨ bɨn é mɨleme bim yiʼ mpʉʼ ɨ? 9Yé ndɨ é kunbo lé esa? Zê yé é kunbo ó, go lɛŋɨ mbʉmbʉʼ mʉr ó: “Bɨbaa bɨ ebebe byo, bi pɛʼɔ” ɛ? Zê yé é kunbo ó, go lɛŋɨ nye ó: “Mʉŋa si. Nkɛŋɨ tɔɔ go. Go à laa” ɛ? 10Sa gwar, me muno ze lɛʼle bɨn dweʼle ó, Mwan mo Mʉr ó ndɨ e nkul mojwɨ̀ʼa é si nwaʼ é l'efu ó, nye pɛʼɛ bʉr bɨbaa Zyɛm lé eniʼe é lɔb mɨsyem myɔɔ ɛ.» Nye ze lɛɛ e mbʉmbʉʼ ó: 11«Me lɛɛ e go ó: Mʉŋa. Nkɛŋɨ tɔɔ go. Go à to kwar go.»
12Cye e cye yaa, mʉr waa ntɔʼ mʉa si é bʉ, nkɛɛ tɔɔ we, ntɔʼ kœʼ, bʉr bɨbɛh lé ebee! Bʉr bɨbɛh, bé a si jehe syɛɛla yaa, ntɔʼ dwiibɨ Zyɛm. Bé ó: «Bɨna bé apa bee ga yʉʉ sɔʼɔ nwɨɨla e yi!»
Yesʉs lé ejebe Levi
(Mataos 9.9-13; Lʉkas 5.27-32)
13Pie tɨ, Yesʉs ze bâʼle to nkpah maŋ. Ntuntuma bʉr, yi pyal boo Yesʉs. Nye ze taare lé edwe be sikʉlʉ. 14É zi nye a cwɨɨ ɨ, nye ze bee Levi, mwan mo Alfe. Nye a kœb nye ó, ndindil é gumo nye a dɨ nʉa tœa ɛ. Yesʉs, nye e nye ó: «Duʼo me.» Nye ntɔʼ mʉa si, taare lé edu nye.
15É jɔʼ bé a be lé ede é mbɛr we e, buobuo onwɨa o tœa ofih, le bʉʉ bʉr ofih bé a be é bul jwɨ̂ʼlɨ e mɨsyem ɨ, bé a be nteme ó, lé ede, bé e boo nɔɔ, e l'ompʉn mo Yesʉs, ebe, bʉr bé a du nye e, bé a be ó é buo. 16Oyeʼle o motie, bé a be é nkɔm oFarizyɛŋ ɨ, mpʉ bé a bee nye lé ede fua gwar e l'osyɛl o mɨsyem ndwe e l'onwɨa o tœa ɛ, bé ntɔʼ dî e l'ompʉn be ó: «Ebe yé nye lé emɛʼle lé epuhba mobo, bé e l'onwɨa o tœa ndwe e bʉr o ndɨ é bul jwɨ̂ʼlɨ e mɨsyem ɨ?»
17Yesʉs ntɔʼ joʼo be lé elwib no. Nye ó: «Mɨnjɨh, myé ajɨ ejʉmba boo dɔbra. Mɨsyoblʉ myé ome ó lé ejɨ dʉm. Me a baaze jebe ocɨcyel o bʉr. Me a ze jebe ó osyɛl o mɨsyem.»
Eti mode
(Mataos 9.14-17; Lʉkas 5.33-39)
18Ompʉn mo Yʉanes bé e l'oFarizyɛŋ, bé a be-be ó lé eti mode. No ó bʉr, bé a ze lɛɛ e Yesʉs ó: «Ompʉn mo Yʉanes le baa o nkɔm bʉr oFarizyɛŋ, bé etil-ti mode. A, ebe yé baa bo bɛɛ ndɨ agum ka ti mode ɛ?» 19Yesʉs, nye e be ó: «É jɔʼ mbœm mʉma lé ecyel zɔɔ ɛ, zê bɨn bé lé ejwɨʼ ó, ofo mo mbœm mʉma, bé óbɛm ti mode, nye dina tɨʼ é duò zɔɔ ɛ? Tɨtoʼo! Cye yiyɛh nye dina tɨʼ é zɔɔ ɛ, bé abe e nkul eti mode. 20Yé ópyal jɔʼ ndɨ ó, mbœm mʉma óze pɛʼɔ é sama yɔɔ ɛ. É dobo laa ó bé óti mode e.
21«Peh kan edwan l'apa dubɔ é modibe, l'apa kʉʼra ɛ, yé abe lé elarɔ é l'egʉa e mbor kan. ǃƗ mʉr si lar we é l'egʉa nɛʼɛ, é jɔʼ kan waa, wé ójwɨ̀ɔ ɛ, egʉa lé a larɔ e peh kan edwan yaa ɛ, lé óbâʼle kʉ bwaʼ ó bwaʼa, laa bim lé a taare be e. 22No nteme, bé abe lé elwan modwan monwoʼ é mɨnjʉ̌m bɨntaʼ ndɨ mɨsɛa e bɨkʉr bɨ otir ɨ. ǃBé si sa no nɛʼɛ, é jɔʼ monwoʼ maa, mé ógubla ɛ, mɨnjʉm bɨntaʼ myaa, myé ódɨ tʉl, monwoʼ swɨɨ si, bɨntaʼ dwè ntuʼ. Bé elwan modwan monwoʼ ó, é bɨntaʼ ndɨ modwan ɨ.»
Sikʉlʉ é lɔb moho saba
(Mataos 12.1-8; Lʉkas 6.1-5)
23É guu moho saba, Yesʉs bé e l'ompʉn be, bé a be ó lé ecwɨɨ é bɨpeme bɨ ble. Ompʉn be, bé a be ó lé edu nye pihe. Bé ze taare lé ebuʼo mɨtu mɨ ble yaa#2.23 Bʉr oYʉden, bé a be ó, abe lé ekamle mɨngbaalaŋa lé enʉa mode é bɨpeme ndɨ nkpah mpaʼa ɛ. Kalara Zyɛm nteme a lɛɛ tina ó, njɨ bé l'abar e pa. (Deteronom 23.26) Bé a lwib ó syɛɛ ompʉn bé a sea moho saba ɛ: emwaʼ le epɛʼ bɨkʉr. Bʉr o b'a sa bɨsyɛɛ byaa ɛ, bé a be ó si ntaa motie mo saba.. 24Bʉʉ oFarizyɛŋ ntɔʼ ze dî e Yesʉs ó: «Paʼ bee: ebe yé bé lé esa sa ndɨ kɔmlʉ é moho saba ɛ?»
25Yesʉs ntɔʼ bɨha e be ó: «Bɨn bé a baasi láa mpʉ David a sa, é jɔʼ bé e l'esama le, bé a be é sɔɔlʉ mode, mɨmo zoʼo e? 26Zê bɨn bé agʉa ó, bé a si ni é l'Odia mo Zyɛm tʉŋlʉ é jɔʼ Abiatar a be njwɨɨ opara ɛ? David bana de guu paʼ bler yé a be koma é nko paʼ duu mo Zyɛm ɨ. Pie tɨ, nye ze pɛ̂ʼ bʉr o sama ye ya, mʉr peh, mʉr peh, bɨbɛh ze de. To kœb ó, yé a be ó kɔmlʉ ó, mʉr deʼ bye, alaa ó mʉr waa, nye ó para.» 27Nye ó: «Moho saba, wé a cyelɔ ó, é l'efu e mʉr. Mʉr a baakomlɔ é l'efu e moho waa. 28Ebe no, Mwan mo Mʉr ó ndɨ ejwɨ̀ʼ sa yiyɛh, dam be moho saba.»
Currently Selected:
Markus 2: ozmBad
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
