GÉNESIS 26

Isaacpa Gerarta risqan

1Chay hallp'apin yarqay karqan, Abrahampa tiemponpi kasqanmantaña, chaymi Isaacqa rirqan Filistea runakunaq reynin Gerar llaqtapi kaq Abimelecman. 2Chaypin Señor Diosqa Isaacman rikhurispa nirqan: –Ama Egiptoman uraykuychu, qanta nisqayki chay hallp'api tiyakuy. 3Kay hallp'apiqa tiyakullay, qanwanmi kashani, saminchasqaykin, qanmanmi mirayniykimanwan kay llapan hallp'ata qosqayki. Abraham taytaykiman prometesqaytaqa hunt'asaqmi. 4Hanaq pacha ch'askakunata hinan mirayniykita askhayachisaq, hinaspan kay llapan hallp'ata paykunaman qosaq. Lliw kay pachapi suyukunataq mirayniykiwan saminchasqa kanqaku, 5simiyta Abrahampa kasukusqanrayku, simiyta llapa kamachikusqaykunatawan hunt'asqanraykupiwan, nispa.

6Gerar llaqtapin Isaacqa tiyarqan. 7Chaypi tiyaq runakunan payta tapurqanku warminmanta, hinan payqa kutichirqan:

–Panaymi, nispa. Manchakurqanmi “warmiymi” niyta. Sonqonpin yuyaykurqan: Paqtan chaypi tiyaq runakuna Rebecarayku wañuchiwankuman, nispa. Rebecaqa sumaq rikch'ayniyoqmi karqan.

8Unayña pay chaypi kashaqtintaq, Filistea runakunaq reynin Abimelecqa ventanamanta qhawaspa Isaacta rikurqorqan warmin Rebecata munakushaqta. 9Hinaspanmi Abimelecqa Isaacta waqyaspa, nirqan:

–¡Yaw, payqa warmiykimá kasqa! ¿Imanaqtintaq nirqanki: Panaymi, nispa?

Hinan Isaacqa kutichirqan:

–Chaytaqa nirqani: Paqtan payrayku wañuchiwankuman, nispan.

10Chaymi Abimelecqa nirqan:

–¿Imaraykun chayta ruwawankiku? Hinachu mayqen runapas warmiykiwan puñunman karqan, ahinapi huchallichiwankikuman karqan, nispa.

11Hinan Abimelecqa llapa runakunata kamachirqan:

–Pipas chay qharita otaq warmintapas tupaykunqa chayqa, wañunqapunin, nispa.

12Chay hallp'apin Isaacqa tarpurqan, hinan chay wata askhallataña cosecharqan, Señor Dios payta saminchasqanrayku. 13Qhapaqyasharqanmi allinyasharqanmi ancha atiyniyoq kapunankama. 14Karqanmi oveja t'aqanpas, waka t'aqanpas, hinallataq askha llank'aqninkunapas, chaymi Filistea runakunaqa payta envidiakurqanku. 15Taytan Abrahampa tiemponpin taytanpa kamachinkunaqa p'uytukunata t'oqosqaku, chaykunatan Filistea runakuna wisq'arqapusqaku, hallp'awan hunt'arqachispanku. 16Hinan Abimelecqa Isaacta nirqan:

–Ripuy kaymanta, ñoqaykumanta aswan atiyniyoqmi kashanki, nispa.

17Chaymi Isaacqa chaymanta ripurqan, hinaspan Gerar wayq'opi karpakuspa chaypi tiyarqan. 18Hinaspanmi Isaacqa wakmanta hasp'irqan taytan Abrahampa tiemponpi hasp'ichisqan chay unu p'uytukunata, chaykunatan Abrahampa wañukapusqan qhepata Filistea runakuna wisq'apusqaku. Hinan Isaacqa chay p'uytukunata suticharqan taytanpa sutichasqan sutiwan. 19Isaacpa kamachinkunan wayq'opi p'uytuta t'oqorqanku, phullpuq unuta chaypi tariqtinkutaq, 20Gerarpi michiqkunaqa ch'aqwarqanku Isaacpa michiqninkunawan: Ñoqaykuqmi kay unuqa, nispa. Chaymi Isaacqa p'uytuta suticharqan “Ch'aqway” sutiwan, paywan huchatarisqankurayku. 21Hinan huk p'uytuta t'oqorqanku, chay hawapas ch'aqwallarqankutaq, chaymi suticharqan “Cheqninakuy” sutiwan.

22Hinaqtinmi chaymanta t'aqakurqanku, hinaspa wak p'uytuta t'oqorqanku, manataq chay p'uytu hawaqa ch'aqwarqankuchu, hinan suticharqan “Kachariy” sutiwan. Hinaspan nirqan: –Kunanqa Señor Diosmi kacharichiwanchis, kaypi allin kananchispaq, nispa.

23Chaymantataq Beersebaman wicharqan. 24Chay tutapin Señor Diosqa payman rikhurispa nirqan:

–Ñoqan kani Abraham taytaykiq Diosnin,

ama manchakuychu, ñoqan qanwan kashani,

saminchasqaykin, mirayniykitan askhayachisaq

kamachiy Abrahamta munakusqayrayku, nispa.

25Hinan Isaacqa chaypi huk altarta perqaspa Señor Diosmanta mañakurqan, karpantapas chaypi sayarichirqan. Paypa kamachinkunataq chaypi huk p'uytuta t'oqorqanku.

26Huk p'unchaymi Abimelecqa Gerar llaqtamanta payman hamurqan, yuyaychaqnin Ahuzatpiwan, ejercitonpa umallin Ficolpiwan. 27Hinan Isaacqa paykunata nirqan:

–¿Imamanmi hamuwankichis? Cheqnikuwarqankichismi, qankuna ukhumantapas wikch'umuwarqankichismi, nispa.

28Paykunataq kutichirqanku:

–Rikuykun qanwan Señor Dios kashasqanta, hinaspan yuyaykuyku qanwan rimanakuyta. Chay rimanakuytaq kay hina kanqa: 29Aman ima mana allintapas ruwawankikuchu, ñoqaykupas manan imanarqaykikupaschu, aswanpas allillantapunin ruwapurqaykiku, hinaspan allinpi kachampurqaykiku, kunanqa Señor Diosmi saminchashasunki, nispa.

30Hinan Isaacqa paykunapaq hatun mikhunata wayk'uchirqan, hinaspan mikhurqanku ukyarqanku. 31Pacha illarimuytataq hatarispanku jurachinakurqanku, hinaspanmi Isaacqa paykunata kacharparipurqan, paykunapas allinpi ripurqanku.

32Chay kikin p'unchaymi Isaacpa kamachinkunaqa hamurqanku, hinaspan t'oqosqanku p'uytumanta payman willarqanku:

–Unutan tarimuyku, nispa. 33Chaymi chay p'uytuta “Juramentota” suticharqan, chayraykun chay llaqtaq sutinqa chaymantapacha Beerseba nisqa kapurqan.

34Esauqa tawa chunka watayoqña kashaspan casarakurqan Het runa Beeriq ususin Juditwan, Het runa Elonpa ususin Basematwan ima. 35Chaymi Isaacpaqpas Rebecapaqpas chay warmikuna uma nanay karqanku.

Currently Selected:

GÉNESIS 26: QUECUZ

Highlight

Copy