LUCAS 5

Challwa hap'iy milagro

(Mt 4.18-22; Mr 1.16-20)

1Genesaret qocha patapi Jesús kashaqtinmi, runakunaqa payman mat'ipakurqanku Diospa siminta uyarinankupaq. 2Jesustaq qocha patapi iskay boteta rikurqan. Challwaqkunan botekunamanta uraykamuspa llikankuta t'aqsasharqanku. 3Jesusmi Simonpa botenman haykuspa valekurqan qocha ukhuman asllata apaykunanpaq. Hinaspan tiyaykuspa botemantapacha runakunata yachachimurqan. 4Rimayta tukuspataq Simonta nirqan: —Aswan qocha ukhuneqman haykuspa llikaykichista wikch'uykuychis challwanapaq, nispa.

5Simontaq payta nirqan: —Yachachikuq, tutantin llank'aspapas manan imallatapas hap'imurqaykuchu, aswanpas nisqaykiman hina llikata wikch'uykusaq, nispa.

6Wikch'uykuspataq askha challwata hap'irqanku, hinan llikankuraq yaqa llik'ikurqan. 7Chaymi huknin botepi kaq challwaq-masinkuta makinkuwan waqyarqanku yanapaq hamunankupaq, hamuqtinkutaq iskaynin boteman hunt'achirqanku yaqa chinkaykunankukama. 8Simón Pedrotaq chayta rikuspa Jesuspa ñawpaqenpi qonqoriykukurqan: —Señorníy, anchhuriy ñoqamanta, huchasapa runan kani, nispa.

9Challwa hap'isqankumantan Simonqa paywan kaqkunapiwan anchatapuni mancharikurqanku. 10Mancharikullarqankutaqmi Simonpa challwaq-masin Zebedeoq churinkuna Jacobowan Juanpiwan. Jesustaq Simonta nirqan: —Ama mancharikuychu, kunanmantaqa runakunatan Diosman pusamunki, nispa.

11Hinan botekunata qocha pataman chayachispanku lliwta saqespa Jesuspa qhepanta ripurqanku.

Aycha qarapi millay onqoyniyoqta Jesuspa qhaliyachisqan

(Mt 8.1-4; Mr 1.40-45)

12Huk llaqtapi Jesús kashaqtinmi, aycha qarapi millay onqoypa tukusqan runa hamurqan, paymi Jesusta rikuspa pampakama k'umuykukuspan rogakurqan: —Señor, munanki chayqa atinkin alliyachiwayta, nispa.

13Chaymi Jesusqa makinta haywarispa llamiykurqan: —Munanin, qhali kapuy, nispa. Rimariqtin hinataq millay onqoyqa chinkapurqan. 14Hinan Jesusqa kamachirqan: —Aman pimanpas willakunkichu, aswanpas rispa sacerdotewan qhawachikamuy, Moisespa kamachikusqanman hina qhaliyasqaykimanta ofrendata haywamuy, chaymi qhaliyasqaykita llapa yachanqaku, nispa.

15Chaywanpas aswantaraqmi Jesusmantaqa uyarikurqan. Askha runakunataq huñukamurqanku Jesusta uyarinankupaq, onqoyninkumanta qhaliyachisqa kanankupaqwan. 16Jesustaq ch'inneqman rispa Diosmanta chaypi mañakurqan.

Such'uta Jesuspa qhaliyachisqan

(Mt 9.1-8; Mr 2.1-2)

17Huk p'unchay Jesús yachachishaqtinmi fariseokunaqa*f** Diospa kamachikuyninta yachachiqkunapiwan tiyasharqanku. Paykunan Galilea provincia huch'uy llaqtakunamanta, Judea hap'iymanta Jerusalén llaqtamantawan hamusqaku. Señor Diospa atiyninwanmi Jesusqa onqosqakunata qhaliyachirqan. 18Hinan wakin runakunaqa such'u runata puñunapi wantumuspanku Jesuspa ñawpaqenman churaykunankupaq apaykuytapuni munarqanku. 19Askha runakuna kasqanrayku mana maynintapas apaykuyta atispa, wasi pataman wicharqanku, hinaspan paykuna chawpiman, Jesuspa ñawpaqen cheqasman puñunantinta warkuykurqanku. 20Jesustaq Diospi iñisqankuta reparasqa such'uta nirqan: —Such'u runa, huchaykikunatan pampachayki, nispa. 21Hinaqtinmi kamachikuy simita yachachiqkunaqa fariseokunapiwan*f** sonqonkupi yuyaykurqanku: ¿Pitaq kayri Diosta pisichaspa riman? ¿Pitaq huchakunata pampachaytari atinman? ¿Manachu Dioslla? nispanku. 22Chay hina yuyaykusqankuta yachaspan Jesusqa paykunata nirqan: —¿Imaraykun chay hinata sonqoykichispi yuyaykunkichis? 23¿Mayqentaq aswan atikuq: Huchaykikunatan pampachayki, niychu, icha: Sayarispa puriy, niytaqchu? 24Ñoqaqa Diospa Kachamusqan Runan*f** kani, chaymi kay pachapi huchakunata pampachanaypaq atiyniyoq kasqayta yachanaykichispaq, kay such'uta nisaq: —Qantan niyki: Hatariy, puñunaykita hoqarispa wasiykita ripuy, nispa. 25Chaymi ñawpaqenkupi sayarispa hina, sirisqan puñunantawan hoqarispa wasinta ripurqan, Diosta hatunchaspan. 26Llapankutaq musphaspanku Diosta hatuncharqanku. Hinaspan ancha mancharisqa nirqanku: —Kunan p'unchaymi mana hayk'aq rikusqanchiskunata rikunchis, nispa.

Leví nisqa Mateota Jesuspa waqyasqan

(Mt 9.9-13; Mr 2.13-17)

27Chaykuna qhepatataq Jesusqa lloqsimuspa Leví sutiyoq contribución cobraqta rikurqan, contribución cobrana wasipi sisata cobrashaqta, hinaspan nirqan: —Qhepayta hamuy, nispa.

28Lliwta saqespataq sayarispa paypa qhepanta ripurqan.

29Hinaspan Leviqa hatun mikhuyta wasinpi haywarqan, askhataq contribución cobraqkunapas hukkunapas paykunawan mikhuq tiyaykurqanku. 30Kamachikuy simita yachachiqkunataq fariseokunapiwan*f** Jesuspa yachachisqankuna contra rimaspa nirqanku: —¿Imaraykun contribución cobraqkunawan huchasapakunapiwan mikhunkichispas ukyankichispas? nispa.

31Chaymi Jesusqa paykunata nirqan: —Qhalikunaqa manan hampiqta necesitankuchu, aswanpas onqosqakunallan necesitanku. 32Manan chanin runakunata waqyaqchu hamurqani, aswanpas huchasapakunata Diosman kutirichinaypaqmi, nispa.

Ayunaymanta tapukuy

(Mt 9.14-17; Mr 2.18-22)

33Hinaqtinmi paykunaqa Jesusta nirqanku: —¿Imaraykun Juanpa yachachisqankunapas fariseokunaq*f** yachachisqankunapas sapa kuti ayunanku mañakunku, yachachisqaykikunataq mana ayunaspa mikhunku ukyanku? nispa.

34Jesustaq paykunata nirqan: —¿Casamientoman invitasqakunataqa, ayunachinkumanchu novio paykunawan kashaqtinqa? Manan. 35Ichaqa chayamunqan p'unchaykuna, noviota aparqoqtinku ayunanqaku, nispa.

36Huk rikch'anachiy simitapas paykunaman nillarqantaqmi: —Manan pipas mosoq p'achata llik'ispaqa mawk'a p'achaman siranmanchu, chay hinata ruwaqtinqa mosoq remiendon llik'inman, mosoq remiendoqa manan allinchu mawk'a p'achapaqqa. 37Manan pipas upi vinotaqa mawk'a odrekunaman hillp'unchu, chay hina kaqtinqa, upi vinon poqospa odrekunata phatachinqa, vinopas hich'akunqan, odrekunapas llik'ikapunqan. 38Aswanmi upi vinotaqa mosoq odrekunaman hillp'unku. 39Pipas poqosqa vinota malliykuspaqa manan upi vinotaqa munanñachu. Payqa ninmi: Poqosqan aswan sumaqqa, nispa.

Currently Selected:

LUCAS 5: QC88

Highlight

Copy