JUAN 20

Jesuspa kawarimiynin

1Semanapa qallanan junaq, Marya Magdalena qoya ampillaraq keykaptin eywarqan sepultúraman i rikárerqan sepultúra tsaparaq rumi jorqarishqatana. 2Tseynam, eyqipa eywarqan Simon Pedruman, i juknin kaq disípulu Jesús kuyashqanman i nerqan: —Señortam apakuyashqa sepultúrapeq, i manam musyayatsu meymanraq churayashqa.

3Pedrunam jukninkaq disípuluwan yarqurir, eywayarqan sepultúraman. 4Ishkanmi eyqiyarqan; peru juknin kaq disípulun eyqirqan Pedrupita mas, i chárerqan puntata sepultúraman. 5I yarpurirna, rikárerqan sabanaskuna tseychow churareykaqta, peru manam yeykorqantsu.

6Qepantanam chárerqan Simon Pedru, i yeykurerqan sepultúraman, rikárerqan sabanaskuna churarpeykaqta tseychow, 7i Jesuspa peqanchow kaq sudaryutapis sabanaskunawan, mana churareykaqta sinowqa juk láduchow jaqpi wankushqata. 8Tseynam yeykorqan juknin disípulu, sepultúraman puntata shamoqkaq; i rikárir, kreyerqan. 9Manam kayiyarqanraqtsu Eskritúrata, wanushqakunapita pey kawarimunampaq kanqanta. 10I disípulukunanam kutikuyarqan wayinkunaman.

Jesús yuripun Marya Magdalenata

11Maryanam waqeykarqan sepultúra nowpanchow; waqeykarnam puktirkur qaweykorqan sepultúra rurinman; 12rikarqan ishkey angelkunata luyaq bestidushqa teykayaqta jawnanchow jukta i chakinkuna kanqanchow jukninta, Jesuspa kwerpun churarashqa kanqanchow. 13I niyarqan: —Warmi, ¿imanirtaq waqanki?

Yaskerqannam: —Señorníta apakuyashqa kaptinmi i manam musyatsu meyman churayashqanta.

14Keyta nirirnam, tumarerqan, i rikeykorqan Jesús tseychow keykaqta, peru manam musyarqantsu Jesús kanqanta.

15Jesusnam nerqan: —Warmi, ¿imatataq waqanki? ¿Pitataq ashinki?

Peynam, werta uryaqkanqanta yarpar, nerqan: —Teytey, qam apashqa karqa willeykamey meyman churashqeykita, i noqam apakushaq.

16Jesusnam nerqan: —¡Marya!

Peynam tumeykur, nerqan: —¡Raboni! (Keymi ninan, Mayestru).

17Jesusnam nerqan: —Ama yatameytsu, manaran Teytáman witsáraqtsu; eywey wawqíkunaman, i willey: “Teytámanmi witsá i Teyteykikunamanmi, Dyosníman i Dyosnikikunaman.”

18Tseynam Marya Magdalena eywarqan disípulunkunaman willakoq Señor rikashqanta, i pey keykuna nishqanta.

Jesús yuripun disípulunkunata

19Tsey junaq ampiriptinnam, semanapa qallanan, punkukuna wichqashqa keykaptin disípulunkuna eyllukashqa keykayanqanman judyukunata mantsarnin, Jesús shamorqan, i chowpinkunaman sheykur, nerqan: “¡Yamey key qamkunawan katsun!” 20Keyta nirirnam, rikátserqan makinkunata i qasqunta. Disípulunkunanam kushikuyarqan Señorta rikárir. 21Tseynam Jesús yapey nerqan: “¡Yamey key qamkunapaq katsun! Imanowmi Teyta kachamarqon, tseynowmi noqapis kachayaq.”

22Keyta nirirnam, púkarir nerqan: “Chaskiyey Espiritu Santuta. 23Pipa jutsankunatapis perdonayankitsun, perdonashqam kanqa; i pikunapatam tsarayanki jutsankunata, manam perdonashqatsu kanqa.”

Jesús káyitsin Tomasta

24Tomás, Dídimo nishqan, chunka ishkeypita jukninkaq, peykunawantsu karqan Jesús shamuptin. 25Wakinkaq, disípulukunanam, niyarqan: —¡Señortam rikáyarqó!

Peynam nerqan: —Manatsun rikáshaq makinkunachow klabu uchkushqanta, i dédúta yakáman klabu uchkushqanman i makiyta qasqunman yakashaq, manam kreyishaqtsu.

26Tseypita puwaq junaqtanam yapey keykáyarqan disípulunkuna rurichow, i peykunawan Tomaspis. Jesús chárerqan, punkukuna wichqashqa keykaptin i chowpinkunaman churakárirnin nerqan: —¡Yamey key qamkunachow katsun!

27Tseynam Tomasta nerqan: —Dédikiyta keyman churey i rikey makiykunata; i makikiyta wititsimi i yakey qasqúman, i ama mana kreyikoq keytsu, sinowqa kreyikoq.

28Tseynam Tomás, yaskir nerqan: —¡Señorllá i Dyosllá!

29Jesusnam nerqan: —Tomás, rikámarníraqku kreyinki ¡kushikiyoqmi kayan mana rikashpa kreyeqkuna!

Key librupa imapaq keynin

30Jesús keykunapita mas atska señalkunatam rurarqan disípulunkunapa nowpanchow, tseykuna manam qellqashqatsu key libruchow. 31Peru keykunaqa qellqashqa Jesús Kristu Dyospa Tsurin kashqanta kreyiyaneykipaqmi, i jutinchow kreyirnin wiñey kawéyoq kayáneykipaq.

Currently Selected:

JUAN 20: QUEAN

Highlight

Copy