APOSTULKUNA RURAYANQAN RUREYKUNA 2
2
Espiritupa shamiynin Pentekosteschow
1Pentekostes junaq cháramuptinnam, llapankuna keykáyarqan juknowlla purwakashqa. 2I illaqpita shamorqan syelupita juk janrarey byentunow feyupa púkar, juntarerqan teykayanqan wayiman; 3i yuripuyarqan rakikashqa ninapa lláman, rawreykaqnow llapankunapa janankunaman patsakar. 4I llapankuna juntashqa kayarqan Espiritu Santupa, i parlar qalleykuyarqan jukláya parleykunata, Espiritu parleyta qoshqanmannow.
5Jerusalenchownam yachayarqan judyukuna, ankupákoq ollqukuna, key patsachow jinantin markakunapita. 6Key janrarey kariptinna, atskaq eyllukáyarqan; i pantakashqa keykáyarqan, i wiyayarqan kikinkunapa parleyninkunachow parlayaqta. 7I keykáyarqan mantsakashqa i almirashqa, nishpa: —Rikáyey, ¿manaku key llapan parlaqkuna galilewkuna kayan? 8¿Imanowtaq wiyantsik keykunata yurikiy parleynintsikkunachow parlaqta? 9Partukuna, médukuna, elamitakuna i Mesopotamyachow yachanqantsikkuna, Judeyachow, Kapadosyachow, Pontuchow i Asyachow, 10Frigyachow i Panfilyachow, Egiptuchow i Afrika markakunachow, Sirénipa washaninchow, i keychow yachaq románukuna, judyukuna i judyuman tikrashqakuna. 11Kretensikuna i árabikuna, wiyarqontsik parlayaqta parleynintsikkunachow, Dyospa marabillankunata.
12I llapankuna keykáyarqan almirashqa i anawashqa, kikinkunapura ninakur: —¿Ima ninantaq key?
13Wakinkunanam, burlakur, niyarqan: —Machashqam keykáyan.
Pentekosteschow Pedrupa predikeynin
14Tseynam Pedru chunka jukkunawan sharkur, sinchipa parlarqan nishpa: —Ollqu judyukuna i llapan Jerusalenchow yachaqkuna, keyta musyayey, wiyayey parlamonqáta. 15Keykunaqa manam machashqatsu kayan, qamkuna niyanqeykinow, junaqpa kima óranllaran keykan. 16Keyqa profeta Joelpa nishqanmi:
17Dyosmi nin shamoq junaqkunachow,
Espiritútam ramamushaq llapan nunakunaman,
i tsurikikuna i waweykikunam profetisáyanqa;
jobinnikikunam rikáyanqa bisyonkunata,
awkinnikikunam sweñukuyanqa sweñukiykunata;
18tseqeypam taqey junaqkunachow sirweqníkunaman,
Espiritúpitam ramamushaq,
i profetisáyanqam.
19I almirakiykunatam rikátsishaq rara syeluchow,
i señalkunata patsachow,
yawar i nina i pukuteynow qoyeyta;
20intinam tikrarenqa anpiman,
i killanam yawarman,
Señorpa junaqnin manaraq shamuptin,
jatun i rikakiy junaq;
21Señorpa jutin llapan qayakoqkunam,
salbashqa kanqa.
22»Israyel ollqukuna, wiyayey key palabrakunata: Jesús Nasareynu, Dyospa alli nishqan óllqu qamkunachow marabillakunawan, almirakiykunawan señalkuna Dyos qamkunachow rurashqa Peypa, kikikikuna musyayanqeykinow; 23keytam, entregashqa Dyos munanqanmannow i nowpa reqishqannow, tsariyarqeyki i wanutsiyarqeyki jutsasapakunapa makinkunawan, krusifikarnin; 24peytam Dyos sharkatserqan, waniy nanatsikiykunapita kacharishqa, waniy tsareyta mana pwediptin. 25Dabidmi nin peypaq:
Wiñeymi rikarqá Señorta nowpáchow;
derécháchow keykaptin,
manam kuyutsishqatsu kashaq.
26Tseymi shonqú kushirqan,
i qallú kushikorqan,
i eytsápis jamanqam shuyakiychow;
27almáta manam jaqinkitsu Ádischow,
i manam permitinkitsu santíkiy ismunanta.
28Reqitsimarqonki kawey nánikunata;
kushikiywanmi juntatsimanki keykamonqeykiwan.
29»Wawqikuna, pweydiymanmi niyeynikita patryarka Dabidpita, wanurqan i pampashqam karqan, i sepultúran noqantsikwan keykan kanan junaqyaq. 30Profeta keykar, juramentuwan Dyos jurashqanta musyeykar kastanpita, nuna keyninchow, Kristuta pallarirkunmanmi tronunchow tákunampaq, 31uney rikaqnownam, parlarqan Kristupa kawarimiyninpita: Alman manam jaqishqatsu karqan Adischow, ni eytsan ismurqantsu. 32Key Jesustam Dyos kawaritsimorqan, keypitam llapantsikkuna testigu kantsik.
33»Tseymi, pallarishqa Dyospa deréchanwan, Teytapita ánikiy Espiritu Santuta chaskishqa keykar, ramamushqa qamkuna key rikáyanqeykita i wiyayanqeykita. 34Dabid manam witsarqantsu syeluman; peru kikinmi nin:
Señormi nerqan Señorníta: “Tákarami derecháman,
35chikishoqnikikunata chakikikuna jarunanman churamonqáyaq.”
36Musyayey, tseqeypa Israyelpa llapan wayi, key Jesusta qamkuna krusifikayanqeykitam, Dyos rurashqa Señor i Kristu.
37Keyta wiyarnam shonqunkunachow nanatsikurkuyarqan, i niyarqan Pedruta i wakin apostulkunata: —Wawqikuna, ¿imatataq rurayáshaq?
38Pedrunam nerqan peykunata: —Wanakuyey jutseykikunapita, i bawtisakuyey kada únu qamkunapita Jesukristupa jutinchow jutseykikuna perdonashqa kanampaq; i chaskiyankim Espiritu Santupa qareyninta. 39Qamkunapaqmi ánikiy, i tsurikikunapaq i llapan karuchow kaqkunapaq; Señornintsik Dyos llapan qayashqanpaqwanmi.
40I wakin atskaq parleykunawan willakurqan i piñapákurqan, nishpa: —¡Salbashqa kayey key mana alli kastakunapita!
41Tseymi, palabranta chaskeqkuna bawtisashqa kayarqan; i tsey junaq yapakáyarqan kima waranqanow nunakuna. 42Tsarakuyarqan apostulkunapa yachatsikiyninchow, juknowlla keychow, jukninkuna jukninkunawan, tanta rakinakiychow i Dyosman mañakiychow.
Kreyentikunachow kada junaq kawey
43I mantsakiy shamorqan llapan nunaman; i atska marabillakuna i señalkuna rurashqa karqan apostulkunapa. 44Llapan kreyishqakunam keykáyarqan juntulla, i llapan kosasninkunam kayáporqan llapampaq; 45i rantikuyaq chakrankunata i kapoqninkunata, i rakiyaq llapankunata waneyninkunamannow. 46I tsarakur juknowlla kada junaq templuchow, i tantata rakikur wayikunachow, mikuyaq jukllachow kushikiwan i qollmi shonquwan, 47Dyosta alabarnin, llapan pweblupa faborninta chaskir. I Señornam kada junaq miratseq iglesyaman salbashqa kayánanpaq kaqkunata.
Currently Selected:
APOSTULKUNA RURAYANQAN RUREYKUNA 2: QUEAN
Highlight
Share
Copy
Want to have your highlights saved across all your devices? Sign up or sign in
Quechua Ancash New Testament © Peruvian Bible Society, 1992.
