GÉNESIS 24
24
Abrahampa Isaacpaq warmita maskhachimusqan
1Abrahamtaq yuyaqña kapurqan, unayniyoq runaña, Señor Diosmi Abrahamta tukuypi saminchasqa. 2Abrahammi aswan machukaq kamachin mayordomota waqyaspa nirqan:
—Kunanqa makiykita phakay ukhuman churaykuy, 3hinaspa jurapuway hanaq pacha kay pacha Dios Señorpa sutinpi Canaán warmikunamantaqa ama churiypaq warmita pusamunaykipaq, paykuna ukhupin ñoqa tiyani. 4Aswanpas rinki hallp'ayta aylluypata, hinaspan churiy Isaacpaq warmita pusamunki, nispa.
5Kamachitaq payman kutichirqan:
—Warmiqa manapaschá kayman pusachikamuyta munanqachu. ¿Kutichipusaqchu churiykita lloqsimusqayki hallp'aman? nispa.
6Hinan Abrahamqa payta nirqan:
—¡Amapuni churiytaqa haqayman pusankichu! 7Hanaq pacha Dios Señormi taytaypa wasinmanta aylluypa hallp'anmantapas pusamuwarqan, hinaspa juramentowan prometewarqan: Mirayniykimanmi kay hallp'ata qosaq, nispa. Paymi ñawpaqeykita angelninta kachanqa, churiypaq warmita haqaymanta pusamunaykipaq. 8Warmitaqchus kayman mana pusachikamuyta munanqachu chayqa, manan huchaykiñachu kanqa jurapuwasqaykimanta, churillayta amaqa haqayman pusaychu, nispa.
9Hinaqtinmi kamachiqa patronnin Abrahampa phakan ukhuman makinta churaykurqan, hinaspan chayta hunt'ananpaq jurarqan. 10Hinaspataq kamachiqa patronninpa camellonkunamanta chunka camellota akllarqan, patronninpa may sumaq kaqninkunata aparikuspataq puririrqan. Chaymantataq Mesopotamiapi kaq Nakorpa llaqtanman chayarqan.
11Camellokunatan samarichirqan llaqta hawapi, unu p'uytu qayllapi, warmikunaq unuman lloqsimunan rasphiyaykuy horasta. 12Hinaspan mañakurqan:
—Señor Diosnilláy, patronniy Abrahampa Diosnin, rogakuykin kunan allinta tupaykuchiway, patronniy Abrahamtataq khuyapayay. 13Kayqa unu p'uytu patapin kashani, kay llaqta sipaskunataq unuman lloqsimunqaku. 14Kay hinayá kachun, mayqen sipastachus ñoqa nisaq:
Ama hinachu kay, p'uyñuykita uraykachikuy ukyaykunaypaq, nispay, hinataq pay niwanqa:
—Ukyaykuy, camelloykikunamanpas ukyachillasaqtaq, nispan chayqa, chay kachun kamachiyki Isaacpaq akllapusqayki. Hinan chaypi yachasaq patronniyta khuyapayasqaykita, nispa.
15Pay manaraq rimayta tukushaqtintaq, Rebeca rikhurimurqan, Abrahampa wawqen Nakorpa warmin Milkaq churin Betuelpa ususin, paymi lloqsimurqan rikran patapi p'uyñuntin. 16Sipastaq ancha sumaq rikch'ayniyoq doncella karqan, qharita manaraq reqsiq. Paymi p'uytuman uraykamurqan, hinaspan p'uyñuman hunt'aykachispa kutipusharqan. 17Hinan kamachiqa payneqman phawarispa nirqan:
—Valekuyki as chhikallanta p'uyñuykimanta ukyarichiwanaykita, nispa.
18Chaymi payqa kutichirqan:
—Ukyaykuy, wiraqocháy, nispa. Hinaspan p'uyñunta usqhaylla uraykachikuspa payman ukyachirqan. 19Payta ukyachisqanmantataq, nirqan:
—Unuta wisillasaqtaq camelloykikunapaqpas, saksanankukama ukyanankupaq, nispa.
20Hinaspanmi usqhaylla p'uyñumanta uywa ukyanaman hich'aykurqan, phawarillarqantaq huktawan p'uytuman unuta wisimunanpaq, hinaspan llapa camellokunapaq wisimurqan. 21Chay qharitaq ch'inlla payta qhawasharqan. Señor Diosqa purisqanta qhawarisqachus icha manachus chayta yachananpaq. 22Camellokuna ukyayta tukuqtintaq, qhariqa sipasman qorqan senqanpaq ancha chaniyoq qori areteta, phatu iskay qori chipanatawan#Chipana otaq brazalete.. 23Hinaspanmi nirqan:
—Willaykuway, ¿piqpa ususintaq kanki? ¿Taytaykiq wasinpi kanmanchu campo qorpachakunaykupaq? nispa.
24Paytaq kutichirqan:
—Milkaq churin Betuelpa ususinmi kani, paytan Milka Nakorpaq wachakurqan. 25Kashanmi wasiykupi pajapas askha q'achupas, qorpachakunapaq campopas, nispa.
26Hinaqtinmi chay qhariqa k'umuykurqan, hinaspa Señor Diosta yupaychaspa 27nirqan: Patronniy Abrahampa Diosnin Señor saminchasqa kachun, patronniytan khuyapayarqanki, hunt'aq kayniykitapas reqsichirqanki, patronniypa wawqenkunaq wasinmanmi cheqanta pusamuwanki, nispa.
28Hinan sipasqa phawaspa chaykunata mamanpa wasinpi willakurqan. 29-30Rebecaqmi karqan huk turan Labán sutiyoq, paymi pananpi areteta makinpitaq chipanakunata rikuspa, hinallataq: Chay hinatan chay qhari rimapayawan, nispa, niqta uyarispa ima, chay qhariman phawarirqan p'uytu qayllata. Payta camellokunaq kasqanpi p'uytu qayllapi sayashaqta rikuspataq 31nirqan:
—Hamuy Señor Diospa saminchasqan, ¿imanaqtintaq hawapi kashanki? Wasitapas allichamuniñan, hinallataq camellokunapaq kanchatapas, nispa.
32Hinan chay qhariqa wasiman haykurqan, Labantaq camellokunata paskaspa qararqan pajata q'achuta, hinallataq unutapas payman hamuysiq runakunamanwan qorqan chakinkuta mayllikunankupaq.
33Hinamantataq payman mikhunata haywarqanku, paytaq ichaqa nirqan:
—Manan mikhusaqchu imamanchus hamusqayta ninaykama, nispa.
Labantaq payta nirqan:
—Rimariy, nispa.
34Hinaqtinmi nirqan:
—Ñoqaqa Abrahampa kamachinmi kani. 35Patronniytan Señor Diosqa anchatapuni samincharqan, chaymi payqa hatunchasqa. Paymanmi qorqan ovejakunata, wakakunata, qolqeta, qorita, qhari kamachikunata, warmi kamachikunata, camellokunata, asnokunata ima. 36Patronniypa warmin Sara yuyaq-kayninpiña huk qhari wawata patronniypaq wachakurqan, paymi churinman qopurqan hayk'an kaqninta. 37Patronniytaq jurachiwarqan: Aman churiypaqqa warmita pusamunkichu Canaán warmikunamanta, paykunaq hallp'anpin tiyani. 38Aswanpas rinki taytaypa wasinta aylluypata churiypaq warmita pusamunaykipaq, nispa. 39Ñoqataq nirqani: Manapaschá warmiqa pusachikamuwanqachu, nispa. 40Hinaqtinmi payqa niwarqan: Señor Diospa munayninman hinan kawsarqani, paymi angelninwan pusachisunki, purisqaykitapas qhawarinqa. Hinaspan churiypaq warmita pusamunki aylluymanta taytaypa wasinmanta, 41hinan jurapuwasqaykimanta mana huchayoqñachu kanki. Aylluyman chayaqtiykitaqchus warmita mana qomusunkikuchu chayqa, manan huchayoqñachu kanki jurapuwasqaykimanta, nispa.
42-43Kunanmi p'uytuman chayarqani, hinaspa nirqani: Señor, patronniy Abrahampa Diosnin, kayqa unu p'uytu patapin kashani, kunan purisqayta qan qhawarinki chayqa, kay hinayá kachun, mayqen sipaschus unuman lloqsimunqa, payta nisaq: Ama hinachu kay, p'uyñuykimanta as chhikallanta ukyarichiway, nispay, 44hinataq pay niwanqa: Ukyaykuy, camelloykikunapaqpas unuta wisisaq, nispan chayqa, chay kachun patronniypa churinpaq akllapusqayki warmi, nispa. 45Hinan sonqoypi rimayta manaraq tukushaqtiy, Rebecaqa rikran patapi unu p'uyñuntin lloqsimurqan, hinaspan p'uytuman uraykuspa unuta wisimurqan, chaymi payta nirqani: Valekuykin, ukyarichiway, nispa. 46Hinaqtinmi p'uyñunta rikran patamanta uraykachikuspa nirqan: Ukyaykuy, camelloykikunatapas ukyachillasaqtaq, nispa. Chaymi ukyarqani, camelloykunamanpas ukyachillarqantaq. 47Hinan payta tapurqani: ¿Piqpa ususintaq kanki? nispa. Chaymi payqa kutichiwarqan: Nakorpa churin Betuelpa ususinmi kani, Nakorpaqmi Milka wachakurqan, nispa. Hinaqtinmi senqanman huk areteta churarqani, chipanakunatapas makinman. 48Hinaspanmi k'umuykukuspay Señor Diosta yupaycharqani, saminchallarqanitaq patronniy Abrahampa Diosnin Señorta, cheqanta pusamuwasqanmanta patronniypa wawqenpa ususinta churinpaq pusanaypaq. 49Kunanqa, patronniyta khuyapayankichis chayqa, hunt'aqtaq kankichis chayqa, sut'inchawaychis, mana hina kaqtinpas, sut'inchawaychis. Hinan ima ruwaytapas yachasaq, nispa.
50Hinaqtinmi Labanpas Betuelpas kutichirqanku:
—Señor Diospa munayninmi kayqa, manan ima nispapas niykikumanchu. 51Kayqa ñawpaqeykipi Rebeca, pusarikuy, patronniykiq churinpa warmintaq kachun, Señor Diospa nisqanman hina, nispa.
52Chaymi Abrahampa kamachinqa siminkunata uyarispa hina, Señor Diosman pampakama k'umuykukurqan. 53Hinaspanmi horqomurqan qori qolqe illakunata#illa otaq alhaja., p'achakunata ima, hinaspan Rebecaman qorqan. Turanmanpas mamanmanpas qollarqantaq ancha chaniyoqkunata. 54Chaymantan paypas paywan hamuq qharikunapas mikhurqanku ukyarqanku puñurqanku. Tutamanta hatarispataq, nirqan:
—Patronniyman kachapuwaychis, nispa.
55Hinaqtinmi turanpas mamanpas kutichirqan:
—Sipasqa chunka p'unchayllapas ñoqaykuwan karichunraq, chaymantaqa rinqan, nispa.
56Chaymi paykunata nirqan:
—Ama hark'awaychischu, Señor Diosmi riki allinta pusamuwan, kachapuwaychis patronniyman ripunaypaq, nispa.
57Hinan paykunaqa kutichirqanku:
—Waqyasaqku sipasta, hinaspa tapusaqku, nispa.
58Hinaspan Rebecata waqyaspa nirqanku:
—¿Riwaqchu kay qhariwan? nispa.
Paytaq kutichirqan:
—Arí, risaqmi, nispa.
59Chaymi mana hark'arqankuchu pananku Rebecaq rinanta, uywaqenpa, Abrahampa kamachinpa, runankunaq rinantapas. 60Hinaspan Rebecata samincharqanku:
Panayku, waranqa-waranqaq maman kay, mirayniykitaq awqankunata atipachun, nispa.
61Chaymantan Rebecaqa sipasninkunantin sayarispa camellokunaman sillakurqanku, hinaspan chay runaq qhepanta rirqanku. Chay hinatan kamachiqa Rebecata pusarikuspa ripurqan.
62Isaactaq hamusqa Rikuwaqniy-Kawsaq P'uytu nisqa qayllaman, payqa Neguev ch'inneqpin tiyarqan. 63Isaacmi ch'isiyaykuyta campota lloqsisqa purikuq, qhawarispataq rikurqan camellokuna hamushaqta. 64Rebecapas qhawarillarqantaq, hinan rikurqan Isaacta, hinaspan camellomanta uraykuspa 65kamachita tapurqan:
—¿Pitaq haqay qhari ñoqanchisman campota hamuqri? nispa.
Kamachitaq nirqan:
—Paymi patronniyqa, nispa.
Hinaqtinmi payqa qatata hap'ispa uyanta qataykukurqan.
66Kamachitaq Isaacman willarqan lliw ima hayk'a ruwasqanta. 67Isaactaq Rebecata pusaykurqan maman Saraq karpanman, hinaspan Rebecawan casarakurqan. Isaacmi Rebecata munakurqan, hinaspan sonqochakurqan mamanpa wañukapusqan qhepata.
Currently Selected:
GÉNESIS 24: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
