GENESIS 18
18
Abraham churiyoq kananpaq Diospa prometesqanmanta
1Mamre sutiyoq runapa encina sachankunapa kasqanpi rupayllaña kaptinmi Abraham karpanpa punkunpi tiyachkarqa, chaypim Tayta Dios payman rikuriykurqa. 2Abrahanmi rikururqa chimpanpi sayachkaq kimsa runakunata hinaspam chaskinanpaq karpanpa punkunmanta kallparqa chaymi qonqoranpa pampaman kumuykuspan 3nirqa:
—Taytáy, ama hina kaspayá suyaykuwayraq. 4Yakuta aparachimuptiyá chakikichikta mayllakuykuychik hinaspayá samariychik sachapa llantuyninpi. 5Mikuytayá aparamusaq mikuykuspa kallpanchakuykunaykichikpaq, chaymantañachiki pasakunkichikqa, chaychiki chayaykamuwarqankichik serviqnikichikpa kasqaymanqa —nispa.
Hinaptinmi paykunañataq nirqaku:
—Nisqaykiman hinayá ruray —nispanku.
6Chaymi Sarapa kasqan karpaman Abraham kallpaspan nirqa:
—Apurawman chapuy iskay chunka kilo harinata hinaspa ruray tortillakunata —nispa.
7Chaymi vacakunapa kasqanman Abraham kallparqa hinaspam huknin allin wira malta torota hapispan qoykurqa sirvientenman chaymi payñataq utqayllamanña nakaspa preparamurqa. 8Hinaspam quesillotawan lecheta apamurqa preparasqan malta toropa aychantawan hinaspam paykunapa ñawpaqninman churaykurqa. Abraham ladonkupi sayaykuptinmi paykuna mikurqaku sachapa llantuyninpi.
9Chaymantam Abrahamta tapurqaku:
—¿Maypitaq kachkan warmiki Sara? —nispa.
Chaymi payñataq nirqa:
—Wak karpapim —nispa.
10Chaymi Tayta Dios nirqa:
—Watamanmi kunan hinatapuni kutimusaq hinaptinmi warmiki Sarapas wawayoqña kanqa —nispa.
Sarañataqmi Abrahanpa qepanpi kaq karpapa punkunmanta uyarimuchkarqa. 11Abrahanwan Saraqa llumpay yuyaqñam karqaku. Sarapa killanpas manañam hamuqchu. 12Chaymi Saraqa sonqollanpi asikuspan nirqa:
—¿Señorniypas chaynataq ñoqapas yuyaqña kachkaspachum wawayoq kaspay kusisqa kayman? —nispa.
13Chaymi Abrahamta Tayta Dios nirqa:
—¿Imanasqataq Saraqa asikurqa “¿Cheqaptachu wachakuymanraq yuyaqña kachkaspay?” nispa? 14¿Kanmanchu ñoqapaq imapas sasa? Watamanmi kunan hinatapuni nisqay tiempopi watukamusqayki chaymi Saraqa wawayoqña kanqa —nispa.
15Chaymi Sara manchakuspan llullakurqa:
—Manam asikurqanichu —nispa.
Tayta Diosñataqmi nirqa:
—Cheqaptapunim asikurqanki —nispa.
Sodoma llaqtapa favorninpi Abraham mañakusqanmanta
16Chay runakuna chay sitiomanta rispankum qawarqaku Sodoma lawta. Abrahamñataqmi paykunata compañarqa despedikamunanpaq. 17Chaymi Tayta Dios piensarqa:
—Manam pakaymanchu Abrahanmanqa imam ruranaytaqa. 18Abrahampa castankunaqa ancha hatun nacionmi kanqa, payraykum llapallan nacionkunata bendecisaq. 19Abrahamtaqa akllarqani churinkunatapas hinaspa mirayninkunatapas kamachinanpaqmi chaynapi munasqayman hina allin kaqta ruraptinku Abrahanman nisqaykuna cumplikunanpaq —nispa.
20Chaymi Tayta Dios nirqa:
—Sodoma llaqtapi hinaspa Gomorra llaqtapi runakunapa mana allin rurasqanwan huchallikusqankum llumpayña kachkan. 21Chaynaqa rispayá qawamusaq ñoqaman niwasqankupi hinachus rurayninku kasqanmanta, chaynapim yachamusaq —nispa.
22Hinaptinmi kimsankumanta iskay runakuna chay sitiomanta rakikuykuspanku rirqaku Sodoma lawman, Abrahamñataqmi Tayta Dioswan qeparurqa. 23Chaymi payman asuykuspa Abraham tapurqa:
—¿Puchukarachinkichu allin ruraq runakunatapas mana allin runakunatawan kuskata? 24Pichqa chunka allin ruraq runakuna wak llaqtakunapi kaptinpas ¿puchukarachiwaqchu? ¿Castigawaqraqchu chay lugarta pichqa chunka allin ruraq runakuna paykunawan kachkaptinpas? 25¡Amayá chaynataqa ruraychu! ¡Amayá allin ruraq runakunataqa mana allin runakunatawanqa wañuchiychu, amayá chaynachu kachun! Tukuy kay pachapa Jueznin kachkaspaqa ¿manachum allin kaqta mana rurawaq? —nispa.
26Chaymi Tayta Dios nirqa:
—Pichqa chunka allin ruraq runakunata Sodoma llaqtapi tarispayqa paykunaraykum lliw lugarta mana castigasaqchu —nispa.
27Hinaptinmi Abraham nirqa:
—Señorniy, rimapayaykuykim mana imapaq valeq ñutu allpa hinaspa uchpa hina kachkaspaypas. 28Icha faltanpas pichqa chunkamantaqa pichqaraqpas ¿puchukarachinkichu lliw llaqtata pichqa faltasqanrayku? —nispa.
Hinaptinmi payñataq nirqa:
—Manam puchukachisaqchu tawa chunka pichqayoqllata tarispaypas —nispa.
29Chaymantam Abraham kasqallan rimapayaspa nirqa:
—Icha tawa chunkallapas kachkanku —nispa.
Hinaptinmi Tayta Diosñataq nirqa:
—Tawa chunkaraykum mana imanasaqpaschu —nispa.
30Chaymi Abrahamñataq nirqa:
—SeñornĂy, amayá piñakuychu yapamanta rimapayasqaywanqa. Ichapas kimsa chunkallapas kachkanku —nispa.
Chaymi Tayta Dios nirqa:
—Manam imanasaqpaschu kimsa chunkallata chaypi tarispaypas —nispa.
31Chaymantam Abraham nirqa:
—Señor, rimapayachkaspayqa niykusqaykiyá. Icha iskay chunkallapas kachkanku —nispa.
Chaymi Señorñataq nirqa:
—Manam puchukachisaqchu iskay chunkalla kaptinpas —nispa.
32Chaymi Abrahamñataq kasqallan nirqa:
—SeñornĂy, amayá piñakuychu kunanllañayá rimapayaykusqayki. Ichapas chaypiqa chunkallapas kachkanku —nispa.
Hinaptinmi Señorñataq nirqa:
—Manam puchukachisaqchu chunkantinrayku —nispa.
33Chaymantam Abrahanwan rimayta tukuruspan Tayta Dios pasakurqa, Abrahamñataqmi kutikurqa maymi kasqanman.
Currently Selected:
GENESIS 18: QUEAYA87
Highlight
Share
Copy
Want to have your highlights saved across all your devices? Sign up or sign in
