LUCAS 21

Wakcha viudaq ofrendata churasqan

(Mr 12.41-44)

1Jesusmi qhapaqkunata Dios yupaychana wasipi alcanciaman qolqeta churaykushaqta rikusharqan. 2Huk wakcha viudatapas rikullarqantaq, chayman iskay qolqechata churaykushaqta. 3Chaymi Jesusqa nirqan: —Cheqaqtan niykichis, kay wakcha viudan llapankumanta astawanqa churaykun. 4Llapanmi qhapaq kashaspa mana munasqallanta Diospaq ofrendata churaykunku, viudataq ichaqa wakcha kayninpi tukuy kawsananpaq kaqta llapanta churaykun, nispa.

Dios yupaychana wasiq thunikunanmanta

(Mt 24.1-2; Mr 13.1-2)

5Dios yupaychana wasiq sumaq ruminkunamanta qokuykunawan sumaqchasqa kasqanmantawan wakinkuna rimashaqtintaq Jesusqa nirqan: 6—P'unchaykunan chayamunqa, kay qhawasqaykichiskunaqa lliwmi thunisqa kanqa, rumi patapi huk rumillapas manan qhepanqachu, nispa.

P'uchukay qaylla señalkuna

(Mt 24.3-14; Mr 13.3-13)

7Paytataq tapurqanku: —Yachachikuq, ¿hayk'aqmi kay nisqaykiqa kanqa? ¿Ima señaltaq kanqa llapan kaykuna hunt'akunan kashaqtinri? nispanku.

8Chaymi Jesusqa nirqan: —Cuidakuychis, paqtataq pantachisqa kawaqchis, askhan sutiywan sutichakuspa hamunqaku: Ñoqan Diospa Akllasqan Cristoqa kani, p'uchukay tiempopas sispaykamushanñan, nispanku. Chay hinaqa, aman paykunaq qhepanta rinkichischu. 9Awqa-tinkuykunamanta, ch'aqwaykunamanta rimayta uyarispaykichisqa aman mancharikunkichischu, chaykunaraqmi ñawpaqtaqa kanan, ichaqa manan p'uchukayraqchu kanqa, nispa.

10Jesusqa nillarqantaqmi: —Llaqtakunan huk llaqtakunawan maqanakunqaku, huk suyun hukkaq suyuwan maqanakunqa, 11kanqataqmi sinchita pacha chhaphchiykuna, kayneqpi chayneqpi yarqaykuna, onqoykuna ima, hanaq pachapipas mancharikuy hatun señalkunan kanqa.

12Ichaqa tukuy chaykuna ñawpaqtaraqmi runakunaqa hap'isunkichis qatiykachasunkichis, Diosmanta yachachina wasikunaman, carcelkunaman aysasunkichis. Ñoqaraykun reykunaq, kamachikuqkunaq ñawpaqenman apasqa kankichis. 13Ahinapin ñoqamanta paykunaman willankichis. 14Chay hinaqa, ama sonqoykichispi ñawpaqmanta yuyaykunkichischu imatachus kutichikunaykichista, 15ñoqan yachachisqaykichis yachaywan rimanaykichispaq, chaymi llapa awqaykichiskunaqa mana atipaytapas kutichiytapas atisunkichischu. 16Ichaqa tayta-mamaykichis, wawqeykichiskuna, aylluykichiskuna, reqsinakuq-masiykichiskuna kamachikuqkunaman hap'iykachisunkichis, wakinniykichistataqmi wañuchisunkichis. 17Ñoqaraykun tukuypa cheqnisqan kankichis. 18Ichaqa chukchaykichispas manan hukllapas chinkanqachu. 19Qaqata sayasqaykichiswanmi kawsankichis.

Jerusalén llaqtata soldadokunaq muyuykunanmanta

(Mt 24.15-21; Mr 13.14-19)

20Jerusalén llaqtata askha soldadokunaq muyuykusqanta rikuspaykichisqa thunikuynin chayamusqanta yachaychis. 21Chaypacha Judea provinciapi kashaqkunaqa orqokunaman ayqechunku, Jerusalén ukhupi kashaqkunataq hawaman lloqsichunku, chakrakunapi kashaqkunapas amaña llaqtamanqa haykuchunkuchu. 22Chay p'unchaykunapin Diosqa llaqtanta muchuchinqa, paypa nisqan qelqasqakuna lliw hunt'akunanpaq. 23¡Ay, chay p'unchaykunapi wiksallikuqkunamanta! ¡Ay wawata ñuñuqkunamantapas! Kay pachapin manchay ñak'ariy kanqa, kay llaqtapaqpas manchay phiñakuy kanqa. 24Wakintan soldadokuna espadawan wañuchinqaku, wakintataq llapa suyukunaman presota apanqaku, Jerusalén llaqtatapas wak suyu runakunan munaychakunqaku, wak suyu runakunaq kamachikunan tiempon hunt'akunankama, nispa.

Diospa Kachamusqan Runaq kutimunanmanta

(Mt 24.29-31; Mr 13.24-27)

25Jesusqa nillarqantaqmi: —Señalkunan intipi, killapi, ch'askakunapipas kanqa, kay pachapitaq suyukuna manchay llakikuypi rikukunqaku, mancharikunqakutaqmi mama qochaq qaparisqanwan phoqchiqesqanwan. 26Kay teqsimuyuntinman hamunan kaqkunata yuyaspan runakunaqa mancharisqa musphanqaku. Cielopi kaq ch'askakunaqa chhaphchisqan kanqa. 27Chaypachan Diospa Kachamusqan Runata*f** rikuwanqaku, hatun atiywan lliphlli-kaywan phuyupi hamushaqta. 28Chaykuna sucedeqtinqa makillaña qhawapakushaychis, Diospa kacharichinasuykichis tiempon chayamushanña, nispa.

Higos sach'amanta rikch'anachiy simi

(Mt 24.32-35; Mr 13.28-31)

29Huk rikch'anachiy simitapas Jesusqa nillarqantaqmi: —Qhawariychis higos sach'ata, mayqen sach'atapas. 30Raphichakushaqtaña rikuspaykichismi poqoy tiempo sispaykamusqanta reparankichis. 31Ahinallataq qankunapas, kaykuna hunt'akusqanta rikuspaykichisqa Diospa kamachikunan qayllaykamushasqanta yachankichis.

32Cheqaqtan niykichis, manan kay mirayqa tukukunqachu lliw chaykuna hunt'akunankama. 33Hanaq pachapas kay pachapas tukukunqan, simiykunan ichaqa mana tukukunqachu.

Makilla rikch'ashanamanta

34Cuidakuychis qankuna kikiykichista, paqtataq sonqoykichis rumiyanman viciokunawan, machaywan, kay kawsaypa llakichikuyninwan, chaytaq Diospa Kachamusqan Runaq*f** kutimunay p'unchay qonqaylla hap'isunkichisman seq'ona waskha hina. 35Kay pachantinpi lliw tiyaqkunamanmi hamusaq. 36Chay hinaqa, tuta p'unchay Diosmanta mañakuspa rikch'ashaychis, tukuy chay hamuqkunamanta ayqenaykichispaq, hinaspa Diospa Kachamusqan Runaq*f** qayllaypi rikhurinaykichispaq, nispa.

37Jesusqa Dios yupaychana wasipin p'unchay yachachiq, tutataq Olivos nisqa orqoman rispa qorpachakamuq. 38Llapa runakunataq tutallamanta Dios yupaychana wasiman hamuqku Jesusta uyarinankupaq.

Currently Selected:

LUCAS 21: QC88

Highlight

Copy