ÉXODO 30

Incienso ruphachina altar

(Ex 37.25-28)

1Ruwallankitaqmi acacia kurkumanta altartapas, inciensota ruphachinapaq. 2Wask'anpas anchonpas kuskan metrokaman kanqa, sayaynintaq huk metro. Esquina waqrankunaqa kikillanmantan kanqa. 3Hinamantataq patantapas, muyuriq qhatantapas, waqrankunatapas ch'uya qoriwan qatanki, muyuriq patantataq qoriwan ribetenki. 4Iskay qori argollatapas churallankitaqmi ribeteq uranpi, sapanka ladoman iskaytakama, chaykunatan wantunapaq k'aspikunaqa suskhunqa. 5Suskhuq k'aspikunataqa acacia kurkumantan ruwanki, hinaspan qoriwan k'uyunki. 6Kamachikuy simiyoq arca pata hucha pampachana cheqaspin qanwan tupasaq, chaypa ñawpaqen chimpa cortinaq huk ladonpin chay altarta churanki. 7Aaronmi sapa paqar lamparakunata allichaspa, chay altar patapi q'apaq inciensota ruphachinqa. 8Hinallataq rasphiyaykuyta lamparakunata Aarón hap'ichiqtin inciensotapas ruphachillanqataq. Chayqa ñawpaqeypi ruwakullanqapunin lliw mirayniykichiskunapipas. 9Aman chay altarpiqa wak inciensotapas, ruphachina sacrificiotapas, ruru ofrendatapas, vino hich'ana ofrendatapas haywankichu. 10Kay altarqa ñoqa Señor Diospaqpunin ch'uyay-ch'uya kanqa. Huchakuna pampachasqa kananpaq sacrificioq yawarnintan Aaronqa watapi huk kutillata waqrakunaman llusiykuspa altarta ch'uyanchanqa. Chay hinatan sapa watallapuni ruwakunqa mirayniykichiskunapipas, nispa.

Runa yupay pagana qolqe

11Señor Diosmi Moisesta nirqan:

12–Israel runakunata yupaqtiykiqa, sapanka yupasqan pay kikin mana wañunanpaq qolqeta pagawanqa, chay hinapin runa yupakushaqtin mana paykuna ukhupi wañuray kanqachu.

13Llapa yupasqan ñoqaman ofrendata qowanqa phisqa gramo qolqeta, chay phisqa gramo qolqeqa yupaychana wasipi tupunaman hina tupukunqa. 14Llapa iskay chunka watayoqmanta wichayman yupasqan, ñoqaman chay ofrendata qowanqa. 15Qankuna kikiykichis mana wañunaykichispaq ñoqaman ofrendata qowashaspaqa, manan qhapaqpas phisqa gramomanqa yapaykunqachu, manan wakchapas phisqa gramomantaqa pisiyachinqachu. 16Israel runakunamantan kikinku mana wañunankupaq qosqanku qolqeta chaskinki, hinaspa chayta Dioswan Tupana Karpapi yupaychaypaq qonki. Chaywanmi ñoqaqa Israel runakunata yuyarisaq, hinallataq kikinku mana wañunankupaq qolqe qowasqankutapas, nispa.

Bronce puruña

17Señor Diosmi Moisesta nirqan:

18–Ruwallankitaqmi maqchikunapaq bronce puruñatapas kaq broncellamantataq tiyanayoqta. Hinaspan chayta unuyoqta churanki Dioswan Tupana Karpawan kanchapi kaq altarwan tupaypi. 19Chay unuwanmi Aaronpas churinkunapas makinkuta chakinkutawan maqchikunqaku. 20Chay unullawantaqmi maqchikunqaku Karpaman haykuspankupas, haywanapaq altarman asuykuspankupas, ñoqapaq ruphachina ofrendata kananankupaqpas. Chay hinapin mana wañunqakuchu. 21Mana wañunankupaqmi makinkuta chakinkuta maqchikunqaku. Kay kamachikuy simitan Aaronpas churinkunapas mirayninkupas hunt'ashallanqakupuni, nispa.

Hawinapaq aceite

22Señor Diosmi Moisesta nirqan:

23–Sumaq q'apaqkunata akllay: Soqta kilo allinnin mirrata, kinsa kilo q'apaq canelata, kinsa kilo q'apaq cañata, 24soqta kilo casiatapas, tawa litro olivo aceitetawan, yupaychana wasipi tupunaman hina tupusqata. 25Chaykunamantan ch'uya hawina aceiteta ruwanki, hawinakunata ruwaqpa ruwasqanta hina. Chay aceiten hawina ch'uya aceiteqa kanqa. 26Chay aceitetan Dioswan Tupana Karpaman hich'aykunki, kamachikuy simiyoq arcamanpas, 27mesamanpas tukuy imaymananmanwan, candeleromanpas tukuy imaymananmanwan, incienso ruphachina altarmanpas, 28sacrificio ruphachina altarmanpas tukuy imaymananmanwan, tiyanayoq puruñamanpas. 29Chay hinatan chaykunata ch'uyanchanki, hinan ch'uyallaña kanqa. Imallapas chaykunaman tupaykuqqa Diospaq t'aqasqan kapunqa.

30Aarontapas churinkunatapas chay aceitewan hawiykuspan sacerdotey kanankupaq t'aqapuwanki. 31Israel runakunatan ninki:

Kay aceite hinan kanqa ch'uya hawina aceiteyqa llapan mirayniykichispaq. 32Aman wak runataqa hawinkichischu, aman chay ruwasqata hinapas wak aceitetaqa ruwankichischu. Chayqa ch'uyan, ch'uyatapunin chaytaqa qhawankichis. 33Pipas chay aceiteta hina ruwaqqa, otaq pi wak runatapas chaywan hawiykuqqa, llaqtanmantan wikch'usqa kanqa, nispa.

Incienso

34Señor Diosmi Moisesta nirqan:

–Sumaq q'apaqkunata chay chhikatakama huñuy:

Estacteta, ch'uruchata, galbanota, ch'uya inciensotawan. 35Hinaspan chaykunamanta kachichasqata allin chhaqrusqata Diospaq ch'uya inciensota ruwanki, hawinakunata ruwaqpa ruwasqanta hina. 36Wakintan allin ñut'uta kutanki, hinaspan chayta churanki Dioswan Tupana Karpapi kaq kamachikuy simiyoq arcaq ñawpaqenpi, maypichus qanwan tupasaq chaypi. Chay inciensotaqa ch'uyallatañan qhawankichis. 37Chay ruwasqayki inciensota hinaqa aman waktaqa chay kikillanta ruwakunkichischu. Chayqa ñoqaqmi, qanpaqtaq ch'uya kanqa. 38Pipas q'apachikunanpaq chay hinata ruwanqa chayqa, llaqtanmantan wikch'usqa kanqa, nispa.

Currently Selected:

ÉXODO 30: QUECUZ

Highlight

Copy