Juan 3

Nicodemopa Jesuswan rimasqanmanta

1Karqam huk fariseo Nicodemo sutiyuq runa, payqa judiokunamanta ancha reqsisqam karqa. 2Paymi tutallan hamuspan Jesusta nirqa:

Yachachikuq, yachanikum yachachiwanaykikupaq Dios kachamususqaykita, milagrokunataqa manam pipas qam hinaqa ruwayta atinmanchu, sichum mana paywan Dios kaptinqa, nispa.

3Chaymi Jesusñataq nirqa:

Cheqaptapunim niki, pipas mana musoqmanta nacespaqa manam rikunqachu Diospa munaychakusqantaqa, nispa

4Hinaptinmi Nicodemo tapurqa:

¿Imaynataq huk runa machuña kachkaspanqa musoqmanta nacemunman? ¿Icha atinmanchu mamanpa wiksanman kutiykuspa musoqmanta nacemuyta? nispa.

5Jesusñataqmi nirqa:

Cheqaptapunim niki, pipas yaku-mantawan Espiritumanta mana naceqqa Diospa munaychakuyninmanqa manam yaykunqachu. 6Aychamanta nacemuqqa aychallam, Espiritumanta nacemuqmi ichaqa espíritu. 7Amayá admirakuychu “musoqmantam nacenanku” nisqaywanqa. 8Wayraqa munasqanmantam pukumun, chaymi qaparisqanta uyarinki, ichaqa manam yachankichu maymantam hamusqanta nitaq maymanmi risqantapas. Chaynam Espiritumanta nacemuqkunapas, nispa.

9Chaymi Nicodemo huktawan tapurqa:

¿Imaynataq chaykunaqa kanman? nispa.

10Jesusñataqmi nirqa:

Qamqa Israelpi runakuna yachachiqmi kanki, ¿hinachkaspachu kaykunata mana yachanki? 11Cheqaptapunim niki, yachasqayku kaqtam rimaniku, rikusqayku kaqtataqmi willakunikupas, qamkunam ichaqa willasqaykuta mana creenkichikchu. 12Kay pachapi kaqkunamanta willachkaptiy mana creespaykichikqa, ¿imaynataq creewaqchik hanaq pachapi kaqkunamanta willaptiyqa?

13Manam pipas hanaq pachataqa rirqachu, aswanqa runapa Churillanmi, paymi hanaq pachamanta uraykamurqa. 14#Nm 21.9.Imaynam Moisespas maqta uruta broncemanta ruwaspa chunniqpi hoqarirqa, chaynam runapa Churinpas hoqarisqa kanqa. 15Chaynapi pipas paypi iñiqqa wiñay kawsayniyuqña kananpaq.

Kay pachapi runakunata Dios kuyasqanmanta

16Diosqa ancha-anchatam runakunata kuyarqa, chaymi sapallan Churinta qomurqa, pipas paypi iñiqqa mana wañunanpaq, aswanqa wiñay kawsayniyuq kananpaq. 17Diosqa manam churintaqa kay pachamanqa kachamurqa runakunata condenananpaqchu, aswanqa salvananpaqmi.

18Diospa Churinpi iñiqqa manam condenasqachu kanqa, mana iñiqmi ichaqa Diospa sapallan Churinpi mana iñisqanrayku condenasqaña kachkan. 19Condenasqaqa kachkanku, kay pachaman achkiy hamuchkaptin, tukuy mana allinkunata ruwaspanku tutayaytaraq kuyasqankuraykum. 20Mana allinkunata ruwaq runakunaqa achkiytaqa cheqninkum, mana allinkuna ruwasqankuta mana qawachikunankurayku. 21Cheqap kaqman hina kawsaqkunam ichaqa, achkiyman asuykamunku, Diospa munasqanman hina ruwasqankuta qawachikunankupaq.

Bautizaq Juanpa Jesusta hatunchasqanmanta

22Kaykunapa qepantam Jesuswan discipulonkuna Judea lawman rirqaku. Chaypi paykunawan kaspanmi bautizarqa. 23Juanpas Salim llaqtapa hichpan Enón lawpim bautizarqa, chaypi achka yaku kasqanrayku, chaymi llapa runakuna rispa bautizachikurqaku. 24#Mt 14.3; Mr 6.17; Lc 3.19-20.Chaykunaqa pasakurqa Juanta manaraq carcelachkaptinkum.

25Ichaqa Juanpa discipulonkunam wakin judiokunawan chuyanchakuymanta atipanakurqaku. 26Chaymi Juanman rispa nirqaku:

Yachachikuq, Jordán mayupa wak-lawninpi qanwan kaq runapas bautizachkanmi, hinaptinmi llapa runakuna payman richkanku. Paymantaqa allintam willakurqanki, nispanku.

27Juanñataqmi nirqa:

Runaqa manam imatapas chaskinmanchu, sichum hanaq pachapi kaq Dios mana qoptinqa. 28#Jn 1.20.Qamkunaqa uyarirqankichikmi: “Ñoqaqa manam Cristochu kani, aswanqa paypa ñawpaqninta kachamusqallanmi kani”, nisqaytaqa. 29Huk casamientopiqa noviollam noviayuqqa, noviopa ladonpi kaq amistadninñataqmi noviopa rimasqanta uyarispan kusikun. Chaynam ñoqapas kunan anchata kusikuni. 30Cristoqa aswan-aswan reqsisqam kanan, ñoqañataqmi aswan-aswan taksayanay.

31Hanaq pachamanta hamuqqa llapallankupa hawanpim kachkan; kay pachamanta kaqqa kay pachapi kaqllam, rimanpas kay pachapi kaqkunallamantam. Hanaq pachamanta hamuqmi icha-qa llapallankupa hawanpi kachkan, 32rikusqanmantawan uyarisqanmantataqmi willakunpas, ichaqa manam pipas paypa willakusqantaqa chaskinchu. 33Pipas willakusqanta chaskiqmi ichaqa Diospa rimasqanqa cheqap kasqanta willakun. 34Diospa kachamusqanqa Diospa palabrantam willakun, Diosmi paymanqa Espiritunta chaninpi mana pisisqata qon. 35#Mt 11.27; Lc 10.22.Taytaqa Churinta kuyaspanmi tukuy imatapas makinman churaykun. 36Churipi iñiqqa wiñay kawsayniyuqmi, paypi mana iñiqmi ichaqa wiñay kawsaytapas mana haypanqachu, aswanqa Diospa sinchi piñakuynintam chaskinqa, nispa.

Currently Selected:

Juan 3: RCQ12

Highlight

Copy