GÉNESIS 6
6
Runakunaq waqllipusqan
1Kay pachapi mirayta runa qallariqtintaq, paykunapaq warmi wawakuna nacerqan. 2Hinan Diospa wawankunaqa runakunaq ususinkunata sumaq rikch'ayniyoq kasqanta qhawarispa, lliwmanta akllarikuspa, pi munasqankuwan casarakurqanku. 3Señor Diostaq nirqan:
—Espirituyqa manan wiñaypaqchu runapi kashanqa, payqa wañuq runallan, cheqaqpunin runaqa aychalla. P'unchayninkunaqa pachak iskay chunkayoq watalla kachun, nispa.
4Diospa wawankuna runakunaq ususinkunawan tiyaspanku, qhari wawakunata churiyarqanku. Hinan chay tiempopipas qhepamanpas kay pachapi hatuchachaq runakuna karqan. Chaykunan ñawpaqmantapacha karqanku kallpasapa mentasqa qharikuna.
5Señor Diostaq rikurqan kay pachapi runakunaq sinchi mana allin kasqanta, sonqonkuq lliw yuyaykuyninpas mana allillanpuni kasqantawan. 6Hinan Señorqa pesapakurqan kay pachapi runata ruwasqanmanta, sonqonpipas mayta llakikurqan. 7Chaymi Señor Diosqa nirqan:
—Kay pachapi runa kamasqayta ch'usaqyachisaq, runatapas uywatapas suchuq animaltapas phalaq animalkunatapas, chaykunata ruwasqaymantan pesapakuni, nispa.
8Noetaq ichaqa Señor Diospa khuyapayasqan karqan.
Noepa tuyuq wasita ruwasqan
9Kaymi Noemanta willakuykuna: Noeqa karqan chanin qharin, wiñay-masinkuna ukhupi allin kawsaq, payqa Diospa munayninta ruwaspallapunin kawsarqan.
10Noepa churinkunan kinsa karqan: Sem, Kam, Jafetpiwan.
11Runakunaqa Diospa qayllanpin waqllipurqanku, kay pachantinpitaq lliw mana chanin-kaypas q'oñirirqan. 12Diosmi kay pachata qhawarimurqan, hinan waqllisqa kasharqan, lliw runan kay pachapi puriyninpi waqllipusqa. 13Chaymi Noeta nirqan:
—Llapan kawsaqtan p'uchukachipusaq, paykuna hawa kay pacha mana chanin-kaywan hunt'a kashasqanrayku, kunantaq kay pachatawan kuskata paykunata p'uchukachipusaq. 14Ciprés sach'a kurkumanta tuyuq wasita ruway, chaypi wasikunata ruway, ukhuntawan hawantawantaq breawan llut'anki. 15Kay hinatan chayta ruwanki: wask'anta pachak kinsa chunka phisqayoq metrota, anchonta iskay chunka iskayniyoq metro kuskanta, sayaynintataq chunka kinsayoq metro kuskanta. 16Tuyuq wasitan ruwanki kinsa pata altosniyoqta, chaytan qatanki, qempunpi huk kuskan metro sayay kicharayaqta chayta tukunki, punkuntataq ladonpi churanki. 17Ñoqataq kay pachata unuwan millp'uchisaq, kay pachapi hayk'an kawsaqta p'uchukachinaypaq, hayk'an kay pachapi kaqmi wañuranqa. 18Ñoqataq qanwan rimanakusaq, qanmi tuyuq wasiman haykunki warmiykiwan, hinallataq churiykikunapas warmintinkama qanwan kuska haykunqa. 19Hayk'an kawsaqmantataq sapanka t'aqamanta chinantin orqontintakama chayman haykuchinki, qanwan kawsanankupaq. 20Phalaq animalkunamanta t'aqanman hina, uywakunamanta t'aqanman hina, pampanta lliw suchuqkunamanta t'aqanman hina, sapanka t'aqamanta iskaykama qanwan haykunqaku kawsanankupaq. 21Hinallataq imaymana niraq mikhunatapas huñuy, hinaspa apaykuy qanpas animalkunapas chayta mikhunaykichispaq, nispa.
22Noetaq Diospa tukuy kamachisqanman hina ruwarqan.
Currently Selected:
GÉNESIS 6: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
