JUAN 12

Jesús ungishqa Betaniachow

1Joqta junaq manaraq paskwa kaptin, Jesús shamorqan Betaniaman, Lásaru keykanqanman, peymi wanushqa karqan, i peytam wanushqakunapita kawaritsimushqa karqan. 2Tseychownam seneyta rurayápurqan; Martam sirwirqan Lásarunam mesachow teykaqkunapita juknin peywan karqan.

3Tseynam Marya juk libra pukutaq nardu puru, allápa chaniyoqta tsarirkur llusherqan Jesuspa chakinkunata i shupitserqan aqtsanwan, wayinam ungwentupa pukuteyninwan juntarerqan. 4Juknin kaq disípulunnam nerqan, Judas Iskaryoti Simonpa tsurin, entreganan kaq:

5—¿Imanirtaq key pukutaqta rantikushqatsu karqon kima pachak denaryuchow i waktsakunata qoshqa kanman karqan?

6Peru keyta nerqan, waktsakunata ankuparnintsu, sinowqa suwa karmi, i qelley runkuta tsarararnin, jorqaq tseyman winayashqanta. 7Tseynam Jesús nerqan: —Dejeyki; sepultúrá junaqpaqmi keyta churarátsishqa. 8Waktsakunataqa imeypis qamkunawanmi katsiyanki, nowqataqa manam katsiyámankinatsu.

9Atskaq judyukunanam musyariyarqan pey tseychow keykashqanta, i shayámorqan, manam Jesús kawsareykurllatsu, sinowqa Lásarutapis rikáyanampaqmi, peyta wanushqakunapita kawaritsimushqata. 10Peru apun saserdotikunam yachatsinakuyarqan Lásarutapis wanutsiyánampaq. 11Peypaqreykurmi rakikákuriyarqan atskaq judyukuna i Jesusman kreyiyarqan.

Jesús yeykun Jerusalenman

12Waránin junaq atskaq nunakuna fyestaman shayámushqa karqan, Jesús Jerusalenman shamoqta wiyarir, 13palmerapa rámankunata tsarirkur yarquyarqan chaskeqnin, i qapariyarqan “¡Hosanna! ¡Benditum Señorpa jutinchow shamoq, Israyelpa Reynin!”

14Jesusnam tarerqan malta ashnuta, i montarqan, qellqashqa keykanqannow: 15Ama mantsakiytsu, Syonpa wawan; Keymi key Reyniki shamun, juk mallwa ashnun montashqa. 16Key kosaskunata manam disípulunkuna kayiyarqantsu qallananchowqa; peru Jesús glorifikashqa kaptinnam, tseyran yarparkuyarqan, key kosaskuna peypaq qellqashqa kanqanta i rurashqanta.

17Peywan keykaq nunakunanam willakuyarqan Lásaruta sepultúrapita, qayarnin wanushqakunapita kawaritsimushqanta. 18Tseypaqreykurmi nunakuna shayámorqan chaskeqnin, key señalta pey rurashqanta wiyarir. 19Farisewkunanam kikinkunapura ninakuyarqan: —Rikáyey ni imata tariyankitsu. Rikáyey llapan nunakunam pey qepanta ewkuyan.

Wakin griegukuna ashiyan Jesusta

20Wakin griegukunam kayarqan fyestaman adoraq witsashqakunachow. 21Keykunanam witiyargan Felipiman, Galileyapa Betsaydapita kaptin, i rowayarqan nishpa: —Teytey, Jesustam rikeyta munayá.

22Felipinam eywar Andresta nerqan; tseynam Andres i Felipe Jesusta niyarqan. 23Jesusnam yaskerqan nirnin: —Óra cháramushqanam Nunapa Tsurin glorifikashqa kanampaq. 24Tseqeypa, tseqeypam niyaq manatsun juk gránu trigu ishkin patsaman i wanun japallanmi keydan; peru sitsun wanun, atska wayítam apan. 25Kaweyninta kuyaqqa, oqranqam; i kaweyninta key patsachow chikeqqa, wiñey kaweypaqmi churanqa. 26Meyqampis sirwimaqqa, qatiyamey; meychowmi noqa kashaq, tseychowmi sirwimaqnipis kanqa. Meyqampis sirwimaqnitaqa, Teytámi onranqa.

Nunapa Tsurin pallarishqam kanqa

27»Kananqa almá turbádum keykan. ¿Imaraq nishaq: ¿Teyta, key órapita salbekamey?” ¡Keypaqmi chámorqó key óraman! 28Teyta, jutikita glorifikey.

Tseynam juk bos shamorqan syelupita: “¡Glorifikarqónam i yapeymi glorifikáshaq!”

29Tseychow atskaq keykaqkunanam, wiyayarqan bosta i niyarqan, rayum kashqa. Wakinkunanam niyarqan: —Juk angelmi parlapashqa.

30Yaskirnam Jesús nerqan: —Key bosqa shamushqa manam noqapaqreykurtsu, sinowqa qamkunapaqreykurmi. 31Kananmi key mundupaq fisyun; kananmi key mundupa apunnin qarqushqa kanqa. 32I noqa patsapita sharkatsishqa karqa, noqamanmi apamushaq llapanta.

33Keytam nerqan imanow wanunampaq kanqanta kayitsikurnin. 34Nunakunanam yaskiyarqan: —Noqakunaqa leypitam wiyayarqó, Kristuqa wiñeypaq kananta. “¿Imanirtaq, qamqa ninki wananmi Nunapa Tsurin sharkatsishqam kanan”? ¿Pitaq key Nunapa Tsurin?

35Tseynam Jesús nerqan: —Ichikllanam karenqa qamkunawan aktsi; puriyey aktsikikuna kanqanyaq, ampikuna manaraq illaqpita tsariyashuptiki, ampichow pureqqa, manam musyantsu meyta eywanqanta. 36Aktsikikuna kayápushunqeykiyaq, kreyiyey aktsiman, aktsipa tsurin kayaneykipaq.

Key kosaskunatam Jesús parlarqan, i eywakur ratakiykorqan peykunapita.

Jesús tinkutsin mana kreyikiyta

37Peru tseytsika señalkunata peykunapa nowpankunachow rureykaptinpis, manam kreyiyarqantsu peyman. 38Profeta Isaias parlashqan kumplikánampaq, nenqannow: Señor, ¿pitaq kreyishqa willakiynintsikta? ¿Pimantaq rikátsikushqa Señorpa rikran? 39Keynowpam kreyita pwediyarqantsu, Isaiaspis nishqam karqan: 40Peykunapa nawinkunatam wiskuyatsishqa, shonqunkunata chukruyatsishqa nawinkunawan mana rikáyanampaq i shonqunkunawan kayiyananpaq, kombertikuyaptin, noqa kachakátsinápaq. 41Isaias keyta nerqan gloryanta rikeykur, i peypaq parlarqan.

42Key llapanwan, mandakoqkunapis, atskaqmi kreyiyarqan peyman, peru farisewkunareykurmi willakuyarqantsu, eyllukana wayipita mana qarqushqa kayánanpaq. 43Nunakunapa sumeynintam mas kuyayarqan, Dyospa gloryampita.

44Jesusmi qaparipa nerqan: “Noqaman kreyeqqa, manam noqamantsu kreyin, sinowqa kachamaqniymanmi; 45noqata rikámaqníqa, kachamaqnítam rikan. 46Noqa, aktsi, munduman shamorqó, noqaman llapan kreyeqkunaqa ampichow mana kayánanpaq. 47Palabrákuna wiyaqta i mana wardaqtaqa noqa manam jusgátsu; manam shamushqa ká mundu jusgaqtsu, sinowqa mundu salbaqmi. 48Rechasamaqniytaqa, palabrákunata mana chaskeqtaqa, jusgaqnin kanmi; noqa parlakonqámi jusganqa shamoq junaqchow. 49Noqa manam parlarqó kikiyllapitatsu; kachamaqní Teytámi, peymi qomarqon key mandamyentuta noqa ninápaq i parlanápaq kaqta. 50I noqa musyámi mandamyentun wiñey kaweypa kashqanta. Tseymi noqaqa parlá Teyta nimashqanta.”

Currently Selected:

JUAN 12: QUEAN

Highlight

Copy