ÉXODO 5
5
Moiseswan Aaronwan rey Faraonta rimapayasqanku
1Chaymantataq Moiseswan Aaronwan rey Faraonpa ñawpaqenman haykurqanku, hinaspan payta nirqanku:
–Israelpa Diosnin Señormi nin, llaqtayta kachariy ripunanpaq, ch'inneqpi fiestata ruwapuwanankupaq, nispa. 2Rey Faraontaq kutichirqan:
–¿Pitaq chay Señor Diosri, siminta kasunaypaq, Israel runakunata kacharinaypaqpas? Manan Señor Diostaqa reqsinichu, manataqmi Israel runakunatapas kacharisaqchu, nispa.
3Paykunataq nirqanku:
–Hebreo runakunaq Diosninmi rikhurimuwarqanku, chaymi valekuykiku ch'inneqta kinsa p'unchay puriyta rinaykupaq, hinaspa Señor Diosniykuman sacrificiokunata haywamusaqku, paqtan wañuchiwankuman onqoywanpas espadawanpas, nispa.
4Hinan Egipto suyu reyqa nirqan:
–Yaw, Moisés, yaw, Aarón, ¿imaraykutaq runakunaq llank'ananta sayachinkichis? Kutiychis llank'anaykichisman. 5Chay Israel runakunaqa askhallañan, ¿qankunachu llank'anankuta sayachiwaqchis? nispa.
6Chay p'unchaypachan rey Faraonqa kamachirqan mit'ani oficialkunata hinallataq capatazninkutapas: 7–Amañan kunanmantaqa runakunaman pajata qonkichischu adobeta ruwanankupaq. ¡Paykuna rispa pajata pallakamuchunku! 8Hayk'atachus kunankama ruwashanku chay chhikallatapuni adobeta ruwanankupaq kamachinkichis. ¡Amataq huk adobellatapas pisiyachinkichischu! Qella kaspan rimashanku: ¡Haku sacrificiokunata Diosninchisman haywamusunchis! nispanku. 9Astawan paykunata llank'achiychis, ahinapin tukuy tiempo llank'ashaspa llulla simikunata mana kasunqakuchu, nispa.
10Mit'ani oficialkunataq capatazninkupiwan runakunata nirqanku:
–Kay hinatan rey Faraonqa kamachikun: Manan pajata qosqaykichischu. 11Qankunan rispaykichis pajataqa maymantapas pallamunkichis, manataqmi llank'anaykichisqa ima chhikallanpas pisiyanqachu, nispa.
12Chaymi Israel runakunaqa Egipto suyuntinman ch'eqeykurqanku pajaq rantinpi rastrojota pallamunankupaq. 13Mit'ani oficialkunataq paykunata qatirqan:
–Paja churasqa hayk'atachus sapa p'unchay adoberqankichis chay chhikallatataqmi adobenkichis, nispa.
14Rey Faraonpa mit'ani oficialninkunan Israel runa capatazkunata churasqaku, chay oficialkunan capatazkunata waqtarqanku:
–¿Imanaqtintaq adobe ruwayta mana tukuchinkichischu, qayna p'unchaypas kunan p'unchaypas ñawpaq hina? nispanku.
15Chaymi Israel runa capatazkunaqa rey Faraonman uyarichikuq rispa nirqanku:
–¿Imanaqtinmi kamachiykikunata kay hinata ruwawankiku? 16Manan kamachiykikunaman pajata qowankuchu, chaywanpas: Adobeychis, niwankuraqtaq. Chaymantapas waqtawankuraqtaq. ¡Oficialniykikunaqa mana allintan ruwashanku! nispanku.
17Rey Faraontaq nirqan:
–Qankunaqa qellan kankichis, arí, aysarayashankichismi, chaymi ninkichis: Haku sacrificiokunata Señor Diosman haywamusunchis, nispaykichis. 18Lloqsiychis, llank'amuychis. Manan pajataqa qosunkichischu, hayk'atachus adoberqankichis chay chhikallatapunin ruwankichis, nispa.
19Hinaqtinmi Israel runa capatazkunaqa llakipi rikukurqanku, paykunata: Manan sapa p'unchay adobenaykichis ima chhikallanpas pisiyachisqachu kanqa, nispa kamachiqtin. 20Moiseswan Aaronwantaq hawapi suyasharqanku, hinan capatazkunaqa rey Faraonpa qayllanmanta lloqsimuspanku, 21paykunata nirqanku:
–Señor Diosmi kayta rikuspa huchachasunkichis, rey Faraonwanmi oficialninkunapiwan cheqnichiwankiku, qankuna hawan wañuchisqapas kasaqku, nispa.
Moisespa mañakusqan
22Chaymi Moisesqa Señor Diosman qayllaykuspa nirqan:
–Señornilláy, ¿imanaqtinmi kay llaqtaykita ñak'arichinki? ¿Imapaqmi kachawarqanki? 23Sutiykipi rimapayanaypaq rey Faraonman risqaymantapachan kay llaqtaykita aswanta muchuchishan, qantaq kay llaqtaykita mana kacharichinkichu, nispa.
Currently Selected:
ÉXODO 5: QUECUZ
Highlight
Share
Copy
Want to have your highlights saved across all your devices? Sign up or sign in
Revised Quechua Cuzco Bible © Peruvian Bible Society, 2004.
